3-ﺑﯚﻟﯜﻡ

9. ﺳﻮﺋﺎﻝ: ﻳﯘﺭﺗﺘﯩﻜﻰ ﺋﻮﺗﺘﯘﺭﺍ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻐﺎ ﻳﻪﺭﻟﯩﻚ ﻣﺎﺋﺎﺭﯨﭙﻨﯩﯔ ﻳﯧﺘﻪﺭﺳﯩﺰ ﺗﻪﺭﻩﭘﻠﯩﺮﯨﻨﻰ ﺋﯚﺯﻟﯩﺮﯨﮕﻪ ﺗﻮﺳﺎﻟﻐﯘ ﺑﯩﻠﯩﭗ، ﺋﯚﮔﯩﻨﯩﺸﺘﻪ ﺑﻮﺷﯩﺸﯩﺸﻨﯩﯔ ﺳﻪﯞﻩﺑﻰ ﻗﯩﻠﯩﯟﺍﻟﻤﺎﺳﻠﯩﻘﻰ ﺗﻮﻏﺮﯨﺴﯩﺪﺍ ﻳﯘﻗﯩﺮﯨﻘﻰ ﺑﺎﻳﺎﻧﻠﯩﺮﯨﯖﯩﺰﺩﯨﻦ ﺑﺎﺷﻘﺎ ﻗﯩﺴﺘﯘﺭﻣﯩﯖﯩﺰ ﺑﺎﺭﻣﯘ؟

ﺟﺎﯞﺍﺏ: ﻳﯘﺭﺗﯩﻤﯩﺰﺩﺍ ﺑﯩﺮ ﺟﺎﻳﺪﯨﻜﻰ ﻣﻪﻛﺘﻪﭖ ﺑﯩﻠﻪﻥ ﻳﻪﻧﻪ ﺑﯩﺮ ﺟﺎﻳﺪﯨﻜﻰ ﻣﻪﻛﺘﻪﭘﻨﯩﯔ ﺋﻮﺗﺘﯘﺭﯨﺴﯩﺪﺍ ﻫﻪﻗﯩﻘﻪﺗﻪﻧﻤﯘ ﭘﻪﺭﻕ ﺑﺎﺭ. ﺋﯜﺭﯛﻣﭽﯩﺪﯨﻜﻰ ﻣﻪﻛﺘﻪﭘﻠﻪﺭ ﺑﯩﻠﻪﻥ ﻫﻪﺭ ﻗﺎﻳﺴﻰ ﯞﯨﻼﻳﻪﺗﻠﻪﺭﺩﯨﻜﻰ ﻣﻪﻛﺘﻪﭘﻠﻪﺭﻧﯩﯔ ﺳﻪﯞﯨﻴﯩﺴﻰ ﺋﻮﺧﺸﯩﻤﺎﻳﺪﯗ. ﺑﯩﺮ ﺷﻪﻫﻪﺭﻧﯩﯔ ﺋﯩﭽﯩﺪﯨﻜﻰ ﺑﯩﺮ ﻗﺎﻧﭽﻪ ﻣﻪﻛﺘﻪﭘﻠﻪﺭ ﺋﻮﺗﺘﯘﺭﯨﺴﯩﺪﯨﻤﯘ ﭘﻪﺭﻕ ﺑﻮﻟﯩﺪﯗ. ﻛﯚﭖ ﺳﺎﻧﺪﯨﻜﻰ ﻳﺎﺵ ﺋﯚﺳﻤﯜﺭﻟﻪﺭ ﺋﻮﻗﯘﺗﯘﺵ ﺋﻪﻫﯟﺍﻟﻰ ﻳﺎﺧﺸﯩﺮﺍﻕ ﻣﻪﻛﺘﻪﭘﻜﻪ ﻛﯩﺮﯨﭗ ﺋﻮﻗﯘﺷﻨﻰ ﺋﺎﺭﺯﯗ ﻗﯩﻠﯩﺪﯗ. ﺑﯘ ﺑﯩﺮ ﻧﻮﺭﻣﺎﻝ ﺋﻪﻫﯟﺍﻝ. ﻟﯧﻜﯩﻦ، ﺳﯩﺰ ﺋﯚﺯ ﻣﻪﻛﺘﯩﭙﯩﯖﯩﺰﻧﯩﯔ ﺳﻪﯞﯨﻴﯩﺴﯩﻨﯩﯔ ﺑﺎﺷﻘﺎ ﻣﻪﻛﺘﻪﭘﻠﻪﺭﺩﯨﻦ ﺳﻪﻝ ﺗﯚﯞﻩﻧﻠﯩﻜﻰ ﺗﯜﭘﻪﻳﻠﯩﺪﯨﻦ ﻳﺎﺧﺸﻰ ﺋﻮﻗﯘﻣﯩﺴﯩﯖﯩﺰ، ﺋﯩﻨﺘﺎﻳﯩﻦ ﭼﻮﯓ ﺯﯨﻴﺎﻥ ﺗﺎﺭﺗﯩﺴﯩﺰ. ﺟﯘﯕﮕﻮ ﻣﺎﺋﺎﺭﯨﭙﯩﻨﯩﯔ ﺑﯩﺮ ﭘﺎﻳﺪﯨﻠﯩﻖ ﺗﻪﺭﯨﭙﻰ ﻳﺎﻛﻰ ﺑﯩﺮ ﺋﺎﻻﻫﯩﺪﯨﻠﯩﻜﻰ ﺷﯘﻛﻰ، ﺟﯘﯕﮕﻮﺩﺍ ﺩﻩﺭﺳﻠﯩﻚ ﻛﯩﺘﺎﺑﻼﺭ ﺑﯩﺮ ﺗﯘﺗﺎﺵ ﺗﻪﻳﻴﺎﺭﻟﯩﻨﯩﺪﯗ. ﺷﯘﯕﺎ ﺳﯩﺰ ﻳﯘﺭﺗﯩﻤﯩﺰﻧﯩﯔ ﻗﻪﻳﯧﺮﯨﺪﻩ ﻳﺎﺷﺎﯞﺍﺗﻘﺎﻧﻠﯩﻐﯩﯖﯩﺰﺩﯨﻦ ﻗﻪﺗﺌﯩﻴﻨﻪﺯﻩﺭ، ﺳﯩﺰﮔﻪ ﺋﯚﺗﯜﻟﯩﯟﺍﺗﻘﺎﻥ ﺩﻩﺭﺳﻠﯩﻚ ﻛﯩﺘﺎﺑﻼﺭ ﺳﯩﺰ ﺗﯘﺭﯗﯞﺍﺗﻘﺎﻥ ﺟﺎﻳﺪﯨﻜﻰ ﺑﺎﺷﻘﺎ ﻣﻪﻛﺘﻪﭖ ﯞﻩ ﺑﺎﺷﻘﺎ ﺟﺎﻳﻼﺭﺩﯨﻜﻰ ﻣﻪﻛﺘﻪﭘﻠﻪﺭﻧﯩﯖﻜﻰ ﺑﯩﻠﻪﻥ ﺋﻮﭖ-ﺋﻮﺧﺸﺎﺵ. ﺩﻩﺭﺳﺨﺎﻧﺎ ﯞﻩ ﺋﻮﻗﯘﺗﻘﯘﭼﻰ ﺳﯩﺰﻧﯩﯔ ﺋﯚﮔﯩﻨﯩﺸﯩﯖﯩﺰﺩﯨﻜﻰ ﺑﯩﺮ ﯞﺍﺳﯩﺘﯩﺪﯨﻦ ﺋﯩﺒﺎﺭﻩﺕ ﺑﻮﻟﯘﭖ، ﺳﯩﺰﻧﯩﯔ ﺋﯚﮔﯩﻨﯩﺸﯩﯖﯩﺰ ﺳﯜﭘﯩﺘﯩﻨﯩﯔ ﻳﯘﻗﯩﺮﻯ-ﺗﯚﯞﻩﻥ ﺑﻮﻟﯘﺷﻰ ﺋﺎﺳﺎﺳﯩﻲ ﺟﻪﻫﻪﺗﺘﯩﻦ ﺋﯚﺯﯨﯖﯩﺰﮔﻪ ﺑﺎﻏﻠﯩﻖ. ﻣﻪﻛﺘﻪﭖ ﯞﻩ ﺋﻮﻗﯘﺗﻘﯘﭼﻰ ﺗﺎﺷﻘﻰ ﺋﺎﻣﯩﻞ، ﺳﯩﺰ ﺑﻮﻟﺴﯩﯖﯩﺰ ﺋﯩﭽﻜﻰ ﺋﺎﻣﯩﻞ. ﺑﯩﺮ ﺋﻮﻗﯘﻏﯘﭼﯩﻨﯩﯔ ﯞﯨﻼﻳﻪﺗﻠﯩﻚ ﻣﻪﻛﺘﻪﭘﺘﻪ ﺗﯘﺭﯗﭖ، ﺋﯜﺭﯛﻣﭽﻰ ﺗﻪﺟﺮﯨﺒﻪ ﺋﻮﺗﺘﯘﺭﺍ ﻣﻪﻛﺘﯩﭙﯩﺪﯨﻜﻰ ﺑﯩﺮ ﻗﯩﺴﯩﻢ ﺋﻮﻗﯘﻏﯘﭼﯩﻼﺭﺩﯨﻦ ﻳﺎﺧﺸﯩﺮﺍﻕ ﺋﻮﻗﯘﻳﺎﻟﯩﺸﻰ ﭘﯜﺗﯜﻧﻠﻪﻱ ﻣﯘﻣﻜﯩﻦ. ﺳﯩﺰ ﻣﻪﻟﯘﻡ ﺑﯩﺮ ﻳﯩﺰﯨﺪﺍ ﺗﯘﺭﯗﭖ، ﯞﯨﻼﻳﻪﺕ ﻣﻪﺭﻛﯩﺰﯨﺪﯨﻜﻰ ﺑﯩﺮ ﻗﯩﺴﯩﻢ ﺋﻮﻗﯘﻏﯘﭼﯩﻼﺭﺩﯨﻦ ﻳﺎﺧﺸﯩﺮﺍﻕ ﺋﻮﻗﯘﻳﺎﻟﯩﺸﯩﯖﯩﺰﻣﯘ ﭘﯜﺗﯜﻧﻠﻪﻱ ﻣﯘﻣﻜﯩﻦ. ﺑﯘ ﺋﯩﺸﻨﯩﯔ ﺋﺎﺧﯩﺮﻗﻰ ﻧﻪﺗﯩﺠﯩﺴﯩﻨﯩﯔ ﻗﺎﻧﺪﺍﻕ ﺑﻮﻟﯘﺷﻰ، ﭘﯜﺗﯜﻧﻠﻪﻱ ﺋﯚﺯﯨﯖﯩﺰﻧﯩﯔ ﺗﯩﺮﯨﺸﭽﺎﻧﻠﯩﻘﯩﻐﺎ ﺑﺎﻏﻠﯩﻖ.

ﻣﻪﻛﺘﻪﭖ ﺳﻪﯞﯨﻴﯩﺴﯩﻨﯩﯔ ﻳﯘﻗﯩﺮﻯ-ﺗﯚﯞﻩﻧﻠﯩﻜﯩﺪﯨﻦ ﺑﺎﺷﻘﺎ، ﺑﯩﺮ ﺋﻮﻗﯘﻏﯘﭼﯩﻨﯩﯔ ﺋﻮﺗﺘﯘﺭﺍ ﻣﻪﻛﺘﻪﭘﺘﯩﻜﻰ ﻧﻪﺗﯩﺠﯩﺴﯩﻨﯩﯔ ﻗﺎﻧﺪﺍﻕ ﺑﻮﻟﯘﺷﻰ، ﻳﻪﻧﻪ ﻣﯘﻧﺪﺍﻕ ﺑﯩﺮ ﻗﺎﻧﭽﻪ ﺋﺎﻣﯩﻠﻐﺎ ﺑﺎﻏﻠﯩﻖ:

 ﺋﺎﺗﺎ-ﺋﺎﻧﯩﻨﯩﯔ ﺋﯚﺯ ﺑﺎﻟﯩﺴﯩﻨﯩﯔ ﺋﻮﻗﯘﺷﯩﻐﺎ ﺗﯘﺗﻘﺎﻥ ﭘﻮﺯﯨﺘﺴﯩﻴﯩﺴﻰ.

 ﺩﻭﺳﺖ ﯞﻩ ﺳﺎﯞﺍﻗﺪﺍﺷﻠﯩﺮﯨﻨﯩﯔ ﺗﻪﺳﯩﺮﻯ.

 ﻫﻪﻣﺪﻩ ﺷﯘ ﭼﺎﻏﺪﯨﻜﻰ ﺳﯩﻴﺎﺳﯩﻲ ﯞﻩ ﺋﯩﺠﺘﯩﻤﺎﺋﯩﻲ ﯞﻩﺯﯨﻴﻪﺕ.

ﺗﯚﯞﻩﻧﺪﻩ ﻣﻪﻥ ﺑﯘ ﻣﻪﺳﯩﻠﯩﻠﻪﺭ ﺋﯜﺳﺘﯩﺪﻩ ﻗﯩﺴﻘﯩﭽﻪ ﺗﻮﺧﺘﯩﻠﯩﻤﻪﻥ:

ﻣﻪﻥ ﺗﯜﻧﯜﮔﯜﻥ (2005-ﻳﯩﻠﻰ 27-ﻓﯧﯟﺭﺍﻝ، ﻳﻪﻛﺸﻪﻧﺒﻪ) ﺗﯧﻠﯧﯟﯨﺰﻭﺭﺩﺍ ﺋﺎﻣﯧﺮﯨﻜﺎ ﻛﯩﻨﻮ ﺋﺎﻛﺎﺩﯦﻤﯩﻴﯩﺴﯩﻨﯩﯔ ﺋﻮﺳﻜﺎﺭ ﻣﯘﻛﺎﭘﯩﺘﯩﻨﻰ ﺗﺎﺭﻗﯩﺘﯩﺶ ﻣﯘﺭﺍﺳﯩﻤﯩﻨﯩﯔ ﺋﻪﻣﻪﻟﯩﻲ ﺋﻪﻫﯟﺍﻟﯩﻨﻰ ﻛﯚﺭﺩﯛﻡ. ﺋﺎﻳﺎﻝ ﺑﺎﺵ ﺭﻭﻟﭽﻰ ﺗﯜﺭﯨﺪﻩ ﺋﻮﺳﻜﺎﺭ ﻣﯘﻛﺎﭘﯩﺘﯩﻨﻰ ﺋﺎﻟﻐﺎﻥ ﻗﯩﺰﭼﺎﻗﻨﯩﯔ ﺋﯩﺴﻤﻰ ﻫﯩﻼﺭﻱ ﺳﯟﺍﻧﻚ ﺑﻮﻟﯘﭖ، ﻣﯘﻛﺎﭘﺎﺗﻨﻰ ﺗﺎﭘﺸﯘﺭﯗﭖ ﺋﯧﻠﯩﺶ ﻧﯘﺗﻘﯩﻨﻰ ﺳﯚﺯﻟﯩﮕﻪﻧﺪﻩ، ﺋﯘ ﻣﯘﻧﺪﺍﻕ ﺩﯨﺪﻯ: "ﻣﻪﻥ ﺑﯘ ﻣﯘﻛﺎﭘﺎﺗﻘﺎ ﻻﻳﯩﻖ ﺑﻮﻟﯘﺵ ﺋﯜﭼﯜﻥ ﺑﯘ ﺋﯚﻣﺮﯛﻣﺪﻩ ﻧﯧﻤﻪ ﺋﯩﺶ ﻗﯩﻠﻐﯩﻨﯩﻤﻨﻰ ﺑﯩﻠﻤﻪﻳﻤﻪﻥ. ﻣﻪﻥ ﺑﯩﺮ ﯞﺍﮔﻮﻥ ﺋﯚﻱﺩﻩ (ﻳﻪﻧﻰ، ﺑﯩﺮ ﻣﺎﺷﯩﻨﯩﻐﺎ ﺳﯚﺭﯨﺘﯩﭗ ﺑﯩﺮ ﻳﻪﺭﺩﯨﻦ ﻳﻪﻧﻪ ﺑﯩﺮ ﻳﻪﺭﮔﻪ ﻳﯚﺗﻜﯩﮕﯩﻠﻰ ﺑﻮﻟﯩﺪﯨﻐﺎﻥ ﺋﯚﻳﻨﻰ ﺩﯦﻤﻪﻛﭽﻰ ﺑﻮﻟﯘﭖ، ﺋﯩﻨﮕﻠﯩﺰﭼﯩﺪﻩ "trailer home" ﺩﻩﭖ ﺋﺎﺗﯩﻠﯩﺪﯗ. ﺋﺎﻣﯧﺮﯨﻜﯩﺪﯨﻜﻰ ﺋﻪﯓ ﻛﻪﻣﺒﻪﻏﻪﻝ ﻛﯩﺸﯩﻠﻪﺭ ﺋﻪﻧﻪ ﺷﯘﻧﺪﺍﻕ ﺋﯚﻳﺪﻩ ﻳﺎﺷﺎﻳﺪﯗ) ﺑﯩﺮ ﻏﺎﻳﻪ ﺑﯩﻠﻪﻥ ﭼﻮﯓ ﺑﻮﻟﻐﺎﻥ ﺑﯩﺮ ﺋﺎﺩﻩﺗﺘﯩﻜﻰ ﻗﯩﺰ. ﻛﯩﭽﯩﻜﯩﻤﺪﻩ ﻫﺎﺯﯨﺮﻗﯩﺪﻩﻙ ﺑﯩﺮ ﻛﯩﻨﻮ ﭼﻮﻟﭙﯩﻨﻰ ﺑﻮﻟﯘﺵ ﺋﯘﺧﻼﭖ ﭼﯜﺷﯜﻣﮕﯩﻤﯘ ﻛﯩﺮﻣﻪﻳﺘﺘﻰ. ﻣﻪﻥ ﺋﻪﯓ ﺋﺎﻟﺪﯨﺪﺍ ﺋﺎﺗﺎ-ﺋﺎﻧﺎﻣﻐﺎ ﺭﻩﻫﻤﻪﺕ ﺋﯧﻴﺘﯩﻤﻪﻥ. ﺋﻪﮔﻪﺭ ﺋﯘﻻﺭﻧﯩﯔ ﻣﺎﯕﺎ ﺑﻮﻟﻐﺎﻥ ﺋﯩﺸﻪﻧﭽﻰ ﯞﻩ ﻣﺎﯕﺎ ﻗﯩﻠﻐﺎﻥ ﺋﯩﺰﭼﯩﻞ ﻳﺎﺭﺩﯨﻤﻰ ﺑﻮﻟﻤﯩﻐﺎﻥ ﺑﻮﻟﺴﺎ، ﻣﯧﻨﯩﯔ ﺑﯜﮔﯜﻥ ﺑﯘ ﺳﻪﻫﻨﯩﮕﻪ ﭼﯩﻘﺎﻟﯩﺸﯩﻢ ﻣﯘﻣﻜﯩﻦ ﺋﻪﻣﻪﺱ ﺋﯩﺪﻯ." ﺋﻪﺭ ﺑﺎﺵ ﺭﻭﻟﭽﻰ ﺗﯜﺭﻯ ﺑﻮﻳﯩﭽﻪ ﺋﻮﺳﻜﺎﺭ ﻣﯘﻛﺎﭘﯩﺘﯩﻨﻰ ﺋﺎﻟﻐﺎﻥ ﺑﯩﺮ Jamie Foxx ﺋﯩﺴﯩﻤﻠﯩﻚ ﻗﺎﺭﺍ ﺗﻪﻧﻠﯩﻚ ﺑﻮﻟﯘﭖ، ﺋﯘ ﻧﯘﺗﻘﯩﺪﺍ ﻣﯘﻧﺪﺍﻕ ﺩﯦﺪﻯ: "ﺑﯘ ﻣﯘﻛﺎﭘﺎﺕ ﻣﯧﻨﯩﯔ ﭼﻮﯓ ﺋﺎﻧﺎﻣﻐﺎ ﻣﻪﻧﺴﯘﭖ. ﻣﻪﻥ ﻛﯩﭽﯩﻜﯩﻤﺪﻩ ﺋﯚﺭﻩ ﺗﯘﺭﻏﺎﻧﺪﺍ ﺋﻮﺑﺪﺍﻥ ﺗﯘﺭﺍﻟﻤﯩﺴﺎﻡ ﯞﻩ ﻳﻮﻝ ﻣﺎﯕﻐﺎﻧﺪﺍ ﺋﻮﺑﺪﺍﻥ ﻣﺎﯕﺎﻟﻤﯩﺴﺎﻡ، ﭼﻮﯓ ﺋﺎﭘﺎﻡ ﻗﻮﻟﯩﺪﯨﻦ ﺋﯩﺶ ﻛﯧﻠﯩﺪﯨﻐﺎﻥ ﺋﺎﺩﻩﻣﺪﻩﻙ ﺗﯘﺭ! ﻗﻮﻟﯩﺪﯨﻦ ﺋﯩﺶ ﻛﯧﻠﯩﺪﯨﻐﺎﻥ ﺋﺎﺩﻩﻣﺪﻩﻙ ﻣﺎﯓ! ﺩﻩﭖ ﺋﯘﺭﺍﺗﺘﻰ. ﻣﻪﻥ ﺑﯜﮔﯜﻥ ﭼﻮﯓ ﺋﺎﻧﺎﻣﻨﯩﯔ ﺷﯘ ﺗﻪﻧﺒﯩﻬﻠﯩﺮﯨﮕﻪ ﺭﻩﻫﻤﻪﺕ ﺋﯧﻴﺘﯩﻤﻪﻥ. ﭼﻮﯓ ﺋﺎﻧﺎﻡ ﺑﯜﮔﯜﻧﻜﻰ ﺑﯘ ﺋﯩﺸﻼﺭﻧﻰ ﻛﯚﺭﻩﻟﻤﻪﻳﺪﯗ. ﺑﯩﺮﺍﻕ، ﻣﻪﻥ ﺋﯘﻧﯩﯔ ﺑﯩﻠﻪﻥ ﭼﯜﺷﯜﻣﺪﻩ ﺩﺍﯞﺍﻣﻠﯩﻖ ﻛﯚﺭﯛﺷﯜﭖ ﺗﯘﺭﯨﻤﻪﻥ. ﻣﻪﻥ ﻫﺎﺯﯨﺮ ﺋﯚﻳﮕﻪ ﻗﺎﻳﺘﯩﭗ ﻛﯧﺘﯩﭗ ﺋﯘﺧﻼﺷﻘﺎ ﺋﺎﻟﺪﯨﺮﺍﯞﺍﺗﯩﻤﻪﻥ. ﻣﯧﻨﯩﯔ ﺑﯜﮔﯜﻥ ﭼﻮﯓ ﺋﺎﻧﺎﻡ ﺑﯩﻠﻪﻥ ﺳﯚﺯﻟﯩﺸﯩﺪﯨﻐﺎﻥ ﻧﯘﺭﻏﯘﻥ ﮔﯧﭙﯩﻢ ﺑﺎﺭ." ﺋﯘ ﻛﯩﺸﻰ ﺋﺎﺭﯨﻠﯩﻘﺘﺎ ﻛﯚﺯ ﻳﺎﺷﻠﯩﺮﯨﻨﻰ ﺗﯚﻛﯜﭖ، ﺳﯚﺯﯨﻨﻰ ﺩﺍﯞﺍﻣﻼﺷﺘﯘﺭﺍﻟﻤﯩﻐﯩﻠﻰ ﺗﺎﺳﻼ ﻗﺎﻟﺪﻯ. ﻳﯘﻗﯩﺮﯨﻘﻰ ﻧﯘﺗﯘﻗﻼﺭﺩﯨﻦ ﭼﯩﻘﯩﭗ ﺗﯘﺭﻏﯩﻨﯩﺪﻩﻙ، ﺑﯘ ﺋﯩﻜﻜﻪﻳﻠﻪﻧﻨﯩﯔ ﺋﺎﺷﯘﻧﺪﺍﻕ ﻣﯘﯞﻩﭘﭙﻪﻗﯩﻴﻪﺗﻜﻪ ﺋﯧﺮﯨﺸﻪﻟﯩﺸﯩﺪﻩ، ﺋﯘﻻﺭﻧﯩﯔ ﺋﺎﺗﺎ-ﺋﺎﻧﯩﺴﻰ ﻧﺎﻫﺎﻳﯩﺘﻰ ﭼﻮﯓ ﺭﻭﻝ ﺋﻮﻳﻨﯩﻐﺎﻥ.  ﺷﯘﻧﺪﺍﻕ. ﺑﻪﺯﯨﻠﻪﺭ ﺋﺎﺗﺎ-ﺋﺎﻧﺎ ﺟﻪﻫﻪﺗﺘﻪ ﺗﻪﻟﻪﻳﻠﯩﻚ. ﺋﯘﻻﺭ ﺋﯚﺯ ﭘﻪﺭﺯﻩﻧﺘﯩﻨﯩﯔ ﺳﺎﻏﻼﻡ، ﻛﺎﺭﻏﺎ ﻛﯧﻠﯩﺪﯨﻐﺎﻥ ﺑﻮﻟﯘﭖ ﭼﻮﯓ ﺑﻮﻟﯘﺷﯩﻐﺎ ﭼﻮﯕﻘﯘﺭ ﻛﯚﯕﯜﻝ ﺑﯚﻟﯩﺪﯨﻐﺎﻥ، ﺋﯩﺰﭼﯩﻞ ﺗﯜﺭﺩﻩ ﺋﯚﺯ ﭘﻪﺭﺯﻩﻧﺘﻠﯩﺮﯨﮕﻪ ﻳﺎﺧﺸﻰ ﺷﻪﺭﺕ-ﺷﺎﺭﺍﺋﯩﺖ ﻳﺎﺭﯨﺘﯩﭗ ﺑﯧﺮﯨﺪﯨﻐﺎﻥ ﻫﻪﻣﺪﻩ ﺑﺎﺷﺘﯩﻦ ﺋﺎﺧﯩﺮ ﺑﺎﻟﯩﻠﯩﺮﯨﻐﺎ ﻣﻪﺳﺌﯘﻝ ﺑﻮﻟﯩﺪﯨﻐﺎﻥ ﺑﯩﺮ ﻳﺎﺧﺸﻰ ﺋﺎﺗﺎ-ﺋﺎﻧﯩﻨﯩﯔ ﺋﯚﻳﯩﺪﻩ ﺗﯘﻏﯘﻟﯩﺪﯗ. ﺋﻪﮔﻪﺭ ﺳﯩﺰﻧﯩﯔ ﺋﯚﻳﯩﯖﯩﺰ ﺋﯘﻧﺪﺍﻕ ﺋﺎﺋﯩﻠﯩﻠﻪﺭﺩﯨﻦ ﺑﻮﻟﻤﯩﺴﺎ، ﻗﺎﻧﺪﺍﻕ ﻗﯩﻠﯩﺸﯩﯖﯩﺰ ﻛﯧﺮﻩﻙ؟ ﺋﺎﺗﺎ-ﺋﺎﻧﯩﯖﯩﺰ ﻫﻪ ﺩﯦﺴﯩﻼ ﺳﯩﺰﻧﻰ ﺋﻪﮔﻪﺷﺘﯜﺭﯛﭖ ﺋﻮﻟﺘﯘﺭﯗﺵ-ﻣﯧﻬﻤﺎﻧﺪﺍﺭﭼﯩﻠﯩﻘﻘﺎ ﺑﺎﺭﺳﺎ، ﺳﯩﺰ ﺗﺎﻣﺎﻛﺎ ﺋﯩﺴﻰ ﯞﻩ ﻫﺎﺭﺍﻕ ﭘﯘﺭﯨﻘﻰ ﺑﯩﻠﻪﻥ ﻟﯩﻖ ﺗﻮﺷﻘﺎﻥ ﺋﯚﻳﻨﯩﯔ ﺋﯩﭽﯩﺪﻩ ﻛﯧﭽﻪ-ﻛﯧﭽﻪ ﺋﯘﺧﻠﯩﻤﺎﻱ ﻳﯜﺭﺳﯩﯖﯩﺰ ﺑﻮﻻﻣﺪﯗ؟ ﺋﻮﺗﺘﯘﺭﺍ ﻣﻪﻛﺘﻪﭖ ﺩﻩﯞﺭﯨﺪﻩ، ﺋﻪﮔﻪﺭ ﺳﯩﺰ 8-9 ﺳﺎﺋﻪﺕ ﻳﺎﺧﺸﻰ ﺋﯘﺧﻠﯩﻤﯩﺴﯩﯖﯩﺰ، ﺳﯩﺰﻧﯩﯔ ﻣﯧﯖﯩﯖﯩﺰ ﻧﻮﺭﻣﺎﻝ ﺋﯩﺸﻠﯩﻤﻪﻳﺪﯗ. ﺋﺎﺗﺎ-ﺋﺎﻧﯩﯖﯩﺰ ﺳﯩﺰﻧﯩﯔ ﻣﻪﻛﺘﻪﭘﻜﻪ ﻛﯧﺮﻩﻛﻠﯩﻚ ﺑﻮﻟﻐﺎﻥ ﻛﯩﺘﺎﺏ، ﻗﻪﻟﻪﻡ-ﺩﻩﭘﺘﻪﺭﻟﻪﺭﻧﻰ ﺋﯧﻠﯩﭗ ﺑﻪﺭﻣﯩﺴﯩﭽﯘ؟ ﺳﯩﺰﮔﻪ ﺑﺎﺷﻘﯩﻼﺭﻧﯩﯔ ﺋﺎﻟﺪﯨﺪﺍ ﻳﯜﺯﯨﯖﯩﺰ ﭼﯜﺷﯜﭖ ﻛﻪﺗﻤﯩﮕﯩﺪﻩﻙ ﻛﯧﻴﯩﻢ ﺋﯧﻠﯩﭗ ﺑﻪﺭﻣﯩﺴﯩﭽﯘ؟ ﺋﻪﮔﻪﺭ ﺳﯩﺰ ﺋﺎﺷﯘﻧﺪﺍﻕ ﺋﻪﻫﯟﺍﻟﻐﺎ ﺩﯗﭺ ﻛﻪﻟﺴﯩﯖﯩﺰ، ﻣﯧﻨﯩﯔ ﺳﯩﺰﮔﻪ ﺑﯩﺮﻻ ﻧﻪﺳﯩﻬﯩﺘﯩﻢ ﺑﺎﺭ: ﺳﯩﺰ ﺋﺎﺗﺎ-ﺋﺎﻧﯩﯖﯩﺰﻏﺎ ﻳﯚﻟﻪﻧﻤﻪﯓ--ﺋﯚﺯ ﺗﻪﻗﺪﯨﺮﯨﯖﯩﺰﻧﻰ ﺋﯚﺯ ﻗﻮﻟﯩﯖﯩﺰﺩﺍ ﺗﯘﺗﯘﯓ. ﺋﻪﮔﻪﺭ ﺋﺎﺗﺎ-ﺋﺎﻧﯩﯖﯩﺰﻧﯩﯔ ﻳﯘﻗﯩﺮﯨﻘﯩﺪﻩﻙ ﺋﯩﺸﻠﯩﺮﯨﻨﻰ ﺑﺎﻫﺎﻧﻪ ﻗﯩﻠﯩﭗ، ﺋﻮﺑﺪﺍﻥ ﺋﻮﻗﯘﻣﯩﺴﯩﯖﯩﺰ، ﻛﻪﻟﮕﯜﺳﯩﺪﻩ ﺯﯨﻴﺎﻧﻨﻰ ﻛﯩﻢ ﺗﺎﺭﺗﯩﺪﯗ؟ ﺋﺎﺗﺎ-ﺋﺎﻧﯩﯖﯩﺰ ﺳﯩﺰﻧﻰ ﻣﻪﯕﮕﯜ ﺑﺎﻗﻤﺎﻳﺪﯗ. ﻫﻪﻣﺪﻩ ﻣﻪﯕﮕﯜﻣﯘ ﺑﯧﻘﯩﭗ ﺑﻮﻻﻟﻤﺎﻳﺪﯗ. ﺋﯘﻻﺭ ﺋﻪﯓ ﻣﻪﺭﺕ ﺑﻮﻟﻐﺎﻧﺪﯨﻤﯘ، ﺳﯩﺰﻧﻰ ﺋﯚﺯﻟﯩﺮﯨﻨﯩﯔ ﻛﯩﺮﯨﻤﻰ ﺗﻮﺧﺘﯩﻐﯩﭽﻪ ﺑﺎﻗﺎﻟﯩﺸﻰ ﻣﯘﻣﻜﯩﻦ. ﺋﯘﻧﯩﯖﺪﯨﻦ ﻛﯧﻴﯩﻦ ﻗﺎﻧﺪﺍﻕ ﻗﯩﻠﯩﺴﯩﺰ؟ ﺑﯩﺮ ﻛﯩﺸﯩﻨﯩﯔ ﻳﯧﺸﻰ 18 ﺩﯨﻦ ﺋﺎﺷﻘﺎﻧﺪﯨﻦ ﻛﯧﻴﯩﻦ، ﻳﻪﻧﯩﻼ ﺋﺎﺗﺎ-ﺋﺎﻧﯩﻐﺎ ﻳﯚﻟﯩﻨﯩﭗ ﺟﺎﻥ ﺑﯧﻘﯩﺶ ﺋﯩﻨﺘﺎﻳﯩﻦ ﻧﻮﻣﯘﺳﻠﯘﻕ ﺋﯩﺶ. ﺋﯘﻧﻰ ﺳﯩﺰ ﻫﺎﺯﯨﺮ ﻫﯧﺲ ﻗﯩﻼﻟﻤﺎﺳﻠﯩﻘﯩﯖﯩﺰ ﻣﯘﻣﻜﯩﻦ. ﺋﻪﮔﻪﺭ ﻫﺎﺯﯨﺮ ﻳﺎﺧﺸﻰ ﺋﻮﻗﯘﻣﯩﺴﯩﯖﯩﺰ، ﻛﻪﻟﮕﯜﺳﯩﺪﻩ ﻣﯘﺳﺘﻪﻗﯩﻞ ﺟﺎﻥ ﺑﺎﻗﺎﻻﻳﺪﯨﻐﺎﻥ ﺑﯩﺮ ﺋﯩﻘﺘﯩﺪﺍﺭﻧﻰ ﻳﯧﺘﯩﻠﺪﯛﺭﻣﯩﺴﯩﯖﯩﺰ، ﯞﺍﻗﺘﻰ ﻛﻪﻟﮕﻪﻧﺪﻩ ﺳﯩﺰﮔﻪ ﭼﯩﻘﯩﭗ ﻛﯧﺘﻪﻱ ﺩﯦﺴﯩﯖﯩﺰ ﺋﺎﺳﻤﺎﻥ ﻳﯩﺮﺍﻕ، ﻛﯩﺮﯨﭗ ﻛﯧﺘﻪﻱ ﺩﯦﺴﯩﯖﯩﺰ ﻳﻪﺭ ﻗﺎﺗﺘﯩﻖ ﺑﯩﺮ ﺋﺎﻗﯩﯟﻩﺗﻜﻪ ﺩﯗﭺ ﻛﯧﻠﯩﺴﯩﺰ. ﺷﯘﯕﻼﺷﻘﺎ ﻫﻪﺭﮔﯩﺰ ﺋﺎﺗﺎ-ﺋﺎﻧﯩﯖﯩﺰﻏﺎ ﻗﯧﻴﺪﺍﭖ، ﻳﺎﺧﺸﻰ ﺋﻮﻗﯘﻣﺎﺳﻠﯩﻖ ﻳﻮﻟﯩﻐﺎ ﻛﯩﺮﯨﭗ ﻗﺎﻟﻤﺎﯓ.

ﻣﯧﻨﯩﯔ ﺋﺎﭘﺎﻡ ﺑﯩﻠﻪﻥ ﺭﻩﻫﻤﻪﺗﻠﯩﻚ ﺩﺍﺩﺍﻡ ﻣﻪﻥ ﻛﯩﭽﯩﻚ ﯞﺍﻗﺘﯩﻤﺪﺍ ﺑﺎﻟﯩﻐﺎ ﺑﻪﻛﻤﯘ ﻛﯚﻳﯜﻧﻪﺗﺘﻰ. ﻟﯧﻜﯩﻦ، ﺋﺎﺋﯩﻠﯩﻤﯩﺰﺩﻩ ﺑﺎﻻ ﻛﯚﭖ، ﺗﯘﺭﻣﯘﺷﯩﻤﯩﺰ ﻗﯩﻴﯩﻦ ﺑﻮﻟﻐﺎﭼﻘﺎ، ﺋﺎﻛﺎﻡ ﺑﯩﻠﻪﻥ ﺋﯩﻜﻜﯩﻤﯩﺰ ﻧﯘﺭﻏﯘﻥ ﺋﯩﺸﻼﺭﺩﺍ ﺋﯚﺯﯨﻤﯩﺰﮔﻪ ﺗﺎﻳﯩﻨﯩﺸﻘﺎ ﻣﻪﺟﺒﯘﺭ ﺑﻮﻟﺪﯗﻕ. ﻣﻪﻥ ﺋﻮﺗﺘﯘﺭﺍ ﻣﻪﻛﺘﻪﭘﺘﻪ ﺋﻮﻗﯘﯞﺍﺗﻘﺎﻥ ﭼﺎﻏﻼﺭﻧﯩﯔ ﻗﯩﺶ ﻛﯜﻧﻠﯩﺮﻯ ﺑﯩﺰ ﺋﻪﺗﯩﮕﻪﻧﻠﯩﻚ ﺗﺎﻣﯩﻘﯩﻤﯩﺰ ﺋﯜﭼﯜﻥ ﻫﻪﺭ ﻛﯜﻧﻰ ﺋﯘﻣﺎﭺ ﭼﯧﻠﯩﭗ ﺋﯩﭽﻪﺗﺘﯘﻕ. ﺋﻪﺗﯩﮕﻪﻧﻠﯩﻜﻰ ﺋﯚﻳﺪﯨﻜﻰ ﻣﻪﺷﻨﯩﯔ ﺋﻮﺗﻰ ﺋﺎﻟﻠﯩﻘﺎﭼﺎﻥ ﺋﯚﭼﯜﭖ ﺑﻮﻟﻐﺎﻥ ﺑﻮﻟﻐﺎﭼﻘﺎ، ﺋﯚﻳﻨﯩﯔ ﺋﯩﭽﻰ ﺋﯩﻨﺘﺎﻳﯩﻦ ﺳﻮﻏﯘﻕ ﺑﻮﻟﯘﭖ، ﺋﻮﺕ ﻗﺎﻻﺷﺘﯩﻦ ﺑﯘﺭﯗﻥ ﺋﻮﺭﯗﻧﺪﯨﻦ ﺗﯘﺭﯗﺵ ﺋﻪﯓ ﻣﯜﺷﻜﯜﻝ ﺋﯩﺸﻼﺭﻧﯩﯔ ﺑﯩﺮﻯ ﺋﯩﺪﻯ. ﻣﻪﻥ ﻣﻪﻛﺘﻪﭘﻜﻪ ﺑﻪﻙ ﺋﺎﻣﺮﺍﻕ ﺑﻮﻟﻐﺎﭼﻘﺎ، ﻫﻪﺭ ﻛﯜﻧﻰ ﺋﻪﺗﯩﮕﻪﻧﺪﻩ 1-ﺑﻮﻟﯘﭖ ﺋﻮﺭﻧﯘﻣﺪﯨﻦ ﺗﯘﺭﯗﭖ، ﻣﻪﺷﻜﻪ ﺋﻮﺕ ﻗﺎﻻﻳﺘﺘﯩﻢ (ﺋﯧﻬﺘﯩﻤﺎﻝ ﺋﺎﻛﺎﻡ ﺑﯩﻠﻪﻥ ﻧﯚﯞﻩﺗﻠﻪﺷﻜﻪﻥ ﺑﻮﻟﯘﺷﯘﻣﻤﯘ ﻣﯘﻣﻜﯩﻦ. ﺋﻪﻣﻤﺎ ﺋﯘﻧﺪﺍﻕ ﻗﯩﻠﻐﺎﻧﻠﯩﻘﯩﻤﯩﺰ ﻫﺎﺯﯨﺮ ﻣﯧﻨﯩﯔ ﺋﯧﺴﯩﻤﺪﻩ ﻗﺎﻟﻤﺎﭘﺘﯘ). ﺋﻮﺕ ﺗﯘﺗﺎﺷﻘﺎﻧﺪﯨﻦ ﻛﯧﻴﯩﻦ، ﻣﻪﻥ ﺋﯘﻣﺎﭺ ﭼﺎﻻﺗﺘﯩﻢ. ﺋﯘﻣﺎﭺ ﺗﻪﻳﻴﺎﺭ ﺑﻮﻻﻱ ﺩﯦﮕﻪﻧﺪﻩ ﻗﺎﻟﻐﺎﻧﻼﺭ ﺋﻮﺭﯗﻧﻠﯩﺮﯨﺪﯨﻦ ﺗﯘﺭﺍﺗﺘﻰ. ﺋﯘ ﭼﺎﻏﺪﺍ ﺑﯩﺮ ﺋﺎﻳﻠﯩﻖ ﻧﻮﺭﻣﯩﻠﯩﻖ ﺋﯘﻥ ﺑﯩﻠﻪﻥ ﻣﺎﻳﻨﻰ ﺑﯩﺮﺍﻗﻼ ﺋﺎﻻﺗﺘﯘﻕ. ﺑﻪﺯﯨﺪﻩ، ﺩﺍﺩﺍﻡ ﺋﺎﺧﺸﯩﻤﻰ ﺋﯘﺧﻼﺷﺘﯩﻦ ﺑﯘﺭﯗﻥ ﻣﯧﻨﯩﯔ ﺋﻪﺗﯩﺴﻰ ﻣﻪﻛﺘﻪﭘﺘﯩﻦ ﺳﻮﺭﺍﭖ ﻛﯧﻠﯩﭗ، ﺋﯘﻥ ﭘﻮﻧﻜﯩﺘﯩﺪﯨﻦ ﺋﯘﻥ ﺋﻪﭘﻜﯧﻠﯩﺸﻜﻪ ﺑﯩﺮﮔﻪ ﺑﯧﺮﯨﺸﯩﻤﻨﻰ ﺗﺎﭘﯩﻼﻳﺘﺘﻰ. ﻣﻪﻥ "ﻣﺎﻗﯘﻝ" ﺩﻩﻳﺘﺘﯩﻢ. ﻟﯧﻜﯩﻦ، ﺋﻪﺗﯩﮕﯩﻨﻰ ﻗﺎﻟﻐﺎﻧﻼﺭ ﻗﻮﭘﯘﺷﺘﯩﻦ ﺑﯘﺭﯗﻥ، ﺳﻮﻣﻜﺎﻣﻨﻰ ﺋﯧﻠﯩﭗ، ﺋﺎﺳﺘﺎ ﺗﺎﻻﻏﺎ ﭼﯩﻘﯩﭗ، ﺋﯘﻧﻰ ﺑﯩﺮ ﻳﻪﺭﮔﻪ ﺗﯩﻘﯩﭗ ﻗﻮﻳﺎﺗﺘﯩﻢ. ﺋﻪﺗﯩﮕﻪﻧﻠﯩﻚ ﺗﺎﻣﺎﻗﻨﻰ ﻳﻪﭖ ﺑﻮﻟﻐﺎﻧﺪﺍ، ﻣﻪﻥ ﺩﺍﺩﺍﻣﻐﺎ "ﻣﻪﻥ ﻣﻪﻛﺘﻪﭘﻜﻪ ﺑﯧﺮﯨﭗ ﺳﻮﺭﺍﭖ ﻛﯧﻠﻪﻱ"، ﺩﻩﭖ ﺗﺎﻻﻏﺎ ﭼﯩﻘﯩﭗ، ﻳﻮﺷﯘﺭﯗﭖ ﻗﻮﻳﻐﺎﻥ ﺳﻮﻣﻜﺎﻣﻨﻰ ﺋﯧﻠﯩﭗ ﻣﻪﻛﺘﻪﭘﻜﻪ ﻛﯧﺘﯩﭗ، ﺷﯘ ﻛﻪﺗﻜﻪﻧﭽﻪ ﻗﺎﻳﺘﯩﭗ ﻛﻪﻟﻤﻪﻳﺘﺘﯩﻢ. ﻣﻪﻥ ﺋﯜﭼﯜﻥ ﺑﯩﺮ ﻛﯜﻧﻠﯜﻙ ﻣﻪﻛﺘﻪﭘﺘﯩﻦ ﻗﯧﻠﯩﺶ ﺋﯩﻨﺘﺎﻳﯩﻦ ﺋﯧﻐﯩﺮ ﻣﻪﺳﯩﻠﻪ ﺑﻮﻟﯘﭖ، ﻣﻪﻥ ﺩﻩﺭﺱ ﻗﺎﻟﺪﯗﺭﯗﺷﻘﺎ ﻗﺎﺗﺘﯩﻖ ﺋﯚﭺ ﺋﯩﺪﯨﻢ. ﻣﯘﺷﯘﻧﺪﺍﻕ ﺳﻪﯞﻩﺏ ﺑﯩﻠﻪﻥ، ﻣﻪﻥ ﺩﺍﺩﺍﻣﺪﯨﻦ ﻧﻪﭼﭽﻪ ﻗﯧﺘﯩﻢ ﺟﺎﺯﺍ ﻳﯧﮕﻪﻥ ﺋﯩﺪﯨﻢ. ﺑﯩﺮ ﻛﯜﻧﻤﯘ ﻣﻪﻛﺘﻪﭘﺘﯩﻦ ﻗﺎﻟﻤﺎﺳﻠﯩﻖ ﻣﯧﻨﯩﯔ ﺷﯘ ﭼﺎﻏﺪﺍ ﺑﺎﺷﻼﻧﻐﺎﻥ ﺋﺎﺩﯨﺘﯩﻢ ﺑﻮﻟﯘﭖ، ﺋﯘ ﺋﺎﺩﻩﺗﻨﻰ ﺋﯚﺯ ﺑﺎﻟﻠﯩﺮﯨﻤﻐﯩﻤﯘ ﺋﯩﺰﭼﯩﻞ ﺗﯜﺭﺩﻩ ﻗﻮﻟﻠﯩﻨﯩﭗ ﻛﯧﻠﯩﯟﺍﺗﯩﻤﻪﻥ. ﺋﺎﭘﺎﻣﻨﯩﯔ ﯞﺍﻗﺘﻰ ﻳﻪﺗﻤﯩﮕﻪﻧﺪﻩ، ﻣﻪﻥ ﺭﻩﺧﺘﻨﻰ ﻛﻪﺳﺘﯜﺭﯛﯞﯦﻠﯩﭗ، ﺋﯚﺯﯛﻡ ﻣﺎﺷﯩﻨﯩﭽﯩﻠﯩﻖ ﻗﯩﻠﯩﭗ، ﺋﯩﭽﻜﻰ ﻛﯧﻴﯩﻤﻠﯩﺮﯨﻤﻨﻰ ﺋﯚﺯﯛﻡ ﺗﯩﻜﯩﭗ ﻛﻪﻳﺪﯨﻢ. ﺋﺎﻳﯩﻐﯩﻢ ﻳﯩﺮﺗﯩﻠﯩﭗ ﻛﻪﺗﺴﻪ، ﺋﯚﺯﯛﻡ ﻣﻮﺯﺩﯗﺯﻟﯘﻕ ﻗﯩﻠﯩﭗ، ﺋﺎﻳﯩﻐﯩﻤﻨﻰ ﺋﯚﺯﯛﻡ ﻳﺎﻣﺎﭖ ﻛﻪﻳﺪﯨﻢ. ﺋﺎﻛﺎﻡ ﺑﯩﻠﻪﻥ ﺋﯩﻜﻜﯩﻤﯩﺰﻧﯩﯔ ﻫﻪﺭ ﻛﯜﻧﻰ ﻣﻪﻛﺘﻪﭘﺘﯩﻦ ﻛﻪﻟﮕﻪﻧﺪﻩ ﺋﯩﻨﺘﺎﻳﯩﻦ ﻛﯚﭖ ﯞﻩﺯﯨﭙﯩﻤﯩﺰ ﺑﺎﺭ ﺋﯩﺪﻯ. ﻛﯜﺯ ﯞﺍﻗﺘﻰ ﺗﻮﻧﯘﺭﻏﺎ ﻗﺎﻻﭖ ﻧﺎﻥ ﻳﯧﻘﯩﺶ ﺋﯜﭼﯜﻥ ﻏﺎﺯﺍﯓ ﻳﯩﻐﺎﺗﺘﯘﻕ. ﺋﯚﻳﺪﯨﻦ 5 ﻛﯩﻠﻮﻣﯩﺘﯩﺮ ﻳﯩﺮﺍﻗﻠﯩﻘﺘﯩﻜﻰ ﺟﺎﯕﮕﺎﻟﻐﺎ ﺑﯧﺮﯨﭗ، ﻗﯘﺭﯗﭖ ﻗﺎﻟﻐﺎﻥ ﻳﺎﻧﺘﺎﻕ-ﻳﯘﻟﻐﯘﻧﻼﺭﻧﻰ ﻳﯩﻐﯩﭗ، ﺋﯘﻧﻰ ﺋﺎﺭﻏﺎﻣﭽﺎ ﺑﯩﻠﻪﻥ ﻳﻮﻏﺎﻥ ﺑﯩﺮ ﺗﻮﭖ ﻗﯩﻠﯩﭗ ﺗﯧﯖﯩﭗ، ﻳﯜﺩﯛﭖ ﺋﯚﻳﮕﻪ ﺋﻪﭘﻜﯧﻠﻪﺗﺘﯘﻕ. ﻗﯩﺶ ﻛﯜﻧﻠﯩﺮﻯ ﻣﻪﻛﺘﯩﯟﯨﻤﯩﺰﺩﯨﻜﻰ ﺋﻮﻗﯘﻏﯘﭼﯩﻼﺭ ﺗﯚﻛﯜﯞﻩﺗﻜﻪﻥ ﻛﯚﻣﯜﺭ ﻛﯜﻟﻠﯩﺮﯨﻨﻰ ﺗﺎﺳﻘﺎﭖ، ﺋﯘﻧﯩﯔ ﺋﯩﭽﯩﺪﯨﻜﻰ ﺷﺎﺧﺎﺭﻧﻰ ﻳﯩﻐﺎﺗﺘﯘﻕ. ﺑﯘﻧﻰ "ﺷﺎﺧﺎﺭ ﺗﯧﺮﯨﺶ" ﺩﻩﭖ ﺋﺎﺗﺎﻳﺘﺘﯘﻕ. ﻳﺎﺯ ﻛﯜﻧﻠﯩﺮﻯ ﺋﯚﻳﺪﯨﻦ 5-6 ﻛﯩﻠﻮﻣﯩﺘﯩﺮ ﻳﯩﺮﺍﻗﻠﯩﻘﺘﯩﻜﻰ ﻳﯧﺰﯨﻼﺭﻏﺎ ﺑﯧﺮﯨﭗ، ﺋﯩﮕﯩﺰ ﺋﯚﺳﻜﻪﻥ ﺋﻮﺕ-ﭼﯚﭘﻠﻪﺭﻧﻰ ﺋﻮﺭﯗﭖ ﻳﯩﻐﯩﭗ، ﻳﯜﺩﯛﭖ ﻛﯧﻠﯩﭗ، ﻳﺎﻛﻰ ﺳﺎﺗﺎﺗﺘﯘﻕ، ﻳﺎﻛﻰ ﺗﻮﺷﻘﺎﻧﻐﺎ ﺑﯧﺮﻩﺗﺘﯘﻕ. ﺷﯘ ﭼﺎﻏﺪﺍ ﻣﯧﻨﯩﯔ ﺑﯩﺮ ﺋﺎﻕ ﺭﻩﯕﻠﯩﻚ ﻛﯚﻳﻨﯩﻜﯩﻢ ﺳﯜﺗﻠﯜﻙ ﺋﻮﺗﻨﯩﯔ ﺳﯜﺗﻰ ﺑﯩﻠﻪﻥ ﺑﻮﻳﯩﻠﯩﭗ، ﻗﺎﭖ-ﻗﺎﺭﺍ ﺑﻮﻟﯘﭖ ﻛﻪﺗﻜﻪﻧﯩﺪﻯ. ﺗﻮﻟﯘﻗﺴﯩﺰﻧﯩﯔ ﺋﺎﺧﯩﺮﻗﻰ ﻳﯩﻠﻠﯩﺮﯨﺪﯨﻦ ﺑﺎﺷﻼﭘﻼ، ﻣﻪﻥ ﻫﻪﺭ ﻳﯩﻠﻰ ﻳﺎﺯﻟﯩﻖ ﺗﻪﺗﯩﻠﺪﻩ ﻗﯘﺭﯗﻟﯘﺷﺘﺎ ﺋﯩﺸﻠﯩﺪﯨﻢ. ﺑﯩﺮ ﻛﯜﻥ 8 ﺳﺎﺋﻪﺕ ﺋﯩﺸﻠﯩﺴﻪﻡ، 80 ﺗﯩﻴﯩﻦ (ﻳﻪﻧﻰ 8 ﻣﻮﭼﻪﻥ) ﭘﯘﻝ ﺗﺎﭘﺎﺗﺘﯩﻢ. ﺗﺎﻡ ﺋﯘﻟﻰ ﻛﻮﻻﺵ، ﺗﺎﻡ ﺋﯘﻟﻰ ﭼﯩﯖﺪﺍﺵ، ﺳﺎﻣﺎﻧﻠﯩﻖ ﯞﻩ ﺳﯧﻤﻮﻧﺖ ﻻﻱ ﺋﯧﺘﯩﺶ، ﺋﻪﭘﻜﻪﺷﺘﻪ ﻻﻱ ﺗﻮﺷﯘﺵ، ﺗﺎﻡ ﻗﻮﭘﯘﺭﯗﺵ، ﺗﺎﻡ ﺳﯘﯞﺍﺵ ﺋﯩﺸﻠﯩﺮﯨﻨﻰ ﻗﯩﻼﺗﺘﯩﻢ. ﺳﺎﻣﺎﻧﻠﯩﻖ ﻻﻱ ﺋﻪﺗﻜﻪﻧﺪﻩ، ﻻﻳﻐﺎ ﻳﺎﻻﯓ ﺋﺎﻳﺎﻍ ﻛﯩﺮﯨﺪﯨﻐﺎﻥ ﺑﻮﻟﻐﺎﭼﻘﺎ، ﭘﯘﺗﯘﻣﻨﻰ ﺳﺎﻣﺎﻥ ﻏﺎﺟﺎﭖ، ﻗﯩﭙﻘﯩﺰﯨﻞ ﺑﻮﻟﯘﭖ ﻛﻪﺗﻪﺗﺘﻰ. ﻫﺎﻙ ﺋﺎﺭﯨﻼﺷﺘﯘﺭﯗﭖ ﺳﯧﻤﻮﻧﺖ ﻻﻱ ﺋﻪﺗﻜﻪﻧﺪﻩ، ﭘﯘﺗﯘﻣﻐﺎ ﻫﺎﻙ ﭼﺎﭼﯩﺮﺍﭖ، ﭘﯘﺗﯘﻣﻨﻰ ﻳﯧﺮﯨﭗ ﻗﺎﻧﯩﺘﯩﯟﯦﺘﻪﺗﺘﻰ. ﺋﯘ ﭼﺎﻏﺪﺍ ﺭﺍﺩﯨﺌﻮ ﻳﺎﺳﺎﺵ ﺋﯜﭼﯜﻥ ﻛﯧﺮﻩﻛﻠﯩﻚ ﺑﻮﻟﻐﺎﻥ ﺑﯩﺮ ﺩﺍﻧﻪ 3 ﻗﯘﺗﯘﭘﻠﯘﻕ ﻻﻣﭙﺎ ﺑﯩﺮ ﻳﯜﻩﻥ ﺑﻮﻟﯘﭖ، ﺗﺎﭘﻘﺎﻥ ﭘﯘﻟﯘﻣﻨﯩﯔ ﺑﯩﺮ ﻗﯩﺴﻤﯩﺪﺍ ﺭﺍﺩﯨﺌﻮ ﺳﺎﻳﻤﯩﻨﻰ ﺋﺎﻻﺗﺘﯩﻢ. ﻗﺎﻟﻐﯩﻨﯩﻨﻰ ﻛﯩﻴﯩﻤﮕﻪ ﺧﻪﺟﻠﻪﻳﺘﯩﻢ. ﺑﯘﻧﺪﺍﻕ ﺋﯩﺸﻼﺭﻧﻰ ﻳﺎﺯﺳﺎﻡ، ﻳﻪﻧﻪ ﺋﯩﻨﺘﺎﻳﯩﻦ ﻛﯚﭖ. ﻣﻪﻥ ﺋﺎﺷﯘ ﺋﯩﺸﻼﺭﻧﯩﯔ ﻫﻪﻣﻤﯩﺴﯩﻨﻰ ﻗﯩﻠﯩﭗ، ﻳﻪﻧﻪ ﻛﯧﭽﯩﺴﻰ ﻳﯧﺮﯨﻢ ﻛﯧﭽﯩﮕﯩﭽﻪ ﺋﯚﮔﯩﻨﯩﺶ ﻗﯩﻼﺗﺘﯩﻢ. ﺋﯚﻳﺪﯨﻜﻰ ﻫﻪﻣﻤﻪﻳﻠﻪﻧﺪﯨﻦ ﻛﯧﻴﯩﻦ ﺋﯘﺧﻼﻳﺘﯩﻢ. ﺗﻪﺑﯩﺌﻰ ﭘﻪﻧﻠﻪﺭﺩﻩ ﻣﻪﻥ ﻛﯩﺘﺎﺑﺘﯩﻜﻰ ﺋﯚﺗﯜﻟﻤﯩﮕﻪﻥ ﻣﻪﺯﻣﯘﻧﻼﺭﻧﻰ ﺋﺎﻟﺪﯨﻦ ﺋﺎﻻ ﻛﯚﺭﯛﯞﺍﻟﯩﺪﯨﻐﺎﻥ ﺑﻮﻟﻐﺎﭼﻘﺎ، ﺩﻩﺭﺱ ﯞﺍﻗﺘﯩﺪﺍ ﻛﯚﭘﯩﻨﭽﻪ ﺋﻮﻗﯘﺗﻘﯘﭼﯩﻨﯩﯔ ﺳﯚﺯﻟﯩﮕﯩﻨﯩﻨﯩﯔ ﺗﻮﻏﺮﺍ-ﺧﺎﺗﺎﻟﯩﻘﯩﻨﻰ ﺑﺎﻫﺎﻻﭖ ﺋﻮﻟﺘﯘﺭﺍﺗﺘﯩﻢ. ﻣﯧﻨﯩﯔ ﭼﯩﺮﺍﻳﯩﻢ ﺳﻪﻝ ﺋﯚﺯﮔﯩﺮﯨﭗ ﻗﺎﻟﺴﺎ، ﺋﻮﻗﯘﺗﻘﯘﭼﻰ ﺩﻩﺭﻫﺎﻝ ﺗﻮﺧﺘﺎﭖ، "ﺋﻪﺭﻛﯩﻦ، ﺑﯩﺮ ﻳﯧﺮﻯ ﺧﺎﺗﺎ ﺑﻮﻟﯘﭖ ﻗﺎﻟﺪﯨﻤﯘ؟" ﺩﻩﭖ ﺳﻮﺭﺍﻳﺘﺘﻰ. ﺑﯩﺮ ﻗﯧﺘﯩﻢ ﻣﺎﺗﯧﻤﺎﺗﯩﻜﺎ ﺋﻮﻗﯘﺗﻘﯘﭼﯩﺴﻰ ﺑﯩﺮ ﻳﯧﯖﻰ ﺑﺎﭘﻨﻰ ﺑﺎﺷﻠﯩﻐﺎﻧﺪﺍ، ﺋﯘﻧﻰ ﺋﯚﺯﯛﻡ ﺋﺎﻟﺪﯨﻨﺌﺎﻻ ﺋﯚﮔﯩﻨﯩﭗ، ﻛﯩﺘﺎﺑﺘﯩﻜﻰ ﻣﻪﺷﻘﻠﻪﺭﻧﯩﯔ ﺑﯩﺮﯨﻨﯩﻤﯘ ﻗﻮﻳﻤﺎﻱ ﺋﯩﺸﻠﻪﭖ ﺑﻮﻟﻐﺎﻥ ﺑﻮﻟﻐﺎﭼﻘﺎ، ﺋﻮﻗﯘﺗﻘﯘﭼﯘﻡ: "ﺋﻪﺭﻛﯩﻦ، ﺗﺎﻻﻏﺎ ﭼﯩﻘﯩﭗ ﺋﻮﻳﻨﺎ" ﺩﻩﭖ، ﻣﯧﻨﻰ ﺋﻮﻳﻨﺎﺷﻘﺎ ﻗﻮﻳﯘﭖ ﺑﻪﺭﮔﻪﻥ ﺋﯩﺪﻯ. ﻣﻪﻥ ﭘﯜﺗﯜﻥ ﻣﻪﻳﺪﺍﻧﺪﺍ ﺋﯚﺯﯛﻡ ﻳﺎﻟﻐﯘﺯ ﯞﺍﺳﻜﯧﺘﺒﻮﻝ ﺋﻮﻳﻨﯩﻐﺎﻥ ﺋﯩﺪﯨﻢ. ﻫﺎﺯﯨﺮﻗﻰ ﺋﻮﺗﺘﯘﺭﺍ ﻣﻪﻛﺘﻪﭖ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﻣﯘﺗﻠﻪﻕ ﻛﯚﭖ ﻗﯩﺴﻤﻰ ﻳﯘﻗﯩﺮﯨﻘﯩﺪﻩﻙ ﺷﺎﺭﺍﺋﯩﺖ ﺋﺎﺳﺘﯩﺪﺍ ﺋﻮﻗﯘﺷﻘﺎ ﻣﻪﺟﺒﯘﺭ ﺑﻮﻟﻤﯩﺴﺎ ﻛﯧﺮﻩﻙ. ﺋﻪﮔﻪﺭ ﺋﻪﻣﻪﻟﯩﻲ ﺋﻪﻫﯟﺍﻝ ﻳﺎﻛﻰ ﺳﯩﺰﻧﯩﯔ ﺋﺎﺗﺎ-ﺋﺎﻧﯩﯖﯩﺰ ﺳﯩﺰﻧﯩﯔ ﻳﺎﺧﺸﻰ ﺋﻮﻗﯘﺷﯩﯖﯩﺰﻏﺎ ﭘﺎﻳﺪﯨﻠﯩﻖ ﺷﻪﺭﺕ-ﺷﺎﺭﺍﺋﯩﺖ ﻳﺎﺭﯨﺘﯩﭗ ﺑﻪﺭﻣﯩﮕﻪﻥ ﺑﻮﻟﺴﺎ، ﺋﯘ ﺷﺎﺭﺍﺋﯩﺘﻨﻰ ﺋﯚﺯﯨﯖﯩﺰ ﻳﺎﺭﯨﺘﯩﯔ. ﻣﻪﻥ ﺷﯘﻧﺪﺍﻕ ﻗﯩﻠﻐﺎﻥ. ﺳﯩﺰﻣﯘ ﺷﯘﻧﺪﺍﻕ ﻗﯩﻼﻻﻳﺴﯩﺰ.

ﻣﻪﻥ 1971-ﻳﯩﻠﯩﺪﯨﻦ 1976-ﻳﯩﻠﯩﻐﯩﭽﻪ ﺋﺎﻗﺴﯘ 1-ﺋﻮﺗﺘﯘﺭﺍ ﻣﻪﻛﺘﻪﭘﺘﻪ ﺋﻮﻗﯘﺩﯗﻡ. ﺗﻮﻟﯘﻗﺴﯩﺰﻧﻰ ﭘﯜﺗﺘﯜﺭﯛﭖ ﺑﻮﻟﻤﺎﻱ ﺗﯘﺭﯗﭘﻼ، "ﺋﯩﺸﯩﻜﻨﻰ ﺋﯧﭽﯩﭗ ﻗﻮﻳﯘﭖ ﻣﻪﻛﺘﻪﭖ ﺑﺎﺷﻘﯘﺭﯗﺵ" ﺳﯩﻴﺎﺳﯩﺘﻰ ﻳﻮﻟﻐﺎ ﻗﻮﻳﯘﻟﺪﻯ. ﺋﯩﭽﻜﯩﺮﻛﻰ ﺋﯚﻟﻜﯩﺪﯨﻜﻰ ﺋﺎﻟﯩﻲ ﻣﻪﻛﺘﻪﭖ ﺋﯩﻤﺘﯩﻬﺎﻧﯩﺪﺍ ﺋﺎﻕ ﻗﻪﻏﻪﺯ ﺗﺎﭘﺸﯘﺭﻏﺎﻥJang Tishng ﻧﯩﯔ ﺋﯩﺶ-ﺋﯩﺰﻟﯩﺮﻯ ﻛﻪﯓ ﺗﯜﺭﺩﻩ ﺗﻪﺷﯟﯨﻖ ﻗﯩﻠﯩﻨﯩﭗ، ﺋﻮﻗﯘﺗﻘﯘﭼﯩﻼﺭ "ﺳﯧﺴﯩﻖ 9-ﺋﯘﻧﺴﯘﺭﻻﺭ" ﺩﻩﭖ ﺗﻪﻧﻘﯩﺪ ﻗﯩﻠﯩﻨﺪﻯ. ﻧﯘﺭﻏﯘﻥ ﺋﺎﺗﺎ-ﺋﺎﻧﯩﻼﺭ ﻛﯜﺭﻩﺷﻜﻪ ﺗﺎﺭﺗﯩﻠﯩﭗ، ﺑﺎﻟﯩﻠﯩﺮﯨﻨﯩﯔ ﻫﺎﻟﯩﺪﯨﻦ ﺧﻪﯞﻩﺭ ﺋﯧﻠﯩﺸﻘﺎ ﺋﺎﻣﺎﻟﺴﯩﺰ ﻗﺎﻟﺪﻯ. ﺋﻮﺗﺘﯘﺭﺍ ﻣﻪﻛﺘﻪﭘﻠﻪﺭﻧﯩﯔ ﻫﻪﻣﻤﯩﺴﻰ "ﻳﺎﺷﻼﺭ ﺑﻪﺭﯨﺒﯩﺮ ﻳﯧﺰﯨﻐﺎ ﺑﺎﺭﯨﺪﯨﻐﺎﻥ ﺑﻮﻟﻐﺎﻧﺪﯨﻜﯩﻦ، ﺷﯘ ﻳﯧﺰﯨﺪﺍ ﻻﺯﯨﻢ ﺑﻮﻟﯩﺪﯨﻐﺎﻥ ﺑﯩﻠﯩﻤﻠﻪﺭﻧﻰ ﺋﯚﮔﯩﺘﻪﻳﻠﻰ"، ﺩﻩﭖ، ﺑﯩﺰﮔﻪ ﻳﻪﺭﻧﻰ ﻗﺎﻧﺪﺍﻕ ﺋﺎﻏﺪﯗﺭﯗﺵ، ﺯﯨﺮﺍﺋﻪﺗﻨﻰ ﻗﺎﻧﺪﺍﻕ ﺗﯧﺮﯨﺶ، ﻗﺎﻧﺪﺍﻕ ﺋﺎﺳﺮﺍﺵ، ﻗﺎﻧﺪﺍﻕ ﭘﻪﺭﯞﯨﺶ ﻗﯩﻠﯩﺶ، ﻛﯚﭼﻪﺗﻨﻰ ﻗﺎﻧﺪﺍﻕ ﺋﯘﻻﺵ ﻗﺎﺗﺎﺭﻟﯩﻖ ﻧﻪﺭﺳﯩﻠﻪﺭﻧﻰ ﺋﯚﺗﯜﺷﻜﻪ ﺑﺎﺷﻠﯩﺪﻯ. ﻧﯧﻤﯩﺪﯨﮕﻪﻥ ﭘﺎﺭﻻﻕ ﺋﯩﺴﺘﯩﻘﺒﺎﻝ؟ ﭘﯜﺗﯜﻥ ﻣﻪﻛﺘﻪﭖ ﭘﺎﻟﻪﭺ ﺑﻮﻟﺪﻯ. ﻟﯧﻜﯩﻦ، ﺋﺎﻟﺪﯨﻨﻘﻰ ﻗﯩﺴﯩﻤﻼﺭﺩﯨﻤﯘ ﺗﯩﻠﻐﺎ ﺋﯧﻠﯩﭗ ﺋﯚﺗﯜﭖ ﻛﻪﺗﻜﻪﻧﺪﻩﻙ، ﻣﻪﻥ ﺋﯚﮔﯩﻨﯩﺸﯩﻤﻨﻰ ﺩﺍﯞﺍﻣﻼﺷﺘﯘﺭﺩﯗﻡ. ﺋﻮﻗﯘﺗﻘﯘﭼﯩﻠﯩﺮﯨﻤﻨﯩﯔ ﺋﻪﻫﯟﺍﻟﻰ ﺋﯩﻨﺘﺎﻳﯩﻦ ﻗﯩﻴﯩﻦ ﺑﻮﻟﺴﯩﻤﯘ، ﺋﯘﻻﺭ ﺷﯘ ﯞﺍﻗﯩﺘﺘﯩﻜﻰ ﯞﻩﺯﯨﻴﻪﺗﻨﯩﯔ ﺋﯩﻨﺘﺎﻳﯩﻦ ﺧﺎﺗﺎﻟﯩﻘﯩﻨﻰ ﻣﺎﯕﺎ ﻣﻪﺧﭙﯩﻲ ﻫﺎﻟﺪﺍ ﺋﯧﻴﺘﯩﭗ ﺗﯘﺭﺍﺗﺘﻰ. ﺑﯩﺮ ﻣﻪﺯﮔﯩﻞ ﻫﻪﻣﻤﻪ ﺋﺎﺩﻩﻡ ﻫﻪﻣﻤﻪ ﺳﯚﺯﻧﯩﯔ ﺑﯧﺸﯩﻐﺎ "ﺋﻪﯓ ﺋﺎﻟﯩﻲ ﻳﻮﻟﻴﻮﺭﯗﻕ"،ﭘﺎﺭﺗﯩﻴﯩﻨﯩﯔ ﺭﻩﻫﺒﻪﺭﻟﯩﻜﯩﺪﻩ ﺩﯦﮕﻪﻥ ﺳﯚﺯﻧﻰ ﻗﯩﺴﺘﯘﺭﻣﯩﺴﺎ ﺑﻮﻟﻤﺎﻳﺪﯨﻐﺎﻥ ﺑﻮﻟﯘﭖ ﻗﺎﻟﺪﻯ. ﺋﻮﻗﯘﺗﻘﯘﭼﯘﻡ ﺳﯩﻨﯩﭙﺘﺎ، "ﺋﻪﮔﻪﺭ ﻳﻪﺭﮔﻪ ﺑﯘﻏﺪﺍﻱ ﺗﯧﺮﯨﺴﯩﯖﯩﺰ، ﭘﺎﺭﺗﯩﻴﯩﻨﯩﯔ ﺭﻩﻫﺒﻪﺭﻟﯩﮕﯩﺪﻩ، ﺑﯘﻏﺪﺍﻱ ﺋﯜﻧﯜﭖ ﭼﯩﻘﯩﺪﯗ"، ﺩﻩﻳﺘﺘﻰ. ﺩﻩﺭﺳﺘﯩﻦ ﭼﯜﺷﻜﻪﻧﺪﯨﻦ ﻛﯧﻴﯩﻦ، ﻣﯧﻨﯩﯔ ﻗﯘﻟﯩﻘﯩﻤﻐﺎ ﺋﺎﺳﺘﺎ "ﺋﻪﮔﻪﺭ ﭘﺎﺭﺗﯩﻴﯩﻨﯩﯔ ﺭﻩﻫﺒﻪﺭﻟﯩﮕﻰ ﺑﻮﻟﻤﯩﺴﺎ، ﻳﻪﺭﮔﻪ ﺑﯘﻏﺪﺍﻱ ﺗﯧﺮﯨﺴﯩﯖﯩﺰ، ﻳﻪﺭﺩﯨﻦ ﻗﻮﻧﺎﻕ ﺑﻮﻟﯘﭖ ﺋﯜﻧﯜﺷﻰ ﻣﯘﻣﻜﯩﻦ ﺋﻪﻣﻪﺱ"، ﺩﻩﻳﺘﺘﻰ. ﻣﺎﻧﺎ ﻣﯘﺷﯘﻧﺪﺍﻕ ﯞﻩﺯﯨﻴﻪﺕ ﺋﺎﺳﺘﯩﺪﺍ، ﻣﯧﻨﯩﯔ ﺳﺎﯞﺍﻗﺪﺍﺷﻠﯩﺮﯨﻤﻨﯩﯔ ﻫﻪﻣﻤﯩﺴﻰ ﺩﯦﮕﯩﺪﻩﻙ ﻧﻮﺭﻣﺎﻝ ﺋﻮﻗﯘﺷﺘﯩﻦ ﯞﺍﺯﻛﻪﭼﺘﻰ. ﻳﺎﺧﺸﻰ ﺋﻮﻗﯘﻣﯩﺴﺎ، ﻫﯧﭽﻜﯩﻢ ﻫﯧﭽﻨﯧﻤﻪ ﺩﯦﻴﻪﻟﻤﻪﻳﺘﻰ. ﺋﺎﺧﯩﺮﻗﻰ ﻧﻪﺗﯩﺠﻪ ﻗﺎﻧﺪﺍﻕ ﺑﻮﻟﺪﻯ؟ ﺑﯩﺰ 1977-ﻳﯩﻠﻰ 12-ﺋﺎﻳﺪﺍ ﺋﺎﻟﯩﻲ ﻣﻪﻛﺘﻪﭘﻜﻪ ﺋﯩﻤﺘﯩﻬﺎﻥ ﺑﻪﺭﮔﻪﻧﺪﻩ، ﻣﻪﻥ ﺑﯩﻠﻪﻥ ﺋﻮﺧﺸﺎﺵ ﻳﯩﻠﻠﯩﻘﺘﺎ ﺋﻮﻗﯘﻏﺎﻥ ﺋﺎﻗﺴﯘ 1-ﺋﻮﺗﺘﯘﺭﺍ ﻣﻪﻛﺘﯩﭙﯩﻨﯩﯔ 3 ﺳﯩﻨﯩﭙﯩﺪﯨﻦ ﺋﺎﺭﺍﻥ 3 ﺋﻮﻗﯘﻏﯘﭼﻰ ﺋﺎﻟﯩﻲ ﻣﻪﻛﺘﻪﭘﻜﻪ ﺋﯚﺗﺘﻰ. ﺋﯘﻧﯩﯔ ﺑﯩﺮﻯ ﻣﻪﻥ. ﻗﺎﻟﻐﺎﻥ ﺋﯩﻜﻜﯩﺴﻰ ﻗﯩﺰ ﺋﻮﻗﯘﻏﯘﭼﻰ. ﺋﯘﻧﯩﯔ ﺑﯩﺮﻯ ﺗﻮﻟﯘﻕ ﺋﻮﺗﺘﯘﺭﺍ ﻣﻪﺯﮔﯩﻠﯩﺪﻩ ﻛﻮﻧﺎﺷﻪﻫﻪﺭﺩﯨﻦ ﻳﯚﺗﻜﯩﻠﯩﭗ ﻛﻪﻟﮕﻪﻥ ﺑﻮﻟﯘﭖ، ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺗﺎﺭﯨﺦ ﻛﻪﺳﭙﯩﮕﻪ ﻛﯩﺮﺩﻯ. ﻳﻪﻧﻪ ﺑﯩﺮﻯ ﺷﯩﻨﺠﺎﯓ ﺗﯧﺒﺒﯩﻲ ﺋﯩﻨﺴﺘﯩﺘﯘﺗﯩﻐﺎ ﻛﯩﺮﺩﻯ. ﻗﺎﻟﻐﺎﻧﻼﺭﻧﯩﯔ ﺑﻪﺯﯨﻠﯩﺮﻯ ﺋﯩﺸﭽﻰ ﺑﻮﻟﺪﻯ. ﺑﻪﺯﯨﻠﯩﺮﻯ ﺷﻮﭘﯘﺭ، ﺑﻪﺯﯨﻠﯩﺮﻯ ﺳﺎﻗﭽﻰ، ﻳﻪﻧﻪ ﺑﻪﺯﯨﻠﯩﺮﻯ ﺑﻮﻟﺴﺎ ﻳﯧﺰﯨﻐﺎ ﺑﯧﺮﯨﭗ ﺩﯦﻬﻘﺎﻥ ﺑﻮﻟﺪﻯ. ﻣﻪﻥ 1989- ﯞﻩ 1991-ﻳﯩﻠﻠﯩﺮﻯ ﻳﯘﺭﺗﻘﺎ ﺑﺎﺭﻏﺎﻧﺪﺍ، ﺋﯘﻻﺭﻧﯩﯔ ﺑﻪﺯﯨﻠﯩﺮﯨﻨﻰ ﻛﻮﭼﯩﺪﺍ ﺋﯘﭼﺮﺍﺗﺘﯩﻢ. ﻣﯧﻨﯩﯔ ﺋﯘﻻﺭ ﺑﯩﻠﻪﻥ ﻛﯚﺭﯛﺷﯜﭖ، ﺋﯘﻻﺭ ﺑﯩﻠﻪﻥ ﺑﻪﻛﻤﯘ ﭘﺎﺭﺍﯕﻼﺷﻘﯩﻢ ﺑﺎﺭ ﺋﯩﺪﻯ. ﻟﯧﻜﯩﻦ، ﺋﯘﻻﺭ ﻣﯧﻨﻰ ﻛﯚﺭﯛﭘﻼ ﺋﯚﺯﯨﻨﻰ ﺋﻪﭘﻘﺎﭼﺘﻰ. ﻣﻪﻥ ﺋﯩﻨﺘﺎﻳﯩﻦ ﻫﻪﺳﺮﻩﺗﻠﻪﻧﺪﯨﻢ. ﺋﯩﻨﺘﺎﻳﯩﻦ ﺋﺎﺯﺍﺑﻼﻧﺪﯨﻢ. ﺋﯘﻻﺭ ﺋﺎﺷﯘﻧﺪﺍﻕ ﺑﯩﺮ ﺗﺎﺭﯨﺨﯩﻲ ﺩﻩﯞﺭﺩﯨﻜﻰ ﺳﯩﻴﺎﺳﻪﺗﻨﯩﯔ ﻗﯘﺭﺑﺎﻧﻰ ﺑﻮﻟﯘﭖ ﻛﻪﺗﺘﻰ. ﻣﻪﻥ ﺋﯘﻻﺭﻧﻰ ﺩﺍﯞﺍﻣﻠﯩﻖ ﺋﻪﺳﻠﻪﻳﻤﻪﻥ. ﻟﯧﻜﯩﻦ، ﭘﻪﻗﻪﺕ ﺑﯩﺮ ﻗﺎﻧﭽﻪ ﺳﺎﯞﺍﻗﺪﯨﺸﯩﻤﻨﯩﻼ ﻛﯚﺯ ﺋﺎﻟﺪﯨﻤﻐﺎ ﻛﻪﻟﺘﯜﺭﻩﻟﻪﻳﻤﻪﻥ. ﺑﯩﺰﻧﯩﯔ ﺑﯩﺮﻩﺭ ﭘﺎﺭﭼﻪ ﺳﯩﻨﯩﭗ ﺭﻩﺳﯩﻤﯩﻤﯩﺰ ﻳﻮﻕ. ﺋﻪﻣﯩﻠﯩﻴﻪﺗﺘﻪ ﺑﺎﺷﻘﺎ ﺧﯩﻠﺪﯨﻜﻰ ﺭﻩﺳﯩﻤﻠﻪﺭﺩﯨﻨﻤﯘ ﻫﯧﭽﻘﺎﻧﺪﯨﻘﻰ ﻳﻮﻕ. ﺋﯘ ﭼﺎﻏﺪﺍ ﻛﯩﭽﯩﻚ ﺗﯩﭙﺘﯩﻜﻰ ﺭﻩﺳﯩﻢ ﺋﺎﭘﺎﺭﺍﺗﻰ ﺗﯧﺨﻰ ﻳﻮﻕ ﺋﯩﺪﻯ. ﺋﺎﻣﯧﺮﯨﻜﯩﺪﺍ ﺑﺎﺷﻼﻧﻐﯘﭼﻨﯩﯔ 1-ﺳﯩﻨﯩﭙﯩﺪﯨﻦ ﺗﺎﺭﺗﯩﭗ ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭖ ﺋﺎﺧﯩﺮﻻﺷﻘﯩﭽﻪ، ﻣﻪﻛﺘﻪﭘﺘﯩﻦ ﻫﻪﺭ ﻳﯩﻠﻰ "ﻳﯩﻠﻨﺎﻣﻪ" ﺩﯦﮕﻪﻥ ﺋﯩﺴﯩﻤﻠﯩﻚ ﺑﯩﺮ ﻛﯩﺘﺎﭖ ﺋﯩﺸﻠﻪﭖ ﺑﯧﺮﯨﺪﯨﻜﻪﻥ. ﺋﯘ ﻛﯩﺘﺎﺑﻘﺎ ﺷﯘ ﻳﯩﻠﻰ ﺷﯘ ﻣﻪﻛﺘﻪﭘﺘﻪ ﺋﻮﻗﯘﻏﺎﻥ ﻫﻪﻣﻤﻪ ﺋﻮﻗﯘﻏﯘﭼﯩﻼﺭﻧﯩﯔ ﺋﺎﻳﺮﯨﻢ ﭼﯜﺷﻜﻪﻥ ﺭﻩﺳﯩﻤﻰ، ﺳﯩﻨﯩﭗ ﺭﻩﺳﯩﻤﻰ، ﺋﻮﻗﯘﺗﻘﯘﭼﯩﻼﺭﻧﯩﯔ ﺭﻩﺳﯩﻤﻰ ﯞﻩ ﺷﯘ ﺑﯩﺮ ﻳﯩﻠﺪﯨﻜﻰ ﺋﺎﻻﻫﯩﺪﻩ ﭘﺎﺋﺎﻟﯩﻴﻪﺗﻠﻪﺭﻧﯩﯔ ﻛﯚﺭﯛﻧﯜﺷﻠﯩﺮﯨﻨﻰ ﻣﻪﺯﻣﯘﻥ ﻗﯩﻠﻐﺎﻥ ﺭﻩﺳﯩﻤﻠﻪﺭﻧﻰ ﻛﯩﺮﮔﯜﺯﯨﺪﯨﻜﻪﻥ. ﻫﻪﺭ ﺑﯩﺮ ﺭﻩﺳﯩﻤﻨﯩﯔ ﺋﺎﺳﺘﯩﻐﺎ ﺷﯘ ﺭﻩﺳﯩﻤﺪﯨﻜﻰ ﻛﯩﺸﯩﻨﯩﯔ ﺗﻮﻟﯘﻕ ﺋﯩﺴﻤﻰ ﻳﯧﺰﯨﻠﯩﺪﯨﻜﻪﻥ. ﺑﯘ ﻛﯩﺘﺎﺑﻨﯩﯔ ﺑﺎﻫﺎﺳﻰ 65 ﺩﻭﻟﻼﺭ ﺋﻪﺗﺮﺍﭘﯩﺪﺍ. ﻣﻪﻥ ﺑﺎﻟﯩﻠﯩﺮﯨﻤﻐﺎ ﻫﻪﺭ ﻳﯩﻠﻰ ﺋﯧﻠﯩﭗ ﺑﯧﺮﯨﭗ، ﺳﺎﻗﻼﭖ ﻗﻮﻳﯘﯞﺍﺗﯩﻤﻪﻥ. ﯞﻩﺗﻪﻧﺪﯨﻜﻰ ﻳﺎﺵ-ﺋﯚﺳﻤﯜﺭﻟﻪﺭﮔﻪ ﺑﯩﺮ ﺗﻪﯞﯨﺴﯩﻴﻪﻡ: ﺭﻩﺳﯩﻤﮕﻪ ﭼﯜﺷﯜﭖ، ﺧﺎﺗﯩﺮﻩ ﻗﺎﻟﺪﯗﺭﯗﯕﻼﺭ. ﻳﺎﺧﺸﻰ ﺋﯚﺗﻜﻪﻥ ﺑﻮﻟﺴﺎﯕﻼﺭﻣﯘ، ﻳﺎﺧﺸﻰ ﺋﯚﺗﻤﯩﮕﻪﻥ ﺑﻮﻟﺴﺎﯕﻼﺭﻣﯘ ﺧﺎﺗﯩﺮﻩ ﻗﺎﻟﺪﯗﺭﯗﯕﻼﺭ. ﺳﯩﻠﻪﺭﻧﯩﯔ ﺯﺍﻣﺎﻧﯩﯖﻼﺭ ﺑﯩﺮ ﮔﯜﺯﻩﻝ ﺯﺍﻣﺎﻥ. ﺋﯘ ﺑﯩﺮ ﻛﻪﺗﺴﻪ، ﻣﻪﯕﮕﯜ ﻗﺎﻳﺘﯩﭗ ﻛﻪﻟﻤﻪﻳﺪﯗ.

ﻳﯧﻘﯩﻨﺪﺍ ﻣﻪﻥ ﺑﯩﺰ ﺗﺎﻡ ﻗﻮﺷﻨﯩﻤﯩﺰﻧﯩﯔ ﻳﻪﻧﻪ ﺑﯩﺮ ﺋﺎﺩﻩﻡ ﺑﯩﻠﻪﻥ ﭘﺎﺭﺍﯕﻠﯩﺸﯩﯟﺍﺗﻘﺎﻥ ﺳﯚﺯﯨﻨﻰ ﺋﺎﯕﻼﭖ ﻗﺎﻟﺪﯨﻢ. ﺋﯘ ﻗﻮﺷﻨﯩﻤﯩﺰﻧﯩﯔ ﺷﻪﺧﺴﯩﻲ ﺷﯩﺮﻛﯩﺘﻰ ﺑﺎﺭ ﺑﻮﻟﯘﭖ، ﻗﯘﺭﯗﻟﯘﺵ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯗ. ﺋﯘ ﻛﯩﺸﻰ ﻣﯘﻧﺪﺍﻕ ﺩﻩﻳﺪﯗ: "ﻣﻪﻥ ﻛﯩﭽﯩﻜﯩﻤﺪﻩ ﻳﺎﺧﺸﻰ ﺋﻮﻗﯘﻣﺎﻱ، ﻣﯘﺷﯘ ﻛﻪﺳﭙﻜﻪ ﻛﯩﺮﯨﭗ ﻗﺎﻟﻐﺎﻧﯩﻜﻪﻧﻤﻪﻥ. ﺋﻪﻣﺪﻯ ﻛﻪﺳﭗ ﺋﯚﺯﮔﻪﺭﺗﻪﻱ ﺩﯦﺴﻪﻡ، ﺑﺎﺷﻘﺎ ﺳﺎﻫﻪﺩﻩ ﻫﯧﭽﻘﺎﻧﺪﺍﻕ ﺑﯩﻠﯩﻢ ﻳﺎﻛﻰ ﺋﯩﻘﺘﯩﺪﺍﺭﯨﻢ ﻳﻮﻕ. ﺑﯘ ﺋﯩﺸﺘﯩﻦ ﺑﯩﺮ ﺋﺎﺯ ﺯﯦﺮﯨﻜﺘﯩﻢ. ﺋﻪﻣﺪﻯ ﺑﯩﺮ ﺋﺎﻟﯩﻲ ﻣﻪﻛﺘﻪﭘﻜﻪ ﺋﻮﻗﯘﺳﺎﻡ ﺑﻮﻟﯩﺪﯨﻐﺎﻥ ﺋﻮﺧﺸﺎﻳﺪﯗ." ﻣﻪﻥ ﺋﯚﺗﻜﻪﻥ ﻳﯩﻠﻰ ﺋﯚﻱ ﺋﯧﻠﯩﺶ ﺟﻪﺭﻳﺎﻧﯩﺪﺍ ﺗﻮﻧﯘﺷﯘﭖ ﻗﺎﻟﻐﺎﻥ ﻳﻪﻧﻪ ﺑﯩﺮ ﻗﻮﺷﻨﺎﻡ ﺑﺎﺭ. ﻳﯧﻘﯩﻨﺪﺍ ﺋﯘ ﻛﯩﺸﻰ ﺑﯩﻠﻪﻥ ﺋﯚﻳﻨﯩﯔ ﺋﺎﻟﺪﯨﺪﯨﻜﻰ ﻛﻮﭼﯩﺪﺍ ﺋﯘﭼﺮﯨﺸﯩﭗ ﻗﯧﻠﯩﭗ، "ﺋﯩﺸﻠﯩﺮﯨﯔ ﻗﺎﻧﺪﺍﻗﺮﺍﻕ؟ ﺋﺎﻟﺪﯨﺮﺍﺷﻤﯘ؟" ﺩﻩﭖ ﺳﻮﺭﯨﺴﺎﻡ، ﺋﯘ ﻛﯩﺸﻰ: "ﺧﯩﺰﻣﯩﺘﯩﻤﻐﯘ ﺋﺎﻟﺪﯨﺮﺍﺵ ﺋﻪﻣﻪﺱ. ﻟﯧﻜﯩﻦ، ﻳﯧﻘﯩﻨﺪﯨﻦ ﺑﯘﻳﺎﻥ ﺑﯩﺮ ﺋﺎﺯ ﺑﯩﻠﯩﻤﮕﻪ ﺋﯧﻬﺘﯩﻴﺎﺟﯩﻢ ﭼﯜﺷﯜﭖ ﻗﯧﻠﯩﭗ، ﺋﺎﻟﯩﻲ ﻣﻪﻛﺘﻪﭘﻨﯩﯔ ﺑﯩﺮ ﻣﺎﺗﯧﻤﺎﺗﯩﻜﺎ ﺩﻩﺭﺳﯩﻨﻰ ﺗﺎﻟﻠﯩﻐﺎﻥ ﺋﯩﺪﯨﻢ. ﻫﺎﺯﯨﺮ ﺷﯘ ﺩﻩﺭﺳﻨﯩﯔ ﺗﺎﭘﺸﯘﺭﯗﻗﻠﯩﺮﻯ ﻣﯧﻨﻰ ﺋﯩﻨﺘﺎﻳﯩﻦ ﺋﺎﻟﺪﯨﺮﺍﺵ ﻗﯩﻠﯩﯟﻩﺗﺘﻰ. ﻗﯧﺮﯨﻐﺎﻧﺪﺍ ﺋﯘﻧﺪﺍﻕ ﻧﻪﺭﺳﯩﻨﻰ ﺋﯚﮔﯩﻨﯩﺶ ﺋﺎﺳﺎﻥ ﺋﻪﻣﻪﺳﻜﻪﻥ". ﺑﯘ ﻛﯩﺸﯩﻨﯩﯖﻤﯘ ﺧﻮﺗﯘﻧﻰ ﺑﯩﻠﻪﻥ ﺑﯩﺮﻟﯩﺸﯩﭗ ﺋﺎﭼﻘﺎﻥ ﺷﻪﺧﺴﯩﻲ ﺷﯩﺮﻛﯩﺘﻰ ﺑﺎﺭ. ﻫﺎﺯﯨﺮ 50 ﻳﺎﺷﻼﺭﻏﺎ ﻳﯧﻘﯩﻨﻠﯩﺸﯩﭗ ﻗﺎﻟﻐﺎﻧﺪﺍ، ﺋﺎﻟﯩﻲ ﻣﻪﻛﺘﻪﭖ ﻣﺎﺗﯧﻤﺎﺗﯩﻜﺎ ﺩﻩﺭﺳﯩﻨﻰ ﺋﻮﻗﯘﺷﻘﺎ ﺑﺎﺷﻼﭘﺘﯘ. ﻣﻪﻥ 1990-ﻳﯩﻠﻰ ﻣﺎﮔﯩﺴﺘﯧﺮﻟﯩﻖ ﺋﯘﻧﯟﺍﻧﻰ ﺋﺎﻟﻐﺎﻧﺪﺍ، ﺋﻮﻗﯘﺵ ﭘﯜﺗﺘﯜﺭﯛﺵ ﻣﯘﺭﺍﺳﯩﻤﯩﺪﺍ ﺳﻪﻫﻨﯩﮕﻪ ﭼﯩﻘﯩﭗ، ﻛﯧﻨﯩﺸﻜﻪ ﺋﺎﻟﻐﺎﻧﻼﺭﻧﯩﯔ ﺋﯩﭽﯩﺪﻩ 65 ﻳﺎﺷﻠﯩﻖ ﺑﯩﺮ ﻛﯩﺸﻰ ﺑﺎﺭ ﺋﯩﺪﻯ. ﺋﯘ ﻛﯩﺸﻰ ﺳﻪﻫﻨﯩﮕﻪ ﭼﯩﻘﻘﺎﻧﺪﺍ، ﺯﺍﻟﺪﯨﻜﯩﻠﻪﺭ ﺋﯘﻧﯩﯔ ﺋﺎﺷﯘﻧﺪﺍﻕ ﻗﯧﺮﯨﻐﺎﻧﺪﺍ ﺋﻮﻗﯘﻏﺎﻧﻠﯩﻘﯩﻨﻰ ﺗﻪﺑﺮﯨﻜﻠﻪﭖ، ﻗﺎﺗﺘﯩﻖ ﭼﺎﯞﺍﻙ ﭼﯧﻠﯩﭗ ﻛﻪﺗﻜﻪﻧﯩﺪﻯ. ﻣﯧﻨﯩﯔ ﺑﯩﺮ ﺋﯘﻳﻐﯘﺭ ﺩﻭﺳﺘﯘﻣﻨﯩﯔ 3 ﻛﯩﭽﯩﻚ ﺑﺎﻟﯩﺴﻰ ﺑﺎﺭ ﺑﻮﻟﯘﭖ، ﻳﯧﻘﯩﻨﺪﯨﻦ ﺑﯘﻳﺎﻥ ﻫﻪﻡ ﭘﯜﺗﯜﻥ ﻛﯜﻥ ﺋﯩﺸﻠﻪﭖ، ﻫﻪﻡ ﺑﯩﺮ ﺋﺎﻟﯩﻲ ﻣﻪﻛﺘﻪﭘﺘﻪ ﭘﯜﺗﯜﻥ ﻛﯜﻥ ﺋﻮﻗﯘﯞﺍﺗﯩﺪﯗ. ﺋﺎﺋﯩﻠﻪ ﻛﯩﺮﯨﻤﯩﻨﻰ ﺋﯚﺯﻯ ﺗﺎﭘﻤﯩﺴﺎ ﺑﻮﻟﻤﯩﻐﺎﭼﻘﺎ، ﺋﺎﺷﯘﻧﺪﺍﻕ ﻗﯩﻠﯩﺸﻘﺎ ﻣﻪﺟﺒﯘﺭ ﺑﻮﻟﻐﺎﻧﯩﺪﻯ. ﻳﯧﻘﯩﻨﺪﺍ ﻣﻪﻥ ﺋﯘﻧﯩﯖﻐﺎ ﺑﯩﺮ ﻗﯧﺘﯩﻢ ﺗﯧﻠﯧﻔﻮﻥ ﻗﯩﻠﺴﺎﻡ، ﺋﯘ ﻣﺎﯕﺎ ﻣﯘﻧﺪﺍﻕ ﺩﯦﺪﻯ: "ﺋﻪﺭﻛﯩﻦ، ﻣﻪﻥ ﻫﺎﺯﯨﺮ ﺩﻩﻫﺸﻪﺕ ﺋﺎﻟﺪﯨﺮﺍﺵ ﺑﻮﻟﯘﭖ ﻛﻪﺗﺘﯩﻢ. ﺋﯚﻳﻨﯩﯔ ﺋﯩﭽﯩﺪﻩ ﻣﺎﯞﯗ ﺋﯚﻳﺪﯨﻦ ﺋﺎﯞﯗ ﺋﯚﻳﮕﻪ ﻣﺎﯕﺴﺎﻣﻤﯘ ﻗﻮﻟﯘﻡ ﻗﯘﺭﯗﻕ ﻣﺎﯕﻤﺎﻳﺪﯗ. ﺗﺎﭘﺸﯘﺭﯗﻗﯘﻣﻨﻰ ﺗﺎﻣﺎﻕ ﻳﻪﯞﯦﺘﯩﭗ ﺋﯩﺸﻠﻪﻳﻤﻪﻥ. ﻛﯧﭽﯩﺴﻰ ﺋﻪﯓ ﻛﯚﭖ ﺑﻮﻟﻐﺎﻧﺪﺍ 4 ﺳﺎﺋﻪﺕ ﺋﯘﺧﻼﻳﻤﻪﻥ. ﺧﯘﺩﺍﻳﯩﻢ ﻧﯧﻤﯩﺸﻘﯩﻤﯘ ﺋﺎﺩﻩﻣﻠﻪﺭﻧﻰ ﻛﯧﭽﯩﺴﻰ ﺋﯘﺧﻼﻳﺪﯨﻐﺎﻥ ﻗﯩﻠﯩﭗ ﻗﻮﻳﻐﺎﻧﻜﯩﻦ. ﺑﻪﺯﯨﺪﻩ ﻛﯜﻧﯩﮕﻪ 24 ﺳﺎﺋﻪﺕ ﺋﯩﺸﻠﻪﯞﯦﺮﯨﺪﯨﻐﺎﻥ ﻗﯩﻠﯩﭗ ﻳﺎﺭﺍﺗﺴﺎ ﺑﻮﻟﻤﺎﺳﻤﯩﺪﻯ، ﺩﻩﭖ ﺋﻮﻳﻼﻳﻤﻪﻥ".

ﻣﻪﻥ ﺋﺎﻣﯧﺮﯨﻜﯩﻐﺎ ﻛﻪﻟﮕﻪﻧﺪﯨﻦ ﺑﯘﻳﺎﻥ، ﻣﻪﻥ ﺑﯩﻠﻪﻥ ﺑﯩﺮﮔﻪ ﺋﯩﺸﻠﯩﮕﻪﻥ ﺟﯘﯕﮕﻮﻟﯘﻕ ﺧﻪﻧﺰﯗ ﺋﻮﻗﯘﻏﯘﭼﯩﻼﺭﺩﯨﻦ ﻧﯘﺭﻏﯘﻧﻠﯩﺮﻯ ﻣﻪﻧﺪﯨﻦ ﺟﯘﯕﮕﻮﺩﯨﻜﻰ ﻗﺎﻳﺴﻰ ﺋﺎﻟﯩﻲ ﻣﻪﻛﺘﻪﭘﻨﻰ ﭘﯜﺗﺘﯜﺭﮔﻪﻧﻠﯩﻜﯩﻤﻨﻰ ﺳﻮﺭﺍﭖ ﺑﻮﻟﺪﻯ. ﻣﻪﻥ ﻫﻪﺭ ﻗﯧﺘﯩﻢ ﻧﺎﻫﺎﻳﯩﺘﻰ ﭘﻪﺧﯩﺮﻟﻪﻧﮕﻪﻥ ﻫﺎﻟﺪﺍ "ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﻨﻰ" ﺩﻩﭖ ﺟﺎﯞﺍﺏ ﺑﯧﺮﯨﭗ ﻛﻪﻟﺪﯨﻢ. ﻣﻪﻥ ﻫﺎﺯﯨﺮﻏﯩﭽﻪ ﺋﻪﻧﮕﻠﯩﻴﻪﻧﯩﯔ ﺋﻮﻛﯩﺴﻔﻮﺭﺩ ﺋﯘﻧﯩﯟﯦﺮﺳﯩﺘﯧﺘﯩﻨﻰ، ﺋﺎﻣﯧﺮﯨﻜﯩﻨﯩﯔ ﺧﺎﺭﯞﺍﺭﺩ، ﺳﺘﺎﻧﻔﻮﺭﺩ، ﻣﯩﺖ، Caltech ﻗﺎﺗﺎﺭﻟﯩﻖ ﻣﻪﻛﺘﻪﭘﻠﯩﺮﯨﺪﻩ ﺩﻭﻛﺘﻮﺭﻟﯘﻕ ﺋﯘﻧﯟﺍﻧﻰ ﺋﺎﻟﻐﺎﻥ ﻛﯩﺸﯩﻠﻪﺭﺩﯨﻦ ﻧﯘﺭﻏﯘﻧﻠﯩﺮﻯ ﺑﯩﻠﻪﻥ ﺋﯩﺸﻠﻪﭖ ﺑﺎﻗﺘﯩﻢ. ﻳﺎﭘﻮﻧﯩﻴﻪﺩﻩ ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﭘﺮﻭﻓﯧﺴﺴﻮﺭﻯ ﺑﯩﻠﻪﻥ ﺋﯩﺸﻠﻪﭖ ﺑﺎﻗﺘﯩﻢ. ﺷﺎﯕﺨﻪﻱ ﻗﺎﺗﻨﺎﺵ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺑﯩﺮ ﻳﯩﻞ ﺑﯩﻠﯩﻢ ﺋﺎﺷﯘﺭﯗﭖ ﺑﺎﻗﺘﯩﻢ. ﺋﺎﻣﯧﺮﻛﯩﻠﯩﻖ، ﻳﺎﭘﻮﻧﯩﻴﯩﻠﯩﻚ، ﺋﻪﻧﮕﻠﯩﻴﯩﻠﯩﻚ، ﻓﯩﻨﻼﻧﺪﯨﻴﻪﻟﯩﻚ، ﺋﯩﺮﺍﻧﻠﯩﻖ، ﻫﯩﺴﺪﯨﺴﺘﺎﻧﻠﯩﻖ، ﺷﺎﯕﮕﺎﯕﻠﯩﻖ، ﺗﻪﻳﯟﻩﻧﻠﯩﻚ، ﻛﻮﺭﯨﻴﻪﻟﯩﻚ، ﯞﯦﻨﮕﯩﺮﯨﻴﻪﻟﯩﻚ ﯞﻩ ﻛﺎﻧﺎﺩﺍﻟﯩﻖ ﻗﺎﺗﺎﺭﻟﯩﻖ ﻳﻮﻗﯘﺭﻯ ﺩﻩﺭﯨﺠﯩﻠﯩﻚ ﺋﯩﻨﮋﯨﻨﯧﺮﻻﺭ ﯞﻩ ﻳﯘﻗﯩﺮﻯ ﺗﯧﺨﻨﯩﻜﯩﻠﯩﻖ ﺷﯩﺮﻛﻪﺕ ﺑﺎﺷﻠﯩﻘﻠﯩﺮﻯ ﺑﯩﻠﻪﻥ ﺋﯩﺸﻠﻪﭖ ﺑﺎﻗﺘﯩﻢ. ﺋﯘﻻﺭﻧﯩﯔ ﭼﻮﯕﻘﯘﺭ ﻫﯚﺭﻣﯩﺘﯩﮕﻪ ﺋﯧﺮﯨﺸﺘﯩﻢ. ﻛﻪﺳﭗ ﺟﻪﻫﻪﺗﺘﻪ ﻣﻪﻧﺪﯨﻦ ﺋﺎﻻﻫﯩﺪﻩ ﺋﯧﺸﯩﭗ ﭼﯜﺷﯩﺪﯨﻐﺎﻥ ﺑﯩﺮﻩﺭ ﺟﯘﯕﮕﻮﻟﯘﻕ ﺧﻪﻧﺰﯗ ﺋﯩﻨﮋﯨﻨﯧﺮﻧﻰ ﺋﯘﭼﺮﯨﺘﯩﭗ ﺑﺎﻗﻤﯩﺪﯨﻢ. ﻫﺎﺯﯨﺮﻏﯩﭽﻪ ﻣﯧﻨﯩﯔ ﺋﺎﻗﺴﯘ 4-ﺑﺎﺷﻼﻧﻐﯘﭺ ﻣﻪﻛﺘﻪﭘﺘﻪ، ﺋﺎﻗﺴﯘ 1-ﺋﻮﺗﺘﯘﺭﺍ ﻣﻪﻛﺘﻪﭘﺘﻪ ﯞﻩ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﻮﻗﯘﻏﺎﻧﻠﯩﻘﯩﻢ ﭼﯧﻨﯩﭗ ﺑﺎﻗﻘﺎﻥ ﺋﻪﻣﻪﺱ. ﺋﯚﺯﯛﻣﻨﯩﯔ ﺑﯩﺮ ﺋﯘﻳﻐﯘﺭﻟﯘﻗﯘﻡ ﭼﯧﻨﯩﭗ ﺑﺎﻗﻘﺎﻥ ﺋﻪﻣﻪﺱ. ﺋﯚﺯﯛﻣﻨﯩﯔ ﺋﺎﺷﯘ ﻣﻪﻛﺘﻪﭘﻠﻪﺭﺩﻩ ﺋﻮﻗﯘﻏﺎﻧﻠﯩﻘﯩﻤﺪﯨﻦ ﺋﯩﻨﺘﺎﻳﯩﻦ ﭘﻪﺧﯩﺮﻟﯩﻨﯩﻤﻪﻥ. ﻛﯚﭖ ﺳﺎﻧﺪﯨﻜﻰ ﻛﯩﺸﯩﻠﻪﺭ ﺋﯩﻘﺘﯩﺪﺍﺭﯨﻨﯩﯔ ﻳﻮﻗﻠﯘﻗﯩﺪﯨﻦ ﺋﻪﻣﻪﺱ، ﺭﯨﻘﺎﺑﻪﺗﻨﯩﯔ ﺩﻩﺭﯨﺠﯩﺪﯨﻦ ﺗﺎﺷﻘﯩﺮﻯ ﻳﯘﻗﯩﺮﯨﻠﯩﻘﻰ ﯞﻩ ﭘﯘﺭﺳﻪﺗﻨﯩﯔ ﺑﻮﻟﻤﺎﺳﻠﯩﻘﯩﺪﯨﻦ ﺩﺍﯕﻠﯩﻖ ﻣﻪﻛﺘﻪﭘﻜﻪ ﻛﯩﺮﻩﻟﻤﻪﻳﺪﯗ. ﺋﻪﮔﻪﺭ ﺩﺍﯕﻠﯩﻖ ﻣﻪﻛﺘﻪﭘﻜﻪ ﻛﯩﺮﻩﻟﯩﺴﯩﯖﯩﺰ، ﺋﯘ ﻳﻪﺭﺩﻩ ﺳﯩﺰﻣﯘ ﺋﻮﻗﯘﭖ ﻛﯧﺘﻪﻟﻪﻳﺴﯩﺰ.

ﺷﯘﯕﺎ ﺋﻮﺑﺪﺍﻥ ﺋﻮﻳﻼﯓ. ﻗﺎﻧﺪﺍﻕ ﺑﯩﺮ ﺋﺎﺋﯩﻠﯩﺪﻩ ﺗﯘﻏﯘﻟﯘﺷﻨﻰ ﺳﯩﺰ ﺑﻪﻟﮕﯩﻠﯩﻴﻪﻟﻤﻪﻳﺴﯩﺰ. ﻗﺎﻳﺴﻰ ﺑﺎﺷﻼﻧﻐﯘﭺ ﻣﻪﻛﺘﻪﭖ، ﻗﺎﻳﺴﻰ ﺋﻮﺗﺘﯘﺭﺍ ﻣﻪﻛﺘﻪﭘﻜﻪ ﻛﯩﺮﯨﺸﻨﻰ ﺳﯩﺰ ﺋﺎﺳﺎﺳﻪﻥ ﺑﻪﻟﮕﯩﻠﯩﻴﻪﻟﻤﻪﻳﺴﯩﺰ. ﺳﯩﺰ ﻳﺎﺷﯩﻐﺎﻥ ﺩﻩﯞﺭﺩﯨﻜﻰ ﺳﯩﻴﺎﺳﻪﺗﻨﯩﯔ ﻗﺎﻧﺪﺍﻕ ﺑﻮﻟﯘﺷﻰ ﺳﯩﺰﻧﯩﯔ ﺋﯩﺮﺍﺩﯨﯖﯩﺰﮔﻪ ﺑﺎﻏﻠﯩﻖ ﺋﻪﻣﻪﺱ. ﺋﯚﺯﯨﯖﯩﺰ ﻛﻮﻧﺘﺮﻭﻝ ﻗﯩﻼﻟﻤﺎﻳﺪﯨﻐﺎﻥ ﺋﯩﺸﻼﺭ ﺋﯜﺳﺘﯩﺪﻩ ﻗﺎﻧﭽﯩﻠﯩﻚ ﺋﺎﻫ ﺋﯘﺭﯗﯓ، ﻳﻮﻟﯩﯖﯩﺰﻧﻰ ﺗﯜﺯ ﻗﯩﻠﻤﯩﻐﺎﻥ ﺑﺎﻫﺎﻧﻪ-ﺳﻪﯞﻩﺑﻠﻪﺭ ﺋﯜﺳﺘﯩﺪﻩ ﻗﺎﻧﭽﯩﻠﯩﻚ ﺷﯩﻜﺎﻳﻪﺕ ﻗﯩﻠﯩﯔ، ﺑﯘ ﺟﻪﻫﻪﺗﺘﻪ ﺳﯩﺰﻧﯩﯔ ﺩﻩﯞﺍﺗﻘﯩﻨﯩﯖﯩﺰ ﻗﺎﻧﭽﯩﻠﯩﻚ ﺋﻪﻗﯩﻠﮕﻪ ﻣﯘﯞﺍﭘﯩﻖ ﺑﻮﻟﺴﯘﻥ، ﺋﯘﻻﺭﻧﯩﯔ ﻫﻪﻣﻤﯩﺴﯩﻨﯩﯔ ﺳﯩﺰ ﺋﯜﭼﯜﻥ، ﺳﯩﺰﻧﯩﯔ ﺋﯩﺴﺘﯩﻘﺒﺎﻟﯩﯖﯩﺰ ﺋﯜﭼﯜﻥ ﻫﻪﭺ ﻗﺎﻧﺪﺍﻕ ﻗﯩﻤﻤﯩﺘﻰ ﻳﻮﻕ. ﻛﯜﻥ ﺑﻮﻳﻰ ﺑﺎﺷﻘﺎ ﺋﯩﺶ ﻗﯩﻠﻤﺎﻱ، ﺑﺎﺷﻘﯩﻼﺭ ﯞﻩ ﺟﻪﻣﺌﯩﻴﻪﺕ ﺋﯜﺳﺘﯩﺪﻩ ﺷﯩﻜﺎﻳﻪﺕ ﻗﯩﻠﺴﯩﯖﯩﺰﻣﯘ، ﺳﯩﺰ ﻳﻪﻧﯩﻼ ﺋﯚﺯﯨﯖﯩﺰﻧﯩﯔ ﺑﯘﺭﯗﻧﻘﻰ ﻫﺎﻟﯩﺘﯩﯖﯩﺰﺩﻩ ﺗﯘﺭﯗﭖ ﻗﯧﻠﯩﯟﯦﺮﯨﺴﯩﺰ. ﺷﯘﯕﺎ ﻳﺎﺧﺸﻰ ﺋﻮﻗﯘﻣﺎﺳﻠﯩﻘﻘﺎ ﺑﺎﻫﺎﻧﻪ ﺋﯩﺰﺩﯨﻤﻪﯓ. ﻳﺎﺧﺸﻰ ﺋﻮﻗﯘﺷﻘﺎ ﻳﻮﻝ ﺋﯩﺰﺩﻩﯓ. ﺳﯩﺰﮔﻪ ﻳﯚﻟﻪﻧﭽﯜﻙ ﺑﻮﻟﻤﯩﺴﺎ، ﻫﯧﭻ ﻛﯩﻤﮕﻪ ﻳﯚﻟﻪﻧﻤﻪﯓ. ﻫﺎﺯﯨﺮﻗﻰ ﺳﯩﺰﮔﻪ ﺗﻪﯞﻩ ﺑﻮﻟﻤﯩﻐﺎﻥ ﻧﻪﺭﺳﯩﻠﻪﺭﮔﻪ ﺋﺎﻟﺪﯨﻨﯩﭗ، ﻛﻪﻟﮕﯜﺳﯩﺪﯨﻜﻰ ﺭﯨﻘﺎﺑﻪﺗﻨﻰ ﺋﯘﻧﺘﯘﭖ ﻗﺎﻟﻤﺎﯓ. ﺳﯩﺰﻧﯩﯔ ﻫﺎﻳﺎﺗﯩﯖﯩﺰﻧﻰ ﺑﺎﺷﻘﺎ ﻫﯧﭽﻜﯩﻢ ﻳﺎﺷﺎﭖ ﺑﯧﺮﻩﻟﻤﻪﻳﺪﯗ. ﺋﯘﻧﻰ ﺋﯚﺯﯨﯖﯩﺰ ﻳﺎﺷﺎﻳﺴﯩﺰ. ﺋﯜﺯﯛﻝ-ﻛﯧﺴﯩﻞ ﺋﯩﺰﺩﯨﻨﯩﭗ، ﺋﯚﺯﯨﯖﯩﺰﻧﯩﯔ ﻛﯩﻢ ﺋﯩﻜﻪﻧﻠﯩﻜﯩﻨﻰ، ﺳﯩﺰﻧﯩﯔ ﺋﺎﻻﻫﯩﺪﯨﻠﯩﻜﯩﯖﯩﺰﻧﯩﯔ ﻧﯧﻤﻪ ﺋﯩﻜﻪﻧﻠﯩﮕﯩﻨﻰ، ﺋﯚﺯﯨﯖﯩﺰﻧﯩﯔ ﻛﻪﻟﮕﯜﺳﯩﺪﻩ ﻗﺎﻳﺴﻰ ﺗﻪﺭﻩﭘﺘﻪ ﺋﻪﯓ ﻣﯘﯞﻩﭘﭙﻪﻗﯩﻴﻪﺗﻠﯩﻚ ﺑﻮﻻﻻﻳﺪﯨﻐﺎﻧﻠﯩﻘﯩﯖﯩﺰﻧﻰ ﺗﯧﭙﯩﭗ ﭼﯩﻘﯩﯔ. ﺷﯘﻧﯩﯖﻐﺎ ﺋﺎﺳﺎﺳﻪﻥ ﺋﯚﺯﯨﯖﯩﺰﻧﯩﯔ ﻛﻪﻟﮕﯜﺳﻰ ﻧﯩﺸﺎﻧﯩﯖﯩﺰﻧﻰ ﺗﯘﺭﻏﯘﺯﯗﭖ ﭼﯩﻘﯩﯔ. ﺋﺎﻧﺪﯨﻦ ﺋﺎﺷﯘ ﻧﯩﺸﺎﻧﯩﯖﯩﺰﻧﻰ ﺋﻪﻣﻪﻟﮕﻪ ﺋﺎﺷﯘﺭﯗﺵ ﺋﯜﭼﯜﻥ ﺋﺎﺗﻠﯩﻨﯩﯔ. ﺋﻪﺗﻪ ﺑﺎﺷﻼﻳﻤﻪﻥ ﺋﻪﻣﻪﺱ، ﺑﯜﮔﯜﻥ ﺑﺎﺷﻼﯓ. ﻫﯧﻠﯩﺮﺍﻕ ﺋﻪﻣﻪﺱ، ﻫﺎﺯﯨﺮ ﺑﺎﺷﻼﯓ. ﺋﺎﻧﺪﯨﻦ ﻣﻪﯕﮕﯜ ﺑﻮﺷﺎﺷﻤﺎﯓ. ﺋﺎﺷﯘﻧﺪﺍﻕ ﻗﯩﻠﺴﯩﯖﯩﺰ، ﺳﯩﺰ ﭼﻮﻗﯘﻡ ﻣﯘﯞﻩﭘﭙﻪﻗﯩﻴﻪﺕ ﻗﺎﺯﯨﻨﯩﺴﯩﺰ. ﻣﻪﻥ ﺷﯘﻧﯩﯖﻐﺎ ﻗﻪﺗﺌﻰ ﺋﯩﺸﯩﻨﯩﻤﻪﻥ.

10. ﺳﻮﺋﺎﻝ: ﻳﯘﺭﺗﺘﯩﻜﻰ ﻳﺎﺵ-ﺋﯚﺳﻤﯜﺭﻟﻪﺭ ﺋﯩﻠﯩﻢ-ﭘﻪﻥ ﺳﺎﻫﻪﺳﯩﺪﻩ ﺋﻪﯓ ﻗﯩﺰﯨﻘﯩﺪﯨﻐﺎﻥ ﺗﯧﻤﯩﻼﺭﻧﯩﯔ ﺑﯩﺮﻯ ﻧﻮﺑﯧﻞ ﻣﯘﻛﺎﭘﺎﺗﻰ. ﺳﯩﺰﭼﻪ ﻛﻪﻟﮕﯜﺳﯩﺪﻩ ﺋﯘﻳﻐﯘﺭﻻﺭﺩﯨﻨﻤﯘ ﻧﻮﺑﯧﻞ ﻣﯘﻛﺎﭘﺎﺗﻰ ﺋﺎﻟﯩﺪﯨﻐﺎﻥ ﺋﺎﺩﻩﻡ ﭼﯩﻘﺎﺭﻣﯘ؟ ﺑﯘ ﺗﻮﻏﺮﯨﺪﺍ ﺋﻮﻳﻠﯩﻐﺎﻧﻠﯩﺮﯨﯖﯩﺰﻧﻰ ﺳﯚﺯﻟﻪﭖ ﺑﻪﺭﮔﻪﻥ ﺑﻮﻟﺴﯩﯖﯩﺰ؟

ﺟﺎﯞﺍﺏ: ﻣﻪﻥ ﺋﺎﻟﺪﻯ ﺑﯩﻠﻪﻥ ﻧﻮﺑﯧﻞ ﻣﯘﻛﺎﭘﺎﺗﯩﻨﻰ ﻗﯩﺴﻘﯩﭽﻪ ﭼﯜﺷﻪﻧﺪﯛﺭﯛﭖ ﺋﯚﺗﻪﻱ. ﻧﻮﺑﯧﻞ ﻣﯘﻛﺎﭘﺎﺗﻰ 1-ﺑﻮﻟﯘﭖ ﺗﻪﺳﯩﺲ ﻗﯩﻠﯩﻨﻐﺎﻥ ﺧﻪﻟﻘﺌﺎﺭﺍﻟﯩﻖ ﻣﯘﻛﺎﭘﺎﺕ ﺑﻮﻟﯘﭖ، ﺋﯘ 1901-ﻳﯩﻠﻰ ﻓﯩﺰﯨﻜﺎ، ﺧﯩﻤﯩﻴﻪ، ﻓﯩﺰﯨﺌﻮﻟﻮﮔﯩﻴﻪ ﻳﺎﻛﻰ ﻣﯧﺪﯨﺘﺴﯩﻨﺎ، ﺋﻪﺩﻩﺑﯩﻴﺎﺕ ﯞﻩ ﺗﯩﻨﭽﻠﯩﻖ ﻗﺎﺗﺎﺭﻟﯩﻖ ﺳﺎﻫﻪﻟﻪﺭ ﺑﻮﻳﯩﭽﻪ ﺑﯧﺮﯨﻠﯩﺸﻜﻪ ﺑﺎﺷﻠﯩﻐﺎﻥ. 1968-ﻳﯩﻠﻰ Sweden (ﺷﯩﯟﯦﺘﺴﺎﺭﯨﻴﻪ) ﺑﺎﻧﻜﯩﺴﻰ Alfrd Nobl ﺧﺎﺗﯩﺮﯨﺴﻰ ﺋﯜﭼﯜﻥ ﺋﯩﻘﺘﯩﺴﺎﺩ ﺋﯩﻠﻤﻰ ﺳﺎﻫﻪﺳﯩﺪﯨﻤﯘ ﻧﻮﺑﯧﻞ ﻣﯘﻛﺎﭘﺎﺗﯩﻨﻰ ﺗﻪﺳﯩﺲ ﻗﯩﻠﻐﺎﻥ. ﻫﻪﺭ ﺑﯩﺮ ﻣﯘﻛﺎﭘﺎﺕ ﺑﯩﺮﺩﯨﻦ ﻣﯧﺪﺍﻝ، ﺧﯘﺳﯘﺳﯩﻲ ﺩﯨﭙﻠﻮﻣﺎ (ﮔﯘﯞﺍﻫﻨﺎﻣﻪ) ﯞﻩ ﭘﯘﻟﺪﯨﻦ ﺗﻪﺭﻛﯩﺐ ﺗﺎﭘﯩﺪﯗ. ﻧﻮﺑﯧﻞ ﻣﯘﻛﺎﭘﺎﺗﯩﻨﻰ ﺋﻪﯓ ﻛﯚﭖ ﺋﺎﻟﻐﺎﻥ ﺋﺎﻟﺪﯨﻨﻘﻰ 10 ﺩﯙﻟﻪﺕ ﺗﯚﯞﻩﻧﺪﯨﻜﯩﻠﻪﺭﺩﯨﻦ ﺋﯩﺒﺎﺭﻩﺕ (1901-2002):

1.ﺋﺎﻣﯧﺮﯨﻜﺎ: (261)؛ 2.ﺋﻪﻧﮕﻠﯩﻴﻪ: (79)؛ 3.ﮔﯧﺮﻣﺎﻧﯩﻴﻪ: (61)؛ 4.ﻓﺮﺍﻧﺴﯩﻴﻪ: (28)؛ 5.ﺷﯩﯟﯦﺘﺴﺎﺭﯨﻴﻪ: (22)؛ 6.ﺷﯩﯟﯦﺪﺳﯩﻴﻪ: (18)؛ 7.ﺭﻭﺳﯩﻴﻪ: (11)؛ 8.ﮔﻮﻟﻼﻧﺪﯨﻴﻪ: (9)؛ 9.ﺩﺍﻧﯩﻴﻪ: (8)؛ 10.ﻳﺎﭘﻮﻧﯩﻴﻪ: (7). ﺟﯘﯕﮕﻮ ﺗﯧﺨﻰ ﺑﯩﺮﻧﯩﻤﯘ ﺋﺎﻻﻟﻤﯩﻐﺎﻥ.

ﻳﺎﺷﻼﺭ ﺋﯚﺯﻟﯩﺮﯨﮕﻪ ﺗﯘﺭﻏﯘﺯﯗﺷﻘﺎ ﺗﯧﮕﯩﺸﻠﯩﻚ ﻧﯩﺸﺎﻥ 2 ﺧﯩﻞ ﺑﻮﻟﯩﺪﯗ. ﺋﯘﻧﯩﯔ ﺑﯩﺮﻯ، ﺋﯚﺯﯨﻨﯩﯔ ﺗﺎﻻﻧﺘﻰ ﺑﯩﻠﻪﻥ ﺋﯚﺯ ﺗﯩﺮﯨﺸﭽﺎﻧﻠﯩﻘﯩﻐﯩﻼ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﯘﭖ، ﻳﯧﺘﻪﺭﻟﯩﻚ ﺩﻩﺭﯨﺠﯩﺪﻩ ﺗﯩﺮﯨﺸﺴﺎ، ﺋﻪﻣﻪﻟﮕﻪ ﺋﺎﺷﯘﺭﻏﯩﻠﻰ ﺑﻮﻟﯩﺪﯨﻐﺎﻥ ﻧﯩﺸﺎﻧﺪﯗﺭ. ﻣﻪﺳﯩﻠﻪﻥ، ﺋﻪﮔﻪﺭ ﺳﯩﺰ ﻛﯩﭽﯩﻜﯩﯖﯩﺰﺩﯨﻼ "ﻣﻪﻥ ﭼﻮﯓ ﺑﻮﻟﻐﺎﻧﺪﺍ ﭼﻮﻗﯘﻡ ﺑﯩﺮ ﺩﻭﺧﺘﯘﺭ ﺑﻮﻟﯩﻤﻪﻥ"، ﺩﯦﮕﻪﻧﻨﻰ ﺋﯚﺯﯨﯖﯩﺰﮔﻪ ﻧﯩﺸﺎﻥ ﻗﯩﻠﯩﭗ، ﺷﯘ ﻧﯩﺸﺎﻧﻐﺎ ﻳﯧﺘﯩﺶ ﺋﯜﭼﯜﻥ ﻳﯧﺘﻪﺭﻟﯩﻚ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﻪﺗﺴﯩﯖﯩﺰ، ﺳﯩﺰ ﭼﻮﻗﯘﻡ ﺩﻭﺧﺘﯘﺭ ﺑﻮﻻﻻﻳﺴﯩﺰ. ﺑﯘ ﺟﯘﯕﮕﻮﺩﯨﻤﯘ، ﺋﺎﻣﯧﺮﯨﻜﯩﺪﯨﻤﯘ ﺷﯘﻧﺪﺍﻕ. ﻣﻪﻥ ﻛﯩﭽﯩﻜﯩﻤﺪﯨﻦ ﺗﺎﺭﺗﯩﭗ ﺭﺍﺩﯨﺌﻮ ﺋﯧﻠﯧﻜﺘﺮﻭﻧﯩﻜﺎ ﻛﻪﺳﭙﯩﮕﻪ ﻗﯩﺰﯨﻘﻘﺎﻥ ﺋﯩﺪﯨﻢ. ﻣﺎﻧﺎ ﻫﺎﺯﯨﺮ ﺋﺎﺷﯘ ﻛﻪﺳﭙﻨﯩﯔ ﺑﯩﺮ ﺗﺎﺭﻣﯩﻘﯩﺪﺍ ﺋﯩﺸﻠﻪﯞﺍﺗﯩﻤﻪﻥ. ﻳﻪﻧﻪ ﺑﯩﺮﻯ ﺑﻮﻟﺴﺎ، ﺋﯘ ﭘﻪﻗﻪﺕ ﺋﯚﺯ ﺗﯩﺮﯨﺸﭽﺎﻧﻠﯩﻘﯩﯖﯩﺰﻏﯩﻼ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﻤﯩﻐﺎﻥ، ﺩﻩﺭﯨﺠﯩﺪﯨﻦ ﺗﺎﺷﻘﯩﺮﻯ ﺭﯨﻘﺎﺑﻪﺕ ﯞﻩ ﺑﻪﻟﮕﯩﻠﯩﻚ ﺩﻩﺭﯨﺠﯩﺪﯨﻜﻰ ﺗﯘﻏﻤﺎ ﺗﺎﻻﻧﺖ ﺗﻪﻟﻪﭖ ﻗﯩﻠﯩﺪﯨﻐﺎﻥ ﻧﯩﺸﺎﻧﺪﯗﺭ. ﻣﻪﺳﯩﻠﻪﻥ، ﺑﯩﺮ ﻧﺎﺧﺸﯩﭽﻰ ﺑﻮﻟﯘﺵ، ﻫﻮﻟﻠﻴﯟﻭﺩﻗﺎ ﻛﯧﻠﯩﭗ، ﻛﯩﻨﻮ ﭼﻮﻟﭙﯩﻨﻰ ﺑﻮﻟﯘﺵ ﯞﻩ ﻧﻮﺑﯧﻞ ﻣﯘﻛﺎﭘﺎﺗﻰ ﺋﯧﻠﯩﺶ. 2-ﺧﯩﻠﺪﯨﻜﻰ ﻧﯩﺸﺎﻧﻨﯩﯔ ﺋﻪﻣﻪﻟﮕﻪ ﺋﯧﺸﯩﺶ-ﺋﺎﺷﻤﺎﺳﻠﯩﻘﻰ ﭘﻪﻗﻪﺕ ﺋﯚﺯﯨﯖﯩﺰﮔﯩﻼ ﻣﯘﻧﺎﺳﯩﯟﻩﺗﻠﯩﻚ ﺑﻮﻟﻤﯩﻐﺎﭼﻘﺎ، ﺋﯘﻧﻰ ﻫﻪﺭﮔﯩﺰ ﺋﯚﺯﯨﯖﯩﺰﻧﯩﯔ ﺋﺎﺳﺎﺳﻠﯩﻖ ﻧﯩﺸﺎﻧﻰ ﻗﯩﻠﻤﺎﺳﻠﯩﻘﯩﯖﯩﺰ ﻛﯧﺮﻩﻙ (ﺋﻪﮔﻪﺭ ﺳﯩﺰﻧﯩﯔ ﺋﺎﯞﺍﺯﯨﯖﯩﺰ ﻳﺎﺧﺸﻰ ﺑﻮﻟﺴﺎ، ﻧﺎﺧﺸﯩﭽﻰ ﺑﻮﻟﯘﺷﻨﻰ ﺋﺎﺳﺎﺳﻠﯩﻖ ﻧﯩﺸﺎﻥ ﻗﯩﻠﺴﯩﯖﯩﺰ ﺋﻪﻟﯟﻩﺗﺘﻪ ﺑﻮﻟﯩﯟﯦﺮﯨﺪﯗ). ﻛﯚﭘﯩﻨﭽﻪ ﺋﻪﻫﯟﺍﻟﺪﺍ، ﺋﯚﺯﯨﯖﯩﺰﮔﻪ 1-ﺧﯩﻠﺪﯨﻜﻰ ﻧﯩﺸﺎﻧﺪﯨﻦ ﺑﯩﺮﻧﻰ ﺗﯘﺭﻏﯘﺯﯗﯞﯦﻠﯩﭗ، ﺋﺎﻧﺪﯨﻦ 2-ﺧﯩﻠﺪﯨﻜﯩﻨﻰ ﻗﻮﺷﯘﻣﭽﻪ ﻗﯩﻠﯩﺸﯩﯖﯩﺰ ﻛﯧﺮﻩﻙ.

ﻧﻮﺑﯧﻞ ﻣﯘﻛﺎﭘﺎﺗﻰ ﻫﻪﺭ ﻳﯩﻠﻰ ﻫﻪﺭ ﺑﯩﺮ ﺳﺎﻫﻪﺩﻩ ﺩﯗﻧﻴﺎ ﺑﻮﻳﯩﭽﻪ ﭘﻪﻗﻪﺕ ﺑﯩﺮﻻ ﺋﺎﺩﻩﻣﮕﻪ ﻳﺎﻛﻰ ﺑﯩﺮ ﮔﯘﺭﯗﭘﭙﺎ ﺋﺎﺩﻩﻣﮕﻪ ﺑﯧﺮﯨﻠﯩﺪﯗ. ﺑﯘ ﻣﯘﻛﺎﭘﺎﺗﻨﻰ ﺋﺎﻟﻐﺎﻧﻼﺭ ﻛﯚﭘﯩﻨﭽﻪ ﯞﺍﻗﯩﺘﻼﺭﺩﺍ ﺋﯚﺯﻟﯩﺮﯨﻨﯩﯔ ﺋﯘﻧﻰ ﺋﺎﻻﻻﻳﺪﯨﻐﺎﻧﻠﯩﻘﯩﻨﻰ ﺗﺎﻛﻰ ﺋﻪﯓ ﺋﺎﺧﯩﺮﯨﺪﺍ ﻧﻮﺑﯧﻞ ﻣﯘﻛﺎﭘﺎﺗﻰ ﻛﻮﻣﯩﺘﯧﺘﯩﻨﯩﯔ ﺋﺎﯞﺍﺯ ﺑﯧﺮﯨﺶ ﻧﻪﺗﯩﺠﯩﺴﻰ ﭼﯩﻘﻤﯩﻐﯩﭽﻪ ﺑﯩﻠﻤﻪﻳﺪﯗ. ﺷﯘﯕﺎ ﺋﯘﻻﺭ ﻫﻪﺭﮔﯩﺰ ﺋﯚﻣﯜﺭ ﺑﻮﻳﻰ ﻧﻮﺑﯧﻞ ﻣﯘﻛﺎﭘﺎﺗﻰ ﺋﯧﻠﯩﺶ ﺋﯜﭼﯜﻥ ﺗﯩﺮﯨﺸﻘﺎﻧﻼﺭ ﺋﻪﻣﻪﺱ. ﻟﯧﻜﯩﻦ، ﺋﯩﻠﯩﻢ-ﭘﻪﻧﻨﯩﯔ ﻳﯘﻗﯩﺮﻯ ﭘﻪﻟﻠﯩﺴﯩﮕﻪ ﭼﯩﻘﯩﺶ ﺋﯜﭼﯜﻥ ﭘﯜﺗﯜﻥ ﺋﯚﻣﺮﯨﻨﻰ ﺋﺎﺗﯩﻐﺎﻧﻼﺭﺩﯗﺭ. ﺑﯘ ﺋﺎﺩﻩﻣﻠﻪﺭﻧﯩﯔ ﻛﯚﭘﯩﻨﭽﯩﻠﯩﺮﻯ ﺋﯜﭼﯜﻥ ﺋﯘﻻﺭﻧﯩﯔ ﺋﻪﯓ ﻫﻮﺯﯗﺭﻟﯩﻨﯩﺪﯨﻐﺎﻥ، ﻫﻪﻣﻤﯩﺪﯨﻦ ﻣﯘﻫﯩﻢ ﺋﯩﺸﻰ ﺋﯚﺯﻟﯩﺮﻯ ﺷﯘﻏﯘﻟﻠﯩﻨﯩﯟﺍﺗﻘﺎﻥ ﺋﯩﻠﻤﯩﻲ ﺗﻪﺗﻘﯩﻘﺎﺗﺘﯩﻦ ﺋﯩﺒﺎﺭﻩﺗﺘﯘﺭ. ﺷﯘﯕﺎ، ﺑﯘ ﺋﺎﺩﻩﻣﻠﻪﺭﻧﯩﯔ ﻛﯚﭘﯩﻨﭽﯩﻠﯩﺮﻯ ﺋﯜﭼﯜﻥ، ﻣﻪﻥ ﺑﯘ ﺳﯚﻫﺒﻪﺗﻨﯩﯔ ﺋﺎﻟﺪﯨﻨﻘﻰ ﻗﯩﺴﻤﯩﺪﺍ ﺑﺎﻳﺎﻥ ﻗﯩﻠﻐﺎﻥ ﺋﯩﺸﻼﺭﻧﯩﯔ ﻣﯘﻫﯩﻤﻠﯩﻖ ﺗﻪﺭﺗﯩﭙﯩﻨﯩﯔ ﺋﻪﯓ ﺋﺎﻟﺪﯨﺪﺍ ﺋﯚﺯﯨﻨﯩﯔ ﺗﻪﺗﻘﯩﻘﺎﺗﻰ ﺗﯘﺭﯨﺪﯗ.

ﻣﻪﻥ ﻳﯧﻘﯩﻨﺪﺍ ﺑﯩﺮ ﻗﯧﺘﯩﻢ Caltech (ﻳﻪﻧﻰ، "California Institute of Technology" ﺩﯦﮕﻪﻥ ﺋﺎﻟﯩﻲ ﻣﻪﻛﺘﻪﭘﻨﻰ ﺩﯦﻤﻪﻛﭽﻰ. ﺑﯩﺰﻧﯩﯔ ﺋﯩﺪﺍﺭﻩ JPL ﺋﺎﺷﯘ ﻣﻪﻛﺘﻪﭘﻜﻪ ﻗﺎﺭﺍﻳﺪﯗ) ﺯﯨﻴﺎﺭﻩﺕ ﻗﯩﻠﺪﯨﻢ. ﺑﺎﻛﺎﻻﯞﺭ ﺋﻮﻗﯘﻏﯘﭼﯩﻠﯩﺮﯨﻨﯩﯔ ﻳﺎﺗﺎﻗﻠﯩﺮﯨﻐﺎ ﻛﯩﺮﯨﭗ ﺑﺎﻗﺘﯩﻢ. ﺑﯘ ﻣﻪﻛﺘﻪﭘﻜﻪ ﻛﯩﺮﮔﻪﻥ ﻫﻪﺭ ﻗﺎﻧﺪﺍﻕ ﺑﺎﻛﺎﻻﯞﺭ ﺋﻮﻗﯘﻏﯘﭼﯩﺴﻰ 1-ﻳﯩﻠﻰ ﭼﻮﻗﯘﻡ ﻣﻪﻛﺘﻪﭖ ﺗﻪﻣﯩﻨﻠﯩﮕﻪﻥ، ﻣﻪﻛﺘﻪﭘﻨﯩﯔ ﺋﯩﭽﯩﺪﯨﻜﻰ ﻳﺎﺗﺎﻗﺘﺎ ﺗﯘﺭﯗﺷﻰ ﻛﯧﺮﻩﻙ ﺋﯩﻜﻪﻥ. ﺑﯘ ﻣﻪﻛﺘﻪﭘﻜﻪ ﻫﻪﺭ ﻳﯩﻠﻰ ﺋﺎﻟﯩﺪﯨﻐﺎﻥ ﺑﺎﻛﺎﻻﯞﺭ ﺋﻮﻗﯘﻏﯘﭼﯩﻨﯩﯔ ﺳﺎﻧﻰ ﺋﯩﻨﺘﺎﻳﯩﻦ ﺋﺎﺯ ﺑﻮﻟﯘﭖ، 200 ﺋﻪﺗﺮﺍﭘﯩﺪﺍ ﺋﯩﻜﻪﻥ. ﻫﻪﻣﺪﻩ ﺋﯘﻻﺭﻧﯩﯔ ﻛﯚﭘﯩﻨﭽﯩﺴﻰ ﺗﺎﻻﻧﺖ ﺟﻪﻫﻪﺗﺘﯩﻦ "ﻧﻮﺭﻣﺎﻝ ﺋﺎﺩﻩﻡ" ﻟﻪﺭﺩﯨﻦ ﺋﻪﻣﻪﺱ ﺑﻮﻟﯘﭖ، ﺋﻮﺗﺘﯘﺭﺍ ﻣﻪﻛﺘﻪﭘﺘﻪ ﺑﯩﺮﻩﺭ ﻧﻪﺭﺳﻪ ﺋﯩﺠﺎﺕ ﻗﯩﻠﯩﭗ ﺑﺎﻗﻘﺎﻧﻼﺭ ﺋﯩﻜﻪﻥ. ﻣﻪﻛﺘﻪﭘﺘﯩﻜﻰ ﭘﺮﻭﻓﯧﺴﺴﻮﺭ ﺑﯩﻠﻪﻥ ﺋﻮﻗﯘﻏﯘﭼﯩﻨﯩﯔ ﻧﯩﺴﺒﯩﺘﻰ 1:3 ﺋﯩﻜﻪﻥ. ﻳﻪﻧﻰ، ﻫﻪﺭ 3 ﺋﻮﻗﯘﻏﯘﭼﯩﻐﺎ ﺑﯩﺮﺩﯨﻦ ﭘﺮﻭﻓﯧﺴﺴﻮﺭ ﺗﻮﻏﺮﺍ ﻛﯧﻠﯩﺪﯨﻜﻪﻥ. ﺩﯦﻤﻪﻙ، ﺑﯘ ﻣﻪﻛﺘﻪﭘﺘﯩﻜﻰ ﭘﺎﺋﺎﻟﯩﻴﻪﺗﻨﯩﯔ ﺋﺎﺳﺎﺳﯩﻲ ﻗﯩﺴﻤﻰ ﺩﻩﺭﺱ ﺋﯚﺗﯜﺵ ﺋﻪﻣﻪﺱ، ﭘﻪﻥ ﺗﻪﺗﻘﯩﻘﺎﺗﻰ ﺋﯩﻜﻪﻥ. Caltech ﺗﻪ ﻫﺎﺯﯨﺮﻏﯩﭽﻪ ﻧﻮﺑﯧﻞ ﻣﯘﻛﺎﭘﺎﺗﯩﻐﺎ ﺋﯧﺮﯨﺸﻜﻪﻧﻠﻪﺭﻧﯩﯔ ﺳﺎﻧﻰ 30 ﻧﻪﭘﻪﺭ ﺋﯩﻜﻪﻥ.

ﻣﻪﻥ ﺋﺎﻟﺪﯨﻨﻘﻰ ﺳﻮﺋﺎﻟﻨﯩﯔ ﺟﺎﯞﺍﺑﯩﺪﺍ ﺋﯧﻴﺘﻘﺎﻧﺪﻩﻙ، ﺋﯘﻳﻐﯘﺭﻻﺭﻧﯩﯔ ﺑﯘ ﺩﯗﻧﻴﺎﺩﯨﻜﻰ ﺑﺎﺷﻘﺎ ﻣﯩﻠﻠﻪﺗﻠﻪﺭﺩﯨﻦ ﻫﯧﭻ ﻗﺎﻧﺪﺍﻕ ﭘﻪﺭﻗﻰ ﻳﻮﻕ. ﺋﯘﻳﻐﯘﺭﻻﺭﻣﯘ ﺑﺎﺷﻘﺎ ﻣﯩﻠﻠﻪﺗﻠﻪﺭ ﻗﯩﻼﻟﯩﻐﺎﻥ ﺋﯩﺸﻨﯩﯔ ﻫﻪﻣﻤﯩﺴﯩﻨﻰ ﻗﯩﻼﻻﻳﺪﯗ. ﻳﯘﺭﺗﯩﻤﯩﺰﺩﯨﻜﻰ ﻳﺎﺵ-ﺋﯚﺳﻤﯜﺭﻟﻪﺭ ﺋﯜﭼﯜﻥ ﻫﺎﺯﯨﺮ "ﻣﻪﺩﻩﻧﯩﻴﻪﺕ ﺋﯩﻨﻘﯩﻼﺑﻰ"، "ﻗﺎﻳﺘﺎ ﺗﻪﺭﺑﯩﻴﻪ ﺋﯧﻠﯩﺶ" ﺩﯦﮕﻪﻥ ﺋﯩﺸﻼﺭ ﺑﻮﻟﻤﯩﻐﺎﻧﺪﯨﻜﯩﻦ، ﺋﯘﻻﺭ ﺋﯩﻠﯩﻢ-ﭘﻪﻧﻨﯩﯔ ﻳﯘﻗﯩﺮﻯ ﭘﻪﻟﻠﯩﺴﯩﮕﻪ ﭼﯩﻘﯩﺸﻘﺎ ﻫﻪﻗﯩﻘﯩﻲ ﺋﯩﺮﺍﺩﻩ ﺑﺎﻏﻼﭖ، ﻗﺎﺗﺘﯩﻖ ﺗﯩﺮﯨﺸﺴﯩﻼ، 28 ﻳﺎﺷﻘﺎ ﻛﯩﺮﻣﻪﻱ ﺗﯘﺭﯗﭖ ﺩﻭﻛﺘﻮﺭﻟﯘﻕ ﺋﯘﻧﯟﺍﻧﯩﻨﻰ ﺋﺎﻻﻻﻳﺪﯗ. ﻣﺎﻧﺎ ﺷﯘ ﻳﺎﺷﻼﺭﻧﯩﯔ ﺋﯩﭽﯩﺪﯨﻦ، ﻫﻪﻣﺪﻩ ﻫﺎﺯﯨﺮ ﭼﻪﺕ ﺋﻪﻟﺪﻩ ﻳﺎﺷﺎﯞﺍﺗﻘﺎﻥ ﺋﯘﻳﻐﯘﺭ ﭘﻪﺭﺯﻩﻧﺘﻠﯩﺮﯨﻨﯩﯔ ﺋﯩﭽﯩﺪﯨﻦ ﺋﺎﻣﯧﺮﯨﻜﯩﺪﯨﻜﻰ ﺧﺎﺭﯞﺍﺭﺩ، ﺳﺘﺎﻧﻔﻮﺭﺩ، Caltech ، ﻣﯩﺖ ﮔﻪ ﺋﻮﺧﺸﺎﺵ ﺩﺍﯕﻠﯩﻖ ﻣﻪﻛﺘﻪﭘﻜﻪ ﻛﯩﺮﻩﻟﻪﻳﺪﯨﻐﺎﻧﻠﯩﺮﻯ ﭼﯩﻘﯩﭗ، ﺋﺎﺷﯘ ﻣﻪﻛﺘﻪﭘﻠﻪﺭﻧﯩﯔ ﺑﯩﺮﻩﺭﺳﯩﺪﻩ ﺗﻪﺗﻘﯩﻘﺎﺕ ﺋﯧﻠﯩﭗ ﺑﺎﺭﺳﺎ، ﺋﯘﻳﻐﯘﺭﻻﺭ ﺋﯩﭽﯩﺪﯨﻨﻤﯘ ﻧﻮﺑﯧﻞ ﻣﯘﻛﺎﭘﺎﺗﻰ ﺋﺎﻟﯩﺪﯨﻐﺎﻧﻼﺭ ﭼﻮﻗﯘﻡ ﭼﯩﻘﯩﺪﯗ. ﻣﻪﻥ ﺑﯘﻧﯩﯖﻐﺎ ﻗﻪﺗﺌﯩﻲ ﺋﯩﺸﯩﻨﯩﻤﻪﻥ.

ﻣﻪﻥ ﺑﯘ ﻳﻪﺭﺩﻩ ﺗﻪﻛﯩﺘﻠﻪﭖ ﺋﯚﺗﯜﭖ ﻛﯧﺘﯩﺸﻨﻰ ﻻﻳﯩﻖ ﻛﯚﺭﮔﻪﻥ ﻣﯘﻧﺪﺍﻕ ﺑﯩﺮ ﺋﯩﺶ ﺑﺎﺭ. ﺑﺎﻟﯩﻼﺭﻧﻰ ﺋﯩﻠﯩﻢ-ﭘﻪﻧﻨﯩﯔ ﻳﯘﻗﯩﺮﻯ ﭘﻪﻟﻠﯩﺴﯩﮕﻪ ﭼﯩﻘﯩﺸﻘﺎ ﺭﯨﻐﺒﻪﺗﻠﻪﻧﺪﯛﺭﯛﺵ، ﻫﻪﺭﮔﯩﺰ ﺋﯘﻻﺭﻧﻰ ﺑﺎﺷﻼﻧﻐﯘﭼﻨﯩﯔ 1-ﺳﯩﻨﯩﭙﯩﺪﯨﻦ ﺑﺎﺷﻼﭖ ﻫﻪﺭ ﻛﯜﻧﻰ 10 ﻧﻪﭼﭽﻪ ﺳﺎﺋﻪﺕ ﺋﯚﮔﯩﻨﯩﺶ ﻗﯩﻠﯩﺸﻘﺎ ﻣﻪﺟﺒﯘﺭﻻﺵ ﺩﯦﮕﻪﻧﻠﯩﻚ ﺋﻪﻣﻪﺱ. ﺋﯘﻧﺪﺍﻕ ﻗﯩﻠﯩﺶ ﺑﺎﻟﯩﻼﺭﻧﯩﯔ ﻧﻮﺭﻣﺎﻝ ﺋﯚﺳﯜﭖ ﻳﯧﺘﯩﻠﯩﺸﯩﮕﻪ ﺋﯩﻨﺘﺎﻳﯩﻦ ﺯﯨﻴﺎﻧﻠﯩﻖ. ﺋﺎﻣﯧﺮﯨﻜﯩﺪﺍ ﺑﺎﺷﻼﻧﻐﯘﭺ ﻣﻪﻛﺘﻪﭖ ﺑﺎﻟﯩﻠﯩﺮﯨﻐﺎ ﺋﺎﺳﺎﺳﻪﻥ ﺗﺎﭘﺸﯘﺭﯗﻕ ﺑﯧﺮﯨﻠﻤﻪﻳﺪﯗ. ﺗﻮﻟﯘﻗﺴﯩﺰ ﺋﻮﺗﺘﯘﺭﺍ ﻣﻪﻛﺘﻪﭘﺘﯩﻤﯘ ﺗﺎﭘﺸﯘﺭﯗﻕ ﺑﯩﺮ ﻗﻪﺩﻩﺭ ﻳﻪﯕﮕﯩﻞ ﺑﻮﻟﯘﭖ، ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭘﻜﻪ ﭼﯩﻘﻘﺎﻧﺪﯨﻦ ﻛﯧﻴﯩﻦ ﺗﺎﭘﺸﯘﺭﯗﻕ ﺋﯧﻐﯩﺮﻟﯩﺸﯩﺪﯗ. ﺑﺎﺷﻼﻧﻐﯘﭼﺘﺎ ﺋﺎﺗﺎ-ﺋﺎﻧﯩﻼﺭﺩﯨﻦ ﭘﻪﻗﻪﺕ ﺑﺎﻟﯩﻠﯩﺮﯨﻐﺎ ﻛﯚﭘﻠﻪﭖ ﻛﯩﺘﺎﺏ ﺋﻮﻗﯘﭖ ﺑﯧﺮﯨﺶ ﻫﻪﻣﺪﻩ ﺑﺎﻟﯩﻠﯩﺮﯨﻨﻰ ﺋﯚﺯﻟﯜﻛﯩﺪﯨﻦ ﻛﯩﺘﺎﺏ ﺋﻮﻗﯘﺷﻘﺎ ﺭﯨﻐﺒﻪﺗﻠﻪﻧﺪﯛﺭﯛﺵ ﺗﻪﻟﻪﭖ ﻗﯩﻠﯩﻨﯩﺪﯗ. ﺑﺎﻟﯩﻼﺭﻧﯩﯔ ﻫﻪﺭ ﻛﯜﻧﻰ 3-4 ﺳﺎﺋﻪﺕ ﺋﻮﻳﻨﯩﺸﯩﻐﺎ ﻛﺎﭘﺎﻟﻪﺗﻠﯩﻚ ﻗﯩﻠﯩﺶ ﺗﻪﻟﻪﭖ ﻗﯩﻠﯩﻨﯩﺪﯗ. ﺋﺎﻣﯧﺮﯨﻜﯩﺪﯨﻜﻰ ﺋﺎﻕ ﺗﻪﻧﻠﯩﻜﻠﻪﺭﻧﯩﯔ ﺑﺎﻟﯩﻠﯩﺮﯨﻐﺎ ﻛﯩﺘﺎﺏ ﺋﻮﻗﯘﭖ ﺑﯧﺮﯨﺶ ﯞﻩ ﻛﯩﺘﺎﺏ ﺋﻮﻗﯘﺗﯘﺵ ﺋﺎﺩﯨﺘﻰ ﺋﯩﻨﺘﺎﻳﯩﻦ ﺋﻮﻣﯘﻣﻼﺷﻘﺎﻥ ﺑﻮﻟﯘﭖ، ﺑﻪﺯﯨﻠﻪﺭ ﻗﻮﺭﺳﯩﻘﯩﺪﯨﻜﻰ ﺗﯧﺨﻰ ﺗﯘﻏﯘﻟﻤﯩﻐﺎﻥ ﺑﺎﻟﯩﻼﺭﻏﯩﻤﯘ ﻛﯩﺘﺎﺏ ﺋﻮﻗﯘﭖ ﺑﯧﺮﯨﯟﺍﺗﻘﯩﻨﯩﻨﻰ ﺋﯚﺯ ﻛﯚﺯﯛﻡ ﺑﯩﻠﻪﻥ ﻛﯚﺭﺩﯛﻡ. ﻳﺎﺵ ﺋﯚﺳﻤﯜﺭﻟﻪﺭ ﻛﯩﺘﺎﺑﺘﯩﻦ ﻧﯘﺭﻏﯘﻥ ﻛﯩﺸﯩﻠﯩﻚ ﺗﯘﺭﻣﯘﺵ ﺗﻪﺟﺮﯨﺒﯩﻠﯩﺮﯨﻨﻰ ﺋﯚﮔﯩﻨﻪﻟﻪﻳﺪﯗ. ﺷﯘﯕﺎ ﻫﻪﺭ ﺑﯩﺮ ﺋﺎﺗﺎ-ﺋﺎﻧﺎ ﺑﯘ ﻣﻪﺳﯩﻠﯩﮕﻪ ﻫﻪﺭﮔﯩﺰ ﺳﻪﻝ ﻗﺎﺭﯨﻤﺎﺳﻠﯩﻘﻰ ﻛﯧﺮﻩﻙ. ﺋﻪﮔﻪﺭ ﺋﯩﻤﻜﺎﻧﯩﻴﻪﺗﻼ ﻳﺎﺭ ﺑﻪﺭﺳﻪ، ﺑﺎﻟﯩﯖﯩﺰﻏﺎ ﺋﯘﻻﺭ ﻳﺎﺧﺸﻰ ﻛﯚﺭﯨﺪﯨﻐﺎﻥ ﻛﯩﺘﺎﺑﻼﺭﻧﯩﯔ ﻫﻪﻣﻤﯩﺴﯩﻨﻰ ﺋﯧﻠﯩﭗ ﺑﯧﺮﯨﯔ. ﺋﺎﻣﯧﺮﯨﻜﯩﺪﯨﻜﻰ ﺋﺎﻕ ﺗﻪﻧﻠﯩﻜﻠﻪﺭﻧﯩﯔ ﻛﯚﭘﯩﻨﭽﯩﺴﯩﻨﯩﯔ ﺑﯩﺮ ﺋﻮﺭﺗﺎﻕ ﺋﺎﻻﻫﯩﺪﯨﻠﯩﻜﻰ، ﺋﯘﻻﺭ ﮔﻪﭖ-ﺳﯚﺯﮔﻪ، ﺑﺎﺷﻘﯩﻼﺭ ﺑﯩﻠﻪﻥ ﻣﯘﻧﺎﺳﯩﯟﻩﺕ ﻗﯩﻠﯩﺸﻘﺎ ﺋﯩﻨﺘﺎﻳﯩﻦ ﺋﯘﺳﺘﺎ. ﺋﯚﺯﻟﯩﺮﻯ ﺷﯩﺮﻛﻪﺕ ﺋﯧﭽﯩﺸﻘﺎ ﺋﯩﻨﺘﺎﻳﯩﻦ ﻣﺎﻫﯩﺮ. ﺷﯘﻧﺪﺍﻕ ﺑﻮﻟﻐﺎﭼﻘﺎ، ﺋﯘﻻﺭﻧﯩﯔ ﺋﯩﭽﯩﺪﯨﻜﻰ ﺑﯩﺮ ﻗﯩﺴﯩﻤﻼﺭ ﺑﯩﺮﻩﺭ ﺳﺎﻫﻪﺩﻩ ﺋﺎﻻﻫﯩﺪﻩ ﺋﯩﻘﺘﯩﺪﺍﺭﻧﻰ ﻳﯧﺘﯩﻠﺪﯛﺭﻣﯩﮕﻪﻥ ﺗﻪﻗﺪﯨﺮﺩﯨﻤﯘ، ﺋﯚﺯﻟﯩﺮﯨﻨﯩﯔ ﺭﺍﯞﺍﻥ ﺗﯩﻠﻰ ﺋﺎﺭﻗﯩﻠﯩﻖ ﺑﺎﺷﻘﯩﻼﺭ ﺑﯩﻠﻪﻥ ﺋﯜﻧﯜﻣﻠﯜﻙ ﻣﯘﻧﺎﺳﯩﯟﻩﺕ ﻗﯩﻠﯩﺶ ﺋﯩﻘﺘﯩﺪﺍﺭﯨﻐﺎ ﺗﺎﻳﯩﻨﯩﭗ، ﻧﺎﻫﺎﻳﯩﺘﻰ ﺋﻮﺑﺪﺍﻥ ﺟﺎﻥ ﺑﺎﻗﺎﻻﻳﺪﯗ. ﺑﯘ ﺟﻪﻫﻪﺗﺘﻪ ﻛﯩﭽﯩﻜﯩﺪﯨﻦ ﺗﺎﺭﺗﯩﭗ ﻛﯩﺘﺎﺏ ﺋﻮﻗﯘﺷﻘﺎ ﺋﺎﺩﻩﺗﻠﯩﻨﯩﺸﻨﯩﯔ ﺭﻭﻟﻰ ﺋﯩﻨﺘﺎﻳﯩﻦ ﭼﻮﯓ. ﺟﯘﯕﮕﻮ ﻣﺎﺋﺎﺭﯨﭙﯩﺪﺍ ﻛﯩﭽﯩﻚ ﻳﺎﺵ-ﺋﯚﺳﻤﯜﺭﻟﻪﺭﮔﻪ ﺑﻮﻟﻐﺎﻥ ﺑﯧﺴﯩﻢ ﻫﻪﺩﺩﯨﺪﯨﻦ ﺗﺎﺷﻘﯩﺮﻯ ﻳﯘﻗﯩﺮﻯ. ﺑﯘﻧﻰ ﺋﺎﻟﯩﻲ ﻣﻪﻛﺘﻪﭘﻜﻪ ﻛﯩﺮﯨﺸﺘﯩﻜﻰ ﺭﯨﻘﺎﺑﻪﺗﻨﯩﯔ ﻛﯜﭼﻠﯜﻛﻠﯜﻛﻰ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﺑﻮﻟﯘﭖ، ﻣﯧﻨﯩﯖﭽﻪ ﻳﺎﺷﻼﺭﻧﯩﯔ ﻧﻮﺭﻣﺎﻝ ﺋﯚﺳﯜﭖ ﻳﯧﺘﯩﻠﯩﺸﯩﮕﻪ ﺋﯩﻨﺘﺎﻳﯩﻦ ﺋﯧﻐﯩﺮ ﺯﯨﻴﯩﻨﻰ ﺑﻮﻟﯘﯞﺍﺗﯩﺪﯗ. ﻳﯘﻗﯩﺮﯨﻘﯩﻼﺭﺩﯨﻦ ﺑﺎﺷﻘﺎ، ﻣﻪﻥ ﺋﺎﻟﺪﯨﻨﻘﻰ ﻗﯩﺴﯩﻤﻼﺭﺩﺍ ﺋﯧﻴﺘﯩﭗ ﺋﯚﺗﯜﭖ ﻛﻪﺗﻜﻪﻥ، ﻳﺎﺵ-ﺋﯚﺳﻤﯜﺭﻟﻪﺭﻧﯩﯔ ﺋﯚﺯﻯ ﻳﺎﺧﺸﻰ ﻛﯚﺭﮔﻪﻥ ﺑﯩﺮﻩﺭ ﺋﯚﻱ ﻫﺎﻳﯟﯨﻨﯩﻨﻰ ﺑﯧﻘﯩﺸﻰ ﯞﻩ ﺋﯚﺯﻟﯩﺮﻯ ﻳﺎﺧﺸﻰ ﻛﯚﺭﮔﻪﻥ ﺑﯩﺮﻩﺭ ﺗﻪﻧﺘﻪﺭﺑﯩﻴﻪ ﻫﻪﺭﯨﻜﻪﺗﻠﯩﺮﯨﮕﻪ ﻗﺎﺗﻨﯩﺸﯩﺸﯩﻤﯘ ﺋﯘﻻﺭﻧﯩﯔ ﺳﺎﻏﻼﻡ، ﺋﯩﻘﺘﯩﺪﺍﺭﻟﯩﻖ ﺑﻮﻟﯘﭖ ﺋﯚﺳﯜﭖ ﻳﯧﺘﯩﻠﯩﺸﯩﮕﻪ ﺋﯩﻨﺘﺎﻳﯩﻦ ﭘﺎﻳﺪﯨﻠﯩﻖ. ﻣﯧﻨﯩﯔ ﺋﻮﻏﻠﯘﻡ ﺑﺎﺷﻼﻧﻐﯘﭼﺘﺎ ﺋﯩﺸﻠﯩﮕﻪﻥ ﺑﯩﺮ ﭘﺮﻭﺟﻪﻛﺖ، ﺋﯚﺯﯨﻨﯩﯔ ﺋﻪﯓ ﻳﺎﺧﺸﻰ ﻛﯚﺭﯨﺪﯨﻐﺎﻥ ﺗﯘﻏﻘﯩﻨﻰ، ﺩﻭﺳﺘﻰ، ﻛﯩﺘﺎﺑﻰ، ﺗﺎﻣﯩﻘﻰ، ﺋﻮﻳﯘﻧﻰ، ﺋﯚﻱ ﻫﺎﻳﯟﯨﻨﻰ، ﺗﻪﻧﺘﻪﺭﺑﯩﻴﻪ ﺗﯜﺭﻯ ﻗﺎﺗﺎﺭﻟﯩﻘﻼﺭﻧﻰ ﺭﻩﺳﯩﻤﻠﻪﺭ ﺑﯩﻠﻪﻥ ﺑﯩﺮ ﭼﻮﯓ ﺗﺎﺧﺘﺎﻳﻐﺎ ﺗﯩﺰﯨﭗ، ﺋﯘﻻﺭ ﺗﻮﻏﺮﯨﺴﯩﺪﺍ ﭼﯜﺷﻪﻧﺪﯛﺭﯛﺵ ﻳﯧﺰﯨﭗ ﺋﺎﻧﺪﯨﻦ ﺑﯘ ﺗﺎﺧﺘﺎﻳﻨﻰ ﻣﻪﻛﺘﻪﭘﺘﻪ ﻛﯚﺭﮔﻪﺯﻣﻪ ﻗﯩﻠﯩﺶ ﺑﻮﻟﺪﻯ. ﺩﯦﻤﻪﻙ، ﺋﺎﻣﯧﺮﯨﻜﯩﺪﺍ ﻛﯩﺘﺎﺏ ﺋﻮﻗﯘﺵ، ﺋﻮﻳﻨﺎﺵ، ﺋﯚﻱ ﻫﺎﻳﯟﯨﻨﻰ ﺑﯧﻘﯩﺶ ﯞﻩ ﺗﻪﻧﺘﻪﺭﺑﯩﻴﯩﮕﻪ ﻗﺎﺗﻨﯩﺸﯩﺶ ﻗﺎﺗﺎﺭﻟﯩﻘﻼﺭ ﺑﺎﻟﯩﻼﺭ ﻫﺎﻳﺎﺗﯩﺪﯨﻜﻰ ﻛﻪﻡ ﺑﻮﻟﺴﺎ ﺑﻮﻟﻤﺎﻳﺪﯨﻐﺎﻥ ﺑﯩﺮ ﺗﻪﺭﻛﯩﺒﻜﻪ ﺋﺎﻳﻼﻧﻐﺎﻥ.

ﺋﺎﻣﯧﺮﯨﻜﯩﺪﺍ ﻫﻪﺭ ﻗﺎﻧﺪﺍﻕ ﺋﺎﺩﻩﻡ، "ﻣﻪﻥ ﻛﻪﻟﮕﯜﺳﯩﺪﻩ ﺋﺎﻣﯧﺮﯨﻜﺎ ﭘﺮﯦﺰﯨﺪﯨﻨﺘﻰ ﺑﻮﻟﯩﻤﻪﻥ" ﺩﯦﻴﻪﻟﻪﻳﺪﯗ. ﻫﻪﻣﺪﻩ ﺋﺎﺷﯘ ﻳﻮﻟﻨﻰ ﺑﻮﻳﻼﭖ، ﺋﯚﺯ ﺋﯩﻘﺘﯩﺪﺍﺭﻯ ﻳﺎﺭ ﺑﻪﺭﮔﻪﻥ ﺋﻪﯓ ﻳﯘﻗﯩﺮﻯ ﭘﻪﻟﻠﯩﮕﯩﭽﻪ ﭼﯩﻘﺎﻻﻳﺪﯗ. ﻳﺎﺵ ﺋﯚﺳﻤﯜﺭﻟﻪﺭﺩﻩ ﺋﯘﻻﺭﻧﯩﯔ ﺗﯩﺮﯨﺸﺴﯩﻼ ﻫﻪﺭ ﻗﺎﻧﺪﺍﻕ ﺋﯩﺸﻨﻰ ﻗﯩﻼﻻﻳﺪﯨﻐﺎﻧﻠﯩﻘﻰ ﺗﻮﻏﺮﯨﺴﯩﺪﯨﻜﻰ ﺋﯩﺸﻪﻧﭽﺴﯩﻨﻰ ﻳﯧﺘﯩﻠﺪﯛﺭﯛﺵ ﺋﯩﻨﺘﺎﻳﯩﻦ ﻣﯘﻫﯩﻢ. ﺋﺎﺗﺎ-ﺋﺎﻧﯩﻼﺭ ﺑﺎﻟﯩﻠﯩﺮﻯ ﻛﯩﭽﯩﻚ ﯞﺍﻗﺘﯩﺪﯨﻦ ﺑﺎﺷﻼﭘﻼ، ﺋﻪﮔﻪﺭ ﺋﯘﻻﺭ ﻳﺎﺧﺸﻰ ﺋﻮﻗﯘﺳﺎ، ﺋﯘﻻﺭ ﻛﻪﻟﮕﯜﺳﯩﺪﻩ ﭼﻮﯓ ﺋﺎﻟﯩﻢ ﺑﻮﻻﻻﻳﺪﯨﻐﺎﻧﻠﯩﻘﻰ، ﭼﻮﯓ ﺷﯩﺮﻛﻪﺕ ﻗﯘﺭﺍﻻﻳﺪﯨﻐﺎﻧﻠﯩﻘﻰ ﺗﻮﻏﺮﯨﺴﯩﺪﺍ ﺳﯚﺯﻟﻪﭖ ﺗﯘﺭﯗﺷﻰ ﻛﯧﺮﻩﻙ. ﺷﯘﻧﺪﺍﻕ ﻗﯩﻠﻐﺎﻧﺪﺍ ﺑﺎﻟﯩﻼﺭﻧﯩﯔ ﻳﯜﻛﺴﻪﻙ ﻏﺎﻳﯩﻠﻪﺭ ﺑﯩﻠﻪﻥ ﭼﻮﯓ ﺑﻮﻟﯘﺷﯩﻐﺎ ﻧﺎﻫﺎﻳﯩﺘﻰ ﺯﻭﺭ ﺗﻪﺳﯩﺮ ﻛﯚﺭﺳﯩﺘﻪﻟﻪﻳﺪﯗ.

ﺑﺎﺵ ﺑﻪﺗﻜﻪ ﻗﺎﻳﺘﯩﺶ