4- ﺑﯚﻟﯜﻡ

11-ﺳﻮﺋﺎﻝ: ﻳﯘﻗﯩﺮﯨﻘﻰ ﺳﯚﻫﺒﻪﺕ ﺧﺎﺗﯩﺮﯨﺴﯩﺪﯨﻦ ﺳﯩﺰﻧﯩﯔ ﺋﯘﻳﻐﯘﺭﻻﺭ ﺋﯩﭽﯩﺪﯨﻜﻰ ﺋﯚﮔﯩﻨﯩﺶ، ﺧﯩﺰﻣﻪﺕ ﯞﻩ ﺗﯘﺭﻣﯘﺵ ﺟﻪﻫﻪﺗﻠﻪﺭﻧﯩﯔ ﻫﻪﻣﻤﯩﺴﯩﺪﻩ ﺑﯩﺮ ﻗﻪﺩﻩﺭ ﻣﯘﯞﺍﭘﯩﻘﯩﻴﻪﺗﻠﯩﻚ ﻫﺎﻳﺎﺕ ﻛﯚﭼﯜﺭﮔﻪﻥ ﻛﯩﺸﯩﻠﻪﺭﻧﯩﯔ ﺑﯩﺮﻯ ﺋﯩﻜﻪﻧﻠﯩﻜﯩﯖﯩﺰﻧﻰ ﻛﯚﺭﯛﯞﺍﻟﻐﯩﻠﻰ ﺑﻮﻟﯩﺪﯗ. ﺳﯩﺰﻧﯩﯔ ﻛﯩﺸﯩﻠﯩﻚ ﺗﯘﺭﻣﯘﺷﻨﻰ ﺋﺎﺷﯘﻧﺪﺍﻕ ﺋﯧﻠﯩﭗ ﻣﺎﯕﺎﻟﯩﺸﯩﯖﯩﺰﺩﯨﻜﻰ ﺋﻪﯓ ﻣﯘﻫﯩﻢ ﻛﯩﺸﯩﻠﯩﻚ ﺧﺎﺭﺍﻛﺘﯧﺮﻻﺭ ﻗﺎﻳﺴﯩﻼﺭ؟ ﺋﯚﺯ ﺑﯧﺸﯩﯖﯩﺰﺩﯨﻦ ﺋﯚﺗﻜﻪﻥ ﺳﻪﺭﮔﯜﺯﻩﺷﺘﯩﻠﻪﺭ ﺑﯩﻠﻪﻥ ﺑﯩﺮﻟﻪﺷﺘﯜﺭﯛﭖ ﺳﯚﺯﻟﻪﭖ ﺑﻪﺭﮔﻪﻥ ﺑﻮﻟﺴﯩﯖﯩﺰ؟

ﺟﺎﯞﺍﺏ: ﺑﯩﺮ ﺋﺎﺩﻩﻣﻨﯩﯔ ﻛﯩﺸﯩﻠﯩﻚ ﻫﺎﻳﺎﺗﯩﻨﯩﯔ ﻗﺎﻧﺪﺍﻕ ﺑﻮﻟﯘﺷﯩﻨﻰ ﺑﻪﻟﮕﯩﻠﻪﻳﺪﯨﻐﺎﻥ ﺑﯩﺮ ﻣﯘﻫﯩﻢ ﺋﺎﻣﯩﻞ، ﻫﻪﻗﯩﻘﻪﺗﻪﻧﻤﯘ ﺷﯘ ﻛﯩﺸﯩﻨﯩﯔ ﺋﯚﺯﯨﮕﻪ ﺧﺎﺱ ﻣﯩﺠﻪﺯ-ﺧﺎﺭﺍﻛﺘﯧﺮﯨﺪﯨﻦ ﺋﯩﺒﺎﺭﻩﺕ.
ﻣﯧﻨﯩﯔ ﻣﯩﺠﻪﺯ-ﺧﺎﺭﺍﻛﺘﯧﺮﯨﻤﻨﻰ ﺗﯚﯞﻩﻧﺪﯨﻜﻰ 5 ﺋﯧﻐﯩﺰ ﺳﯚﺯﮔﻪ ﻳﯩﻐﯩﻨﭽﺎﻗﻼﺵ ﻣﯘﻣﻜﯩﻦ:
1) ﺳﻪﻣﯩﻤﯩﻴﻠﯩﻚ
2)ﻗﯩﻴﯩﻨﭽﯩﻠﯩﻘﻘﺎ ﺑﻪﺭﺩﺍﺷﻠﯩﻖ ﺑﯧﺮﯨﺶ
3) ﺋﯩﺠﺎﺩﻛﺎﺭ ﺑﻮﻟﯘﺵ
4) ﺋﯩﺸﻨﻰ ﺗﻪﻟﻪﭘﺘﯩﻦ ﻳﯘﻗﯩﺮﻯ ﻗﯩﻠﯩﺶ
5) ﺗﻮﺧﺘﯩﻤﺎﻱ ﺋﯩﺰﺩﯨﻨﯩﺶ
ﺑﯘﻧﯩﯖﺪﯨﻦ 30 ﻧﻪﭼﭽﻪ ﻳﯩﻞ ﺑﯘﺭﯗﻥ ﻣﻪﻥ ﺋﻮﺗﺘﯘﺭﺍ ﻣﻪﻛﺘﻪﭘﺘﻪ ﺋﻮﻗﯘﯞﺍﺗﻘﺎﻥ ﻣﻪﺯﮔﯩﻠﺪﻩ، ﻣﯧﻨﯩﯔ ﺳﯩﻨﯩﭗ ﻣﯘﺩﯨﺮﯨﻢ ﻣﺎﯕﺎ ﻣﯘﻧﺪﺍﻕ ﺳﯚﺯﻟﻪﺭﻧﻰ ﺋﯧﻴﺘﻘﺎﻥ ﺋﯩﺪﻯ: "ﻫﻪﺭ ﺑﯩﺮ ﺋﺎﺩﻩﻣﻨﯩﯔ ﺋﺎﺭﺗﯘﻗﭽﯩﻠﯩﻘﻰ ﺑﻮﻟﯩﺪﯗ. ﻳﯧﺘﻪﺭﺳﯩﺰﻟﯩﻜﯩﻤﯘ ﺑﻮﻟﯩﺪﯗ. ﺋﻪﮔﻪﺭ ﺋﯘﻧﻰ ﺳﯩﺰﻧﯩﯔ ﻣﯜﺭﯨﯖﯩﺰﺩﯨﻜﻰ ﺑﯩﺮ ﺧﯘﺭﺟﯘﻧﻨﯩﯔ ﺋﯩﭽﯩﺪﯨﻜﻰ ﻧﻪﺭﺳﯩﻠﻪﺭﮔﻪ ﺋﻮﺧﺸﺎﺗﺴﺎﻕ، ﺋﺎﺭﺗﯘﻗﭽﯩﻠﯩﻘﯩﯖﯩﺰ ﺧﯘﺭﺟﯘﻧﻨﯩﯔ ﺋﺎﻟﺪﻯ ﺧﺎﻟﺘﯩﺴﯩﺪﺍ، ﻳﯧﺘﻪﺭﺳﯩﺰﻟﯩﻜﯩﯖﯩﺰ ﺑﻮﻟﺴﺎ ﺧﯘﺭﺟﯘﻧﻨﯩﯔ ﺋﺎﺭﻗﺎ ﺧﺎﻟﺘﯩﺴﯩﺪﺍ ﺑﻮﻟﯩﺪﯗ. ﺋﺎﺩﻩﻣﻠﻪﺭ ﻛﯚﭘﯩﻨﭽﻪ ﯞﺍﻗﯩﺘﺘﺎ، ﺧﯘﺭﺟﯘﻧﻨﯩﯔ ﭘﻪﻗﻪﺕ ﺋﺎﻟﺪﯨﺪﯨﻜﻰ ﺧﺎﻟﺘﯩﺴﯩﻨﯩﻼ ﻛﯚﺭﯛﭖ، ﺋﺎﺭﻗﯩﺴﯩﺪﯨﻜﯩﻨﻰ ﻛﯚﺭﻩﻟﻤﻪﻳﺪﯗ. ﺑﯘ ﺋﯩﻨﺘﺎﻳﯩﻦ ﺧﻪﺗﻪﺭﻟﯩﻚ. ﺋﺎﺩﻩﻡ ﺧﯘﺭﺟﯘﻧﻨﯩﯔ ﺋﺎﺭﻗﯩﺴﯩﻨﯩﻤﯘ ﻛﯚﺭﻩﻟﯩﮕﻪﻧﺪﯨﻼ، ﺋﺎﻧﺪﯨﻦ ﺋﯚﺯﯨﮕﯩﻤﯘ ﯞﻩ ﺑﺎﺷﻘﯩﻼﺭﻏﯩﻤﯘ ﺗﻮﻏﺮﺍ ﻣﯘﺋﺎﻣﯩﻠﻪ ﻗﯩﻼﻻﻳﺪﯗ، ﻫﻪﻣﺪﻩ ﺗﻮﺧﺘﯩﻤﺎﻱ ﺋﺎﻟﻐﺎ ﺑﺎﺳﺎﻻﻳﺪﯗ". ﻣﻪﻥ ﺷﯘﻧﯩﯖﺪﯨﻦ ﺑﺎﺷﻼﭖ ﺑﯘ ﺳﯚﺯﻟﻪﺭﻧﻰ ﺋﯧﺴﯩﻤﺪﯨﻦ ﭼﯩﻘﯩﺮﯨﭗ ﺑﺎﻗﻤﯩﺪﯨﻢ. ﻣﻪﻥ ﺋﯩﺰﭼﯩﻞ ﺗﯜﺭﺩﻩ ﺋﯚﺯ-ﺋﯚﺯﯛﻣﮕﻪ، ﺋﺎﺋﯩﻠﻪﻣﺪﯨﻜﯩﻠﻪﺭﮔﻪ، ﺩﻭﺳﺘﻠﯩﺮﯨﻤﻐﺎ، ﺧﯩﺰﻣﻪﺗﺪﺍﺷﻠﯩﺮﯨﻤﻐﺎ، ﯞﻩ ﺑﺎﺷﻠﯩﻘﯩﻤﻐﺎ ﺭﺍﺳﺘﭽﯩﻞ، ﺳﻪﻣﯩﻤﯩﻲ ﺑﻮﻟﯘﺷﻘﺎ ﺗﯩﺮﯨﺸﯩﭗ ﻛﻪﻟﺪﯨﻢ. ﺋﯚﺯ-ﺋﯚﺯﯛﻣﻨﻰ ﺗﻮﻏﺮﺍ ﭼﯜﺷﯩﻨﯩﺸﻜﻪ، ﺋﯚﺯ-ﺋﯚﺯﯛﻣﮕﻪ ﺗﻮﻏﺮﺍ ﺑﺎﻫﺎ ﺑﯧﺮﯨﺸﻜﻪ، ﺋﺎﺟﯩﺰﻟﯩﻘﯩﻤﻨﻰ ﺗﻮﻟﯘﻕ ﺑﯩﻠﯩﭗ، ﺗﻮﺧﺘﯩﻤﺎﻱ ﺋﺎﻟﻐﺎ ﺋﯩﻠﮕﯩﺮﯨﻠﻪﺷﻜﻪ ﺋﺎﻻﻫﯩﺪﻩ ﻛﯚﯕﯜﻝ ﺑﯚﻟﯜﭖ ﻛﻪﻟﺪﯨﻢ. ﺋﯚﺯ-ﺋﯚﺯﯛﻣﻨﻰ ﺩﺍﯞﺍﻣﻠﯩﻖ ﺋﻪﯓ ﻳﯘﻗﯩﺮﻯ ﺩﻩﺭﯨﺠﯩﺪﻩ ﺗﻮﻏﺮﺍ ﭼﯜﺷﯩﻨﯩﭗ ﺗﯘﺭﻏﺎﻥ ﺑﻮﻟﻐﺎﭼﻘﺎ، ﺋﯘﻧﯩﯔ ﺋﯜﺳﺘﯩﮕﻪ ﻣﻪﻥ ﺋﺎﺩﺍﻟﻪﺗﺴﯩﺰﻟﯩﻜﻜﻪ، ﻧﺎﻫﻪﻗﭽﯩﻠﯩﻜﻜﻪ، ﻛﻪﻣﺴﯩﺘﯩﺸﻜﻪ ﯞﻩ ﺑﺎﺷﻘﯩﻼﺭﻏﺎ ﺯﯨﻴﺎﻥ ﺳﯧﻠﯩﺸﻨﯩﯔ ﺑﻪﺩﯨﻠﯩﮕﻪ ﭘﺎﻳﺪﺍ ﺋﯧﻠﯩﺸﻘﺎ ﺋﯩﻨﺘﺎﻳﯩﻦ ﺋﯚﭺ ﻫﻪﻡ ﻗﺎﺭﺷﻰ ﺑﻮﻟﯘﭖ، ﺋﯘﻧﺪﺍﻕ ﺋﯩﺸﻼﺭﻧﻰ ﻗﯩﻠﯩﺸﺘﯩﻦ ﻗﻪﺗﺌﯩﻲ ﺳﺎﻗﻠﯩﻨﯩﺪﯨﻐﺎﻥ، ﺑﺎﺷﻘﯩﻼﺭﻧﯩﯔ ﻛﯚﯕﻠﯩﻨﻰ ﺋﻪﯓ ﻳﯘﻗﯩﺮﻯ ﺩﻩﺭﯨﺠﯩﺪﻩ ﺋﺎﻳﺎﻳﺪﯨﻐﺎﻥ ﺑﻮﻟﻐﺎﭼﻘﺎ، ﺋﯚﺯﯛﻡ ﺗﻮﻏﺮﺍ ﺩﻩﭖ ﻗﺎﺭﯨﻐﺎﻥ ﻳﻮﻟﯘﻣﻨﻰ ﻣﯧﯖﯩﯟﯦﺮﯨﭗ، ﺑﺎﺷﻘﯩﻼﺭﻧﯩﯔ ﻣﺎﯕﺎ ﻗﺎﻧﺪﺍﻕ ﺑﺎﻫﺎ ﺑﯧﺮﯨﺸﯩﮕﻪ ﺋﺎﻧﭽﻪ ﻛﯚﯕﯜﻝ ﺑﯚﻟﻤﯩﺪﯨﻢ. ﭼﯜﻧﻜﻰ، ﺑﺎﺷﻘﯩﻼﺭ ﻣﺎﯕﺎ ﺋﻪﯓ ﺗﻮﻏﺮﺍ ﺑﺎﻫﺎ ﺑﯩﺮﻩﻟﯩﮕﻪﻧﺪﯨﻤﯘ، ﭘﻪﻗﻪﺕ ﻣﯧﻨﯩﯔ ﺋﯚﺯﯛﻣﭽﯩﻠﯩﻚ ﺑﺎﻫﺎ ﺑﯧﺮﻩﻟﻪﻳﺘﺘﻰ.
 ﻣﻪﻥ ﻛﯩﭽﯩﻜﯩﻤﺪﯨﻦ ﺗﺎﺭﺗﯩﭙﻼ ﺟﻪﻣﺌﯩﻴﻪﺗﻨﯩﯔ ﯞﻩ ﺧﻪﻟﻘﯩﻤﻨﯩﯔ ﻣﺎﺧﺘﯩﺸﯩﻐﺎ ﻛﯚﭖ ﺳﺎﺯﺍﯞﻩﺭ ﺑﻮﻟﺪﯗﻡ. ﻫﻪﺭ ﻗﯧﺘﯩﻢ ﺑﺎﺷﻘﯩﻼﺭﻧﯩﯔ ﻣﺎﯕﺎ ﺑﻪﺭﮔﻪﻥ ﺑﺎﻫﺎﺳﯩﻨﻰ ﺋﺎﯕﻠﯩﻐﺎﻧﺪﺍ، ﻣﯧﻨﯩﯔ 1-ﺑﻮﻟﯘﭖ ﺋﯚﺯ-ﺋﯚﺯﯛﻣﺪﯨﻦ ﺳﻮﺭﺍﻳﺪﯨﻐﯩﻨﯩﻢ: "ﻣﻪﻥ ﺑﯘﻧﯩﯖﻐﺎ ﺋﻪﺭﺯﯨﻴﻤﻪﻧﻤﯘ؟" ﺩﯦﮕﻪﻧﺪﯨﻦ ﺋﯩﺒﺎﺭﻩﺕ ﺑﻮﻟﺪﻯ. ﺭﺍﺩﯨﺌﻮ-ﮔﯧﺰﯨﺘﻠﻪﺭﺩﻩ ﻣﻪﻥ ﺗﻮﻏﺮﯨﻠﯩﻖ ﺑﯩﺮ ﻧﻪﺭﺳﻪ ﺋﯧﻼﻥ ﻗﯩﻠﯩﻨﺴﺎ، ﻣﻪﻥ ﺩﻩﺭﻫﺎﻝ ﺋﯘﻧﯩﯔ ﻣﻪﺯﻣﯘﻧﯩﻨﻰ ﺗﻪﭘﺴﯩﻠﯩﻲ ﺗﻪﻛﺸﯜﺭﯛﭖ، ﺋﯘﻧﯩﯔ ﻗﺎﻧﭽﯩﻠﯩﻚ ﺩﻩﺭﯨﺠﯩﺪﻩ ﺗﻮﻏﺮﯨﻠﯩﻘﯩﻨﻰ، ﻳﯧﺰﯨﻠﻐﺎﻥ ﻧﻪﺭﺳﯩﻨﯩﯔ ﺗﻪﺳﯩﺮﯨﻨﻰ ﻛﯜﭼﻪﻳﺘﯩﺶ ﺋﯜﭼﯜﻥ ﻛﯚﺗﯜﺭﯛﯞﯦﺘﯩﻠﮕﻪﻥ ﻗﯩﺴﯩﻤﻠﯩﺮﯨﻨﯩﯔ ﺑﺎﺭ-ﻳﻮﻗﻠﯘﻗﯩﻨﻰ ﯞﻩ ﺋﯘﻧﯩﯔ ﺩﻩﺭﯨﺠﯩﺴﯩﻨﻰ ﺋﻪﺳﺘﺎﻳﯩﺪﯨﻞ ﺗﻪﻛﺸﯜﺭﯛﭖ ﺗﯘﺭﺩﯗﻡ. ﻫﻪﺭﮔﯩﺰ ﺋﯚﺯﯛﻣﺪﻩ ﻳﻮﻕ ﻧﻪﺭﺳﯩﻠﻪﺭ ﺑﯩﻠﻪﻥ ﺋﯚﺯ-ﺋﯚﺯﯛﻣﻨﻰ ﺋﺎﻟﺪﺍﭖ ﻳﯜﺭﻣﯩﺪﯨﻢ. ﺋﺎﻣﯧﺮﯨﻜﯩﺪﺍ ﺷﯩﺮﻛﻪﺗﻠﻪﺭﺩﻩ ﺋﯩﺸﻠﻪﺷﻨﻰ ﺑﺎﺷﻠﯩﻐﺎﻧﺪﯨﻦ ﺑﯘﻳﺎﻥ، ﻣﻪﻥ ﺋﯚﺯﯛﻣﺪﯨﻦ ﺩﺍﯞﺍﻣﻠﯩﻖ ﺗﯚﯞﻩﻧﺪﯨﻜﻰ ﺳﻮﺋﺎﻟﻼﺭﻧﻰ ﺳﻮﺭﺍﭖ ﺗﯘﺭﺩﯗﻡ: "ﻣﻪﻥ ﺋﺎﻟﻐﺎﻥ ﻣﺎﺋﺎﺷﯩﻤﻐﺎ ﭼﯘﺷﻠﯘﻕ ﺋﯩﺸﻠﻪﯞﺍﺗﯩﻤﻪﻧﻤﯘ؟ ﻣﻪﻥ ﻳﯧﯖﻰ ﺋﯩﻘﺘﯩﺪﺍﺭ، ﻳﯧﯖﻰ ﺑﯩﻠﯩﻢ ﺋﯚﮔﯩﻨﯩﯟﺍﺗﯩﻤﻪﻧﻤﯘ؟ ﺋﻪﮔﻪﺭ ﺑﯘ ﺷﯩﺮﻛﻪﺗﺘﯩﻦ ﭼﯩﻘﯩﭗ ﻛﯧﺘﯩﭗ ﻗﺎﻟﺴﺎﻡ، ﺑﺎﺷﻘﺎ ﻳﯧﯖﻰ ﺧﯩﺰﻣﻪﺕ ﺗﺎﭘﺎﻻﻳﻤﻪﻧﻤﯘ؟ ﻣﻪﻧﺪﻩ ﺑﺎﺷﻘﺎ ﺷﯩﺮﻛﻪﺗﻠﻪﺭﻧﻰ ﺟﻪﻟﭗ ﻗﯩﻼﻻﻳﺪﯨﻐﺎﻥ ﻗﺎﻧﺪﺍﻕ ﻧﻪﺭﺳﯩﻠﻪﺭ ﺑﺎﺭ؟ ﻣﯧﻨﯩﯔ ﻫﺎﺯﯨﺮ ﻗﯩﻠﯩﯟﺍﺗﻘﺎﻥ ﺋﯩﺸﯩﻢ ﻣﻪﻧﺪﻩ ﻳﯧﯖﻰ ﺋﯩﻘﺘﯩﺪﺍﺭ ﻳﯧﺘﯩﻠﺪﯛﺭﻩﻟﻪﻣﺪﯗ؟"

ﺋﺎﻣﯧﺮﯨﻜﺎ ﺟﻪﻣﺌﯩﻴﯩﺘﻰ ﺭﯨﻘﺎﺑﻪﺕ ﺑﯩﻠﻪﻥ ﺗﻮﻟﻐﺎﻥ، ﺑﯩﺮ ﭘﺎﺭﭼﻪ ﮔﯚﺷﻨﻰ ﺗﺎﻟﯩﺸﯩﯟﺍﺗﻘﺎﻥ ﺑﯩﺮ ﺗﻮﭖ ﻳﻮﻟﯟﺍﺱ-ﺑﯚﺭﯨﻠﻪﺭﻧﯩﯔ ﺋﯘﯞﯨﺴﯩﻐﯩﻼ ﺋﻮﺧﺸﺎﻳﺪﯗ. ﻛﯜﭼﻠﯜﻙ ﺑﻮﻟﺴﯩﯖﯩﺰ ﭘﻪﻟﻠﯩﻤﯘ ﭘﻪﻟﻠﻪ ﺋﯚﺭﻟﻪﭖ ﻛﯧﺘﯩﯟﯦﺮﯨﺴﯩﺰ. ﺋﻪﮔﻪﺭ ﺋﺎﺟﯩﺰ ﺑﻮﻟﺴﯩﯖﯩﺰ، ﺋﺎﺯ ﻛﯜﻧﺪﯨﻦ ﻛﯧﻴﯩﻦ ﺟﻪﻣﺌﯩﻴﻪﺗﺘﻪ ﻟﻪﻳﻠﻪﭖ ﻗﺎﻟﯩﺴﯩﺰ. ﻣﻪﻥ ﻫﺎﺯﯨﺮﻏﺎ ﻗﻪﺩﻩﺭ ﺑﯩﺮ ﺧﯩﺰﻣﻪﺕ ﺑﯩﻠﻪﻥ ﻳﻪﻧﻪ ﺑﯩﺮ ﺧﯩﺰﻣﻪﺗﻨﯩﯔ ﺋﺎﺭﯨﻠﯩﻘﯩﺪﺍ ﺋﻪﯓ ﺋﯘﺯﯗﻥ ﺧﯩﺰﻣﻪﺗﺴﯩﺰ ﺗﯘﺭﯗﭖ ﺑﺎﻗﻘﺎﻥ ﯞﺍﻗﺘﯩﻢ 3 ﻫﻪﭘﺘﻪ ﺑﻮﻟﯘﭖ، ﻫﻪﺭ ﻗﯧﺘﯩﻢ ﻳﯧﯖﻰ ﺧﯩﺰﻣﻪﺗﻜﻪ ﻛﯩﺮﮔﻪﻧﺪﻩ، ﻣﺎﯕﺎ ﺋﻪﯓ ﻛﻪﻡ ﺩﯦﮕﻪﻧﺪﻩ 2 ﺷﯩﺮﻛﻪﺗﺘﯩﻦ ﭼﺎﻗﯩﺮﯨﻖ ﻛﻪﻟﺪﻯ. ﻣﻪﻥ ﺑﯘﺭﯗﻥ ﺋﯩﺸﻠﯩﮕﻪﻥ "Wawesplitter" ﺩﯦﮕﻪﻥ ﺷﯩﺮﻛﻪﺗﺘﯩﻦ 2002-ﻳﯩﻠﻰ ﻧﻮﻳﺎﺑﯩﺮﺩﺍ ﭼﯩﻘﯩﺮﯨﯟﻩﺗﻜﻪﻥ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻰ ﺑﺎﺭ ﺑﯩﺮ ﺋﺎﻣﯧﺮﯨﻜﯩﻠﯩﻖ ﺗﯧﺨﻰ ﺋﯚﺗﻜﻪﻥ ﻳﯩﻠﻰ (2004-ﻳﯩﻠﻰ) 7-ﺋﺎﻳﺪﺍ ﺋﺎﺭﺍﻥ ﺧﯩﺰﻣﻪﺕ ﺗﺎﭘﺘﻰ. ﺷﯘ ﯞﺍﻗﯩﺘﺘﺎ ﭼﯩﻘﯩﺮﯨﯟﻩﺗﻜﻪﻥ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻰ ﺑﺎﺭ ﺑﯩﺮ ﻓﺮﺍﻧﺴﯩﻴﯩﻠﯩﻚ ﺋﯩﻨﮋﯨﻨﯩﺮ ﺗﯧﺨﯩﭽﻪ ﺧﯩﺰﻣﻪﺕ ﺗﺎﭘﺎﻟﻤﺎﻱ، ﻫﺎﺯﯨﺮ ﺑﯩﺮ ﺗﻪﺭﻩﭘﺘﯩﻦ ﺧﯩﺰﻣﻪﺕ ﺋﯩﺰﺩﻩﭖ، ﺑﯩﺮ ﺗﻪﺭﻩﭘﺘﯩﻦ ﭘﺎﺭﭼﻪ-ﭘﯘﺭﺍﺕ ﺋﻮﻗﯘﺗﻘﯘﭼﯩﻠﯩﻖ ﺧﯩﺰﻣﻪﺗﻠﯩﺮﯨﻨﻰ ﺗﯧﭙﯩﭗ ﺋﯩﺸﻠﻪﭖ ﻛﯜﻥ ﻛﻪﭼﯜﺭﯨﯟﺍﺗﯩﺪﯗ. ﻣﻪﻥ ﺑﺎﺷﻘﯩﻼﺭ ﺑﯩﻠﻪﻥ ﺑﯩﺮﻟﯩﺸﯩﭗ ﻗﯘﺭﻏﺎﻥ 1-ﺷﯩﺮﻛﻪﺗﻜﻪ ﻳﺎﺭﺩﻩﻣﻠﻪﺷﻜﻪﻥ، ﻓﯩﺰﯨﻜﯩﺪﺍ ﻣﺎﮔﯩﺴﺘﯩﺮﻟﯩﻖ ﺋﯘﻧﯟﺍﻧﻰ ﺑﺎﺭ، ﺳﯩﻠﯩﻜﻮﻥ ﺟﯩﻠﻐﯩﺴﯩﺪﺍ 10 ﻧﻪﭼﭽﻪ ﻳﯩﻞ ﺋﯩﻨﮋﯨﻨﯩﺮ ﺑﻮﻟﯘﭖ ﺋﯩﺸﻠﯩﮕﻪﻥ ﺑﯩﺮ ﻛﯩﺸﻰ ﺑﺎﺭ ﺑﻮﻟﯘﭖ، ﺋﺎﻟﺪﯨﻨﻘﻰ ﺑﯩﺮ ﻗﺎﻧﭽﻪ ﻳﯩﻠﻨﯩﯔ ﺋﯩﭽﯩﺪﻩ ﺋﯘ ﺧﯩﺰﻣﻪﺕ ﺗﺎﭘﺎﻟﻤﯩﺪﯨﻢ، ﺩﻩﭖ ﻳﯜﺭﮔﻪﻥ ﺋﯩﺪﻯ. ﻳﯧﻘﯩﻨﺪﺍ ﺋﯘﻧﯩﯖﻐﺎ ﺗﯧﻠﯧﻔﻮﻥ ﻗﯩﻠﺴﺎﻡ، ﺋﯘ ﻫﺎﺯﯨﺮ ﺑﯩﺮ ﻛﻮﻓﯩﺨﺎﻧﯩﺪﺍ ﺋﯩﺸﻠﻪﯞﯦﺘﯩﭙﺘﯘ. "ﻣﯘﺷﯘ ﻳﻪﺭﺩﻩ ﻛﻮﻓﻰ ﺩﻩﻣﻠﻪﺷﻨﻰ ﺋﯚﮔﯩﻨﯩﯟﯦﻠﯩﭗ، ﺋﺎﻧﺪﯨﻦ ﺋﯚﺯﯛﻡ ﺋﺎﻳﺮﯨﻢ ﻛﻮﻓﯩﺨﺎﻧﺎ ﺋﯧﭽﯩﺸﻨﻰ ﺋﻮﻳﻼﯞﺍﺗﯩﻤﻪﻥ"، ﺩﻩﻳﺪﯗ. ﺑﯘ ﻛﯩﺸﻰ ﺑﯘﺭﯗﻧﻘﻰ ﻳﯩﻠﯩﻐﺎ 80 ﻧﻪﭼﭽﻪ ﻣﯩﯔ ﺩﻭﻟﻼﺭ ﻣﺎﺋﺎﺵ ﺋﺎﻟﯩﺪﯨﻐﺎﻥ ﺋﯩﻨﮋﯨﻨﯩﺮﻟﯩﻖ ﺧﯩﺰﻣﯩﺘﯩﺪﯨﻦ ﺋﺎﻳﺮﯨﻠﯩﭗ، ﻫﺎﺯﯨﺮ ﻳﯩﻠﯩﻐﺎ 30 ﻣﯩﯔ ﺩﻭﻟﻼﺭ ﺋﻪﺗﺮﺍﭘﯩﺪﺍ ﻣﺎﺋﺎﺵ ﺋﺎﻟﯩﺪﯨﻐﺎﻥ ﻛﻮﻓﯩﺨﺎﻧﯩﻨﯩﯔ ﺋﯩﺸﯩﻨﻰ ﻗﯩﻠﯩﯟﯦﺘﯩﭙﺘﯘ.
  ﺑﯩﺮ ﻛﯩﭽﯩﻚ ﺑﺎﻟﯩﻨﯩﯔ ﻗﺎﻧﺪﺍﻕ ﺋﺎﺩﻩﻡ ﺑﻮﻟﯘﭖ ﺋﯚﺳﯜﭖ-ﻳﯧﺘﯩﻠﯩﺸﯩﺪﻩ، ﺋﺎﺗﺎ-ﺋﺎﻧﯩﻨﯩﯔ ﺋﯜﻟﮕﯩﻠﯩﻚ ﺭﻭﻟﻰ ﻫﻪﻣﻤﯩﺪﯨﻦ ﭼﻮﯓ ﺑﻮﻟﯩﺪﯗ. ﺑﺎﻟﯩﻼﺭ ﺳﻪﻝ ﺋﻪﻗﻠﯩﻨﻰ ﺗﺎﭘﻘﺎﻧﺪﯨﻦ ﺗﺎﺭﺗﯩﭗ، ﺩﻩﺳﻠﻪﭘﻜﻰ ﻧﯘﺭﻏﯘﻥ ﻧﻪﺭﺳﯩﻠﻪﺭﻧﻰ ﺋﺎﺗﺎ-ﺋﺎﻧﯩﺪﯨﻦ ﺋﯚﮔﯩﻨﯩﺪﯗ. ﺷﯘﯕﺎ ﻣﻪﻥ ﺑﺎﻟﯩﻠﯩﺮﯨﻤﻨﯩﯔ ﺋﺎﻟﺪﯨﺪﯨﻤﯘ ﺳﻪﻣﯩﻤﯩﻴﻠﯩﻚ ﯞﻩ ﺭﺍﺳﺘﭽﯩﻠﻠﯩﻖ ﺟﻪﻫﻪﺗﺘﻪ ﺋﯚﺯﯛﻣﮕﻪ ﺋﯩﻨﺘﺎﻳﯩﻦ ﻳﯘﻗﯩﺮﻯ ﺗﻪﻟﻪﭖ ﻗﻮﻳﺪﯗﻡ. ﺑﺎﻟﯩﻠﯩﺮﯨﻤﻐﯩﻤﯘ ﺭﺍﺳﺘﭽﯩﻞ ﺑﻮﻟﯘﺵ ﺟﻪﻫﻪﺗﺘﻪ ﺗﻪﺭﺑﯩﻴﯩﻨﻰ ﺋﯩﺰﭼﯩﻞ ﺑﻮﺷﺎﺷﺘﯘﺭﻣﯩﺪﯨﻢ. ﻫﻪﻣﺪﻩ ﻫﺎﻻﯞﻩﺗﺘﻪ ﻫﻪﻣﻤﯩﺪﯨﻦ ﻛﯧﻴﯩﻦ، ﺟﺎﭘﺎﺩﺍ ﻫﻪﻣﻤﯩﻨﯩﯔ ﺋﺎﻟﺪﯨﺪﺍ ﺗﯘﺭﯗﭖ، ﺑﺎﻟﯩﻠﯩﺮﯨﻤﻐﺎ ﻫﻪﻣﻤﻪ ﺟﻪﻫﻪﺗﺘﯩﻦ ﻳﺎﺧﺸﻰ ﺋﯜﻟﮕﻪ ﻳﺎﺭﯨﺘﯩﺸﻘﺎ ﺗﯩﺮﯨﺸﺘﯩﻢ. ﺋﺎﻣﯧﺮﯨﻜﯩﻐﺎ ﻣﻪﻥ 1988-ﻳﯩﻠﻰ، ﺋﺎﻳﺎﻟﯩﻢ ﺋﺎﻣﺎﻧﮕﯜﻝ 1989-ﻳﯩﻠﻰ، ﻗﯩﺰﯨﻢ 1991-ﻳﯩﻠﻰ، ﯞﻩ ﺋﻮﻏﻠﯘﻡ 1993-ﻳﯩﻠﻰ ﻛﻪﻟﮕﻪﻥ ﺑﻮﻟﯘﭖ، ﻣﻪﻥ 1985-ﻳﯩﻠﻰ ﻳﺎﭘﻮﻧﯩﻴﻪﮔﻪ ﺑﺎﺭﻏﺎﻧﺪﯨﻦ ﺗﺎﺭﺗﯩﭗ ﺋﺎﺷﯘﻧﺪﺍﻕ ﺗﯧﺮﻩ-ﭘﯩﺮﻩﯓ ﺗﯘﺭﻣﯘﺷﻨﻰ ﺑﺎﺷﻠﯩﻐﺎﻥ ﺋﯩﺪﯨﻢ. 1993-ﻳﯩﻠﻰ ﺋﺎﺧﯩﺮﻯ ﺋﺎﺋﯩﻠﯩﺪﯨﻜﻰ ﻫﻪﻣﻤﯩﻤﯩﺰ ﺟﻪﻡ ﺑﻮﻟﯘﭖ ﻳﺎﺷﯩﻴﺎﻻﻳﺪﯨﻐﺎﻥ ﺑﻮﻟﺪﯗﻕ. ﺋﻮﻏﻠﯘﻡ ﺑﺎﺷﻼﻧﻐﯘﭼﻨﯩﯔ 1-ﺳﯩﻨﯩﭙﯩﺪﺍ ﺋﺎﺩﻩﺗﺘﯩﻜﻰ ﻫﯧﺴﺎﺑﻼﺭﻧﻰ ﺋﯩﺸﻠﯩﻴﻪﻟﻪﻳﺪﯨﻐﺎﻥ ﺑﻮﻟﻐﺎﻧﺪﺍ، ﻣﻪﻥ ﺑﯩﺮ ﻛﯜﻧﻰ ﻗﯩﺰﯨﻢ ﺑﯩﻠﻪﻥ ﺋﯩﻜﻜﯩﺴﯩﻨﻰ ﭼﺎﻗﯩﺮﯨﭗ ﻛﯧﻠﯩﭗ، ﺋﯘﻻﺭﻏﺎ ﺋﺎﻣﺎﻧﮕﯜﻝ ﺑﯩﻠﻪﻥ ﺋﯩﻜﻜﯩﻤﯩﺰﻧﯩﯔ ﺑﯩﺮ ﺋﺎﻳﺪﺍ ﺋﯚﻳﮕﻪ ﺋﻪﻛﯩﺮﮔﻪﻥ ﻣﺎﺋﺎﺵ ﭼﯧﻜﯩﻤﯩﺰﻧﯩﯔ ﻛﯚﺗﯩﻜﻰ ﺑﯩﻠﻪﻥ ﺷﯘ ﺑﯩﺮ ﺋﺎﻱ ﺋﯩﭽﯩﺪﻩ ﭼﻮﯓ-ﭼﻮﯓ ﺋﯩﺸﻼﺭﻏﺎ ﺧﻪﺟﻠﯩﮕﻪﻥ ﭘﯘﻟﻨﯩﯔ ﻫﯚﺟﺠﻪﺗﻠﯩﺮﯨﻨﻰ ﺑﯧﺮﯨﭗ، ﺋﯘﻻﺭﺩﯨﻜﻰ ﭘﯘﻟﻨﯩﯔ ﺳﺎﻧﻠﯩﺮﯨﻨﻰ ﻗﻮﺷﯘﭖ، ﺋﺎﺧﯩﺮﯨﺪﺍ ﭘﻪﺭﻗﯩﻨﻰ ﻫﯧﺴﺎﺑﻼﭖ ﭼﯩﻘﯩﺸﻨﻰ ﺗﺎﭘﺸﯘﺭﺩﯗﻡ. ﺋﯘ ﭼﺎﻏﺪﺍ ﻣﯧﻨﯩﯔ ﺋﺎﺗﺎ-ﺋﺎﻧﺎﻡ ﺋﺎﻣﯧﺮﯨﻜﯩﻐﺎ ﺑﯩﺰﻧﯩﯔ ﻳﯧﻨﯩﻤﯩﺰﻏﺎ ﻛﻪﻟﮕﻪﻥ ﺑﻮﻟﯘﭖ، ﺋﯘ ﺑﯩﺮ ﺋﺎﻳﻨﯩﯔ ﺋﯩﭽﯩﺪﻩ ﺑﯩﺰﻧﯩﯔ ﻛﯩﺮﯨﻤﯩﻤﯩﺰﮔﻪ ﻗﺎﺭﯨﻐﺎﻧﺪﺍ، ﭼﯩﻘﯩﻤﯩﻤﯩﺰ ﻳﯘﻗﯩﺮﻯ ﺑﻮﻟﻐﺎﻧﯩﺪﻯ. ﺋﯘﻻﺭ ﭘﯘﻟﻨﻰ ﻫﯧﺴﺎﺑﻼﭖ ﺑﻮﻟﻐﺎﻧﺪﯨﻦ ﻛﯧﻴﯩﻦ، ﻣﻪﻥ ﺋﯘﻻﺭﻏﺎ ﻫﺎﺯﯨﺮ ﺑﯩﺰﺩﻩ ﭘﯘﻟﻨﯩﯔ ﻛﯚﭖ ﺋﻪﻣﻪﺳﻠﯩﻜﯩﻨﻰ، ﺷﯘﯕﺎ ﺋﯘﻻﺭ ﺋﻮﻳﯘﻧﭽﯘﻕ ﺗﻮﻏﺮﯨﺴﯩﺪﺍ ﻛﯚﭖ ﺟﯧﺪﻩﻝ ﻗﯩﻠﺴﺎ ﺑﻮﻟﻤﺎﻳﺪﯨﻐﺎﻧﻠﯩﻘﯩﻨﻰ ﭼﯜﺷﻪﻧﺪﯛﺭﺩﯛﻡ. ﺋﯘﻻﺭﻧﯩﯔ ﺋﺎﻟﺪﯨﺪﺍ ﺳﺎﻧﻠﯩﻖ ﻣﻪﻟﯘﻣﺎﺗﻼﺭ ﺑﻮﻟﻐﺎﭼﻘﺎ، ﺋﯘﻻﺭﻣﯘ ﻣﯧﻨﯩﯔ ﺳﯚﺯﯛﻣﮕﻪ ﺗﯧﺰﻻ ﻗﺎﻳﯩﻞ ﺑﻮﻟﺪﻯ. ﺷﯘﻧﯩﯖﺪﯨﻦ ﻛﯧﻴﯩﻦ ﺩﯗﻛﺎﻧﻼﺭﻏﺎ ﺑﯧﺮﯨﭗ، ﺑﺎﻟﯩﻼﺭ ﺋﻮﻳﯘﻧﭽﯘﻕ ﺗﻮﻏﺮﯨﺴﯩﺪﺍ ﺋﺎﺭﺗﯘﻗﭽﻪ ﺟﯩﺪﻩﻝ ﻗﯩﻠﻐﺎﻧﺪﺍ، ﻫﯧﻠﯩﻘﻰ ﻫﯧﺴﺎﺑﻨﻰ ﺗﯩﻠﻐﺎ ﺋﺎﻟﺴﺎﻡ، ﺋﯘﻻﺭ ﻳﺎﻣﺎﻧﻠﯩﻤﺎﻳﺪﯨﻐﺎﻥ ﺑﻮﻟﺪﻯ. ﺑﺎﻟﯩﻼﺭﻧﻰ ﺋﯚﻳﻨﯩﯔ ﺋﯩﻘﺘﯩﺴﺎﺩﯨﻲ ﺋﻪﻫﯟﺍﻟﯩﺪﯨﻦ ﺩﺍﯞﺍﻣﻠﯩﻖ، ﺋﻪﻳﻨﻪﻥ ﺧﻪﯞﻩﺭﻟﻪﻧﺪﯛﺭﯛﺵ ﺑﯩﺰﻧﯩﯔ ﺋﺎﺋﯩﻠﯩﻨﯩﯔ ﺑﯩﺮ ﺋﺎﺩﯨﺘﯩﺪﯗﺭ. ﺋﻮﻏﻠﯘﻡ 1-ﺳﯩﻨﯩﭙﺘﺎ ﺋﻮﻗﯘﯞﺍﺗﻘﺎﻧﺪﺍ، ﺑﯩﺮ ﻛﯜﻧﻰ ﺋﯘﻧﯩﯔ ﺋﻮﻗﯘﺗﻘﯘﭼﯩﺴﻰ ﺳﯩﻨﯩﭙﺘﯩﻜﻰ ﺑﺎﻟﯩﻼﺭﺩﯨﻦ ﻣﯘﻧﺪﺍﻕ ﺑﯩﺮ ﻧﻪﺭﺳﯩﻨﻰ ﺳﻮﺭﺍﭘﺘﯘ: "ﺋﻪﮔﻪﺭ ﺳﯩﻠﻪﺭ ﻛﻮﭼﯩﺪﯨﻦ 100 ﺩﻭﻟﻼﺭ ﭘﯘﻝ ﺗﯧﭙﯩﯟﺍﻟﺴﺎﯕﻼﺭ، ﺋﯘ ﭘﯘﻟﻨﻰ ﻧﯧﻤﯩﮕﻪ ﺧﻪﺟﻠﻪﻳﺴﯩﻠﻪﺭ؟" ﻛﯚﭘﯩﻨﭽﻪ ﺋﻮﻏﯘﻟﻼﺭ ﺋﯘﻧﯩﯖﻐﺎ ﺋﻮﻳﯘﻧﭽﯘﻕ ﺋﺎﻟﯩﻤﯩﺰ، ﺩﻩﭘﺘﯘ. ﻗﯩﺰﻻﺭ ﻗﻮﭼﺎﻕ ﺋﺎﻟﯩﻤﯩﺰ، ﺩﻩﭘﺘﯘ. ﺑﻪﺯﯨﻠﯩﺮﻯ ﺩﯨﺴﻨﯧﻲ ﺑﺎﻏﭽﯩﺴﯩﻐﺎ ﺑﺎﺭﯨﻤﯩﺰ، ﺩﻩﭘﺘﯘ. ﺩﯨﻠﺸﺎﺗﻘﺎ ﻛﻪﻟﮕﻪﻧﺪﻩ، ﺋﯘ "ﻣﻪﻥ ﭘﯘﻟﻨﻰ ﺩﺍﺩﺍﻣﻐﺎ ﺑﯧﺮﯨﻤﻪﻥ. ﺩﺍﺩﺍﻡ ﺋﯘﻧﯩﯖﻐﺎ ﺋﯚﻱ ﺋﺎﻟﯩﺪﯗ"، ﺩﻩﭘﺘﯘ. ﺑﯘﻧﻰ ﺋﺎﯕﻠﯩﻐﺎﻥ ﺋﻮﻗﯘﺗﻘﯘﭼﻰ ﻗﺎﺗﺘﯩﻖ ﺗﻪﺳﯩﺮﻟﯩﻨﯩﭗ، ﺋﯘﻧﯩﯔ ﻛﯚﺯﯨﺪﯨﻦ ﻳﺎﺵ ﭼﯩﻘﯩﭗ ﻛﯧﺘﯩﭙﺘﯘ. ﻛﯧﻴﯩﻦ ﻣﻪﻥ ﺑﯩﺮ ﺋﺎﺗﺎ-ﺋﺎﻧﯩﻼﺭ ﻳﯩﻐﯩﻨﯩﻐﺎ ﺑﯧﺮﯨﭗ، ﺋﯘ ﺋﻮﻗﯘﺗﻘﯘﭼﻰ ﺑﯩﻠﻪﻥ ﻛﯚﺭﯛﺷﻜﻪﻧﺪﻩ، ﺋﯘ ﻣﺎﯕﺎ ﺑﯘ ﻫﯧﻜﺎﻳﯩﻨﻰ ﺳﯚﺯﻟﻪﭖ ﺑﯧﺮﯨﭗ (ﻣﻪﻥ ﺋﯘﻧﻰ ﺩﯨﻠﺸﺎﺗﺘﯩﻦ ﺋﺎﯕﻠﯩﻤﯩﻐﺎﻥ ﺋﯩﺪﯨﻢ)، ﺋﺎﻧﺪﯨﻦ "ﺳﯩﻠﻪﺭ ﺋﯚﻳﺪﻩ ﺩﺍﯞﺍﻣﻠﯩﻖ ﺑﯩﺮ ﺋﯚﻱ ﺋﯧﻠﯩﺸﻨﯩﯔ ﮔﯧﭙﯩﻨﻰ ﻗﯩﻠﯩﺸﺎﻣﺴﯩﻠﻪﺭ؟" ﺩﻩﭖ ﺳﻮﺭﯨﺪﻯ. ﺋﻪﻣﻪﻟﯩﻴﻪﺗﺘﻪ ﺑﯩﺰ ﺋﯘﻧﺪﺍﻗﻤﯘ ﻗﯩﻠﻤﺎﻳﺘﺘﯘﻕ. ﻣﯧﻨﯩﯔ ﻣﻪﻛﺘﻪﭘﺘﯩﻦ ﻛﯩﺮﯨﺪﯨﻐﺎﻥ ﻣﺎﺋﺎﺷﯩﻢ ﺋﯧﻴﯩﻐﺎ 1000 ﺩﻭﻟﻼﺭ ﺋﻪﺗﺮﺍﭘﯩﺪﺍ ﺑﻮﻟﯘﭖ، ﺋﻮﻗﯘﺵ ﭘﯘﻟﻰ ﯞﻩ ﺗﯘﺭﻣﯘﺵ ﺭﺍﺳﺨﻮﺩﯨﻐﺎ ﺋﯘ ﻫﻪﺭﮔﯩﺰﻣﯘ ﻳﯧﺘﯩﺸﻤﻪﻳﺘﻰ. ﺷﯘﯕﺎ، ﺋﯘ ﭼﺎﻏﺪﺍ ﺋﺎﻳﺎﻟﯩﻢ ﺑﯩﺰﻧﯩﯔ ﺷﻪﻫﻪﺭﺩﯨﻜﻰ ﺑﯩﺮﺳﯩﻨﯩﯔ ﺋﯚﻳﯩﺪﻩ ﺑﺎﻻ ﺑﺎﻗﻘﺎﻥ ﺋﯩﺪﻯ. ﺋﯘ ﺋﯚﻳﺪﯨﻤﯘ ﺑﯩﺮ ﺋﻮﻏﯘﻝ، ﺑﯩﺮ ﻗﯩﺰ ﺑﺎﺭ ﺑﻮﻟﯘﭖ، ﺋﯘﻻﺭﻧﯩﯔ ﻳﯧﺸﻰ ﺑﯩﺰﻧﯩﯔ ﺑﺎﻟﯩﻼﺭﻧﯩﯖﻜﻰ ﺑﯩﻠﻪﻥ ﺋﻮﺧﺸﺎﺵ ﺋﯩﺪﻯ. ﺋﺎﻣﺎﻧﮕﯜﻝ ﺋﯘ ﺋﯚﻳﮕﻪ ﺑﯩﺰﻧﯩﯔ ﺑﺎﻟﯩﻼﺭﻧﯩﻤﯘ ﺋﺎﭘﯩﺮﯨﭗ، ﺗﯚﺕ ﺑﺎﻟﯩﻨﻰ ﺋﻮﻳﻨﯩﻐﯩﻠﻰ ﻗﻮﻳﯘﭖ ﺑﯧﺮﯨﭗ، ﺋﯚﺯﻯ ﺋﯚﮔﯩﻨﯩﺶ ﻗﯩﻼﺗﺘﻰ. ﺋﯘ ﻛﯩﺸﯩﻠﻪﺭﻧﯩﯔ ﺑﯩﺮ ﭼﻮﯓ ﺋﯚﻳﻰ ﺑﻮﻟﻐﺎﭼﻘﺎ، ﺑﯩﺰﻧﯩﯔ ﺑﺎﻟﯩﻼﺭ ﻣﻪﻧﺪﯨﻦ ﺩﺍﯞﺍﻣﻠﯩﻖ: "ﺩﺍﺩﺍ، ﺑﯩﺰ ﻗﺎﭼﺎﻧﻠﯩﻘﻘﺎ ﺋﯚﻱ ﺋﺎﻟﯩﻤﯩﺰ؟" ﺩﻩﭖ ﺳﻮﺭﺍﻳﺘﺘﻰ. ﺑﯩﺮ ﻗﯧﺘﯩﻢ ﻣﻪﻥ: "ﻛﯧﻴﯩﻦ ﺋﺎﻟﯩﻤﯩﺰ. ﻫﺎﺯﯨﺮ ﺋﺎﻟﯩﺪﯨﻐﺎﻧﻐﺎ ﭘﯘﻟﯩﻤﯩﺰ ﻳﻮﻕ"، ﺩﯦﺴﻪﻡ، ﺋﯘﻻﺭ ﺩﻩﺭﻫﺎﻝ: "ﺩﺍﺩﺍ، ﺳﻪﻧﺪﻩ ﭼﻪﻙ ﺑﺎﺭﻏﯘ؟ ﭼﻪﻙ ﻳﯧﺰﯨﭗ ﺑﻪﺭﺳﻪﯓ ﺑﻮﻟﻤﯩﺪﯨﻤﯘ؟" ﺩﻩﭖ ﺳﻮﺭﯨﺪﻯ.

ﺋﺎﻣﯧﺮﯨﻜﯩﺪﺍ ﺳﯩﺰ ﺑﯩﺮ ﺑﺎﻧﻜﯩﻐﺎ ﭘﯘﻝ ﻗﻮﻳﺴﯩﯖﯩﺰ، ﺋﯘﻻﺭ ﺳﯩﺰﮔﻪ ﺷﻪﺧﺴﯩﻲ ﺑﺎﻧﻜﺎ ﭼﯧﻜﻰ ﺑﯧﺮﯨﺪﯗ. ﺳﯩﺰ ﺑﯘ ﭼﻪﻛﻠﻪﺭﮔﻪ ﭘﯘﻟﻨﯩﯔ ﻗﯩﻤﻤﯩﺘﯩﻨﻰ ﻳﯧﺰﯨﭗ، ﺋﯩﻤﺰﺍ ﻗﻮﻳﯘﭖ، ﺋﯘﻧﻰ ﺧﯘﺩﺩﻯ ﻧﻪﻕ ﭘﯘﻝ ﺧﻪﺟﻠﯩﮕﻪﻧﺪﻩﻙ ﺋﯩﺸﻠﯩﺘﻪﻟﻪﻳﺴﯩﺰ. ﭼﻪﻛﻨﻰ ﺗﺎﭘﺸﯘﺭﯗﭖ ﺋﺎﻟﻐﺎﻥ ﻛﯩﺸﻰ ﺋﯘ ﭘﯘﻟﻨﻰ ﺳﯩﺰﻧﯩﯔ ﺑﺎﻧﻜﺎ ﻫﯧﺴﺎﺑﯩﯖﯩﺰﺩﯨﻦ ﺋﯧﻠﯩﯟﺍﻟﯩﺪﯗ. ﻣﻪﻧﺪﯨﻜﻰ ﺋﯘ ﭼﻪﻙ ﺑﺎﻧﻜﯩﺪﺍ ﭘﯘﻝ ﺑﻮﻟﻤﯩﺴﯩﻤﯘ ﻳﺎﺯﻏﯩﻠﻰ ﺑﻮﻟﯩﺪﯨﻐﺎﻥ ﭼﻪﻙ ﺋﻪﻣﻪﺱ ﺋﯩﺪﻯ (ﭼﺎﺧﭽﺎﻕ). ﺑﺎﻟﯩﻼﺭ ﺋﯘﻧﻰ ﭼﯜﺷﻪﻧﻤﻪﻳﺘﺘﻰ. ﺑﯩﺮ ﻗﯧﺘﯩﻢ ﺑﯩﺰ ﺑﯩﺮ ﺩﻭﺳﺘﯩﻤﯩﺰﻧﯩﯔ ﺋﯚﻳﯩﮕﻪ ﺑﺎﺭﻏﯩﭽﻪ ﺩﯨﻠﺸﺎﺕ ﺑﯩﺮ ﻗﯘﺗﺎ ﺋﯩﭽﯩﻤﻠﯩﻜﻨﻰ ﺋﯩﭽﯩﭗ ﻣﺎﯕﺪﻯ. ﺋﯘﻻﺭﻧﯩﯔ ﺋﯚﻳﻨﯩﯔ ﺋﺎﻟﺪﯨﻐﺎ ﻛﻪﻟﮕﻪﻧﺪﻩ، ﺋﯘ ﻗﯘﺗﯩﻨﻰ ﺗﺎﺷﻼﻳﻠﻰ ﺩﯦﺴﻪﻙ، ﺋﻪﺧﻠﻪﺕ ﺳﺎﻧﺪﯗﻗﻰ ﺗﺎﭘﺎﻟﻤﯩﺪﯗﻕ. ﺷﯘﻧﯩﯔ ﺑﯩﻠﻪﻥ ﻣﻪﻥ ﺋﯘ ﻗﯘﺗﯩﻨﻰ ﻳﺎﺗﺎﻕ ﺑﯩﻨﺎﺳﯩﻨﯩﯔ ﺋﯩﺸﯩﻜﻰ ﺋﺎﻟﺪﯨﻐﺎ ﻗﻮﻳﯘﭖ ﻗﻮﻳﺴﺎﻡ، ﺩﯨﻠﺸﺎﺕ: "ﺩﺍﺩﺍ، ﺑﯘﻧﺪﺍﻕ ﻗﯩﻠﺴﺎﯓ ﻗﺎﻧﺪﺍﻕ ﺑﻮﻟﯩﺪﯗ؟ ﺳﻪﻥ ﺑﯩﺰﻧﻰ ﺋﯘﻧﺪﺍﻕ ﻗﯩﻠﻤﺎﯕﻼﺭ ﺩﻩﻳﺘﺘﯩﯖﻐﯘ؟" ﺩﻩﭖ ﺗﯘﺭﯗﯞﺍﻟﺪﻯ. ﺷﯘﻧﯩﯔ ﺑﯩﻠﻪﻥ ﻣﻪﻥ ﻫﯧﻠﯩﻘﻰ ﻗﯘﺭﯗﻕ ﻗﯘﺗﯩﻨﻰ ﺩﻭﺳﺘﯘﻣﻨﯩﯔ ﺋﯚﻳﯩﮕﻪ ﻛﯚﺗﯩﺮﯨﭗ ﻛﯩﺮﯨﭗ ﻛﻪﺗﺘﯩﻢ. ﺑﯩﺮ ﻗﯧﺘﯩﻢ ﺗﯚﺗﯩﻤﯩﺰ ﻗﻪﺭﺕ ﺋﻮﻳﻨﺎﯞﺍﺗﻘﺎﻧﺪﺍ، ﺑﺎﻟﯩﻼﺭ ﺋﯘﻗﯘﺷﻤﺎﺳﻠﯩﻘﺘﯩﻦ ﻣﯧﻨﻰ ﻳﺎﻟﻐﺎﻧﭽﯩﻠﯩﻖ ﻗﯩﻠﺪﻯ، ﺩﻩﭖ، "ﻫﻪ ﺩﺍﺩﺍ، ﺳﻪﻧﻤﯘ ﻳﺎﻟﻐﺎﻧﭽﯩﻜﻪﻧﺴﻪﻧﻐﯘ؟ ﺑﯜﮔﯜﻥ ﻳﺎﻟﻐﺎﻧﭽﯩﻠﯩﻖ ﻗﯩﻠﺪﯨﯖﻐﯘ؟" ﺩﻩﭖ، ﺋﯚﻳﻨﯩﯔ ﺋﯩﭽﯩﺪﻩ "ﺩﺍﺩﺍﻡ ﻳﺎﻟﻐﺎﻧﭽﻰ! ﺩﺍﺩﺍﻡ ﻳﺎﻟﻐﺎﻧﭽﻰ!" ﺩﻩﭖ، ﺳﻪﻛﺮﯨﺸﯩﭗ ﻛﻪﺗﺘﻰ. ﻣﻪﻥ ﻫﻪﺭﮔﯩﺰ ﻳﺎﻟﻐﺎﻥ ﮔﻪﭖ ﻗﯩﻠﻤﺎﻳﺪﯨﻐﺎﻥ ﺑﻮﻟﻐﺎﭼﻘﺎ، ﺋﯘﻗﯘﺷﻤﺎﺳﻠﯩﻘﺘﯩﻦ ﺋﺎﺷﯘﻧﺪﺍﻕ ﺑﯩﻠﯩﻨﮕﻪﻥ ﺑﯘ ﺑﯩﺮ ﻗﯧﺘﯩﻤﻠﯩﻖ "ﻳﺎﻟﻐﺎﻧﭽﯩﻠﯩﻖ" ﺑﺎﻟﯩﻠﯩﺮﯨﻢ ﺋﯜﭼﯜﻥ ﺑﯩﺮ ﭼﻮﯓ ﯞﻩﻗﻪ ﺑﻮﻟﯘﭖ ﻛﻪﺗﻜﻪﻧﯩﺪﻯ.
 ﻣﺎﯕﺎ ﻛﯩﭽﯩﻜﯩﻤﺪﯨﻦ ﺳﯩﯖﯩﭗ ﻛﻪﺗﻜﻪﻥ ﺑﯩﺮ ﺋﺎﯓ ﺷﯘﻛﻰ، ﺋﺎﺩﻩﻡ ﺟﺎﭘﺎ ﭼﻪﻛﻜﻪﻧﮕﻪ ﺋﯚﻟﯜﭖ ﻗﺎﻟﻤﺎﻳﺪﯗ؛ ﺋﯚﻟﯜﭘﻼ ﻗﺎﻟﻤﯩﺴﺎ، ﺑﺎﺷﻘﺎ ﺋﯩﺸﻨﯩﯔ ﻛﺎﺭﻯ ﭼﺎﻏﻠﯩﻖ. ﻣﻪﻥ ﻛﯩﭽﯩﻚ ﯞﺍﻗﺘﯩﻤﺪﺍ ﻳﯧﺰﯨﺪﯨﻜﻰ ﺭﻩﻫﻤﻪﺗﻠﯩﻚ ﭼﻮﯓ ﺋﺎﭘﺎﻣﻨﯩﯔ ﻗﯧﺸﯩﻐﺎ ﻳﺎﺯﻟﯩﻖ ﺗﻪﺗﯩﻠﺪﻩ ﺑﺎﺭﻏﺎﻧﺪﺍ، ﭼﻮﯓ ﺋﺎﭘﺎﻡ ﻣﯧﻨﻰ ﺋﯚﻳﺪﯨﻦ 2 ﻛﯩﻠﻮﻣﯧﺘﯩﺮ ﻳﯩﺮﺍﻗﻠﯩﻘﺘﯩﻜﻰ ﺑﯩﺮ ﺗﯜﮔﻤﻪﻧﮕﻪ ﺑﯧﺮﯨﭗ، ﺋﯘﻥ ﺗﺎﺭﺗﯩﭗ ﻛﯧﻠﯩﺸﻜﻪ ﺑﯘﻳﺮﯗﻳﺘﺘﻰ. ﺋﯚﭼﯩﺮﻩﺗﺘﻪ ﺋﺎﺩﻩﻡ ﻛﯚﭖ ﺑﻮﻟﻐﺎﭼﻘﺎ، ﻣﺎﯕﺎ ﻧﯚﯞﻩﺕ ﺗﯧﮕﯩﭗ، ﺋﯘﻧﻨﻰ ﺗﺎﺭﺗﯩﭗ ﺑﻮﻟﻐﺎﻧﺪﺍ، ﯞﺍﻗﯩﺖ ﻳﯧﺮﯨﻢ ﻛﯧﭽﻪ ﺑﻮﻟﯘﭖ ﻛﯧﺘﻪﺗﺘﻰ. ﺗﯜﮔﻤﻪﻧﺪﯨﻦ ﺋﯚﻳﮕﻪ ﻗﺎﻳﺘﯩﺪﯨﻐﺎﻥ ﻳﻮﻟﺪﺍ ﺑﺎﺷﻘﺎ ﺋﯚﻳﻠﻪﺭ ﺋﺎﺳﺎﺳﻪﻥ ﻳﻮﻕ، ﻳﻮﻟﻨﯩﯔ ﺋﯩﻜﻜﻰ ﺗﻪﺭﯨﭙﻰ ﻣﺎﻳﻤﺎﻕ-ﺳﺎﻳﻤﺎﻕ ﺟﯩﮕﺪﻩ ﺩﻩﺭﯨﺨﻰ ﺑﯩﻠﻪﻥ ﺗﻮﺷﻘﺎﻥ، ﺋﯘﻧﯩﯔ ﺋﯜﺳﺘﯩﮕﻪ ﺯﻩﺭﻩﺗﮕﺎﻫﻠﯩﻘﺘﯩﻦ ﺋﯚﺗﻪﺗﺘﻰ. ﻣﻪﻥ ﻛﯩﭽﯩﻜﯩﻤﺪﯨﻦ ﺗﺎﺭﺗﯩﭙﻼ ﺟﯩﻨﻨﯩﯔ ﻫﯧﻜﺎﻳﯩﺴﯩﻨﻰ ﻛﯚﭖ ﺋﺎﯕﻼﭖ، ﻳﯧﺰﯨﺪﺍ ﻛﯧﭽﯩﺴﻰ ﻳﻮﻝ ﻣﺎﯕﺴﺎﻡ ﺧﯧﻠﯩﻼ ﻗﻮﺭﻗﯘﺩﯨﻐﺎﻥ ﺑﻮﻟﯘﭖ ﻗﺎﻟﻐﺎﻥ ﺋﯩﺪﯨﻢ. ﺷﯘﯕﺎ، ﺑﯘ ﺑﯩﺮ ﺯﻩﺭﻩﺗﮕﺎﻫﻠﯩﻘﺘﯩﻦ ﻛﯧﺴﯩﭗ ﺋﯚﺗﯩﺪﯨﻐﺎﻥ 2 ﻛﯩﻠﻮﻣﯧﺘﯩﺮ ﻳﻮﻟﻨﻰ ﻣﯧﯖﯩﭗ، ﺋﯚﻳﮕﻪ ﻗﺎﻳﺘﯩﭗ ﻛﯧﺘﯩﺶ، ﻣﻪﻥ ﺋﯚﻣﺮﯛﻣﺪﻩ ﺩﯗﭺ ﻛﻪﻟﮕﻪﻥ ﺋﻪﯓ ﻣﯜﺷﻜﯜﻝ ﺋﯩﺸﻼﺭﻧﯩﯔ ﺑﯩﺮﻯ ﺋﯩﺪﻯ. ﭼﻮﯓ ﺋﺎﭘﺎﻣﻐﺎ "ﻣﻪﻥ ﻗﻮﺭﻗﯩﻤﻪﻥ"، ﺩﯦﻴﯩﺸﺘﯩﻦ ﻧﻮﻣﯘﺱ ﻗﯩﻼﺗﺘﯩﻢ. ﺷﯘﯕﺎ، ﺋﻪﯓ ﺋﺎﺧﯩﺮﯨﺪﺍ، "ﻣﻪﻥ ﻣﯘﺷﯘ ﻳﻮﻝ ﺑﯩﻠﻪﻥ ﺋﯚﻳﮕﻪ ﻗﺎﻳﺘﺴﺎﻡ، ﭼﻮﻗﯘﻡ ﺋﯚﻟﯜﭖ ﻛﻪﺗﻤﻪﻳﻤﻪﻥ. ﺑﺎﺷﻘﯩﺴﻰ ﻣﻪﻳﻠﻰ"، ﺩﻩﭖ ﻳﻮﻟﻐﺎ ﭼﯩﻘﺎﺗﺘﯩﻢ. ﺯﻩﺭﻩﺗﮕﺎﻫﻠﯩﻘﺘﯩﻦ ﺋﯚﺗﻜﯩﭽﻪ ﭘﯘﺗﻠﯩﺮﯨﻢ ﺗﯩﺘﺮﻩﭖ ﻫﻪﻡ ﺟﺎﻧﺴﯩﺰﻟﯩﻨﯩﭗ، ﻳﻮﻝ ﻣﺎﯕﺎﻟﻤﯩﻐﯩﻠﻰ ﺗﺎﺱ ﻗﺎﻻﺗﺘﯩﻢ. ﺟﯩﮕﺪﯨﻠﻪﺭﻧﯩﯔ ﺋﺎﻱ ﻧﯘﺭﻯ ﺋﺎﺳﺘﯩﺪﯨﻜﻰ ﺷﻮﻟﯩﻠﯩﺮﻯ ﻛﯚﺯﯛﻣﮕﻪ ﺋﺎﺟﺎﻳﯩﭗ-ﻏﺎﺭﺍﻳﯩﭗ ﻛﯚﺭﯛﻧﯩﺪﯨﻐﺎﻥ ﺑﻮﻟﻐﺎﭼﻘﺎ، ﺋﺎﺳﻤﺎﻧﻐﺎ ﻗﺎﺭﺍﭖ ﻧﺎﺧﺸﺎ ﺋﯧﻴﺘﯩﭗ ﻣﺎﯕﺴﺎﻣﻤﯘ، ﻫﯧﻠﯩﻘﻰ ﺯﻩﺭﻩﺗﮕﺎﻫﻠﯩﻘﻘﺎ ﻛﻪﻟﮕﻪﻧﺪﻩ ﻧﺎﺧﺸﯩﻨﯩﻤﯘ ﺩﺍﯞﺍﻣﻼﺷﺘﯘﺭﺍﻟﻤﺎﻳﺘﺘﯩﻢ. ﻟﯧﻜﯩﻦ، ﺋﯚﺯﯛﻡ ﺋﻮﻳﻠﯩﻐﺎﻧﺪﻩﻙ، ﻫﻪﺭ ﻗﯧﺘﯩﻢ ﺋﯚﻳﮕﻪ ﺋﯚﻟﯜﭖ ﻗﺎﻟﻤﺎﻱ ﺳﺎﻕ-ﺳﺎﻻﻣﻪﺕ ﻳﯧﺘﯩﭗ ﺑﺎﺭﻏﺎﻧﯩﺪﯨﻢ. ﺑﯩﺰ ﻗﺎﻳﺘﺎ ﺗﻪﺭﺑﯩﻴﻪﮔﻪ ﺑﺎﺭﻏﺎﻧﺪﺍ، ﺯﯨﻴﺎﻟﯩﻲ ﻳﺎﺷﻼﺭ ( ﻗﺎﻳﺘﺎ ﺗﻪﺭﺑﯩﻴﻪﮔﻪ ﺑﺎﺭﻏﺎﻥ ﻳﺎﺷﻼﺭ ﺷﯘﻧﺪﺍﻕ ﺋﺎﺗﯩﻼﺗﺘﻰ) ﻳﯧﺰﯨﺪﺍ ﻛﺎﭘﺎﻟﻪﺗﻜﻪ ﺋﯩﮕﻪ ﺑﻮﻟﻐﺎﻥ ﻧﻪﺭﺳﻪ ﭘﻪﻗﻪﺕ ﺑﯩﺮﻻ ﺋﯩﺪﻯ. ﺋﯘ ﺑﻮﻟﺴﯩﻤﯘ، ﺑﯩﺰ ﺋﺎﺵ ﻗﯧﻠﯩﭗ ﺋﯚﻟﯜﭖ ﻗﺎﻟﻤﺎﻳﺘﺘﯘﻕ--ﺑﯩﺰﮔﻪ ﭘﻪﻗﻪﺕ ﺗﺎﻣﺎﻗﻨﻰ ﺑﯩﻜﺎﺭﻏﺎ ﺑﯧﺮﻩﺗﺘﻰ. ﺋﻪﻣﻤﺎ، ﺑﯩﺰﮔﻪ ﺑﯩﺮ ﺗﯩﻴﯩﻨﻤﯘ ﭘﯘﻝ ﺑﻪﺭﻣﻪﻳﺘﺘﻰ. ﻳﯩﻠﺒﻮﻳﻰ ﺑﯩﻜﺎﺭﻏﺎ ﺋﯩﺸﻠﻪﻳﺘﺘﯘﻕ. ﻛﯩﻴﯩﻢ-ﻛﯧﭽﻪﻛﺘﻪ ﻳﻪﻧﯩﻼ ﺋﺎﺗﺎ-ﺋﺎﻧﯩﻤﯩﺰﻏﺎ ﺗﺎﻳﯩﻨﺎﺗﺘﯘﻕ. ﻣﻪﻥ ﻗﺎﻳﺘﺎ ﺗﻪﺭﺑﯩﻴﻪ ﺋﯧﻠﯩﺸﻘﺎ ﺑﺎﺭﻏﺎﻥ ﻳﯧﺰﺍ ﺑﯩﺰﻧﯩﯔ ﺋﯚﻳﺪﯨﻦ 12 ﻛﯩﻠﻮﻣﯧﺘﯩﺮ ﻳﯩﺮﺍﻗﻠﯩﻘﺘﺎ ﺋﯩﺪﻯ. ﻛﻮﻧﯩﺸﻪﻫﻪﺭﻧﯩﯔ ﻧﺎﻫﯩﻴﻪ ﺑﺎﺯﯨﺮﯨﺪﯨﻨﻤﯘ ﻳﯩﺮﺍﻕ ﺑﻮﻟﻐﺎﭼﻘﺎ، ﻧﺎﻫﯩﻴﻪ ﺑﺎﺯﯨﺮﯨﻐﺎ ﺑﯧﺮﯨﭗ، ﺋﺎﭘﺘﻮﺑﯘﺳﻘﺎ ﭼﯜﺷﯜﺷﻤﯘ ﻗﻮﻻﻳﺴﯩﺰ ﺋﯩﺪﻯ. ﺋﺎﺋﯩﻠﯩﻤﯩﺰﻧﯩﯔ ﺋﯩﻘﺘﯩﺴﺎﺩﯨﻲ ﻗﯩﻴﯩﻨﭽﯩﻠﯩﻘﻰ ﺗﯜﭘﻪﻳﻠﯩﺪﯨﻦ، ﻣﻪﻥ ﺑﯩﺮﻩﺭ ﯞﯦﻠﯩﺴﭙﯩﺘﻘﺎ ﭼﯩﻘﯩﻨﺎﻟﻤﯩﻐﺎﻥ ﺋﯩﺪﯨﻢ. ﺷﯘﯕﻼﺷﻘﺎ، ﻫﻪﺭ ﺷﻪﻧﺒﻪ ﻛﯜﻧﻰ ﻛﻪﭼﺘﻪ ﺋﯩﺸﺘﯩﻦ ﭼﯜﺷﻜﻪﻧﺪﯨﻦ ﻛﯧﻴﯩﻦ، ﺋﺎﻗﺴﯘﺩﯨﻜﻰ ﺋﯚﻳﯩﻤﯩﺰﮔﻪ ﭘﯩﻴﺎﺩﻩ ﻗﺎﻳﺘﯩﭗ ﻛﯧﻠﻪﺗﺘﯩﻢ. ﺋﺎﻗﺴﯘﺩﯨﻦ ﺑﺎﺭﻏﺎﻥ ﺑﺎﺷﻘﺎ ﺋﻮﻏﯘﻝ ﺑﺎﻻ ﺑﻮﻟﻤﯩﻐﺎﭼﻘﺎ، ﺋﯚﺯﯛﻡ ﻳﺎﻟﻐﯘﺯ ﻣﺎﯕﺎﺗﺘﯩﻢ. ﻳﻮﻟﻨﻰ ﻗﯩﺴﻘﺎﺭﺗﯩﺶ ﺋﯜﭼﯜﻥ، ﺋﯧﺘﯩﺰﻟﯩﻘﻼﺭﻧﯩﯔ ﻗﯩﺮﻟﯩﺮﯨﺪﺍ، ﺋﯚﺳﺘﻪﯓ ﺑﻮﻳﻠﯩﺮﯨﺪﺍ ﻣﺎﯕﺎﺗﺘﯩﻢ. 12 ﻛﯩﻠﻮﻣﯧﺘﯩﺮ ﻳﻮﻟﻨﻰ 2 ﺳﺎﺋﻪﺗﺘﻪ ﻣﯧﯖﯩﭗ، ﺋﺎﻧﺪﯨﻦ ﺋﯚﻳﮕﻪ ﻛﯧﻠﻪﺗﺘﯩﻢ. ﻳﻪﻛﺸﻪﻧﺒﻪ ﻛﯜﻧﻰ ﻛﻪﭼﺘﻪ ﻳﻪﻧﻪ 2 ﺳﺎﺋﻪﺕ ﻳﻮﻝ ﻳﯜﺭﯛﭖ، ﺋﯘ ﻳﯧﺰﯨﻐﺎ ﻗﺎﻳﺘﯩﭗ ﻛﯧﺘﻪﺗﺘﯩﻢ. ﻳﯧﺰﯨﺪﺍ ﻗﺎﻳﺘﺎ ﺗﻪﺭﺑﯩﻴﻪ ﺋﺎﻟﻐﺎﻥ ﺑﯩﺮ ﻳﯧﺮﯨﻢ ﻳﯩﻠﺪﯨﻦ ﻛﯚﭘﺮﻩﻙ ﯞﺍﻗﯩﺘﻨﯩﯔ ﻫﻪﻣﻤﯩﺴﯩﺪﻩ ﺋﺎﺷﯘﻧﺪﺍﻕ ﻗﯩﻠﺪﯨﻢ.
 1983- ﻳﯩﻠﻰ ﻳﺎﻧﯟﺍﺭﺩﺍ، ﻣﻪﻥ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﻨﻰ ﭘﯜﺗﺘﯜﺭﯛﭖ ﺑﻮﻟﯘﺷﯘﻣﻐﯩﻼ، ﻓﺎﻛﯘﻟﺘﯧﺘﺘﯩﻦ ﻣﯧﻨﻰ ﺷﺎﯕﺨﻪﻱ ﻗﺎﺗﻨﺎﺵ ﺋﯘﻧﯩﯟﯦﺮﺳﯩﺘﯧﺘﯩﮕﻪ ﺋﯧﻠﯧﻜﺘﺮﻭ-ﻣﺎﮔﻨﯩﺘﻠﯩﻖ ﺩﻭﻟﻘﯘﻥ ﺑﯩﻠﻪﻥ ﻣﯩﻜﺮﻭ-ﺩﻭﻟﻘﯘﻥ ﺗﯧﺨﻨﯩﺴﯩﻜﻰ ﺑﻮﻳﯩﭽﻪ ﺑﯩﻠﯩﻢ ﺋﺎﺷﯘﺭﯗﺷﻘﺎ ﻣﺎﯕﺪﯗﺭﺩﻯ. ﺋﯘ ﭼﺎﻏﺪﺍ ﺷﯩﻨﺠﺎﯕﺪﺍ ﺑﯘ ﻛﻪﺳﯩﭗ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯨﻐﺎﻥ 2-ﺑﯩﺮ ﻛﯩﺸﻰ ﺑﻮﻟﻤﯩﻐﺎﭼﻘﺎ، ﺑﯩﺮ ﻳﯩﻠﻨﯩﯔ ﺋﯩﭽﯩﺪﻩ ﺋﯚﮔﯩﻨﯩﺸﻜﻪ ﺗﯧﮕﯩﺸﻠﯩﻚ ﻧﻪﺭﺳﯩﻠﻪﺭﻧﯩﯔ ﻫﻪﻣﻤﯩﺴﯩﻨﻰ ﺋﯚﮔﯩﻨﯩﭗ، ﺑﯘ ﺳﺎﻫﻪﺩﻩ ﺑﯩﺮ ﻧﻮﭘﯘﺯﻟﯘﻕ ﺋﺎﺩﻩﻡ ﺑﻮﻟﯘﭖ ﭼﯩﻘﯩﺸﻘﺎ ﺑﻪﻝ ﺑﺎﻏﻠﯩﺪﯨﻢ. ﺑﻪﻟﮕﯩﻠﻪﻧﮕﻪﻥ ﺩﻩﺭﺳﻠﻪﺭﻧﻰ ﺋﻮﻗﯘﺷﺘﯩﻦ ﺳﯩﺮﺕ، ﻣﻪﻥ ﻳﻪﻧﻪ ﻳﯧﺘﻪﻛﭽﻰ ﺋﻮﻗﯘﺗﻘﯘﭼﯘﻣﻐﺎ ﻳﺎﺭﺩﻩﻣﻠﯩﺸﯩﭗ، ﻣﯩﻜﺮﻭ ﺩﻭﻟﻘﯘﻥ ﺗﻪﺟﺮﯨﺒﻪﺧﺎﻧﯩﺴﯩﻨﻰ ﺗﻪﻳﻴﺎﺭﻻﭖ، ﻫﻪﻣﺪﻩ ﺋﯘ ﺩﻩﺭﺳﻨﻰ ﺋﯚﺗﯜﺷﯜﭖ ﺑﻪﺭﺩﯨﻢ. ﺑﯩﺮ ﻳﯩﻠﻨﯩﯔ ﺋﯩﭽﯩﺪﯨﻜﻰ 2 ﻣﻪﯞﺳﯜﻣﻨﯩﯔ ﻫﻪﺭ ﺋﯩﻜﻜﯩﻠﯩﺴﯩﺪﻩ ﺋﺎﺷﯘﻧﺪﺍﻕ ﻗﯩﻠﺪﯨﻢ. ﻳﺎﺯﻟﯩﻖ ﺗﻪﺗﯩﻠﺪﻩ ﻳﯘﺭﺗﻘﺎ ﻗﺎﻳﺘﻤﺎﻱ، ﻧﻪﻧﺠﯩﯖﺪﻩ ﺋﯧﻠﯩﭗ ﺑﯧﺮﯨﻠﯩﺪﯨﻐﺎﻥ ﺑﯩﺮ 4 ﻫﻪﭘﺘﯩﻠﯩﻚ ﭘﺮﺍﻛﺘﯩﻜﯩﻐﺎ ﻗﺎﺗﻨﯩﺸﯩﺸﻨﻰ ﺗﻪﻟﻪﭖ ﻗﯩﻠﺪﯨﻢ. ﺋﻪﻳﻨﻰ ﯞﺍﻗﯩﺘﺘﯩﻜﻰ ﻓﯩﺰﯨﻜﺎ ﻓﺎﻛﯘﻟﺘﯧﺘﯩﻨﯩﯔ ﻣﯘﺩﯨﺮﻯ، ﺋﻮﻗﯘﺗﻘﯘﭼﯘﻡ ﺳﯘﻟﺘﺎﻥ ﺋﺎﻛﺎ ﻣﻪﻛﺘﻪﭘﺘﯩﻦ ﺋﯘ ﭘﺮﺍﻛﺘﯩﻜﯩﻨﯩﯔ ﺧﯩﺮﺍﺟﯩﺘﯩﻨﻰ ﻫﻪﻝ ﻗﯩﻠﯩﭗ ﺑﻪﺭﺩﻯ. ﭘﺮﺍﻛﺘﯩﻜﯩﻨﻰ ﻧﻪﻧﺠﯩﯖﺪﯨﻜﻰ ﺑﯩﺮ ﻣﻪﺧﭙﯩﻲ ﻫﻪﺭﺑﯩﻲ ﺭﺍﺩﺍﺭ ﺯﺍﯞﯗﺗﯩﺪﺍ ﺋﯧﻠﯩﭗ ﺑﺎﺭﺩﯗﻕ. ﺑﯘ ﺯﺍﯞﯗﺗﻨﯩﯔ ﺭﺍﺩﺍﺭﻧﻰ ﺳﯩﻨﺎﻕ ﻗﯩﻠﯩﺪﯨﻐﺎﻥ ﺋﻮﺭﻧﻰ ﻧﻪﻧﺠﯩﯖﺪﯨﻜﻰ ﺑﯩﺮ ﭼﻪﺕ ﻳﯧﺰﯨﺪﺍ ﺋﯩﻜﻪﻥ. ﺑﯩﺰ ﺋﯘ ﺳﯩﻨﺎﻕ ﺋﻮﺭﻧﯩﻐﺎ 1-ﻛﯜﻧﻰ ﺑﺎﺭﻏﺎﻧﺪﺍ، ﭼﯜﺷﻠﯜﻙ ﺗﺎﻣﺎﻕ ﺋﯜﭼﯜﻥ ﺋﯘ ﻳﻪﺭﺩﯨﻦ ﻫﯧﭽﻘﺎﻧﺪﺍﻕ ﺑﯩﺮ ﻣﯘﺳﯘﻟﻤﺎﻥ ﺋﺎﺷﺨﺎﻧﯩﺴﻰ ﺗﺎﭘﺎﻟﻤﯩﺪﯨﻢ. ﺷﯘﻧﯩﯔ ﺑﯩﻠﻪﻥ ﭼﯜﺷﻠﯜﻙ ﺗﺎﻣﺎﻕ ﻳﯧﻤﯩﺪﯨﻢ. ﺋﯘ ﭼﺎﻏﺪﺍ ﺟﯘﯕﮕﻮﺩﺍ ﺗﯧﺨﻰ ﺗﻮﯕﻼﺗﻘﯘ ﺩﯦﮕﻪﻧﺪﻩﻙ ﻧﻪﺭﺳﯩﻠﻪﺭ ﭼﯩﻘﻤﯩﻐﺎﻥ ﺋﯩﺪﻯ. ﺋﯩﻜﻜﯩﻨﭽﻰ ﻛﯜﻧﯩﺪﯨﻦ ﺑﺎﺷﻼﭖ، ﻣﻪﻥ ﺋﻪﺗﯩﮕﻪﻧﻠﯩﻚ ﺗﺎﻣﺎﻕ ﯞﺍﻗﺘﯩﺪﺍ ﭼﯜﺷﻠﯜﻙ ﺗﺎﻣﺎﻗﻨﯩﻤﯘ ﻗﻮﺷﯘﭖ، 100 ﮔﺮﺍﻣﻠﯩﻖ ﻫﻮﺭ ﻧﯧﻨﯩﺪﯨﻦ 3-4 ﻳﻪﯞﺍﻟﺪﯨﻢ. ﭼﯜﺷﺘﻪ ﺗﺎﻣﺎﻕ ﻳﯧﻤﯩﺪﯨﻢ. ﻣﻪﻥ ﭘﺎﺕ-ﭘﺎﺕ ﻣﯘﺷﯘﻧﺪﺍﻕ ﺋﯩﺸﻼﺭ ﺑﯩﻠﻪﻥ ﺋﯚﺯﯛﻣﻨﯩﯔ ﺋﯩﺮﺍﺩﯨﺴﯩﻨﻰ ﺳﯩﻨﺎﭖ ﺗﯘﺭﯨﻤﻪﻥ. ﺋﻮﻏﻠﯘﻣﻐﺎ ﻣﯘﺷﯘﻧﺪﺍﻕ ﻫﯧﻜﺎﻳﯩﻠﻪﺭﻧﻰ ﺩﺍﯞﺍﻣﻠﯩﻖ ﺋﯧﻴﺘﯩﭗ ﺑﯧﺮﯨﭗ، "ﺋﻮﻏﻠﯘﻡ، ﺋﻪﮔﻪﺭ ﻫﺎﺯﯨﺮ ﺳﻪﻥ ﺑﯩﺮ ﺟﺎﯕﮕﺎﻟﺪﺍ ﻗﯧﻠﯩﭗ، ﻳﻪﻳﺪﯨﻐﺎﻥ ﺑﯩﺮ ﻧﻪﺭﺳﻪﯓ ﺑﻮﻟﻤﯩﺴﺎ، ﺋﯘ ﻳﻪﺭﺩﻩ ﺟﯧﻨﯩﯖﻨﻰ ﺑﯩﺮﻩﺭ ﻫﻪﭘﺘﻪ ﺳﺎﻗﻠﯩﻴﺎﻻﻣﺴﻪﻥ؟ ﺳﺎﻗﻼﺵ ﺋﯜﭼﯜﻥ ﻗﺎﻧﺪﺍﻕ ﻗﯩﻠﯩﺴﻪﻥ؟" ﺩﻩﭖ ﺳﻮﺭﺍﭖ ﻗﻮﻳﯩﻤﻪﻥ. ﺋﯘ ﻛﯚﭘﯩﻨﭽﻪ: "ﺩﺍﺩﺍ، ﻣﯧﻨﯩﯔ ﺳﯩﺰﻧﯩﯔ ﺋﯚﺗﻤﯜﺷﯩﯖﯩﺰﮔﻪ ﺋﯩﭽﯩﻢ ﺋﺎﻏﺮﯨﻴﺪﯗ. ﺋﻪﻣﻤﺎ، ﻫﺎﺯﯨﺮ ﺋﯚﺗﻤﯜﺵ ﺋﻪﻣﻪﺱ. ﺑﯩﺰﺩﻩ ﻫﺎﺯﯨﺮ ﺋﺎﺵ ﻛﻪﯕﺮﻯ" ﺩﻩﭖ ﺟﺎﯞﺍﺏ ﺑﯧﺮﯨﺪﯗ. ﺷﯘﻧﺪﺍﻕ ﺑﻮﻟﺴﯩﻤﯘ، ﻣﻪﻥ ﺷﯘ ﺋﻮﺧﺸﺎﺵ ﮔﻪﭘﻨﻰ ﺗﻪﻛﺮﺍﺭﻻﭖ ﺗﯘﺭﯨﻤﻪﻥ.
  ﻣﻪﻥ ﻳﺎﭘﻮﻧﯩﻴﻪﺩﻩ ﺋﯩﺸﻠﯩﮕﻪﻥ ﺗﻪﺗﻘﯩﻘﺎﺕ ﺑﯩﺮ ﻣﺎﮔﻨﯩﺘﻠﯩﻖ ﻣﯩﻜﺮﻭ ﺩﻭﻟﻘﯘﻥ ﺯﺍﭘﭽﯩﺴﻰ ﺋﯜﺳﺘﯩﺪﻩ ﺑﻮﻟﯘﭖ، ﺋﯘﻧﯩﯔ ﻣﺎﺗﯧﻤﺎﺗﯩﻜﯩﻠﯩﻖ ﻓﻮﺭﻣﯘﻻﻻﺷﺘﯘﺭﯗﻟﯩﺸﻰ ﺋﯩﻨﺘﺎﻳﯩﻦ ﻣﯘﺭﻩﻛﻜﻪﭖ ﺋﯩﺪﻯ. ﺑﯩﺮ ﻓﻮﺭﻣﯘﻻﻧﯩﯔ ﺋﯘﺯﯗﻧﻠﯘﻗﻰ ﻧﻮﺭﻣﺎﻝ ﺋﯩﺶ ﻗﻪﻏﯩﺰﯨﺪﻩ 2 ﺑﻪﺕ ﻛﯧﻠﯩﺪﯨﻐﺎﻥ ﺑﻮﻟﯘﭖ، ﺑﯩﺮﻩﺭ ﭘﯩﻠﯘﺱ ﻳﺎﻛﻰ ﻣﯩﻨﯘﺱ ﺑﻪﻟﮕﯜﺳﯩﺪﻩ ﺧﺎﺗﺎﻟﯩﻖ ﺑﻮﻟﯘﭖ ﻗﺎﻟﺴﯩﻤﯘ، ﺋﻪﯓ ﺋﺎﺧﯩﺮﻗﻰ ﻧﻪﺗﯩﺠﻪ ﺗﻮﻏﺮﺍ ﭼﯩﻘﻤﺎﻳﺘﺘﻰ. ﺑﯘ ﺯﺍﭘﭽﺎﺳﻨﯩﯔ ﺋﺎﺳﺎﺳﻠﯩﻖ ﻓﻮﺭﻣﯘﻻﺳﯩﻨﻰ ﻛﻪﻟﺘﯜﺭﯛﭖ ﭼﯩﻘﯩﺮﯨﺶ ﺋﯜﭼﯜﻥ، 20-30 ﻓﻮﺭﻣﯘﻻ ﭼﯩﻘﯩﺮﯨﺸﻘﺎ ﺗﻮﻏﺮﺍ ﻛﯧﻠﻪﺗﺘﻰ. ﻣﻪﻥ ﺋﺎﺷﯘﻧﺪﺍﻕ ﻣﺎﺗﯧﻤﺎﺗﯩﻜﯩﻠﯩﻖ ﻣﻪﺳﯩﻠﯩﻨﻰ ﻳﯧﺸﯩﭗ، ﻳﺎﭘﻮﻧﯩﻴﻪﮔﻪ ﺑﯧﺮﯨﭗ 3 ﺋﺎﻳﺪﯨﻦ ﻛﯧﻴﯩﻦ، ﺑﯩﺮﯨﻨﭽﻰ ﺋﯩﻠﻤﯩﻲ ﻣﺎﻗﺎﻟﯩﻨﻰ ﻣﻪﻣﻠﯩﻜﻪﺗﻠﯩﻚ ﻳﯩﻐﯩﻨﻐﺎ ﻳﻮﻟﻠﯩﺪﯨﻢ. ﺋﺎﻟﺘﻪ ﺋﺎﻳﺪﯨﻦ ﻛﯧﻴﯩﻦ 2-ﻣﺎﻗﺎﻟﯩﻨﻰ ﻳﻮﻟﻠﯩﺪﯨﻢ.  ﻣﻪﻥ ﺋﯩﻜﻜﯩﻨﭽﻰ ﻗﯧﺘﯩﻤﻘﻰ ﻳﯩﻐﯩﻨﺪﺍ ﻣﺎﻗﺎﻟﻪﻣﻨﻰ ﺩﻭﻛﻼﺕ ﻗﯩﻠﯩﭗ ﺑﻮﻟﻐﺎﻧﺪﺍ، ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺑﯩﺮ ﭘﺮﻭﻓﯧﺴﺴﻮﺭﻯ ﻗﯧﺸﯩﻤﻐﺎ ﻛﯧﻠﯩﭗ، ﺑﯘﻧﯩﯖﺪﯨﻜﻰ ﻓﻮﺭﻣﯘﻻﻧﻰ ﻛﯩﻢ ﺋﯩﺸﻠﻪﭖ ﭼﯩﻘﺎﺭﻏﺎﻧﻠﯩﻘﯩﻨﻰ ﺳﻮﺭﯨﺪﻯ. ﻣﻪﻥ ﺋﯚﺯﯛﻡ ﻗﯩﻠﻐﺎﻧﻠﯩﻘﯩﻤﻨﻰ ﺋﯧﻴﺘﺘﯩﻢ. ﺋﯘ ﻛﯩﺸﻰ ﻫﻪﻳﺮﺍﻥ ﻗﯧﻠﯩﭗ، ﺩﻩﺭﻫﺎﻝ ﻣﯧﻨﯩﯔ ﺋﯘﺳﺘﺎﺯﯨﻢ ﺑﯩﻠﻪﻥ ﻛﯚﺭﯛﺷﺘﻰ. ﺋﻪﺳﻠﯩﺪﻩ، ﺑﯘ ﭘﺮﻭﻓﯧﺴﺴﻮﺭﻧﯩﯔ ﺑﯩﺮ ﻣﺎﮔﯩﺴﺘﯩﺮﻟﯩﻖ ﯞﻩ ﺑﯩﺮ ﺩﻭﻛﺘﯘﺭﻟﯘﻕ ﺋﻮﻗﯘﺷﯩﺪﯨﻜﻰ ﺋﻮﻗﯘﻏﯘﭼﯩﺴﯩﻤﯘ ﺑﯩﺰﻧﯩﯖﻜﻰ ﺑﯩﻠﻪﻥ ﺋﻮﺧﺸﺎﺵ ﻣﻪﺳﯩﻠﻪ ﺋﯜﺳﺘﯩﺪﻩ ﺗﻪﺗﻘﯩﻘﺎﺕ ﺋﯧﻠﯩﭗ ﺑﯧﺮﯨﯟﺍﺗﻘﺎﻥ ﺑﻮﻟﯘﭖ، ﺋﯘﻻﺭﻧﯩﯔ ﮔﯘﺭﯗﭘﭙﯩﺴﻰ ﺑﯘ ﻣﻪﺳﯩﻠﯩﻨﯩﯔ ﻣﺎﺗﯧﻤﺎﺗﯩﻜﯩﻠﯩﻖ ﻓﻮﺭﻣﯘﻻﺳﯩﻨﻰ ﺋﯩﺸﻠﻪﭖ ﭼﯩﻘﯩﺮﺍﻟﻤﯩﻐﺎﻥ ﺋﯩﻜﻪﻥ. ﺷﯘﻧﯩﯔ ﺑﯩﻠﻪﻥ ﺑﯘ 2 ﮔﯘﺭﯗﭘﭙﺎ ﺑﯩﺮﻟﯩﺸﯩﭗ، ﺑﯩﺮ ﻣﺎﻗﺎﻟﻪ ﺋﯧﻼﻥ ﻗﯩﻠﯩﺪﯨﻐﺎﻥ ﺑﻮﻟﺪﯗﻕ. ﺋﯘ ﻣﺎﻗﺎﻟﻪ ﺋﺎﻣﯧﺮﯨﻜﯩﺪﺍ ﭼﯩﻘﯩﺪﯨﻐﺎﻥ، ﻣﯩﻜﺮﻭ ﺩﻭﻟﻘﯘﻥ ﺳﺎﻫﻪﺳﯩﺪﻩ ﺩﯗﻧﻴﺎ ﺑﻮﻳﯩﭽﻪ ﺋﻪﯓ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﮊﻭﺭﻧﺎﻝ ﺑﻮﻟﻐﺎﻥ

"Ieee transachtions on michrowawe technology" ﺩﯦﮕﻪﻥ ﮊﻭﺭﻧﺎﻟﻐﺎ ﭼﯩﻘﺘﻰ. ﻣﻪﻥ 1-ﺋﺎﭘﺘﻮﺭ ﺑﻮﻟﺪﯗﻡ. ﺷﯘﻧﯩﯖﺪﯨﻦ ﻛﯧﻴﯩﻦ ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﺪﯨﻜﻰ ﻫﯧﻠﯩﻘﻰ ﭘﺮﻭﻓﯧﺴﺴﻮﺭ ﺋﯚﺯﯨﻨﯩﯔ ﺗﻪﺗﻘﯩﻘﺎﺕ ﺭﺍﺳﺨﻮﺗﯩﺪﯨﻦ ﭘﯘﻝ ﭼﯩﻘﯩﺮﯨﭗ، ﻣﯧﻨﯩﯔ ﺑﺎﺭﻟﯩﻖ ﻳﻮﻝ ﻛﯩﺮﺍﻳﯩﻤﻨﻰ ﺗﯚﻟﻪﭖ، ﺋﯚﺯﻟﯩﺮﯨﻨﯩﯔ ﻫﻪﺭ ﻫﻪﭘﺘﯩﺪﻩ ﺑﯩﺮ ﻗﯧﺘﯩﻢ ﺋﯚﺗﻜﯜﺯﯛﻟﯩﺪﯨﻐﺎﻥ ﺗﻪﺗﻘﯩﻘﺎﺕ ﻣﯘﺯﺍﻛﯩﺮﻩ ﻳﯩﻐﯩﻨﯩﻐﺎ ﻗﺎﺗﻨﺎﺷﺘﯘﺭﺩﻯ. ﻣﻪﻥ ﺋﯚﺯﯛﻡ ﺋﯩﺸﻠﻪﯞﺍﺗﻘﺎﻥ ﺋﺎﻟﯩﻲ ﻣﻪﻛﺘﻪﭘﺘﻪ ﺋﺎﻻﻫﯩﺪﻩ ﻛﯚﺯﮔﻪ ﻛﯚﺭﯛﻧﮕﻪﻧﺪﯨﻦ ﻛﯧﻴﯩﻦ، ﺋﯘﻻﺭ ﻣﺎﯕﺎ ﻳﺎﺭﺩﻩﻡ ﻗﯩﻠﯩﺸﻨﻰ ﻗﺎﺭﺍﺭ ﻗﯩﻠﯩﭗ، 1987-ﻳﯩﻠﻰ ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﻣﺎﮔﯩﺴﺘﯩﺮﻟﯩﻖ ﺋﻮﻗﯘﺷﯩﻐﺎ ﻳﯚﺗﻜﻪﭖ ﻗﻮﻳﯩﺪﯨﻐﺎﻥ ﺑﻮﻟﺪﻯ. ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﻤﯘ ﻣﯧﻨﻰ ﺋﯩﻤﺘﯩﻬﺎﻧﺴﯩﺰ ﻗﻮﺑﯘﻝ ﻗﯩﻠﺪﻯ. ﺩﻩﻝ ﺷﯘ ﭼﺎﻏﺪﺍ ﺷﯩﻨﺠﺎﯕﺪﯨﻦ ﺑﯩﺮ ﻫﯚﻛﯜﻣﻪﺕ ﯞﻩﻛﯩﻠﻠﻪﺭ ﺋﯚﻣﯩﻜﻰ ﻛﻪﻟﮕﻪﻥ ﺑﻮﻟﯘﭖ، ﺑﯩﺰﻧﯩﯔ ﻣﻪﻛﺘﻪﭘﻨﯩﯔ 1-ﻣﯘﺩﯨﺮﻯ ﺑﯩﺮ ﻳﯩﻐﯩﻨﺪﺍ ﻣﯧﻨﯩﯔ ﻣﻪﻛﺘﻪﭖ ﺋﺎﻟﻤﺎﺷﻤﺎﻗﭽﻰ ﺑﻮﻟﻐﺎﻥ ﺋﯩﺸﯩﻤﻨﻰ ﺋﻮﺗﺘﯘﺭﯨﻐﺎ ﻗﻮﻳﺪﻯ. ﺑﯘ ﯞﻩﻛﯩﻠﻠﻪﺭﺩﯨﻦ ﻫﯩﭻ ﻗﺎﻧﺪﺍﻕ ﺋﯩﻨﻜﺎﺱ ﭼﯩﻘﻤﯩﻐﺎﭼﻘﺎ، ﻣﻪﻛﺘﻪﭖ ﻣﯘﺩﯨﺮﻯ ﺋﯘﻻﺭﻏﺎ ﺗﺎﺯﯨﻢ ﻗﯩﻠﯩﭗ ﺗﯘﺭﯗﭖ، ﻣﯘﻧﺪﺍﻕ ﺩﯨﺪﻯ: "ﺋﻪﺭﻛﯩﻦ ﺑﯩﺮ ﺋﺎﻻﻫﯩﺪﻩ ﺗﺎﻻﻧﺘﻠﯩﻖ ﻳﺎﺵ ﺋﯩﻜﻪﻥ. ﺋﯘﻧﯩﯖﻐﺎ ﻳﺎﺭﺩﻩﻡ ﻗﯩﻠﺴﺎﯕﻼﺭ، ﺋﯘ ﻛﻪﻟﮕﯜﺳﯩﺪﻩ ﻗﺎﻟﺘﯩﺲ ﺋﯩﺸﻼﺭﻧﻰ ﻗﯩﻼﻻﻳﺪﯗ. ﺳﯩﻠﻪﺭ ﻫﻪﺭﮔﯩﺰ ﺯﯨﻴﺎﻥ ﺗﺎﺭﺗﻤﺎﻳﺴﯩﻠﻪﺭ. ﺑﯩﺮ ﺋﻮﻳﻠﯩﺸﯩﭗ ﺑﺎﻗﺴﺎﯕﻼﺭ". ﺑﯘﻧﯩﯖﻐﺎ ﻳﻪﻧﻪ ﺟﺎﯞﺍﺏ ﭼﯩﻘﻤﯩﺪﻯ. ﻳﯩﻐﯩﻨﺪﯨﻦ ﻛﯧﻴﯩﻦ، ﺋﯘﺳﺘﺎﺯﯨﻢ ﻣﯧﻨﻰ ﺋﯚﺯ ﻳﯧﻨﯩﻐﺎ ﭼﺎﻗﯩﺮﯨﭗ، "ﺋﻪﺭﻛﯩﻦ، ﻳﺎﭘﻮﻧﻠﯘﻗﻼﺭﻧﯩﯔ ﺑﯩﺮ ﺋﺎﺩﯨﺘﻰ، ﺋﯘﻻﺭ ﻫﻪﺭﮔﯩﺰ ﺑﺎﺷﻘﯩﻼﺭﻏﺎ ﺑﺎﺵ ﺋﻪﮔﻤﻪﻳﺪﯗ. ﺑﺎﺷﻘﯩﻼﺭﻏﺎ ﺗﺎﺯﯨﻢ ﻗﯩﻠﯩﺸﻘﺎ ﺗﻮﻏﺮﺍ ﻛﻪﻟﮕﻪﻧﺪﻩ، ﺋﯘﻻﺭ ﺋﯘﻧﯩﯔ ﺋﻮﺭﻧﯩﻐﺎ ﺋﯚﺯ ﻗﺎﺭﻧﯩﻐﺎ ﭘﯩﭽﺎﻕ ﺗﯩﻘﯩﭗ، ﺋﯚﺯﯨﻨﻰ ﺋﯚﻟﺘﯜﺭﯨﯟﺍﻟﯩﺪﯗ. ﺑﯜﮔﯜﻥ ﺑﯩﺰﻧﯩﯔ ﻣﻪﻛﺘﻪﭘﻨﯩﯔ 1-ﻣﯘﺩﯨﺮﻯ ﺳﻪﻧﺪﻩﻙ ﺑﯩﺮ ﺋﯘﻳﻐﯘﺭ ﺋﯜﭼﯜﻥ ﺑﯩﺮ ﻗﺎﻧﭽﻪ ﺟﯘﯕﮕﻮﻟﯘﻗﻘﺎ ﺑﺎﺵ ﺋﻪﮔﺪﻯ. ﺋﯘﻻﺭﻏﺎ ﺗﺎﺯﯨﻢ ﻗﯩﻠﯩﭗ ﺗﯘﺭﯗﭖ ﻳﺎﻟﯟﯗﺭﺩﻯ. ﺳﻪﻥ ﺑﯘﻧﯩﯔ ﻗﯩﻤﻤﯩﺘﯩﻨﻰ ﻫﻪﺭﮔﯩﺰ ﺋﯘﻧﺘﯘﭖ ﻗﺎﻟﻤﺎ". ﺑﯘ ﮔﻪﭘﻠﻪﺭﻧﻰ ﺩﻩﯞﺍﺗﻘﺎﻧﺪﺍ، ﺋﯘﺳﺘﺎﺯﯨﻤﻨﯩﯔ ﺋﺎﯞﺍﺯﻯ ﺗﯩﺘﺮﻩﭖ، ﻛﯚﺯﻟﯩﺮﻯ ﻳﺎﺵ ﺑﯩﻠﻪﻥ ﻟﯩﻖ ﺗﻮﻟﻐﺎﻥ ﺋﯩﺪﻯ. ﻣﻪﻥ ﺋﯘﻧﺘﯘﭖ ﻗﺎﻟﻤﯩﺪﯨﻢ. ﺑﯘﻧﯩﯖﺪﯨﻦ ﻛﯧﻴﯩﻨﻤﯘ ﻣﻪﯕﮕﯜ ﺋﯘﻧﺘﯘﭖ ﻗﺎﻻﻟﻤﺎﻳﻤﻪﻥ.

ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﺪﯨﻜﻰ ﻫﯧﻠﯩﻘﻰ ﺋﯘﺳﺘﺎﺯﯨﻢ ﻣﻪﻥ ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﺪﯨﻜﻰ ﯞﺍﻗﺘﯩﻤﺪﺍ ﻣﯧﻨﯩﯔ ﻗﯧﺸﯩﻤﻐﺎ ﻛﯧﻠﯩﭗ، ﻣﻪﻥ ﺋﯩﺸﻠﻪﻳﺪﯨﻐﺎﻥ ﺗﻪﺟﺮﯨﺒﯩﺨﺎﻧﯩﻨﻰ ﻛﯚﺭﯛﭖ، ﺑﯩﺰﻧﯩﯔ ﻳﺎﺗﺎﻗﺘﺎ ﻣﯧﻬﻤﺎﻥ ﺑﻮﻟﯘﭖ ﺑﺎﻗﻘﺎﻥ ﺋﯩﺪﻯ. ﺋﯘ ﺑﯘ ﻳﯩﻞ ﺋﺎﭘﺮﯦﻠﺪﺍ ﺋﺎﻣﯧﺮﯨﻜﯩﻐﺎ ﻳﯩﻐﯩﻨﻐﺎ ﻛﯧﻠﯩﺪﯨﻐﺎﻥ ﺑﻮﻟﯘﭖ، ﻣﻪﻥ ﺑﯩﻠﻪﻥ ﻛﯚﺭﯛﺷﻜﯩﻠﻰ ﺑﯩﺰﻧﯩﯔ ﺋﯚﻳﮕﻪ ﻳﻪﻧﻪ ﻛﻪﻟﻤﻪﻛﭽﻰ.
 ﻣﯧﻨﯩﯔ ﺷﯩﻨﺠﺎﯓ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺋﻮﻗﯘﻏﯩﻨﯩﻢ ﺭﺍﺩﯨﺌﻮ ﺋﯧﻠﯧﻜﺘﺮﻭﻧﯩﻜﯩﺴﻰ ﻛﻪﺳﭙﻰ ﺑﻮﻟﯘﭖ، ﺋﺎﻣﯧﺮﯨﻜﯩﺪﺍ ﻣﯧﻨﻰ ﺩﻩﺳﻠﻪﭘﺘﻪ ﺋﻮﻗﯘﺷﻘﺎ ﻗﻮﺑﯘﻝ ﻗﯩﻠﻐﺎﻥ ﻓﯩﺰﯨﻜﺎ ﻓﺎﻛﯘﻟﺘﯧﺘﻰ ﺋﯩﺪﻯ. ﻣﻪﻥ 1-ﻣﻪﯞﺳﯘﻣﺪﻩ 3 ﺩﻩﺭﺱ ﺗﺎﻟﻠﯩﺪﯨﻢ. ﺟﯘﯕﮕﻮﺩﺍ ﺋﻮﻗﯘﻏﺎﻧﺪﺍ، ﺋﻮﻗﯘﺗﻘﯘﭼﻰ ﻫﻪﺭ ﺑﯩﺮ ﺩﻩﺭﺳﺘﯩﻦ ﺑﯘﺭﯗﻥ ﺩﻭﺳﻜﯩﻐﺎ ﺑﯜﮔﯜﻥ ﻗﺎﻳﺴﻰ ﺑﺎﭖ، ﻗﺎﻳﺴﻰ ﭘﺎﺭﺍﮔﺮﺍﻓﻨﻰ ﺋﯚﺗﯩﺪﯨﻐﺎﻧﻠﯩﻘﯩﻨﻰ ﻳﯧﺰﯨﭗ ﻗﻮﻳﺎﺗﺘﻰ. ﺋﺎﻣﯧﺮﯨﻜﯩﺪﺍ ﺋﯘﻧﺪﺍﻕ ﻗﯩﻠﻤﺎﻳﺪﯨﻜﻪﻥ. ﺩﻩﺭﺳﻨﻰ ﻛﯩﺘﺎﺑﺘﯩﻜﻰ ﺗﻪﺭﺗﯩﭗ ﺑﻮﻳﯩﭽﯩﻤﯘ ﺋﯚﺗﻤﻪﻳﺪﯨﻜﻪﻥ. ﻣﻪﻥ ﺋﯘﻧﻰ ﺋﯘﻗﻤﯩﻐﺎﭼﻘﺎ، ﺩﻩﺳﻠﻪﭘﺘﻪ ﺋﯚﺗﯜﻟﮕﻪﻥ ﺩﻩﺭﺳﻠﻪﺭﻧﻰ "ﺋﻮﻗﯘﺗﻘﯘﭼﻰ ﻛﯩﺮﯨﺶ ﺳﯚﺯ ﺳﯚﺯﻟﻪﯞﺍﺗﯩﺪﯗ" ﺩﻩﭖ ﺋﻮﻳﻼﭘﺘﯩﻤﻪﻥ. ﺗﺎﻟﻠﯩﻐﺎﻥ ﺩﻩﺭﺳﻨﯩﯔ ﺑﯩﺮﻯ ﻛﯘﯞﺍﻧﺘﻮﻡ ﻓﯩﺰﯨﻜﯩﺴﻰ ﺑﻮﻟﯘﭖ، ﺋﻮﻗﯘﺗﻘﯘﭼﻰ ﻧﻴﯘﺯﻩﻳﻜﯘ ﻛﯩﻴﯩﯟﺍﻟﻐﺎﻥ، ﻛﯚﻳﻨﯩﻜﯩﻨﻰ ﺳﺎﯕﮕﯩﻠﯩﺘﯩﭗ ﻗﻮﻳﻐﺎﻥ، ﻫﻪﻣﺪﻩ ﮔﺎﻟﯩﺴﺘﯘﻙ ﺗﺎﻗﯩﯟﺍﻟﻐﺎﻥ ﺑﻮﻟﯘﭖ، ﺩﺍﯞﺍﻣﻠﯩﻖ ﻗﻮﻟﯩﺪﺍ ﺋﯜﺯﯛﻡ ﻛﯚﺗﯜﺭﯛﯞﯦﻠﯩﭗ، ﺑﯩﺮ ﺗﻪﺭﻩﭘﺘﯩﻦ ﺋﯜﺯﯛﻡ ﻳﻪﭖ، ﺑﯩﺮ ﺗﻪﺭﻩﭘﺘﯩﻦ ﺩﻩﺭﺳﻨﻰ ﺳﯚﺯﻟﻪﻳﺘﺘﻰ. ﻣﻪﻥ "ﻛﯩﺮﯨﺶ ﺳﯚﺯ ﻗﯩﺴﻤﯩﻨﻰ ﻧﯧﻤﯩﺸﻘﺎ ﺑﯘﻧﭽﯩﯟﺍﻻ ﺋﯘﺯﯗﻥ ﺳﯚﺯﻟﻪﻳﺪﯨﻐﺎﻧﺪﯗ؟" ﺩﻩﭖ ﺋﻮﻳﻼﻳﺘﺘﯩﻢ. ﺋﯘ ﭘﺮﻭﻓﯧﺴﺴﻮﺭ 3 ﻫﻪﭘﺘﻪ ﺋﯚﺗﻜﻪﻧﺪﯨﻦ ﻛﯧﻴﯩﻨﻜﻰ ﺑﯩﺮ ﻛﯜﻧﻰ "ﻛﯧﻠﻪﺭ ﺩﯛﺷﻪﻧﺒﻪ ﻛﯜﻧﻰ ﺋﯩﻤﺘﯩﻬﺎﻥ ﺋﺎﻟﯩﻤﻪﻥ" ﺩﯦﺪﻯ. ﻣﻪﻥ ﻫﻪﻳﺮﺍﻥ ﻗﯧﻠﯩﭗ، "ﭘﺮﻭﻓﯧﺴﺴﻮﺭ، ﺳﯩﺰ ﺩﻩﺭﺳﻨﻰ ﻗﺎﭼﺎﻥ ﺑﺎﺷﻠﯩﻐﺎﻥ ﺋﯩﺪﯨﯖﯩﺰ؟" ﺩﻩﭖ ﺳﻮﺭﯨﺪﯨﻢ. ﺋﯘ ﻛﯩﺸﻰ "ﻣﯘﺷﯘ ﻣﻪﯞﺳﯘﻣﻨﯩﯔ 1-ﺳﺎﺋﯩﺘﯩﺪﯨﻼ ﺑﺎﺷﻠﯩﻐﺎﻥ" ﺩﻩﭖ ﺟﺎﯞﺍﺏ ﺑﻪﺭﺩﻯ. ﻣﻪﻥ ﭼﯚﭼﯜﭖ ﻛﻪﺗﺘﯩﻢ. ﺋﻪﺳﻠﯩﺪﻩ ﺋﯘ ﻛﯩﺸﯩﻨﯩﯔ ﺳﯚﺯﻟﻪﯞﺍﺗﻘﯩﻨﻰ ﻛﯩﺮﯨﺶ ﺳﯚﺯ ﺋﻪﻣﻪﺱ، ﺭﻩﺳﻤﯩﻲ ﺩﻩﺭﺱ ﺋﯩﻜﻪﻧﺪﯗﻕ! ﻣﻪﻥ ﺋﯘ ﺋﯩﻤﺘﯩﻬﺎﻧﻨﻰ ﺋﯩﻨﺘﺎﻳﯩﻦ ﻧﺎﭼﺎﺭ ﺑﻪﺭﺩﯨﻢ. ﻓﯩﺰﯨﻜﺎ ﺗﻮﻏﺮﯨﺴﯩﺪﺍ ﺋﯩﻨﮕﻠﯩﺰﭼﻪ ﺳﯚﺯﻟﯜﻛﻠﻪﺭ ﺋﯘ ﻳﺎﻗﺘﺎ ﺗﯘﺭﺳﯘﻥ، ﺧﻪﻧﺰﯗﭼﻪ ﻫﻪﺗﺘﺎ ﺋﯘﻳﻐﯘﺭﭼﯩﻨﯩﻤﯘ ﺑﯩﻠﻤﻪﻳﺘﺘﯩﻢ. ﻟﯧﻜﯩﻦ، ﻛﯩﺘﺎﺏ ﺋﻮﻗﯘﻳﺪﯨﻐﺎﻧﻐﺎ ﯞﺍﻗﯩﺘﻼ ﺑﻮﻟﺴﺎ، ﻫﻪﺭ ﻗﺎﻧﺪﺍﻕ ﻧﻪﺭﺳﯩﻨﻰ ﺋﯚﮔﯩﻨﻪﻟﻪﻳﺪﯨﻐﺎﻧﻐﺎ ﺋﯩﺸﻪﻧﭽﯩﻢ ﺑﺎﺭ ﺑﻮﻟﻐﺎﭼﻘﺎ، ﺑﯘ ﻣﻪﻛﺘﻪﭘﻜﻪ ﻫﯧﭽﻘﺎﻧﺪﺍﻕ ﺋﯩﻜﻜﯩﻠﻪﻧﻤﻪﻳﻼ ﻛﻪﻟﮕﻪﻧﯩﺪﯨﻢ. ﺑﯩﺮﺍﻕ، ﻣﯧﻨﯩﯔ ﺋﯩﺸﯩﻢ ﭘﻪﻗﻪﺕ ﺋﻮﻗﯘﺷﻼ ﺋﻪﻣﻪﺱ. ﻫﻪﺭ ﻫﻪﭘﺘﯩﺪﻩ 3 ﺗﻪﺟﺮﯨﺒﻪ ﺩﻩﺭﺳﻰ ﺋﯚﺗﯜﭖ، 20 ﺳﺎﺋﻪﺕ ﺋﯩﺸﻠﯩﻤﯩﺴﻪﻡ ﺑﻮﻟﻤﺎﻳﺘﺘﻰ. ﺋﯩﻨﮕﻠﯩﺰ ﺗﯩﻠﯩﻨﻰ ﺋﯘ ﺗﯩﻠﻨﻰ ﺳﯚﺯﻟﯩﻤﻪﻳﺪﯨﻐﺎﻥ ﺟﯘﯕﮕﻮ ﺑﯩﻠﻪﻥ ﻳﺎﭘﻮﻧﯩﻴﻪﺩﻩ ﺋﯚﮔﻪﻧﮕﻪﻥ ﺑﻮﻟﻐﺎﭼﻘﺎ، ﺩﻩﺳﻠﻪﭘﺘﻪ ﻣﯧﻨﯩﯔ ﺳﯚﺯﻟﻪﺵ ﺋﯩﻘﺘﯩﺪﺍﺭﯨﻤﻤﯘ ﺋﺎﻧﭽﻪ ﻳﺎﺧﺸﻰ ﺋﻪﻣﻪﺱ ﺋﯩﺪﻯ. ﺋﯘﻧﯩﯔ ﺋﯜﺳﺘﯩﮕﻪ ﻫﻪﺭ ﺑﯩﺮ ﺗﻪﺟﺮﯨﺒﻪ ﺩﻩﺭﺳﯩﻨﻰ ﺋﯚﺗﯜﺵ ﺋﯜﭼﯜﻥ، 30 ﺑﻪﺗﻠﯩﻚ ﺩﻩﺭﺳﻠﯩﻜﻨﻰ ﻛﯚﺭﯛﭖ، ﺩﻩﺭﺱ ﺋﯚﺗﯜﺷﻜﻪ ﺗﻪﻳﻴﺎﺭﻟﯩﻖ ﻗﯩﻠﯩﺸﯩﻢ ﻛﯧﺮﻩﻙ ﺋﯩﺪﻯ. ﻣﻪﻥ ﺋﯜﭼﯜﻥ ﯞﺍﻗﯩﺖ ﺋﯩﻨﺘﺎﻳﯩﻦ ﻗﯩﺲ ﺑﻮﻟﯘﭖ ﻛﻪﺗﺘﻰ. ﻛﯩﺘﺎﺏ ﻛﯚﺭﯛﺷﻜﻪ ﯞﺍﻗﯩﺖ ﻳﯧﺘﯩﺸﻤﻪﻳﺘﻰ. ﺋﯩﻼﺝ ﺑﻮﻟﻤﺎﻱ، ﺋﻮﻗﯘﺵ ﺑﺎﺷﻠﯩﻨﯩﭗ 3 ﻫﻪﭘﺘﻪ ﺋﯚﺗﻜﻪﻧﺪﻩ، ﻛﯘﯞﺍﻧﺘﻮﻡ ﻓﯩﺰﯨﻜﯩﺴﻰ ﺩﻩﺭﺳﯩﺪﯨﻦ ﭼﯩﻘﯩﯟﺍﻟﺪﯨﻢ. ﺑﯩﺮﯨﻨﭽﻰ ﻣﻪﯞﺳﯘﻣﺪﻩ ﭘﻪﻗﻪﺕ 2 ﺩﻩﺭﺳﻨﯩﻼ ﺋﻮﻗﯘﭖ، ﻫﻪﺭ ﺋﯩﻜﻜﯩﻠﯩﺴﯩﺪﯨﻦ "ﺋﺎ" ﺋﺎﻟﺪﯨﻢ. ﺋﯩﻜﻜﯩﻨﭽﻰ ﻣﻪﯞﺳﯘﻣﺪﯨﻦ ﺑﺎﺷﻼﭖ ﺳﯩﻨﯩﭙﻨﯩﯔ ﺋﻪﯓ ﺋﺎﻟﺪﯨﻐﺎ ﺋﯚﺗﺘﯜﻡ. ﺋﻮﻗﯘﺵ ﭘﯜﺗﺘﯜﺭﮔﯩﭽﻪ ﻫﻪﻣﻤﻪ ﺩﻩﺭﺳﻠﻪﺭﺩﻩ "ﺋﺎ" ﺋﯧﻠﯩﭗ، ﭘﻪﻗﻪﺕ ﺑﯩﺮﻻ ﺩﻩﺭﺳﺘﻪ "ﺏ" ﺋﺎﻟﺪﯨﻢ. ﺑﯘ ﺩﻩﺭﺱ "ﺋﯧﻠﯧﻜﺘﺮﻭ ﻣﺎﮔﻨﯩﺖ ﻣﻪﻳﺪﺍﻧﻰ" ﺩﯦﮕﻪﻥ ﺩﻩﺭﺱ ﺑﻮﻟﯘﭖ، ﺋﯘ ﻣﯧﻨﯩﯔ ﻛﻪﺳﭙﯩﻢ ﺋﯩﺪﻯ. ﺋﯘ ﺩﻩﺭﺳﻨﻰ ﺋﯚﺗﻜﻪﻥ ﺋﻮﻗﯘﺗﻘﯘﭼﻰ ﮔﯧﺮﻣﺎﻧﯩﻴﻪﻟﯩﻚ ﺭﯨﻜﺘﻪﺭ ﺋﯩﺴﯩﻤﻠﯩﻚ ﭘﺮﻭﻓﯧﺴﺴﻮﺭ ﺑﻮﻟﯘﭖ، ﺩﻩﺭﺳﺘﻪ ﻳﯘﻗﯩﺮﻯ ﺗﻪﻟﻪﭖ ﻗﻮﻳﯘﺷﺘﺎ ﻣﻪﻛﺘﻪﭖ ﺑﻮﻳﯩﭽﻪ ﺩﺍﯕﻘﻰ ﺑﺎﺭ ﺋﯩﻜﻪﻥ. ﺩﻩﺭﺱ ﺳﯚﺯﻟﯩﺸﻰ ﺋﯩﻨﺘﺎﻳﯩﻦ ﻳﺎﺧﺸﻰ ﺑﻮﻟﯘﭖ، ﺩﻭﺳﻜﯩﻐﺎ ﺑﯩﺮ ﻧﻪﺭﺳﻪ ﻳﺎﺯﺳﺎ، ﺑﯩﺮﻩﺭ ﭘﻪﺵ-ﭼﻪﻛﯩﺘﻨﯩﻤﯘ ﺋﯘﻧﺘﯘﻟﯘﭖ ﻗﺎﻟﻤﺎﻱ ﺗﻮﻟﯘﻕ ﻳﺎﺯﯨﺪﯨﻜﻪﻥ. ﺋﯘ ﻛﯩﺸﻰ ﻫﻪﺭ ﻗﯧﺘﯩﻢ ﺩﻩﺭﺱ ﺋﯚﺗﻜﻪﻧﺪﻩ ﺳﯩﻨﯩﭙﺘﯩﻜﻰ ﻗﯩﺰ ﺋﻮﻗﯘﻏﯘﭼﯩﻼﺭ ﺋﯩﻤﺘﯩﻬﺎﻧﺪﯨﻦ ﺋﯚﺗﻪﻟﻤﻪﻱ، ﻣﻪﻛﺘﻪﭘﻜﻪ ﺋﻪﺭﺯ ﻗﯩﻠﯩﭗ ﺑﺎﺭﯨﺪﯨﻜﻪﻥ. ﻟﯧﻜﯩﻦ، ﺋﺎﻣﯧﺮﯨﻜﯩﺪﺍ ﺑﯩﺮ ﭘﺮﻭﻓﯧﺴﺴﻮﺭ ﻧﯩﯔ ﺑﯩﺮ ﭘﺎﺩﯨﺸﺎﻫ ﺑﯩﻠﻪﻥ ﺋﻮﺧﺸﺎﺵ ﻫﻮﻗﯘﻗﻰ ﺑﻮﻟﻐﺎﭼﻘﺎ، ﻣﻪﻛﺘﻪﭘﺘﯩﻦ ﺋﯘ ﻛﯩﺸﯩﻨﻰ ﻫﯩﭻ ﻧﯧﻤﻪ ﻗﯩﻼﻟﻤﺎﻳﺪﯨﻜﻪﻥ. ﺑﯘ ﭘﺮﻭﻓﯧﺴﺴﻮﺭﻧﯩﯔ ﻳﻪﻧﻪ ﺑﯩﺮ ﻧﺎﭼﺎﺭ ﻳﯧﺮﻯ، ﺋﻪﮔﻪﺭ ﺳﯩﺰ ﺋﯘﻧﯩﯔ ﺩﻩﺭﺳﯩﻨﻰ ﺗﺎﻟﻼﭖ ﺑﻮﻟﯘﭖ، ﻛﯧﻴﯩﻦ ﺋﯘﻧﯩﯔ ﺩﻩﺭﺳﯩﺪﯨﻦ ﭼﯩﻘﯩﯟﺍﻟﯩﻤﻪﻥ ﺩﯦﺴﯩﯖﯩﺰ، ﺋﯘﻧﯩﯖﻐﺎ ﻳﻮﻝ ﻗﻮﻳﻤﺎﻳﺪﯨﻜﻪﻥ (ﺋﺎﺩﻩﺗﺘﻪ ﺑﯘﻧﯩﯖﻐﺎ ﻳﻮﻝ ﻗﻮﻳﯘﻟﯩﺪﯗ). ﻓﺎﻛﯘﻟﺘﯧﺘﺘﯩﻜﻰ ﻗﺎﻟﻐﺎﻥ ﺋﻮﻗﯘﺗﻘﯘﭼﯩﻼﺭﻣﯘ ﺋﯘﻧﯩﯖﻐﺎ ﺋﯚﭺ ﺑﻮﻟﻐﺎﭼﻘﺎ، ﺋﯘﻧﯩﯖﻐﺎ ﺑﺎﺷﻘﺎ ﺑﯩﺮ ﺑﯩﻨﺎﺩﯨﻦ ﺋﯩﺸﺨﺎﻧﺎ ﺑﻪﺭﮔﻪﻧﯩﻜﻪﻥ. ﺋﯘ ﻛﯩﺸﻰ ﺑﯘ ﺩﻩﺭﺳﺘﻪ ﺑﯩﺰﻧﯩﯔ ﺋﯩﻤﺘﯩﻬﺎﻧﻨﯩﯔ ﻳﯧﺮﯨﻤﯩﻨﻰ ﻳﯧﭙﯩﻖ، ﻳﯧﺮﯨﻤﯩﻨﻰ ﺋﻮﭼﯘﻕ ﺋﺎﻟﺪﻯ. ﺳﯩﺰ ﺋﺎﻟﺪﻯ ﺑﯩﻠﻪﻥ ﻳﯧﭙﯩﻖ ﻗﯩﺴﻤﯩﻨﻰ ﺗﯜﮔﯩﺘﯩﭗ، ﺋﯩﻤﺘﯩﻬﺎﻥ ﻗﻪﻏﯩﺰﯨﻨﻰ ﺗﺎﭘﺸﯘﺭﻏﺎﻧﺪﯨﻦ ﻛﯧﻴﯩﻦ، ﺋﺎﻧﺪﯨﻦ ﺋﻮﭼﯘﻕ ﻗﯩﺴﻤﯩﻨﻰ ﺋﯩﺸﻠﯩﮕﯩﻠﻰ ﻳﻮﻝ ﻗﻮﻳﺎﺗﺘﻰ. ﺋﯩﻤﺘﯩﻬﺎﻧﻰ ﺋﯩﻨﺘﺎﻳﯩﻦ ﺗﻪﺱ ﺑﻮﻟﯘﭖ، ﻣﻪﻥ ﺋﯘ ﺩﻩﺭﺳﻨﻰ ﺋﻮﻗﯘﻏﺎﻥ ﭼﺎﻏﺪﺍ ﺋﯘ ﻛﯩﺸﻰ ﻫﯧﭽﻜﯩﻤﮕﻪ "ﺋﺎ" ﺑﻪﺭﻣﯩﺪﻯ. ﺷﯘﯕﺎ ﻣﻪﻥ "ﺏ" ﺋﺎﻟﺪﯨﻢ. ﻟﯧﻜﯩﻦ، ﺑﯘ ﺩﻩﺭﺳﻨﻰ ﺋﯩﻨﺘﺎﻳﯩﻦ ﭘﯘﺧﺘﺎ ﺋﯚﮔﯩﻨﯩﯟﺍﻟﺪﯨﻢ. ﺑﯘ ﺩﻩﺭﺳﻨﻰ ﺗﯜﮔﻪﺗﻜﻪﻧﺪﯨﻦ ﻛﯧﻴﯩﻦ، ﺋﯚﺯﯛﻣﻨﻰ ﺑﯘ ﺳﺎﻫﻪﺩﻩ ﺭﻩﺳﻤﯩﻲ ﻣﯘﺗﻪﺧﻪﺳﺴﯩﺲ ﺑﻮﻟﻐﺎﻧﺪﻩﻙ ﻫﯧﺲ ﻗﯩﻠﺪﯨﻢ. ﻣﻪﻥ ﺑﯘ ﻣﻪﻛﺘﻪﭘﻜﻪ ﻛﯧﻠﯩﺸﺘﯩﻦ ﺑﯘﺭﯗﻥ، ﻓﺎﻛﯘﻟﺘﯧﺘﺘﯩﻜﯩﻠﻪﺭ ﻣﯧﻨﯩﯔ ﺗﻪﺗﻘﯩﻘﺎﺗﯩﻢ ﺋﯜﭼﯜﻥ ﺑﯩﺮ ﻳﺎﭘﻮﻧﻠﯘﻕ ﭘﺮﻭﻓﯧﺴﺴﻮﺭﻧﻰ ﺑﻪﻟﮕﯩﻠﻪﭖ ﻗﻮﻳﻐﺎﻥ ﺋﯩﻜﻪﻥ. ﺋﯘ ﻛﯩﺸﻰ ﻣﯘﺷﯘ ﻣﻪﻛﺘﻪﭘﻨﯩﯔ ﭘﺮﻭﻓﯧﺴﺴﻮﺭﻯ ﻫﻪﻣﺪﻩ Chaltech ﻧﯩﯔ ﺯﻩﺭﻩﺕ ﻓﯩﺰﯨﻜﯩﺴﻰ ﺗﻪﺗﻘﯩﻘﺎﺗﭽﯩﺴﻰ ﺋﯩﻜﻪﻥ. ﻓﺎﻛﯘﻟﺘﯧﺖ ﺑﻮﻳﯩﭽﻪ ﺗﻪﺗﻘﯩﻘﺎﺗﺘﺎ ﻫﻪﻣﻤﯩﺪﯨﻦ ﺋﺎﻛﺘﯩﭗ ﺋﯩﻜﻪﻥ. ﻣﺎﮔﯩﺴﺘﯩﺮﻟﯩﻖ ﻣﺎﻗﺎﻟﻪﻡ ﺋﯜﭼﯜﻥ، ﻣﻪﻥ ﻳﺎﭘﻮﻧﯩﻴﻪﺩﯨﻜﻰ ﺗﻪﺗﻘﯩﻘﺎﺗﯩﻤﻨﯩﯔ ﺩﺍﯞﺍﻣﯩﻨﻰ ﻗﯩﻠﺪﯨﻢ. ﺑﯘ ﺗﻪﺗﻘﯩﻘﺎﺗﺘﺎ ﺑﯩﺰ ﻳﺎﭘﻮﻧﯩﻴﻪﺩﻩ ﻫﻪﻝ ﻗﯩﻼﻟﻤﯩﻐﺎﻥ ﺑﯩﺮ ﻣﻪﺳﯩﻠﻪ ﺑﺎﺭ ﺋﯩﺪﻯ. ﺋﯘ ﺑﻮﻟﺴﯩﻤﯘ ﺑﯩﺰ ﻧﻪﺯﻩﺭﯨﻴﯩﯟﯨﻲ ﺟﻪﻫﻪﺗﺘﯩﻦ ﺑﯩﺰﻧﯩﯔ ﺗﻪﺗﻘﯩﻘﺎﺕ ﻣﻪﺳﯩﻠﯩﻤﯩﺰﺩﻩ ﺋﯧﻨﯧﺮﮔﯩﻴﻪﻧﯩﯔ ﺳﺎﻗﻠﯩﻨﯩﺶ ﻗﺎﻧﯘﻧﯩﻨﻰ ﺋﯩﺴﭙﺎﺗﻼﭖ ﭼﯩﻘﯩﺮﺍﻟﻤﯩﻐﺎﻥ ﺋﯩﺪﯗﻕ. ﺑﯘﺭﯗﻧﻘﻰ ﺋﯩﻠﻤﯩﻲ ﻣﺎﻗﺎﻟﯩﻨﻰ ﺋﯧﻼﻥ ﻗﯩﻠﯩﺪﯨﻐﺎﻧﺪﺍ، ﺑﯩﺰ ﺑﯘ ﺋﻪﻫﯟﺍﻟﻨﻰ ﺋﯩﻠﻤﯩﻲ ﮊﻭﺭﻧﺎﻟﻨﯩﯔ ﺑﺎﺵ ﺗﻪﻫﺮﯨﺮﯨﮕﻪ ﺋﯧﻴﺘﻘﺎﻥ ﺋﯩﺪﯗﻕ. ﺋﯧﻨﯧﺮﮔﯩﻴﻪ ﺳﺎﻗﻠﯩﻨﯩﺶ ﺷﻪﺭﺗﯩﺪﻩ ﭼﯩﻘﻘﺎﻥ ﺧﺎﺗﺎﻟﯩﻖ ﺋﯩﻨﺘﺎﻳﯩﻦ ﻛﯩﭽﯩﻚ، ﺋﯘﻧﯩﯔ ﺋﯜﺳﺘﯩﮕﻪ ﻧﻪﺯﻩﺭﯨﻴﻪ ﺑﯩﻠﻪﻥ ﺗﻪﺟﺮﯨﺒﻪ ﻧﻪﺗﯩﺠﯩﻠﯩﺮﯨﻨﯩﯔ ﻧﺎﻫﺎﻳﯩﺘﻰ ﻳﯧﻘﯩﻦ ﭼﯩﻘﻘﺎﻧﻠﯩﻘﯩﻨﻰ ﻛﯚﺯﺩﻩ ﺗﯘﺗﯘﭖ، ﺋﯘﻻﺭ ﺑﯘ ﻣﺎﻗﺎﻟﯩﻨﻰ ﺋﯧﻼﻥ ﻗﯩﻠﯩﺸﻨﻰ ﻗﺎﺭﺍﺭ ﻗﯩﻠﻐﺎﻧﯩﺪﻯ. ﻟﯧﻜﯩﻦ، ﺑﯘ ﺋﯧﻨﯧﺮﮔﯩﻴﻪﻧﯩﯔ ﺳﺎﻗﻠﯩﻨﯩﺶ ﻗﺎﻧﯘﻧﯩﺪﯨﻜﻰ ﻣﻪﺳﯩﻠﻪ ﺋﺎﻣﯧﺮﯨﻜﯩﺪﯨﻤﯘ ﺩﺍﯞﺍﻡ ﻗﯩﻠﻐﺎﻧﯩﺪﻯ. ﻣﻪﻥ ﺋﻮﻗﯘﺵ ﭘﯜﺗﺘﯜﺭﯨﺪﯨﻐﺎﻧﻐﺎ ﺑﯩﺮ ﻣﻪﯞﺳﯘﻡ ﻗﺎﻟﻐﺎﻧﺪﺍ، ﺋﯚﺯﯛﻡ ﺋﯩﺸﻠﻪﭖ ﭼﯩﻘﺎﺭﻏﺎﻥ ﺗﻪﺗﻘﯩﻘﺎﺕ ﻧﻪﺗﯩﺠﯩﻠﯩﺮﯨﻨﻰ ﺋﯘﺳﺘﺎﺯﯨﻤﻐﺎ ﻛﯚﺭﺳﯩﺘﯩﭗ، ﺷﯘ ﺋﺎﺳﺎﺳﺘﺎ ﻣﺎﻗﺎﻟﻪ ﻳﯧﺰﯨﺸﻨﻰ ﺑﺎﺷﻼﺷﻘﺎ ﺭﯗﺧﺴﻪﺕ ﺋﺎﻟﻤﺎﻗﭽﻰ ﺑﻮﻟﺪﯗﻡ. ﻟﯧﻜﯩﻦ، ﺋﯘ ﻛﯩﺸﻰ ﺋﯩﻨﺘﺎﻳﯩﻦ ﺟﯩﺪﺩﯨﻴﻠﯩﺸﯩﭗ ﻛﻪﺗﺘﻰ. ﺋﯩﻨﺘﺎﻳﯩﻦ ﻛﻪﺳﻜﯩﻦ ﻗﯩﻠﯩﭗ، "ﺋﻪﺭﻛﯩﻦ، ﺳﻪﻥ ﺋﯧﻨﯧﺮﮔﯩﻴﻪﻧﯩﯔ ﺳﺎﻗﻠﯩﻨﯩﺶ ﻗﺎﻧﯘﻧﯩﻨﻰ ﺋﯩﺴﭙﺎﺗﻼﭖ ﭼﯩﻘﺎﺭﻣﯩﺴﺎﯓ ﺑﻮﻟﻤﺎﻳﺪﯗ. ﺋﯘﻧﺪﺍﻕ ﻗﯩﻠﻤﺎﻳﺪﯨﻜﻪﻧﺴﻪﻥ، ﺋﻮﻗﯘﺵ ﭘﯜﺗﺘﯜﺭﻩﻟﻤﻪﻳﺴﻪﻥ. ﺋﻪﮔﻪﺭ ﺋﯘ ﻣﻪﺳﯩﻠﯩﻨﻰ ﻫﻪﻝ ﻗﯩﻠﻤﯩﺴﺎﯓ، ﻣﯧﻨﯩﯔ ﻗﯧﺸﯩﻤﻐﺎ ﻗﺎﻳﺘﯩﻼﭖ ﻛﻪﻟﻤﻪ" ﺩﯦﺪﻯ. ﺑﯘ ﻣﻪﻥ ﺋﯜﭼﯜﻥ ﺑﯩﺮ ﺋﯧﻐﯩﺮ ﺳﯩﻨﺎﻕ ﺑﻮﻟﺪﻯ. ﺷﺎﻥ-ﺷﻪﺭﻩﭖ ﺑﯩﻠﻪﻥ ﺋﻮﻗﯘﺵ ﭘﯜﺗﺘﯜﺭﻣﻪﻛﭽﻰ ﺑﻮﻟﻐﺎﻥ ﺋﺎﺩﻩﻡ، ﺑﯩﺮﺍﻗﻼ ﺋﻮﻗﯘﺵ ﭘﯜﺗﺘﯜﺭﻩﻟﻤﻪﺳﻠﯩﻚ ﺧﻪﺗﯩﺮﯨﮕﻪ ﺩﯗﭺ ﻛﻪﻟﺪﯨﻢ. ﺑﯩﺮ ﻗﺎﻧﭽﻪ ﻛﯜﻥ ﻗﻮﻟﯘﻣﻐﺎ ﻫﯩﭻ ﺋﯩﺶ ﺑﺎﺭﻣﯩﺪﻯ. ﺋﯘﻧﯩﯖﺪﯨﻦ ﻛﯧﻴﯩﻦ ﻣﻪﻥ ﻣﯘﺷﯘ ﺗﻪﺗﻘﯩﻘﺎﺕ ﻣﻪﺳﯩﻠﯩﺴﯩﺪﻩ ﻗﻮﻟﻼﻧﻐﺎﻥ ﻣﺎﺗﯧﻤﺎﺗﯩﻜﯩﻨﯩﯔ ﺋﻪﺳﻠﯩﺪﯨﻜﻰ ﻛﯩﺘﺎﺑﯩﺪﯨﻦ ﺑﯩﺮﻧﻰ ﺗﺎﭘﺘﯩﻢ. ﺋﯘ ﺋﺎﻟﯩﻲ ﻣﻪﻛﺘﻪﭘﻠﻪﺭﺩﻩ ﺋﯚﺗﯩﻠﯩﺪﯨﻐﺎﻥ ﺩﻩﺭﺱ ﺑﻮﻟﻤﯩﻐﺎﭼﻘﺎ، ﻣﺎﯕﺎ ﭘﻪﻗﻪﺕ ﺑﯩﺮﻻ ﻳﻮﻝ ﺑﺎﺭ ﺋﯩﺪﻯ. ﺋﯘ ﺑﻮﻟﺴﯩﻤﯘ ﺋﯘ ﻛﯩﺘﺎﺑﻨﻰ ﺋﯚﺯﯛﻡ ﺋﯚﮔﯩﻨﯩﭗ ﭼﯩﻘﯩﺶ. ﻣﻪﻥ ﺩﻩﻝ ﺷﯘﻧﺪﺍﻕ ﻗﯩﻠﺪﯨﻢ. ﻣﺎﺗﯧﻤﺎﺗﯩﻜﯩﻨﻰ ﺗﻪﭘﺴﯩﻠﯩﻲ ﭼﯜﺷﻪﻧﮕﻪﻧﺪﯨﻦ ﻛﯧﻴﯩﻦ، ﺋﯚﺯﯛﻡ ﺑﯘﺭﯗﻥ ﻛﻪﻟﺘﯜﺭﯛﭖ ﭼﯩﻘﺎﺭﻏﺎﻥ ﻓﻮﺭﻣﯘﻻﻻﺭﻧﯩﯔ ﻫﻪﻣﻤﯩﺴﯩﻨﻰ ﻧﺎﻫﺎﻳﯩﺘﻰ ﺋﯩﻨﭽﯩﻜﯩﻠﻪﭖ ﻗﺎﻳﺘﺎ ﺗﻪﻛﺸﯜﺭﯛﭖ ﭼﯩﻘﺘﯩﻢ. ﺋﺎﺧﯩﺮﯨﺪﺍ ﻣﻪﺳﯩﻠﯩﻨﻰ ﺗﺎﭘﺘﯩﻢ. ﺋﻪﺳﻠﯩﺪﻩ ﻣﻪﻥ ﺑﯘ ﻣﻪﺳﯩﻠﯩﻨﻰ ﻳﯧﺸﯩﺸﻜﻪ ﺑﺎﺷﻠﯩﻐﺎﻧﺪﺍ، ﺋﻮﺳﺎﻛﺎ ﺋﯘﻧﯩﯟﯦﺮﺳﯩﺘﯧﺘﯩﻨﻰ ﺑﯘﺭﯗﻥ ﭘﯜﺗﺘﯜﺭﯛﭖ ﭼﯩﻘﯩﭗ ﻛﻪﺗﻜﻪﻥ ﺑﯩﺮ ﺩﻭﻛﺘﯘﺭﻟﯘﻕ ﺋﻮﻗﯘﻏﯘﭼﯩﺴﯩﻨﯩﯔ ﺩﯨﺴﺴﯧﺮﺗﺎﺗﺴﯩﻴﻪﺳﯩﮕﻪ ﺋﺎﺳﺎﺳﻼﻧﻐﺎﻥ ﺋﯩﺪﯨﻢ. ﺋﻪﺳﻠﯩﺪﻩ ﺋﺎﺷﯘ ﺩﯨﺴﺴﯧﺮﺗﺎﺗﺴﯩﻴﻪﺩﻩ ﺋﯩﻜﻜﻰ ﻣﺎﺗﯧﻤﺎﺗﯩﻜﯩﻠﯩﻖ ﺋﻮﭘﻪﺭﺍﺗﯘﺭﻧﯩﯔ ﺋﻮﺭﻧﻰ ﺋﺎﻟﻤﯩﺸﯩﭗ ﻗﺎﻟﻐﺎﻥ ﺋﯩﻜﻪﻥ. ﺷﯘ ﺳﻪﯞﻩﺑﺘﯩﻦ ﺋﯧﻨﯧﺮﮔﯩﻴﻪﻧﯩﯔ ﺳﺎﻗﻠﯩﻨﯩﺶ ﻗﺎﻧﯘﻧﻰ ﺗﻮﻏﺮﺍ ﭼﯩﻘﻤﺎﭘﺘﯘ. ﺑﯘ ﺋﯩﺸﺘﯩﻦ ﻛﯧﻴﯩﻦ ﺋﯘﺳﺘﺎﺯﯨﻢ ﻣﯩﻨﻰ ﺑﺎﺷﻘﯩﭽﻪ ﻫﯚﺭﻣﻪﺗﻠﻪﻳﺪﯨﻐﺎﻥ ﺑﻮﻟﺪﻯ. ﻣﯧﻨﯩﯔ ﻣﺎﻗﺎﻟﻪﻡ ﺋﺎﻣﯧﺮﯨﻜﯩﺪﺍ ﭼﯩﻘﯩﺪﯨﻐﺎﻥ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﻓﯩﺰﯨﻜﺎ ﺋﯩﻠﻤﯩﻲ ﺟﻮﺭﻧﯩﻠﻰ "Journal of applied phisichs"ﺩﺍ ﺋﯧﻼﻥ ﻗﯩﻠﯩﻨﺪﻯ. ﻣﺎﮔﯩﺴﺘﯩﺮﻟﯩﻖ ﺩﯨﺴﺴﯧﺮﺗﺎﺗﺴﯩﻴﻪﻧﻰ ﻛﯩﺘﺎﺏ ﻗﯩﻠﯩﭗ ﭼﯩﻘﺎﺭﻏﺎﻧﺪﺍ، ﺋﯘﻧﯩﯖﺪﯨﻦ 2 ﻧﯘﺳﺨﯩﻨﻰ ﺋﺎﺭﺗﯘﻕ ﭼﯩﻘﯩﺮﯨﭗ، ﻳﺎﭘﻮﻧﯩﻴﻪﺩﯨﻜﻰ 2 ﺋﯘﺳﺘﺎﺯﯨﻤﻐﺎ ﺑﯩﺮﺩﯨﻦ ﻣﺎﯕﺪﯗﺭﯗﭖ ﺑﻪﺭﺩﯨﻢ. ﻳﯘﻗﯩﺮﯨﻘﯩﺪﻩﻙ ﺋﻮﻗﯘﺵ ﻧﻪﺗﯩﺠﻪﻡ ﺑﯩﻠﻪﻥ، ﺑﯘ ﻣﻪﻛﺘﻪﭘﺘﻪ ﺋﻮﻗﯘﻏﺎﻥ 2 ﻳﯩﻠﻨﯩﯔ ﻫﻪﺭ ﺑﯩﺮﯨﺪﻩ، ﺑﯩﺮ ﻳﯩﻠﺪﺍ ﻓﺎﻛﯘﻟﺘﯧﺖ ﺑﻮﻳﯩﭽﻪ ﭘﻪﻗﻪﺕ ﺑﯩﺮﻻ ﺋﺎﺳﭙﯩﺮﺍﻧﺖ ﺋﻮﻗﯘﻏﯘﭼﯩﻐﺎ ﺑﯧﺮﯨﻠﯩﺪﯨﻐﺎﻥ ﻣﯘﻛﺎﭘﺎﺗﺘﯩﻦ ﺑﯩﺮﯨﮕﻪ ﺋﯧﺮﯨﺸﺘﯩﻢ.
  ﺋﺎﻣﯧﺮﯨﻜﯩﻐﺎ ﺋﻮﻗﯘﺷﻘﺎ ﻛﻪﻟﮕﻪﻥ ﭼﻪﺕ ﺋﻪﻟﻠﯩﻜﻠﻪﺭ ﺩﯗﭺ ﻛﯧﻠﯩﺪﯨﻐﺎﻥ ﺋﻪﯓ ﭼﻮﯓ ﻗﯩﻴﯩﻨﭽﯩﻠﯩﻘﻨﯩﯔ ﺑﯩﺮﻯ، ﺋﯩﻘﺘﯩﺴﺎﺩﻧﻰ ﻗﺎﻧﺪﺍﻕ ﻫﻪﻝ ﻗﯩﻠﯩﺶ ﻣﻪﺳﯩﻠﯩﺴﯩﺪﯗﺭ. ﻣﻪﻥ ﻣﺎﮔﯩﺴﺘﯩﺮﻟﯩﻖ ﺋﻮﻗﯘﺷﯩﻐﺎ ﺑﯩﺮ ﻗﺎﻧﭽﻪ ﭘﯩﺸﻘﻪﺩﻩﻣﻠﯩﺮﯨﻤﯩﺰﻧﯩﯔ ﻳﺎﺭﺩﯨﻤﻰ ﺑﯩﻠﻪﻥ، ﻫﻪﻣﺪﻩ ﻛﻪﺳﯩﭗ ﺋﯚﺯﮔﻪﺭﺗﯩﭗ، ﺗﻮﻟﯘﻕ ﺋﻮﻗﯘﺵ ﻣﯘﻛﺎﭘﺎﺕ ﭘﯘﻟﻰ ﺑﯩﻠﻪﻥ ﻛﯩﺮﺩﯨﻢ. ﻟﯧﻜﯩﻦ، ﺩﻭﻛﺘﯘﺭﻟﯘﻕ ﺋﻮﻗﯘﺷﯩﺪﺍ ﻣﺎﯕﺎ ﺋﯘﻧﺪﺍﻕ ﺷﻪﺭﺕ-ﺷﺎﺭﺍﺋﯩﺖ ﻳﻮﻕ ﺋﯩﺪﻯ. ﺷﯘﯕﻼﺷﻘﺎ، ﺋﺎﻣﯧﺮﯨﻜﯩﻐﺎ ﻛﯧﻠﯩﭙﻼ ﺑﯘ ﻣﻪﺳﯩﻠﻪ ﺋﯜﺳﺘﯩﺪﻩ ﺋﻮﻳﻠﯩﻨﯩﺸﻘﺎ ﺑﺎﺷﻠﯩﺪﯨﻢ. ﻣﻪﻥ ﻣﺎﮔﯩﺴﺘﯩﺮﻟﯩﻖ ﺩﻩﺭﺳﻠﯩﺮﯨﻨﻰ ﺑﯩﺮ ﻳﯧﺮﯨﻢ ﻳﯩﻠﺪﺍ (ﻳﻪﻧﻰ 3 ﻣﻪﯞﺳﯘﻣﺪﻩ) ﺗﯜﮔﯩﺘﯩﭗ ﺑﻮﻟﯘﭖ، ﺋﻪﯓ ﺋﺎﺧﯩﺮﻗﻰ ﻣﻪﯞﺳﯘﻣﻨﻰ ﺋﻮﻗﯘﺵ ﭘﯜﺗﺘﯜﺭﯛﺵ ﺋﯩﻠﻤﯩﻲ ﺗﻪﺗﻘﯩﻘﺎﺕ ﻣﺎﻗﺎﻟﯩﺴﻰ ﻳﯧﺰﯨﺸﻘﺎ ﺋﺎﺟﺮﯨﺘﯩﭗ ﻗﻮﻳﺪﯗﻡ. ﺷﯘﯕﺎ، ﺑﯘ ﺋﻪﯓ ﺋﺎﺧﯩﺮﻗﻰ ﻣﻪﯞﺳﯘﻣﺪﻩ ﯞﺍﻗﺘﯩﻢ ﺧﯧﻠﻰ ﻛﻪﯕﺮﻯ ﺑﻮﻟﯘﭖ ﻗﺎﻟﺪﻯ. ﺷﯘﻧﯩﯔ ﺑﯩﻠﻪﻥ ﺋﯚﺯ ﻓﺎﻛﯘﻟﺘﯧﺘﯩﻤﺪﯨﻜﻰ ﻫﻪﭘﺘﯩﺴﯩﮕﻪ 20 ﺳﺎﺋﻪﺕ ﻗﯩﻠﯩﺪﯨﻐﺎﻥ ﺋﻮﻗﯘﺗﻘﯘﭼﯩﻠﯩﻘﯩﻤﺪﯨﻦ ﺑﺎﺷﻘﺎ، ﻣﻪﻥ ﻳﻪﻧﻪ ﻣﻪﻛﺘﻪﭘﻨﯩﯔ "ﺋﺎﻛﺎﺩﯦﻤﯩﻴﻪ ﻳﺎﺭﺩﻩﻡ ﺑﯧﺮﯨﺶ ﻣﻪﺭﻛﯩﺰﻯ" ﺩﻩ ﻫﻪﭘﺘﯩﺴﯩﮕﻪ 10 ﺳﺎﺋﻪﺕ ﺋﻪﺗﺮﺍﭘﯩﺪﺍ ﺋﯩﺸﻠﯩﺪﯨﻢ. ﺑﯘ ﻣﻪﻛﺘﻪﭘﺘﯩﻜﻰ ﺋﯚﮔﯩﻨﯩﺸﺘﻪ ﻗﯩﻴﯩﻨﭽﯩﻠﯩﻘﻰ ﺑﺎﺭ ﺋﻮﻗﯘﻏﯘﭼﯩﻼﺭ ﺋﯜﭼﯜﻥ ﺗﻪﺳﯩﺲ ﻗﯩﻠﯩﻨﻐﺎﻥ ﺋﻮﺭﯗﻥ ﺑﻮﻟﯘﭖ، ﻫﻪﺭ ﺑﯩﺮ ﺋﻮﻗﯘﻏﯘﭼﻰ ﻫﻪﺭ ﻫﻪﭘﺘﯩﺴﻰ ﺑﯘ ﻳﻪﺭﮔﻪ ﻛﯧﻠﯩﭗ، ﺑﯩﺮ ﺳﺎﺋﻪﺕ ﻣﻪﺧﺴﯘﺱ ﻳﺎﺭﺩﻩﻣﮕﻪ ﺋﯧﺮﯨﺸﻪﻟﻪﻳﺘﻰ. ﺑﯘ ﻳﻪﺭﺩﻩ ﺩﻩﺭﺱ ﭼﯜﺷﻪﻧﺪﯛﺭﯨﺪﯨﻐﺎﻥ ﺋﻮﻗﯘﺗﻘﯘﭼﻰ ﺋﯩﻨﮕﻠﯩﺰﭼﻪ "Tutor" ﺩﻩﭖ ﺋﺎﺗﯩﻼﺗﺘﻰ. ﺳﺎﺋﯩﺘﯩﮕﻪ 8.5 ﺩﻭﻟﻼﺭ ﺋﻪﺗﺮﺍﭘﯩﺪﺍ ﭘﯘﻝ ﺑﯧﺮﻩﺗﺘﻰ. ﻣﻪﻧﺪﯨﻦ ﺑﯩﺮ ﻗﯧﺘﯩﻢ ﺩﻩﺭﺱ ﺋﯧﻠﯩﭗ ﺑﺎﻗﻘﺎﻥ ﺋﻮﻗﯘﻏﯘﭼﯩﻼﺭﻧﯩﯔ ﻫﻪﻣﻤﯩﺴﻰ ﻣﻪﻧﺪﯨﻦ ﺋﯩﻨﺘﺎﻳﯩﻦ ﺭﺍﺯﻯ ﺑﻮﻟﯘﭖ، ﺩﺍﯞﺍﻣﻠﯩﻖ ﻣﯧﻨﻰ ﺗﺎﻟﻼﻳﺪﯨﻐﺎﻥ ﺑﻮﻟﯘﭖ ﻗﺎﻻﺗﺘﻰ. ﺷﯘﯕﺎ، ﻣﻪﻥ ﺑﯩﺮ ﻫﻪﭘﺘﯩﺪﻩ 10 ﺳﺎﺋﻪﺕ ﺋﯩﺸﻠﯩﺴﻪﻡ، ﺑﯘ 10 ﺳﺎﺋﻪﺗﻨﯩﯔ ﻫﻪﻣﻤﯩﺴﯩﮕﻪ ﻟﯩﻘﻤﯘ-ﻟﯩﻖ ﺋﻮﻗﯘﻏﯘﭼﻰ ﺋﻮﺭﯗﻧﻼﺷﺘﯘﺭﯗﻻﺗﺘﻰ (ﻗﯧﺸﯩﻐﺎ ﺋﻮﻗﯘﻏﯘﭼﯩﻼﺭ ﺋﺎﻧﭽﻪ ﻛﻪﻟﻤﻪﻳﺪﯨﻐﺎﻥ، ﻫﻪﻣﻤﻪ ﯞﺍﻗﯩﺘﺘﺎ ﺗﺎﭘﺸﯘﺭﯗﻕ ﺋﯩﺸﻠﻪﭖ ﺋﻮﻟﺘﯘﺭﯨﺪﯨﻐﺎﻥ Tutorﻻﺭﻣﯘ ﺋﺎﺯ ﺋﻪﻣﻪﺱ ﺋﯩﺪﻯ). ﺋﯘﻧﯩﯖﺪﯨﻦ ﺑﺎﺷﻘﺎ، ﻣﻪﻥ ﻓﯩﺰﯨﻜﺎ، ﻣﺎﺗﯧﻤﺎﺗﯩﻜﺎ ﯞﻩ ﺋﯧﻠﯧﻜﺘﺮ ﻛﻪﺳﯩﭙﻠﯩﺮﻯ ﺑﻮﻳﯩﭽﻪ ﺋﯚﺯ ﺋﺎﻟﺪﯨﻤﻐﯩﻤﯘ ﺷﻪﺧﺴﯩﻲ Tutorﻟﯘﻕ ﻗﯩﻠﺪﯨﻢ. ﺳﺎﺋﯩﺘﯩﮕﻪ 12 ﺩﻭﻟﻼﺭ ﺋﺎﻟﺪﯨﻢ. ﺩﻩﺳﻠﻪﭘﺘﻪ ﻣﻪﻛﺘﻪﭘﻨﯩﯔ ﺋﻮﻗﯘﺵ ﺑﯩﻨﺎﻟﯩﺮﯨﻨﯩﯔ ﺋﯩﭽﯩﮕﻪ ﺋﯧﻼﻥ ﭼﺎﭘﻼﭖ ﻗﻮﻳﺪﯗﻡ. ﺑﯘ ﺋﯩﺸﻨﻰ ﺑﯩﺮ ﻧﻪﭼﭽﻪ ﺋﺎﻱ ﻗﯩﻠﻐﺎﻧﺪﯨﻦ ﻛﯧﻴﯩﻦ، ﻣﯧﻨﯩﯔ ﺩﻩﺭﺳﻨﻰ ﻳﺎﺧﺸﻰ ﺋﯚﺗﯜﺩﯨﻐﺎﻧﻠﯩﻘﯩﻤﺪﯨﻦ ﺧﯧﻠﻰ ﻛﯚﭖ ﺋﻮﻗﯘﻏﯘﭼﯩﻼﺭﻏﺎ ﺧﻪﯞﻩﺭ ﺗﯧﭙﯩﭗ، ﻣﯧﻨﻰ ﺋﯘﻻﺭ ﺋﯚﺯﻟﯩﺮﻯ ﺋﯩﺰﺩﻩﭖ ﻛﯧﻠﯩﺪﯨﻐﺎﻥ ﺑﻮﻟﺪﻯ. ﺋﻮﻗﯘﻏﯘﭼﯩﻠﯩﺮﯨﻤﻨﯩﯔ ﺋﯩﭽﯩﺪﻩ ﺋﯧﺰ ﻣﻪﻛﺘﯩﭙﯩﻤﺪﯨﻜﻰ ﺋﯚﮔﯩﻨﯩﺸﻰ ﺋﻪﯓ ﻧﺎﭼﺎﺭﻻﺭﻣﯘ ﺑﺎﺭ ﺑﻮﻟﯘﭖ، ﺋﻪﺗﺮﺍﭘﺘﯩﻜﻰ ﺑﺎﺷﻘﺎ ﺋﺎﻟﯩﻲ ﻣﻪﻛﺘﻪﭘﺘﯩﻜﻰ ﺋﯚﮔﯩﻨﯩﺸﺘﻪ ﺋﻪﯓ ﻳﺎﺧﺸﻰ ﺋﻮﻗﯘﻏﯘﭼﯩﻼﺭﻣﯘ، ﻫﻪﺗﺘﺎ ﻛﺎﻟﯩﻔﻮﺭﻧﯩﺌﺎ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﻟﻮﺱ ﺋﺎﻧﺠﻪﻟﻪﺱ ﺷﯚﺑﯩﺴﯩﻨﯩﯔ ﺋﻮﻗﯘﻏﯘﭼﯩﻠﯩﺮﯨﻤﯘ ﺑﺎﺭ ﺋﯩﺪﻯ. ﺷﻪﻧﺒﻪ ﯞﻩ ﻳﻪﻛﺸﻪﻧﺒﻪ ﻛﯜﻧﻠﯩﺮﯨﻨﯩﯔ ﻫﻪﺭ ﺋﯩﻜﻜﯩﻠﯩﺴﯩﺪﻩ ﻣﺎﯕﺎ ﺋﻮﻗﯘﻏﯘﭼﯩﻼﺭ ﻟﯩﻖ ﺋﯚﭼﯩﺮﻩﺕ ﺑﻮﻟﯘﭖ ﻛﯧﺘﯩﭗ، ﻛﯜﻧﯩﮕﻪ 12 ﺳﺎﺋﻪﺕ ﺩﻩﺭﺱ ﺋﯚﺗﻪﺗﺘﯩﻢ. ﻛﻪﭼﺘﻪ ﻳﺎﺗﺎﻗﻘﺎ ﻗﺎﻳﺘﯩﭗ ﺑﺎﺭﻏﺎﻧﺪﺍ، ﺑﯩﺮ ﻛﯜﻥ ﺗﻮﺧﺘﯩﻤﺎﻱ ﺳﯚﺯﻟﯩﮕﻪﻥ ﺑﻮﻟﻐﺎﭼﻘﺎ، ﺋﺎﻳﺎﻟﯩﻢ ﺋﺎﻣﺎﻧﮕﯜﻟﮕﻪ ﮔﻪﭖ ﻗﯩﻠﺴﺎﻡ ﺋﺎﯞﺍﺯﯨﻢ ﭼﯩﻘﻤﺎﻱ ﻗﺎﻻﺗﺘﻰ. ﺋﺎﻣﺎﻧﮕﯜﻝ ﺋﻮﻏﻠﯩﻤﯩﺰﻧﻰ 7 ﺋﺎﻳﻠﯩﻖ ﯞﺍﻗﺘﯩﺪﯨﻼ ﺳﯜﺗﺘﯩﻦ ﺋﺎﻳﺮﯨﯟﯦﺘﯩﭗ، 2 ﺑﺎﻟﯩﻨﻰ ﺋﯜﺭﯛﻣﭽﯩﺪﻩ ﻗﻮﻳﯘﭖ ﺋﺎﻣﯧﺮﯨﻜﯩﻐﺎ ﻛﻪﻟﮕﻪﻥ ﺑﻮﻟﻐﺎﭼﻘﺎ، ﺩﻩﺳﻠﻪﭘﺘﻪ ﺯﺍﺩﯨﻼ ﻛﯚﻧﻪﻟﻤﯩﺪﻯ. ﺋﯩﻨﮕﻠﯩﺰ ﺗﯩﻠﻰ ﺋﯚﮔﯩﻨﯩﺶ ﺋﯜﭼﯜﻥ ﻗﻮﻟﯩﻐﺎ ﻛﯩﺘﺎﺏ ﺋﺎﻟﺴﺎ، ﻛﯚﺯﯨﮕﻪ 2 ﺑﺎﻻ ﻛﯩﺘﺎﺑﻨﯩﯔ ﻗﯩﺮﻏﯩﻘﯩﺪﺍ ﺋﻮﻟﺘﯘﺭﻏﺎﻧﺪﻩﻙ ﻛﯚﺭﯛﻧﻪﺗﺘﻰ. ﭘﺎﺭﺍﯕﻠﯩﺸﺎﻱ ﺩﯦﺴﻪ ﺋﻪﺗﺮﺍﭘﺘﺎ ﺑﺎﺷﻘﺎ ﺋﺎﺩﻩﻡ ﻳﻮﻕ. ﻣﻪﻥ ﺑﻮﻟﺴﺎﻡ ﻛﯜﻧﺒﻮﻳﻰ ﻣﻪﻛﺘﻪﭘﺘﻪ. ﺑﯩﺮ ﻳﺎﺵ ﺋﺎﻧﺎ ﺋﯜﭼﯜﻥ ﺑﯘ ﻧﺎﻫﺎﻳﯩﺘﻰ ﻛﯜﻟﭙﻪﺗﻠﯩﻚ ﻛﯜﻧﻠﻪﺭ ﺋﯩﺪﻯ. ﺋﺎﻣﯧﺮﯨﻜﯩﻐﺎ ﻳﯧﯖﻰ ﻛﻪﻟﮕﻪﻥ 1-ﻳﯩﻠﻨﯩﯔ ﺋﯩﭽﯩﺪﻩ ﺋﺎﻣﺎﻧﮕﯜﻝ ﻛﯚﭖ ﻳﯩﻐﻼﻳﺘﺘﻰ. ﻛﻪﻟﮕﯜﺳﯩﻨﻰ ﺩﻩﭖ، ﺋﯚﺯﯨﻨﻰ ﺋﯩﻨﮕﻠﯩﺰ ﺗﯩﻠﻰ ﺋﯚﮔﯩﻨﯩﺸﻜﻪ ﻣﻪﺟﺒﯘﺭﻻﻳﺘﺘﻰ.
ﻣﻪﻥ ﺩﻭﻛﺘﯘﺭﻟﯘﻕ ﺋﻮﻗﯘﺷﻰ ﺋﯜﭼﯜﻥ ﺋﺎﻣﯧﺮﯨﻜﯩﺪﯨﻜﻰ 10 ﺩﻩﻙ ﺋﺎﻟﯩﻲ ﻣﻪﻛﺘﻪﭘﻨﯩﯔ ﺋﯧﻠﯧﻜﺘﺮ ﺋﯩﻨﺠﯩﻨﯩﺮﻟﯩﻘﻰ ﻛﻪﺳﭙﯩﮕﻪ ﺋﯩﻠﺘﯩﻤﺎﺱ ﻗﯩﻠﺪﯨﻢ. ﺋﯘﻧﯩﯔ ﺋﯩﭽﯩﺪﻩ 6 ﻣﻪﻛﺘﻪﭘﺘﯩﻦ ﻣﺎﯕﺎ ﺋﻮﻗﯘﺵ ﭼﺎﻗﯩﺮﯨﻘﻰ ﻛﻪﻟﺪﻯ. ﻟﯧﻜﯩﻦ، ﺑﯩﺮﯨﻤﯘ ﻣﺎﯕﺎ ﺋﻮﻗﯘﺵ ﻣﯘﻛﺎﭘﺎﺕ ﭘﯘﻟﻰ ﺑﻪﺭﻣﯩﺪﻯ. ﺋﯧﻠﯧﻜﺘﺮ ﺋﯩﻨﺠﯩﻨﯩﺮﻟﯩﻘﻰ ﻛﻪﺳﭙﻰ ﺋﺎﻣﯧﺮﯨﻜﯩﺪﺍ ﺋﯧﻬﺘﯩﻴﺎﺟﻰ ﺑﯩﺮ ﻗﻪﺩﻩﺭ ﻳﯘﻗﯩﺮﻯ ﺑﻮﻟﻐﺎﻥ ﻛﻪﺳﯩﭗ ﺑﻮﻟﻐﺎﭼﻘﺎ، ﺑﯘ ﻛﻪﺳﯩﭙﻜﻪ ﻛﻪﻟﮕﻪﻥ ﭼﻪﺕ ﺋﻪﻟﻠﯩﻚ ﺩﻭﻛﺘﯘﺭﻟﯘﻕ ﺋﻮﻗﯘﻏﯘﭼﯩﻠﯩﺮﯨﻐﺎ 1-ﻳﯩﻠﻰ ﺋﻮﻗﯘﺵ ﻳﺎﺭﺩﻩﻡ ﭘﯘﻟﻰ ﺑﯧﺮﯨﻠﻤﻪﻳﺪﯨﻜﻪﻥ. ﻣﻪﻥ ﺋﺎﻣﺎﻟﺴﯩﺰ، ﺑﯩﺮ ﻳﯩﻞ ﺋﯩﺸﻠﻪﭖ، ﺋﺎﻧﺪﯨﻦ ﺋﻮﻗﯘﺷﻨﻰ ﺩﺍﯞﺍﻣﻼﺷﺘﯘﺭﯗﺵ ﻗﺎﺭﺍﺭﯨﻐﺎ ﻛﻪﻟﺪﯨﻢ. ﺋﻪﻣﻤﺎ، 1989-1990-ﻳﯩﻠﻠﯩﺮﻯ ﺳﻮﯞﯦﺖ ﺋﯩﺘﺘﯩﭙﺎﻗﻰ ﭘﺎﺭﭼﯩﻼﻧﻐﺎﻧﺪﯨﻦ ﻛﯧﻴﯩﻦ، ﺋﺎﻣﯧﺮﯨﻜﯩﻨﯩﯔ ﺋﯩﻘﺘﯩﺴﺎﺩﻯ ﺋﯩﻨﺘﺎﻳﯩﻦ ﻧﺎﭼﺎﺭﻟﯩﺸﯩﭗ، ﺧﯩﺰﻣﻪﺕ ﺗﯧﭙﯩﺶ ﺋﯩﻨﺘﺎﻳﯩﻦ ﻗﯩﻴﯩﻨﻠﯩﺸﯩﭗ ﻛﻪﺗﺘﻰ. ﻣﻪﻥ ﺋﻮﻗﯘﺵ ﭘﯜﺗﺘﯜﺭﯛﺷﺘﯩﻦ ﺑﯩﺮ ﻗﺎﻧﭽﻪ ﺋﺎﻱ ﺑﯘﺭﯗﻧﻼ ﺧﯩﺰﻣﻪﺕ ﺋﯩﺰﺩﻩﺷﻜﻪ ﺑﺎﺷﻼﭖ، ﭘﻪﻗﻪﺗﻼ ﺧﯩﺰﻣﻪﺕ ﺗﺎﭘﺎﻟﻤﯩﺪﯨﻢ. ﺋﺎﺧﯩﺮﻯ ﺑﻮﻟﻤﺎﻱ، ﺭﻩﺳﺘﯘﺭﺍﻧﺪﺍ ﻛﯜﺗﻜﯜﭼﻰ ﺑﻮﻟﯘﺷﻘﺎ ﺋﯩﻠﺘﯩﻤﺎﺱ ﻗﯩﻠﯩﺸﻘﺎ ﺑﺎﺷﻠﯩﺪﯨﻢ. ﺋﻪﻣﻤﺎ، ﺋﯘﻻﺭ ﻣﯧﻨﯩﯔ ﺋﯩﻠﺘﯩﻤﺎﺱ ﺟﻪﺩﯨﯟﯨﻠﯩﻤﺪﯨﻦ ﻣﯧﻨﯩﯔ ﻓﯩﺰﯨﻜﯩﺪﺍ ﻣﺎﮔﯩﺴﺘﯩﺮﻟﯩﻖ ﺋﯘﻧﯟﺍﻧﯩﻢ ﺑﺎﺭﻟﯩﻘﯩﻨﻰ ﻛﯚﺭﯛﭘﻼ، "ﺳﻪﻥ ﺑﯘ ﻳﻪﺭﺩﻩ ﺋﯘﺯﯗﻥ ﻣﯘﺩﺩﻩﺕ ﺋﯩﺸﻠﯩﻤﯩﮕﯩﺪﻩﻛﺴﻪﻥ"، ﺩﻩﭖ ﻣﯧﻨﻰ ﺋﯩﺸﻘﺎ ﺋﺎﻟﻤﯩﺪﻯ. ﻫﻮﻟﻠﻴﯟﻭﺋﻮﺩﻧﯩﯔ ﻛﯩﻨﻮ ﺋﺎﺭﺗﯩﺴﻠﯩﺮﻯ ﺗﯘﺭﯨﺪﯨﻐﺎﻥ ﺑﻪﺭﯞﻩﻟﻪﻱ ﻫﯩﻠﻞ ﺩﯦﮕﻪﻥ ﺭﺍﻳﻮﻧﺪﺍ ﻛﯩﭽﯩﻚ ﺑﺎﻟﯩﻼﺭﻧﻰ ﺑﺎﻗﺴﺎ، ﭘﯘﻟﻨﻰ ﺧﯧﻠﻰ ﻛﯚﭖ ﺗﺎﭘﻘﯩﻠﻰ ﺑﻮﻟﯩﺪﯨﻜﻪﻥ، ﺩﻩﭖ ﺋﺎﯕﻠﯩﺪﯨﻢ. ﻣﻪﻥ ﻛﯩﭽﯩﻜﯩﻤﺪﻩ ﺋﯚﺯﯛﻣﻨﯩﯔ ﺋﯘﻛﺎ-ﺳﯩﯖﯩﻠﻠﯩﺮﯨﻨﻰ ﺧﯧﻠﻰ ﺑﯧﻘﯩﭗ ﺑﺎﻗﻘﺎﻥ ﺑﻮﻟﻐﺎﭼﻘﺎ، ﺑﯘﻧﯩﻤﯘ ﺳﯩﻨﺎﭖ ﺑﯧﻘﯩﺸﻨﻰ ﻗﺎﺭﺍﺭ ﻗﯩﻠﺪﯨﻢ. ﺋﻪﻣﻤﺎ، ﻣﻪﻥ ﮔﯩﺰﯨﺘﺘﯩﻜﻰ ﺋﯧﻼﻧﻨﻰ ﻛﯚﺭﯛﭖ، ﺋﯚﻱ ﺋﯩﮕﯩﻠﯩﺮﯨﮕﻪ ﺗﯧﻠﯧﻔﻮﻥ ﻗﯩﻠﺴﺎﻡ، "ﺑﯩﺰ ﺋﻪﺭﻟﻪﺭﻧﻰ ﺋﺎﻟﻤﺎﻳﻤﯩﺰ"، ﺩﻩﭖ، ﻣﺎﯕﺎ ﺋﯚﺯﯛﻣﻨﻰ ﺗﻮﻧﯘﺷﺘﯘﺭﯗﺵ ﭘﯘﺭﺳﯩﺘﯩﻨﯩﻤﯘ ﺑﻪﺭﻣﯩﺪﻯ. ﺋﯘﻧﯩﯖﺪﯨﻦ ﻛﯧﻴﯩﻦ ﻣﯩﯔ ﺗﻪﺳﻠﯩﻜﺘﻪ ﺑﯩﺮ ﺋﯧﻠﯧﻜﺘﺮﻭﻧﻠﯘﻕ ﺗﻮﻙ ﻳﻮﻟﻰ ﺗﺎﺧﺘﯩﺴﯩﻨﻰ ﺳﯩﻨﺎﭖ ﺗﻪﻛﺸﯜﺭﯨﺪﯨﻐﺎﻥ 10 ﻧﻪﭼﭽﻪ ﻛﯩﺸﯩﻠﯩﻚ ﻛﯩﭽﯩﻚ ﺷﯩﺮﻛﻪﺗﺘﯩﻦ ﺋﯩﺶ ﺗﺎﭘﺘﯩﻢ. ﺑﯘ ﺷﯩﺮﻛﻪﺗﻨﯩﯔ ﺋﯩﮕﯩﺴﻰ ﺑﯩﺮ ﺋﺎﻕ ﺗﻪﻧﻠﯩﻚ ﺑﻮﻟﯘﭖ، ﻗﺎﻟﻐﺎﻧﻼﺭﻧﯩﯔ ﻣﻪﻧﺪﯨﻦ ﺑﺎﺷﻘﯩﺴﯩﻨﯩﯔ ﻫﻪﻣﻤﯩﺴﻰ ﻣﻪﻛﺴﯩﻜﯩﻠﯩﻘﻼﺭ ﺋﯩﺪﻯ. ﺷﯘﯕﺎ ﺋﯘﻻﺭ ﺋﯚﺯ-ﺋﺎﺭﺍ ﺋﯩﺴﭙﺎﻥ ﺗﯩﻠﯩﺪﺍ ﺳﯚﺯﻟﯩﺸﻪﺗﺘﻰ. ﺷﯩﺮﻛﻪﺗﺘﯩﻜﻰ ﺭﺍﺩﯨﺌﻮﻧﯩﻤﯘ ﺋﯩﺴﭙﺎﻧﭽﻪ ﻗﺎﻧﺎﻟﻐﺎ ﻗﻮﻳﯘﭖ ﻗﻮﻳﺎﺗﺘﻰ. ﺋﯘ ﻣﯧﻨﯩﯔ ﺋﻮﻗﯘﻏﺎﻥ ﺋﯘﻧﯟﺍﻧﯩﻢ ﺑﯩﻠﻪﻥ ﺋﺎﺳﺎﺳﻪﻥ ﻣﯘﻧﺎﺳﯩﯟﯨﺘﻰ ﻳﻮﻕ ﺑﯩﺮ ﻗﺎﺭﺍ ﺧﯩﺰﻣﻪﺕ ﺑﻮﻟﯘﭖ، ﻣﺎﯕﺎ ﺳﺎﺋﯩﺘﯩﮕﻪ ﺋﺎﺭﺍﻥ 5 ﺩﻭﻟﻼﺭ ﺑﯧﺮﻩﺗﺘﻰ. ﺑﯘ ﻳﻪﺭﺩﻩ ﺑﯩﺮ ﺋﺎﻱ ﺋﯩﺸﻠﻪﭖ ﻗﺎﺭﯨﺴﺎﻡ، ﺑﯩﺮ ﺋﺎﻳﻠﯩﻖ ﻛﯩﺮﯨﻤﯩﻤﻨﯩﯔ ﺑﯩﺮ ﻗﯩﺴﻤﯩﻨﻰ ﻳﺎﺗﺎﻗﻘﺎ ﺗﯚﻟﻪﭖ، ﺑﯩﺮ ﻗﯩﺴﻤﯩﻨﻰ ﺗﯘﺭﻣﯘﺷﻘﺎ ﺋﯩﺸﻠﻪﺗﻜﻪﻧﺪﯨﻦ ﻛﯧﻴﯩﻦ، ﺑﯩﺰﮔﻪ ﺋﺎﺭﺍﻥ ﺑﯩﺮ-ﺋﯩﻜﻜﻰ ﻳﯜﺯ ﺩﻭﻟﻼﺭ ﭘﯘﻝ ﻗﺎﻟﯩﺪﯨﻜﻪﻥ. ﺑﯘﻧﯩﯔ ﺑﯩﻠﻪﻥ ﺑﯩﺮ ﻳﯩﻠﺪﺍ ﻛﯧﻴﯩﻨﻜﻰ ﻣﻪﻛﺘﻪﭘﻨﯩﯔ ﺋﻮﻗﯘﺵ ﭘﯘﻟﯩﻨﻰ ﺗﯧﭙﯩﺶ ﻣﯘﻣﻜﯩﻦ ﺋﻪﻣﻪﺱ ﺋﯩﺪﻯ. ﻣﻪﻥ ﺩﺍﯞﺍﻣﻠﯩﻖ ﺋﯩﺰﺩﻩﭖ ﻳﯜﺭﯛﭖ، ﻳﻪﻧﻪ ﺑﯩﺮ ﺷﯩﺮﻛﻪﺗﺘﻪ ﺳﺎﺋﯩﺘﯩﮕﻪ 6.5 ﺩﻭﻟﻼﺭ ﺑﯧﺮﯨﺪﯨﻐﺎﻥ ﺋﯩﺶ ﺗﺎﭘﺘﯩﻢ. ﺋﯘ ﺋﯧﻠﯧﻜﺘﺮ ﺗﻮﻙ ﻳﻮﻟﻰ ﺗﺎﺧﺘﯩﺴﯩﻨﻰ ﺋﯩﺸﻠﻪﭖ ﭼﯩﻘﯩﺮﯨﺪﯨﻐﺎﻥ ﺷﯩﺮﻛﻪﺕ ﺋﯩﺪﻯ. ﺷﯘﻧﯩﯔ ﺑﯩﻠﻪﻥ 1-ﺷﯩﺮﻛﻪﺗﺘﻪ ﺋﻪﺗﯩﮕﻪﻥ ﺳﺎﺋﻪﺕ 8 ﺩﯨﻦ ﭼﯜﺷﻜﯩﭽﻪ، 2-ﺷﯩﺮﻛﻪﺗﺘﻪ ﭼﯜﺷﺘﯩﻦ ﻛﯧﻴﯩﻦ ﺳﺎﺋﻪﺕ 1 ﺩﯨﻦ ﻛﻪﭺ ﺳﺎﺋﻪﺕ 10-11 ﻟﻪﺭﮔﯩﭽﻪ ﺋﯩﺸﻠﻪﻳﺪﯨﻐﺎﻥ ﻗﯩﻠﺪﯨﻢ. ﺋﻪﺗﯩﮕﯩﻨﻰ ﺋﯚﻳﺪﯨﻦ ﺳﺎﺋﻪﺕ 7 ﺩﻩ ﭼﯩﻘﺴﺎﻡ، ﻛﻪﭼﺘﻪ ﺳﺎﺋﻪﺕ 11 ﺩﯨﻦ ﻛﯧﻴﯩﻦ ﻗﺎﻳﺘﯩﭗ ﻛﯧﻠﻪﺗﺘﯩﻢ. ﺑﯩﺮ ﻛﯜﻧﻰ 1-ﺷﯩﺮﻛﻪﺗﺘﯩﻦ ﺋﯩﺸﺘﯩﻦ ﭼﯜﺷﯜﭖ، 2-ﺷﯩﺮﻛﻪﺗﻜﻪ ﺑﯧﺮﯨﭗ، ﺑﯩﻨﺎﻏﺎ ﻛﯩﺮﯨﭗ ﻛﯧﺘﯩﯟﺍﺗﺴﺎﻡ، ﭘﺎﺭﺍﯕﻠﯩﺸﯩﭗ ﺗﯘﺭﻏﺎﻥ ﺑﯘ 2 ﺷﯩﺮﻛﻪﺗﻨﯩﯔ ﺋﯩﮕﯩﻠﯩﺮﯨﮕﻪ ﺋﯘﭼﺮﯨﺸﯩﭗ ﻗﺎﻟﺪﯨﻢ. ﺋﻪﺳﻠﯩﺪﻩ ﺑﯘ 2 ﻛﯩﺸﻰ ﻳﯧﻘﯩﻦ ﺩﻭﺳﺘﻼﺭﺩﯨﻦ ﺋﯩﻜﻪﻥ. 1-ﺷﯩﺮﻛﻪﺗﻨﯩﯔ ﺑﺎﺷﻠﯩﻘﻰ "ﺋﻪﺭﻛﯩﻦ ﻧﯧﻤﯩﺸﻘﺎ ﺑﯘ ﻳﻪﺭﺩﻩ ﻳﯜﺭﯛﻳﺪﯗ؟" ﺩﻩﭖ ﺳﻮﺭﯨﺪﻯ. 2-ﺷﯩﺮﻛﻪﺗﻨﯩﯔ ﺑﺎﺷﻠﯩﻐﻰ "ﺑﯩﺰﻧﯩﯔ ﺷﯩﺮﻛﻪﺗﺘﻪ ﺋﯩﺸﻠﻪﻳﺪﯗ" ﺩﻩﭖ ﺟﺎﯞﺍﺏ ﺑﻪﺭﺩﻯ. ﺷﯘﻧﯩﯔ ﺑﯩﻠﻪﻥ، ﻣﯧﻨﯩﯔ 2 ﺷﯩﺮﻛﻪﺗﺘﻪ ﺗﻪﯓ ﺋﯩﺸﻠﻪﯞﺍﺗﻘﺎﻧﻠﯩﻘﯩﻢ ﭘﺎﺵ ﺑﻮﻟﯘﭖ ﻗﺎﻟﺪﻯ. ﺋﯘﻻﺭ ﻣﯧﻨﯩﯔ ﺑﯩﺮ ﺋﯩﺸﯩﻤﻨﻰ ﻗﯩﺴﻘﺎﺭﺗﯩﺸﯩﻤﻨﻰ ﻗﻪﺗﺌﯩﻲ ﺗﻪﻟﻪﭖ ﻗﯩﻠﺪﻯ. ﺷﯘﻧﯩﯔ ﺑﯩﻠﻪﻥ ﻣﻪﻥ 1-ﺷﯩﺮﻛﻪﺗﻨﻰ ﻗﯩﺴﻘﺎﺭﺗﯩﭗ، 2-ﺷﯩﺮﻛﻪﺗﺘﻪ ﻫﻪﺭ ﻛﯜﻧﻰ 12 ﺳﺎﺋﻪﺕ ﺋﯩﺸﻠﻪﻳﺪﯨﻐﺎﻥ ﻗﯩﻠﺪﯨﻢ. ﻛﯧﻴﯩﻦ ﻗﺎﺭﺍﭖ ﺑﺎﻗﺴﺎﻡ، ﺑﯘ ﻳﻮﻝ ﺑﯩﻠﻪﻥ ﻫﻪﺭ ﺋﺎﻳﺪﺍ ﻳﯩﻐﺎﻻﻳﺪﯨﻐﺎﻥ ﭘﯘﻝ ﻳﻪﻧﻪ 500 ﺩﻭﻟﻼﺭﻏﯩﻤﯘ ﺑﺎﺭﻣﺎﻳﺪﯨﻜﻪﻥ. ﺋﯘﻧﯩﯔ ﺋﯜﺳﺘﯩﮕﻪ، ﻣﯧﻨﯩﯔ ﺑﺎﺷﻠﯩﻘﯩﻢ ﺋﯚﺯﻯ ﺋﯩﺮﺍﻧﺪﯨﻦ 15 ﺋﯩﻠﮕﯩﺮﻯ ﻛﻪﻟﮕﻪﻥ، ﺋﻪﻣﻤﺎ ﺋﯧﺮﻯ ﺋﺎﻣﯧﺮﯨﻜﯩﻐﺎ ﻛﯧﻠﻪﻟﻤﯩﮕﻪﻥ ﺑﯩﺮ ﺋﺎﻳﺎﻝ ﺑﻮﻟﯘﭖ، ﺑﺎﺷﻘﯘﺭﯗﺵ ﺋﯘﺳﯘﻟﻰ ﺋﯩﻨﺘﺎﻳﯩﻦ ﻧﺎﭼﺎﺭ ﺋﯩﺪﻯ. ﺋﯘ ﻣﯧﻜﺴﯩﻜﯩﻠﯩﻖ ﺋﻮﻗﯘﻣﯩﻐﺎﻥ ﻗﺎﺭﺍ ﺧﯩﺰﻣﻪﺗﭽﯩﻠﻪﺭﻧﻰ ﺑﺎﺷﻘﯘﺭﯗﭖ ﺋﯚﮔﯩﻨﯩﭗ ﻗﺎﻟﻐﺎﻥ ﺑﻮﻟﻐﺎﭼﻘﺎ، ﻣﺎﯕﯩﻤﯘ ﺩﻩﻝ ﺋﺎﺷﯘﻧﺪﺍﻕ ﻣﯘﺋﺎﻣﯩﻠﻪ ﻗﯩﻠﺪﻯ. ﻫﻪﺭ ﻛﯜﻧﻰ ﺋﻪﺗﯩﺪﯨﻦ ﻛﻪﭼﻜﯩﭽﻪ ﻛﯚﺯﯛﻣﮕﻪ ﻛﯩﺮﯨﯟﺍﻻﺗﺘﻰ. ﺑﻪﺯﯨﺪﻩ ﺋﯩﺸﻠﻪﯞﻩﺗﯩﭗ ﺑﯩﺮ ﺋﯚﻳﺪﯨﻦ ﻳﻪﻧﻪ ﺑﯩﺮ ﺋﯚﻳﮕﻪ ﻛﯧﺘﯩﭗ ﺑﺎﺭﺳﺎﻡ، "ﺋﻪﺭﻛﯩﻦ، ﻧﯧﻤﻪ ﺋﯩﺶ ﻗﯩﻠﯩﯟﺍﺗﯩﺴﻪﻥ؟" ﺩﻩﭖ ﺳﻮﺭﺍﻳﺘﺘﻰ. ﻣﻪﻥ ﺋﺎﭼﭽﯩﻘﯩﻤﺪﺍ "ﻣﺎﯞﯗ ﻳﻪﺭﺩﯨﻦ ﺋﺎﯞﯗ ﻳﻪﺭﮔﻪ ﻣﯧﯖﯩﯟﺍﺗﯩﻤﻪﻥ!" ﺩﻩﭖ ﺟﺎﯞﺍﺏ ﺑﯧﺮﻩﺗﺘﯩﻢ. ﺭﻭﻫﯩﻲ ﺟﻪﻫﻪﺗﺘﯩﻦ ﺧﯘﺩﺩﻯ ﺋﺎﺳﻤﺎﻧﺪﯨﻦ ﻳﻪﺭﮔﻪ ﭼﯜﺷﻜﻪﻧﺪﻩﻙ ﺑﻮﻟﯘﭖ، ﻫﻪﺭ ﻛﯜﻧﻰ ﺋﯩﺸﻘﺎ ﺑﻮﻳﻨﯘﻣﻨﻰ ﺑﺎﻏﻼﭖ ﺗﺎﺭﺗﻘﺎﻧﺪﻩﻙ ﺑﺎﺭﺍﺗﺘﯩﻢ. ﭘﻪﻗﻪﺕ ﭘﯘﻝ ﺋﯜﭼﯜﻧﻼ ﺋﯩﺸﻠﻪﻳﺘﺘﯩﻢ. ﺑﯘ ﺷﯩﺮﻛﻪﺗﻨﯩﯔ ﻣﯘﺋﺎﯞﯨﻦ ﺭﻩﺋﯩﺴﻰ ﻣﯩﺴﯩﺮﻟﯩﻖ ﻛﯩﺸﻰ ﺑﻮﻟﯘﭖ، ﻣﯧﻨﯩﯔ ﻫﻪﺭ ﻛﯜﻧﻰ ﺭﻭﻫﯩﻢ ﺋﯩﻨﺘﺎﻳﯩﻦ ﭼﯜﺷﻜﯜﻥ ﺋﯩﺸﻘﺎ ﻛﯧﻠﯩﯟﺍﺗﻘﯩﻨﯩﻤﻨﻰ ﻛﯚﺭﮔﻪﻧﺪﯨﻦ ﻛﯧﻴﯩﻦ، ﺑﯩﺮ ﻛﯜﻧﻰ ﻣﯧﻨﻰ ﺋﯚﺯﯨﻨﯩﯔ ﺋﯩﺸﺨﺎﻧﯩﺴﯩﻐﺎ ﭼﺎﻗﯩﺮﯨﭗ، ﻣﻪﻧﺪﯨﻦ ﺋﻪﻫﯟﺍﻝ ﺳﻮﺭﯨﺪﻯ. ﻣﻪﻥ ﺋﯚﺯﯛﻣﻨﯩﯔ ﺩﻭﻛﺘﯘﺭﻟﯘﻗﺘﺎ ﺋﻮﻗﯘﺷﻘﺎ ﭘﯘﻝ ﻳﯩﻐﯩﺶ ﺋﯜﭼﯜﻥ ﺑﯘ ﻳﻪﺭﺩﻩ ﺋﯩﺸﻠﻪﯞﺍﺗﻘﺎﻧﻠﯩﻘﯩﻤﻨﻰ ﭼﯜﺷﻪﻧﺪﯛﺭﮔﻪﻧﺪﯨﻦ ﻛﯧﻴﯩﻦ، ﺋﯘ ﻛﯩﺸﻰ ﻣﺎﯕﺎ: "ﺋﻪﺭﻛﯩﻦ، ﺋﻪﮔﻪﺭ ﻳﺎﺧﺸﯩﺮﺍﻕ ﺧﯩﺰﻣﻪﺕ ﺗﺎﭘﺎﻟﯩﺴﺎﯓ، ﺑﯘ ﺷﯩﺮﻛﻪﺗﺘﯩﻦ ﻫﻪﺭ ﻗﺎﻧﺪﺍﻕ ﯞﺍﻗﯩﺘﺘﺎ ﭼﯩﻘﯩﭗ ﻛﻪﺗﺴﻪﯓ ﺑﻮﻟﯩﯟﯦﺮﯨﺪﯗ. ﻫﻪﺭﮔﯩﺰ ﺑﯩﺰﻧﯩﯔ ﻛﯚﯕﻠﯩﻤﯩﺰﻧﻰ ﺋﺎﻳﺎﺵ ﺋﻮﻳﯩﺪﺍ ﺑﻮﻟﻤﺎ. ﻣﻪﻧﻤﯘ ﺋﻪﻳﻨﻰ ﯞﺍﻗﯩﺘﺘﺎ ﺳﺎﯕﺎ ﺋﻮﺧﺸﺎﺵ ﻳﻮﻟﻼﺭﻧﻰ ﺑﯧﺸﯩﻤﺪﯨﻦ ﻛﻪﭼﯜﺭﮔﻪﻥ. ﻓﯩﺰﯨﻜﯩﺪﺍ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻰ ﺋﯧﻠﯩﭗ ﺑﻮﻟﻐﺎﻧﺪﺍ، ﻣﻪﻥ ﻫﯧﭽﻴﻪﺭﺩﯨﻦ ﺧﯩﺰﻣﻪﺕ ﺗﺎﭘﺎﻟﻤﯩﺪﯨﻢ. ﺷﯘﻧﯩﯔ ﺑﯩﻠﻪﻥ ﻣﻪﻥ ﺋﯚﺯﯛﻣﻨﯩﯔ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻰ ﺑﺎﺭﻟﯩﻘﯩﻨﻰ ﻫﯧﭽﻜﯩﻤﮕﻪ ﺩﯦﻤﻪﻱ، ﻣﯘﺷﯘ ﺷﯩﺮﻛﻪﺗﻜﻪ ﻗﺎﺭﺍ ﺋﯩﺸﭽﻰ ﺋﻮﺭﻧﯩﺪﺍ ﻛﯩﺮﺩﯨﻢ. 5 ﻳﯩﻠﺪﻩﻙ ﺋﯩﺸﻠﯩﮕﻪﻧﺪﯨﻦ ﻛﯧﻴﯩﻦ، ﺋﺎﻧﺪﯨﻦ ﺋﯚﺯﯛﻣﻨﻰ ﺋﺎﺷﻜﺎﺭﯨﻠﯩﺪﯨﻢ. ﻣﺎﻧﺎ ﺋﻪﻣﺪﻯ ﺋﯚﺯ ﺋﯩﻘﺘﯩﺪﺍﺭﯨﻤﻨﻰ ﻫﻪﻗﯩﻘﯩﻲ ﺟﺎﺭﯨﻲ ﻗﯩﻠﺪﯗﺭﺍﻻﻳﺪﯨﻐﺎﻥ ﺑﻮﻟﺪﯗﻡ. ﺷﯘﯕﺎ ﺳﻪﻥ ﺑﯜﮔﯜﻥ ﺑﯩﺮ ﻳﺎﺧﺸﯩﺮﺍﻕ ﺧﯩﺰﻣﻪﺕ ﺗﺎﭘﺴﺎﯓ، ﺋﻪﺗﯩﻼ ﭼﯩﻘﯩﭗ ﻛﻪﺗﺴﻪﯕﻤﯘ، ﻣﻪﻥ ﻫﻪﺭﮔﯩﺰ ﺧﺎﭘﺎ ﺑﻮﻟﻤﺎﻳﻤﻪﻥ". ﺑﯘ ﻳﻮﻝ ﺑﯩﻠﻪﻥ ﻳﯧﺘﻪﺭﻟﯩﻚ ﭘﯘﻝ ﻳﯩﻐﯩﺶ ﺋﯩﻤﻜﺎﻧﯩﻴﯩﺘﻰ ﺑﻮﻟﻤﯩﻐﺎﭼﻘﺎ، ﻣﻪﻥ ﺋﺎﺧﯩﺮﻯ ﻣﯧﻨﻰ ﻗﻮﺑﯘﻝ ﻗﯩﻠﻐﺎﻥ ﻣﻪﻛﺘﻪﭘﻠﻪﺭﻧﯩﯔ ﺑﯩﺮﻯ ﺑﻮﻟﻐﺎﻥ ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺋﯧﻠﯧﻜﺘﺮ ﯞﻩ ﻛﻮﻣﭙﻴﯘﺗﯩﺮ ﺋﯩﻨﮋﯨﻨﯩﺮﻟﯩﻘﻰ ﻓﺎﻛﯘﻟﺘﯧﺘﯩﻨﯩﯔ ﻣﯘﺩﯨﺮﯨﻐﺎ ﺗﯧﻠﯧﻔﻮﻥ ﻗﯩﻠﺪﯨﻢ. ﺋﯘ ﻛﯩﺸﯩﮕﻪ ﺋﯚﺯﯛﻣﻨﯩﯔ ﺋﻮﻗﯘﺗﻘﯘﭼﯩﻠﯩﻘﺘﺎ ﺋﯩﻨﺘﺎﻳﯩﻦ ﻳﺎﺧﺸﻰ ﺋﯩﻜﻪﻧﻠﯩﻜﯩﻤﻨﻰ، ﺷﯘ ﺳﻪﯞﻩﺑﺘﯩﻦ ﻛﺎﻟﯩﻔﻮﺭﻧﯩﻴﻪ ﺷﯩﺘﺎﺕ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺑﯩﺮ ﺋﯩﻠﻐﺎﺭ ﺋﻮﻗﯘﺗﻘﯘﭼﻰ ﺩﯦﮕﻪﻥ ﻣﯘﻛﺎﭘﺎﺗﻘﺎ ﺋﯧﺮﯨﺸﻜﻪﻧﻠﯩﻜﯩﻤﻨﻰ ﺋﯧﻴﺘﯩﭗ، ﻣﯧﻨﯩﯔ ﺋﻮﻗﯘﺵ ﭘﯘﻟﯘﻣﻨﻰ ﻛﯚﺗﯜﺭﯛﯞﻩﺗﻤﯩﮕﻪﻥ ﺗﻪﻗﺪﯨﺮﺩﯨﻤﯘ، ﻣﺎﯕﺎ ﺋﻮﻗﯘﺗﻘﯘﭼﯩﻠﯩﻖ ﺧﯩﺰﻣﯩﺘﻰ ﺑﯧﺮﯨﺸﻨﻰ ﺗﻪﻟﻪﭖ ﻗﯩﻠﺪﯨﻢ. ﺋﯘ ﻛﯩﺸﻰ ﻣﯧﻨﯩﯔ ﺑﯘﺭﯗﻧﻘﻰ ﻣﻪﻛﺘﯩﭙﯩﻤﺪﯨﻦ ﻳﯘﻗﯩﺮﯨﻘﻰ ﺋﻪﻫﯟﺍﻟﻨﻰ ﺗﻪﻛﺸﯜﺭﯛﭖ ﺑﺎﻗﻘﺎﻧﺪﯨﻦ ﻛﯧﻴﯩﻦ، ﻣﺎﯕﺎ 25٪ ﺧﯩﺰﻣﻪﺕ ﺑﻪﺭﺩﻯ. ﺑﯘ ﻫﻪﭘﺘﯩﺴﯩﮕﻪ 10 ﺳﺎﺋﻪﺕ ﺋﯩﺸﻠﻪﻳﺪﯨﻐﺎﻥ ﺧﯩﺰﻣﻪﺕ ﺑﻮﻟﯘﭖ، ﺋﺎﻣﯧﺮﯨﻜﯩﺪﺍ ﭘﯜﺗﯜﻥ ﻛﯜﻧﻠﯜﻙ ﺋﻮﻗﯘﻏﯘﭼﯩﻼﺭ ﻫﻪﭘﺘﯩﺴﯩﮕﻪ 50٪ (ﻳﻪﻧﻰ 20 ﺳﺎﺋﻪﺕ) ﺋﯩﺸﻠﻪﺷﻜﻪ ﻳﻮﻝ ﻗﻮﻳﯘﻟﯩﺪﯗ. ﺋﺎﻣﺎﻧﮕﯜﻝ ﺑﯩﻠﻪﻥ ﺋﯩﻜﻜﯩﻤﯩﺰ ﻗﺎﻧﺪﺍﻕ ﻗﯩﻠﯩﺶ ﺗﻮﻏﺮﯨﺴﯩﺪﺍ ﺑﯩﺮ ﻫﻪﭘﺘﻪ ﻣﻪﺳﻠﯩﻬﻪﺗﻠﻪﺷﺘﯘﻕ. ﻗﺎﻳﺘﺎ-ﻗﺎﻳﺘﺎ ﭘﯘﻝ ﺳﺎﻧﯩﺪﯗﻕ. ﻧﻪﭼﭽﻪ ﻛﯧﭽﯩﻨﻰ ﺋﯘﺧﻠﯩﻤﺎﻱ ﺋﯚﺗﻜﯜﺯﺩﯗﻕ. ﻣﺎﯕﺎ ﺋﯘ ﺧﯩﺰﻣﻪﺗﺘﯩﻦ ﻛﯧﻠﯩﺪﯨﻐﺎﻥ ﻣﺎﺋﺎﺵ 500 ﺩﻭﻟﻼﺭ ﺋﻪﺗﺮﺍﭘﯩﺪﺍ ﺑﻮﻟﯘﭖ، ﺋﯘ ﻣﻪﻛﺘﻪﭘﻨﯩﯔ ﺑﯩﺮ ﻳﯩﻠﻠﯩﻖ ﺋﻮﻗﯘﺵ ﭘﯘﻟﻰ 13000 ﺩﻭﻟﻼﺭ ﺋﯩﺪﻯ. ﺋﺎﺧﯩﺮﻯ ﺋﯘ ﻣﻪﻛﺘﻪﭘﻜﻪ ﺑﯧﺮﯨﺸﻨﻰ ﻗﺎﺭﺍﺭ ﻗﯩﻠﯩﭗ، ﻳﯜﻙ-ﺗﺎﻗﻠﯩﺮﯨﻤﯩﺰﻧﻰ ﻫﻪﺭ ﺑﯩﺮﯨﻨﻰ 700 ﺩﻭﻟﻼﺭﺩﯨﻦ ﺳﯧﺘﯩﯟﺍﻟﻐﺎﻥ 2 ﻛﯩﭽﯩﻚ ﻣﺎﺷﯩﻨﯩﻐﺎ ﻗﺎﭼﯩﻼﭖ، 500 ﻛﯩﻠﻮﻣﯧﺘﯩﺮ ﻳﻮﻝ ﻳﯜﺭﯛﭖ، ﺷﯩﻤﺎﻟﯩﻲ ﻛﺎﻟﯩﻔﻮﺭﻧﯩﻴﻪﮔﻪ ﻛﯚﭼﯜﭖ ﻛﻪﺗﺘﯘﻕ. ﺋﯘ ﻣﻪﻛﺘﻪﭘﻜﻪ ﺑﺎﺭﻏﺎﻧﺪﯨﻦ ﻛﯧﻴﯩﻦ، ﺋﯘﻻﺭ ﻣﯧﻨﯩﯔ ﺧﯩﺰﻣﯩﺘﯩﻤﻨﻰ 50٪ ﮔﻪ ﻛﯚﺗﯜﺭﯛﭖ ﺑﻪﺭﺩﻯ. ﻗﺎﻟﻐﺎﻥ ﻛﻪﻡ ﻳﻪﺭﻟﯩﺮﯨﻨﻰ ﺗﻮﻟﺪﯗﺭﯗﺵ ﺋﯜﭼﯜﻥ، ﺋﺎﻣﺎﻧﮕﯜﻝ ﻫﻪﺭ ﺧﯩﻞ ﺟﺎﭘﺎﻟﯩﻖ ﺧﯩﺰﻣﻪﺗﻠﻪﺭﻧﻰ ﺗﯧﭙﯩﭗ ﺋﯩﺸﻠﯩﺪﻯ. ﺋﯘ ﻣﻪﻛﺘﻪﭘﺘﻪ ﺑﯩﺮ ﻳﯩﻞ 3 ﻣﻪﯞﺳﯘﻡ ﺑﻮﻟﯘﭖ، ﻣﻪﻥ 1-ﻳﯩﻠﻰ ﺋﯚﮔﯩﻨﯩﺶ ﯞﻩ ﺋﻮﻗﯘﺗﻘﯘﭼﯩﻠﯩﻖ ﺟﻪﻫﻪﺗﺘﻪ ﺧﯧﻠﻰ ﻛﯚﺯﮔﻪ ﻛﯚﺭﯛﻧﻪﺭﻟﯩﻚ ﻧﻪﺗﯩﺠﯩﻠﻪﺭﮔﻪ ﺋﯧﺮﯨﺸﻜﻪﻥ ﺑﻮﻟﻐﺎﭼﻘﺎ، 2-ﻳﯩﻠﻰ ﻓﺎﻛﯘﻟﺘﯧﺘﺘﯩﻦ ﻣﯧﻨﯩﯔ 3 ﻣﻪﯞﺳﯘﻣﻠﯘﻕ ﺋﻮﻗﯘﺵ ﭘﯘﻟﯘﻣﻨﯩﯔ ﻫﻪﻣﻤﯩﺴﯩﻨﻰ ﻛﯚﺗﯜﺭﯛﯞﻩﺗﺘﻰ. ﺷﯘ ﭼﺎﻏﺪﺍ ﺑﯩﺮ ﻣﻪﯞﺳﯘﻣﻠﯘﻕ ﺋﻮﻗﯘﺵ ﻣﯘﻛﺎﭘﺎﺕ ﭘﯘﻟﯩﻐﯩﻤﯘ ﺋﯧﺮﯨﺸﻪﻟﻤﯩﮕﻪﻥ ﺟﯘﯕﮕﻮﻟﯘﻕ ﺧﻪﻧﺰﯗ ﺋﻮﻗﯘﻏﯘﭼﯩﻼﺭ ﺑﺎﺭ ﺑﻮﻟﯘﭖ، ﺋﯘﻻﺭﻧﯩﯔ ﺑﻪﺯﯨﻠﯩﺮﻯ ﻓﺎﻛﯘﻟﺘﯧﺖ ﻣﯘﺩﯨﺮﯨﻨﯩﯔ ﻗﯧﺸﯩﻐﺎ ﻣﯧﻨﯩﯔ ﺋﯜﺳﺘﯜﻣﺪﯨﻦ ﺋﻪﺭﺯ ﻗﯩﻠﯩﭗ ﺑﯧﺮﯨﭙﺘﯘ. ﺷﯘﻧﺪﺍﻕ ﻗﯩﻠﯩﭗ، ﻣﯧﻨﯩﯔ ﺩﻭﻛﺘﯘﺭﻟﯘﻕ ﺋﻮﻗﯘﺷﯘﻣﺪﺍ ﺋﺎﻳﺎﻟﯩﻤﻨﯩﯔ ﻗﻮﺷﻘﺎﻥ ﺗﯚﻫﭙﯩﺴﻰ ﺋﯩﻨﺘﺎﻳﯩﻦ ﻛﯚﭖ ﺑﻮﻟﯘﭖ، ﻣﻪﻥ ﺋﺎﻟﻐﺎﻥ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻨﯩﯔ ﺑﯩﺮ ﻗﯩﺴﻤﻰ ﺋﺎﻣﺎﻧﮕﯜﻟﮕﻪ ﺗﻪﯞﻩﺩﯗﺭ.

ﺑﯘ ﺟﻪﻫﻪﺗﺘﻪ ﻫﯧﻜﺎﻳﯩﻠﯩﺮﯨﻢ ﺋﯩﻨﺘﺎﻳﯩﻦ ﻛﯚﭖ ﺑﻮﻟﯘﭖ، ﻫﺎﺯﯨﺮﭼﻪ ﻣﯘﺷﯘ ﻳﻪﺭﺩﻩ ﺗﻮﺧﺘﯩﺘﺎﻱ. ﻣﻪﻥ ﺋﯚﺯﯛﻡ ﺋﯩﺸﻠﻪﭖ ﺑﺎﻗﻘﺎﻥ ﻫﻪﺭ ﺑﯩﺮ ﺋﻮﺭﯗﻧﺪﺍ، ﻳﯘﻗﯩﺮﯨﺪﺍ ﺗﯩﺰﻏﺎﻥ ﺷﻪﺧﺴﯩﻲ ﺧﺎﺭﺍﻛﺘﯩﺮﯨﻢ ﺑﯩﻠﻪﻥ ﻧﺎﻫﺎﻳﯩﺘﻰ ﻳﯘﻗﯩﺮﻯ ﺑﺎﻫﺎﻏﺎ ﺋﯧﺮﯨﺸﯩﭗ ﻛﻪﻟﺪﯨﻢ. ﻣﻪﺳﯩﻠﻪﻥ، ﻣﺎﯕﺎ ﺑﯧﺮﯨﻠﮕﻪﻥ ﺑﯩﺮ ﻗﯩﺴﯩﻢ ﺑﺎﻫﺎﻻﺭ ﻣﯘﻧﺪﺍﻕ: -- ﻣﻪﻥ ﻫﺎﺯﯨﺮﻏﯩﭽﻪ ﺋﯘﭼﺮﯨﺘﯩﭗ ﺑﺎﻗﻘﺎﻥ ﺋﻪﯓ ﻳﺎﺧﺸﻰ ﺋﻮﻗﯘﻏﯘﭼﯩﻼﺭﻧﯩﯔ ﺑﯩﺮﻯ.
-- ﻣﻪﻥ ﻫﺎﺯﯨﺮﻏﯩﭽﻪ ﺋﯘﭼﺮﯨﺘﯩﭗ ﺑﺎﻗﻘﺎﻥ ﺋﻪﯓ ﺋﻪﻗﯩﻠﻠﯩﻖ ﺋﯩﻠﯩﻢ-ﭘﻪﻧﭽﻰ ("Scientist") ﻧﯩﯔ ﺑﯩﺮﺳﻰ.
--  ﻣﻪﻥ ﻫﺎﺯﯨﺮﻏﯩﭽﻪ ﺋﯘﭼﺮﯨﺘﯩﭗ ﺑﺎﻗﻘﺎﻥ ﺋﻪﯓ ﺋﺎﻟﯩﻴﺠﺎﻧﺎﺏ، ﺋﻪﯓ ﺋﯩﻘﺘﯩﺪﺍﺭﻟﯩﻖ ﺋﯩﻨﮋﯨﻨﯩﺮﻧﯩﯔ ﺑﯩﺮﺳﻰ.
-- ﺋﯩﻠﻤﯩﻲ ﺗﻪﺗﻘﯩﻘﺎﺗﺘﺎ، ﺋﯩﺸﻼﺭﻧﻰ ﺩﺍﯞﺍﻣﻠﯩﻖ ﺋﯚﺯ ﻧﻮﺭﻣﯩﺴﯩﺪﯨﻦ ﺋﺎﺭﺗﯘﻕ ﻗﯩﻠﯩﺪﯗ.
-- ﻫﻪﻣﻤﻪ ﺧﯩﺰﻣﻪﺗﻨﻰ ﺗﻪﻟﻪﭘﺘﯩﻦ ﻛﯚﭖ ﻳﯘﻗﯩﺮﻯ ﺋﻮﺭﯗﻧﻼﻳﺪﯗ.
-- ﻣﻪﻥ ﻫﺎﺯﯨﺮﻏﯩﭽﻪ ﺋﯘﭼﺮﯨﺘﯩﭗ ﺑﺎﻗﻘﺎﻥ ﺋﻪﯓ ﻳﺎﺧﺸﻰ ﭘﺮﻭﻓﯧﺴﺴﻮﺭﻧﯩﯔ ﺑﯩﺮﺳﻰ.
-- ﺋﻪﮔﻪﺭ ﭘﺮﻭﻓﯧﺴﺴﻮﺭﻻﺭﻧﯩﯔ ﻫﻪﻣﻤﯩﺴﻰ ﺋﻪﺭﻛﯩﻨﺪﻩﻙ ﺑﻮﻟﺴﺎ، ﻣﻪﻥ ﻫﺎﺯﯨﺮﻗﯩﺪﯨﻦ ﻳﯘﻗﯩﺮﻯ ﺋﻮﻗﯘﺵ ﭘﯘﻟﻰ ﺗﯚﻟﻪﺷﻜﻪ ﺭﺍﺯﯨﻤﻪﻥ.

ﻣﻪﻥ ﺩﻭﻛﺘﻮﺭﻟﯘﻕ ﺋﯘﻧﯟﺍﻧﯩﻨﻰ ﺋﯧﻠﯩﭗ، ﺑﯩﺮ ﻳﯧﺮﯨﻢ ﻳﯩﻞ ﺋﺎﻣﯧﺮﯨﻜﯩﻨﯩﯔ ﺳﺎﻧﺪﯨﺌﺎ ﺩﯙﻟﻪﺗﻠﯩﻚ ﺗﻪﺟﺮﯨﺒﯩﺨﺎﻧﯩﺴﯩﺪﺍ ﺩﻭﻛﺘﻮﺭ ﺋﺎﺷﺘﻰ ( Post doctor ) ﺑﯩﻠﻪﻥ ﺷﯘﻏﯘﻟﻼﻧﺪﯨﻢ. ﺷﯘ ﺟﻪﺭﻳﺎﻧﺪﺍ Chwi laser ﺩﯦﮕﻪﻥ ﺑﯩﺮ ﺷﯩﺮﻛﻪﺗﻨﯩﯔ Alex ﺩﯦﮕﻪﻥ ﻣﯘﺋﺎﯞﯨﻦ ﺭﻩﺋﯩﺴﻰ ﺑﯩﻠﻪﻥ ﺷﯩﺮﯨﻚ ﺋﯩﺸﻠﯩﮕﻪﻥ ﺑﻮﻟﯘﭖ، Post doctor ﺗﺎﻣﺎﻣﻼﻧﻐﺎﻧﺪﺍ، ﺋﯘ ﻣﯧﻨﻰ ﺋﯚﺯ ﺷﯩﺮﻛﯩﺘﯩﮕﻪ ﺧﯩﺰﻣﻪﺗﻜﻪ ﺋﺎﻟﺪﻯ. ﺑﯘ ﻛﯩﺸﯩﻨﯩﯔ ﺋﺎﺗﺎ-ﺋﺎﻧﯩﺴﻰ ﺭﯗﺳﯩﻴﻪﺩﯨﻦ ﻛﻪﻟﮕﻪﻥ ﻳﻪﻫﯘﺩﯨﻴﻼﺭﺩﯨﻦ ﺑﻮﻟﯘﭖ، Alex ﻧﯧﯟﻳﻮﺭﻛﺘﺎ ﺗﻮﻏﯘﻟﯘﭖ ﺋﯚﺳﻜﻪﻥ، ﻣﯩﺖ ﺋﯘﻧﯩﯟﯦﺮﺳﯩﺘﯧﺘﯩﺪﺍ ﺑﺎﻛﻼﯞﯗﺭ، ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺑﻪﺭﻛﻪﻟﻪﻱ ﺷﯚﺑﯩﺴﯩﺪﻩ ﺩﻭﻛﺘﻮﺭﻟﯘﻕ ﺋﻮﻗﯘﻏﺎﻥ ﻛﯩﺸﻰ ﺋﯩﺪﻯ. ﺗﯘﻏﻤﺎ ﺋﻪﻗﯩﻠﻠﯩﻖ ﺑﻮﻟﯘﭖ، ﻛﻪﺳﯩﭙﺘﻪ ﺋﯩﻨﺘﺎﻳﯩﻦ ﻗﺎﺑﯩﻠﯩﻴﻪﺗﻠﯩﻚ ﺋﯩﺪﻯ. ﻟﯧﻜﯩﻦ ﻛﯩﭽﯩﻜﯩﺪﯨﻦ ﺗﺎﺭﺗﯩﭗ ﺋﺎﺋﯩﻠﯩﺴﯩﺪﻩ ﺧﺎﺭﻟﯩﻖ ﺋﯩﭽﯩﺪﻩ ﭼﻮﯓ ﺑﻮﻟﻐﺎﻥ ﺑﻮﻟﯘﭖ، ﻛﯩﺸﯩﻠﻪﺭ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﺘﻪ ﺑﯩﺮ ﺋﺎﺯ ﻧﺎﭼﺎﺭ ﺋﯩﺪﻯ. ﺩﻩﺳﻠﻪﭘﺘﻪ ﻣﯧﻨﻰ ﺗﯜﺯﯛﻛﺮﻩﻙ ﻛﯚﺯﮔﻪ ﺋﯩﻠﻤﯩﺪﻯ. ﻫﻪ ﺩﯦﺴﯩﻼ ﻣﺎﯕﺎ ﻗﻮﭘﺎﻝ ﻣﯘﺋﺎﻣﯩﻠﻪ ﻗﯩﻠﺪﻯ. ﻟﯧﻜﯩﻦ ﺑﯩﺮ ﻣﻪﺯﮔﯩﻞ ﺋﯚﺗﻜﻪﻧﺪﯨﻦ ﻛﯧﻴﯩﻦ، ﺑﯩﺰ ﻧﺎﻫﺎﻳﯩﺘﻰ ﻳﺎﺧﺸﻰ ﭼﯩﻘﯩﺸﯩﭗ ﻛﻪﺗﺘﯘﻕ. ﺑﯩﺮ ﻧﻪﺭﺳﻪ ﻳﺎﺳﺎﭖ ﭼﯩﻘﯩﺮﯨﺸﺘﺎ، ﺋﯘ ﻛﯩﺸﻰ ﺑﯩﺮ ﺗﯧﺨﻨﯩﻜﯩﻨﯩﯔ ﺋﯩﺸﻠﻪﻳﺪﯨﻐﺎﻥ-ﺋﯩﺸﻠﯩﻤﻪﻳﺪﯨﻐﺎﻧﻠﯩﻘﯩﻨﻰ ﺋﺎﻟﺪﯨﻨﺌﺎﻻ ﻣﯚﻟﭽﻪﺭﻟﻪﺷﻜﻪ ﺋﯩﻨﺘﺎﻳﯩﻦ ﻗﺎﺩﯨﺮ ﺋﯩﺪﻯ. ﻣﻪﻥ ﺑﻮﻟﺴﺎﻡ، ﺋﯘﻧﻰ ﻻﻫﯩﻴﯩﻠﻪﭖ، ﺋﯘﻧﯩﯖﻐﺎ ﻛﯧﺘﯩﺪﯨﻐﺎﻥ ﺯﺍﭘﭽﺎﺳﻼﺭﻧﻰ ﺗﯧﭙﯩﭗ ﺋﯧﻠﯩﭗ، ﺋﯘﻧﻰ ﺗﻪﺟﺮﯨﺒﯩﺨﺎﻧﯩﺪﺍ ﻳﺎﺳﺎﭖ ﭼﯩﻘﯩﺸﻘﺎ ﻗﺎﺩﯨﺮ ﺋﯩﺪﯨﻢ. ﻛﯧﻴﯩﻨﭽﻪ ﺋﯩﻜﻜﯩﻤﯩﺰ ﺑﯩﺮﻟﻪﺷﺴﻪﻙ، ﺑﯘ ﺩﯗﻧﻴﺎﺩﺍ ﺑﯩﺰ ﻗﯩﻼﻟﻤﺎﻳﺪﯨﻐﺎﻥ ﺋﯩﺶ ﻳﻮﻗﺘﻪﻙ ﺗﯘﻳﯘﻟﯩﺪﯨﻐﺎﻥ ﺑﻮﻟﺪﻯ. ﻣﻪﻥ ﺑﯩﻠﻪﻥ ﺋﺎﺭﯨﻠﯩﺸﯩﺶ ﺟﻪﺭﻳﺎﻧﯩﺪﺍ ﺋﯘﻳﻐﯘﺭﻻﺭﻧﻰ، ﻣﯧﻨﯩﯔ ﺑﺎﻟﯩﻠﯩﻖ ﻫﺎﻳﺎﺗﯩﻤﻨﻰ، ﻫﻪﻣﺪﻩ ﻣﯧﻨﯩﯔ ﺋﯘﻳﻐﯘﺭ ﻣﯩﻠﻠﯩﺘﯩﮕﻪ ﺑﻮﻟﻐﺎﻥ ﭼﻪﻛﺴﯩﺰ ﺳﯚﻳﮕﯜ ﻫﯧﺴﺴﯩﻴﺎﺗﯩﻤﻨﻰ ﺗﻮﻟﯘﻕ ﺑﯩﻠﯩﭗ ﻛﻪﺗﺘﻰ. ﺋﯘ ﺗﯧﺨﻰ ﻛﻪﻟﮕﯜﺳﯩﺪﻩ ﯞﺍﻗﺘﯩﻤﯩﺰ ﭼﯩﻘﻘﺎﻧﺪﺍ، ﺋﯩﻜﻜﯩﻤﯩﺰ ﺑﯩﺮﻟﯩﺸﯩﭗ ﻣﯧﻨﯩﯔ ﻫﺎﻳﺎﺗﯩﻤﻨﻰ ﺋﯩﻨﮕﻠﯩﺰﭼﻪ ﻳﯧﺰﯨﭗ، ﻛﯩﺘﺎﺏ ﻗﯩﻠﯩﭗ ﭼﯩﻘﯩﺮﯨﺸﻨﻰ ﺗﻪﻛﻠﯩﭗ ﻗﯩﻠﺪﻯ. ﻣﻪﻥ ﭘﺎﺭﺍﯕﻼﺭ ﺋﺎﺭﯨﺴﯩﺪﺍ ﺋﯘﻧﯩﯖﻐﺎ، "ﻗﺎﺭﺍ، ﻣﻪﻥ ﻛﯩﭽﯩﻜﯩﻤﺪﻩ ﻗﻮﺳﯘﻏﯘﻡ ﺗﻮﻳﻐﯩﭽﻪ ﺗﺎﻣﺎﻕ ﻳﯧﻴﻪﻟﻤﻪﻱ، ﺋﯧﺮﯨﻖ-ﺋﯚﺳﺘﻪﯕﻨﯩﯔ ﭘﺎﺳﻜﯩﻨﺎ ﺳﯘﻟﯩﺮﯨﻨﻰ ﺋﯩﭽﯩﭗ ﭼﻮﯓ ﺑﻮﻟﻐﺎﻥ ﺑﻮﻟﺴﺎﻣﻤﯘ، ﻫﺎﺯﯨﺮ ﺳﻪﻧﺪﻩﻙ ﺑﯩﺮ ﺋﻪﻗﯩﻠﻠﯩﻖ ﻳﻪﻫﯘﺩﯨﻴﺪﯨﻦ ﻗﯧﻠﯩﺸﻤﺎﻳﻤﻪﻥ. ﺋﻪﮔﻪﺭ ﻣﻪﻥ ﺳﻪﻥ ﺋﯚﺳﻜﻪﻥ ﺷﻪﺭﺕ-ﺷﺎﺭﺍﺋﯩﺘﺘﺎ ﺋﯚﺳﯜﭖ ﻳﯧﺘﯩﻠﮕﻪﻥ ﺑﻮﻟﺴﺎﻡ، ﺳﻪﻧﺪﯨﻦ ﺟﯩﻖ ﺋﻪﻗﯩﻠﻠﯩﻖ ﺑﻮﻻﺗﺘﯩﻢ" ﺩﯦﺴﻪﻡ، ﺋﯘ ﻛﯜﻟﯜﭖ ﺗﯘﺭﯗﭖ ﺑﯧﺸﯩﻨﻰ ﻟﯩﯖﺸﯩﺘﺎﺗﺘﻰ. ﻣﻪﻥ ﻫﻪﻗﯩﻘﻪﺗﻪﻧﻤﯘ ﺋﯧﺮﯨﻖ-ﺋﯚﺳﺘﻪﯕﻨﯩﯔ ﺳﯜﻳﯩﻨﻰ ﺋﯩﭽﯩﭗ ﭼﻮﯓ ﺑﻮﻟﻐﺎﻥ ﺋﯩﺪﯨﻢ. ﺑﯩﺰﻧﯩﯔ ﺋﯩﺪﺍﺭﯨﻨﯩﯔ ﺋﺎﻟﺪﯨﺪﺍ ﺑﯩﺮ ﻛﯩﭽﯩﻚ ﺋﯧﺮﯨﻖ ﺑﺎﺭ ﺑﻮﻟﯘﭖ، ﺑﯩﺰ ﺳﯘﻧﻰ ﺷﯘ ﻳﻪﺭﺩﯨﻦ ﺋﻪﻛﯩﺮﯨﭗ ﺋﯩﭽﻪﺗﺘﯘﻕ. ﺑﯘ ﺋﯧﺮﯨﻘﻨﯩﯔ ﺑﻪﺷﻰ ﺗﺎﺭﯨﻢ ﺩﻩﺭﻳﺎﺳﻰ ﺑﻮﻟﯘﭖ، ﺑﯩﺰﻧﯩﯔ ﺋﯩﺪﺍﺭﯨﻨﯩﯔ ﺋﺎﻟﺪﯨﻐﺎ ﻛﻪﻟﮕﯩﭽﻪ ﻗﺎﻧﭽﯩﻠﯩﻚ ﺟﺎﻳﻼﺭﺩﺍ ﺑﯘ ﺳﯘﻧﻰ ﺋﺎﺕ-ﺋﯘﻻﻗﻼﺭ ﺋﯩﭽﯩﺪﯨﻐﺎﻧﻠﯩﻘﻰ، ﻗﺎﻧﭽﯩﻠﯩﻚ ﻳﻪﺭﻟﻪﺭﺩﻩ ﻛﯩﭽﯩﻚ ﺑﺎﻟﯩﻼﺭ ﺋﯘﻧﯩﯔ ﺑﯧﺸﯩﺪﯨﻜﻰ ﺋﯚﺳﺘﻪﯕﮕﻪ ﺳﯘﻏﺎ ﭼﯜﺷﯩﺪﯨﻐﺎﻧﻠﯩﻘﻰ ﻣﻪﻟﯘﻡ ﺋﻪﻣﻪﺱ. ﻣﻪﻥ ﻳﯧﺰﯨﺪﺍ ﻗﺎﻳﺘﺎ ﺗﻪﺭﺑﯩﻴﻪ ﺋﯧﻠﯩﯟﺍﺗﻘﺎﻥ ﻣﻪﺯﮔﯩﻠﺪﯨﻤﯘ، ﻗﯩﺶ ﻛﯜﻧﻠﯩﺮﻯ ﺑﯩﺮ ﺗﻮﯕﻼﭖ ﻗﺎﻟﻐﺎﻥ ﻫﻮﺭ ﻧﯧﻨﯩﻨﻰ ﺋﯧﻠﯩﭗ، ﺋﯚﺳﺘﻪﯓ ﺑﻮﻳﯩﻐﺎ ﺑﯩﺮ ﭼﺎﺷﻜﺎ ﺋﯧﻠﯩﭗ ﺑﯧﺮﯨﭗ، ﺳﯘﻧﻰ ﺷﯘ ﺋﯚﺳﺘﻪﯕﺪﯨﻦ ﺋﯧﻠﯩﭗ، ﺗﻮﯕﻼﭖ ﻗﺎﻟﻐﺎﻥ ﻫﻮﺭ ﻧﯧﻨﯩﻨﻰ ﻏﺎﺟﯩﻼﭖ ﻳﻪﯞﺍﺗﻘﺎﻧﺪﺍ، ﺋﯚﺳﺘﻪﯕﻨﯩﯔ ﺑﯧﺸﯩﺪﺍ ﺳﯘﻏﺎ ﻛﯧﭽﯩﭗ ﺗﯘﺭﯗﭖ ﺳﯘ ﺋﯩﭽﯩﯟﺍﺗﻘﺎﻥ ﻣﺎﻟﻼﺭﻧﻰ ﻛﯚﺭﯛﭖ ﺗﯘﺭﺍﺗﺘﯩﻢ. ﻳﯧﺰﯨﺪﯨﻜﻰ ﺗﯘﻏﻘﺎﻧﻼﺭﻧﯩﯔ ﻗﯧﺸﯩﻐﺎ ﺑﺎﺭﻏﺎﻧﺪﺍ، ﺋﯧﺮﯨﻖ ﺑﻮﻳﻠﯩﺮﯨﻐﺎ ﻳﺎﺳﺎﭖ ﻗﻮﻳﻐﺎﻥ ﻛﯩﭽﯩﻚ ﻛﯚﻟﭽﻪﻛﻨﯩﯔ ﺳﯜﻳﯩﻨﻰ ﻗﻮﻝ ﺑﯩﻠﻪﻥ ﺋﯩﭽﻜﻪﻧﺪﻩ، ﺑﻪﺯﯨﺪﻩ ﻗﻮﻟﯩﻤﯩﺰﻏﺎ ﻗﯘﻣﭽﺎﻕ (ﭘﺎﻗﯩﻨﯩﯔ ﺑﺎﻟﯩﺴﻰ) ﭼﯩﻘﯩﭗ ﻗﺎﻻﺗﺘﻰ. ﺑﯩﺰ ﻗﯘﻣﭽﺎﻗﻨﻰ ﭘﯜﯞﻟﻪﭖ ﭼﯜﺷﯜﺭﯛﯞﯦﺘﯩﭗ، ﻗﻮﻟﯩﻤﯩﺰﺩﯨﻜﻰ ﺳﯘﻧﻰ ﺋﯩﭽﻪﺗﺘﯘﻕ. ﻣﻪﻥ ﺗﻮﻟﯘﻕ ﺋﻮﺗﺘﯘﺭﯨﻨﻰ ﭘﯜﺗﺘﯜﺭﻩﻱ ﺩﯦﮕﻪﻧﺪﻩ ﺋﺎﻧﺪﯨﻦ ﺋﺎﻗﺴﯘ ﺷﻪﻫﯩﺮﯨﺪﻩ ﻗﯘﺩﯗﻕ ﭘﻪﻳﺪﺍ ﺑﻮﻟﻐﺎﻧﯩﺪﻯ. ﻛﯧﻴﯩﻨﭽﻪ Alex ﻣﻪﻧﺪﯨﻦ ﻧﺎﻫﺎﻳﯩﺘﻰ ﺗﻪﺳﯩﺮﻟﯩﻨﯩﺪﯨﻐﺎﻥ ﺑﻮﻟﯘﭖ ﻛﻪﺗﺘﻰ. ﺋﯩﻜﻜﻰ ﻳﯩﻠﻨﯩﯔ ﺋﯩﭽﯩﺪﻩ ﻣﺎﺋﺎﺷﯩﻤﻨﻰ ٪ 50ﺋﯚﺳﺘﯜﺭﯛﭖ ﺑﻪﺭﺩﻯ. ﺑﯩﺮ ﻛﯜﻧﻰ ﺋﯘ ﻣﯧﻨﯩﯔ ﻗﯧﺸﯩﻤﻐﺎ ﻛﯧﻠﯩﭗ، "ﺋﻪﺭﻛﯩﻦ، ﻣﻪﻧﺪﻩ ﺳﻪﻧﺪﻩﻙ ﻛﯩﺸﯩﻠﯩﻚ ﭘﺮﯨﻨﺴﯩﭙﻰ ﺩﯦﮕﻪﻥ ﺑﯩﺮ ﻧﻪﺭﺳﻪ ﻳﻮﻕ ﺋﯩﻜﻪﻥ. ﻣﻪﻥ ﺳﺎﯕﺎ ﯞﻩ ﺋﯘﻳﻐﯘﺭﻻﺭﻏﺎ ﻫﯚﺭﻣﻪﺕ ﻗﯩﻠﯩﺶ ﻳﯜﺯﯨﺴﯩﺪﯨﻦ، ﺑﯜﮔﯜﻧﺪﯨﻦ ﺑﺎﺷﻼﭖ ﭼﻮﺷﻘﺎ ﮔﯚﺷﻰ ﻳﯧﻴﯩﺸﻨﻰ ﺗﻮﺧﺘﯩﺘﯩﻤﻪﻥ"، ﺩﯨﺪﻯ. ﺑﯘ ﻛﯩﺸﻰ ﺩﯨﻨﻐﺎ ﺋﯩﺸﻪﻧﻤﯩﮕﻪﭼﻜﻪ، ﺑﯘﺭﯗﻥ ﭼﻮﺷﻘﺎ ﮔﯚﺷﯩﻨﯩﻤﯘ ﻳﻪﯞﯦﺮﻩﺗﺘﻰ. ﺑﯩﺰﻧﯩﯔ ﺩﻭﺳﺘﻠﯘﻗﯩﻤﯩﺰ ﺷﯘﻧﯩﯖﺪﯨﻦ ﺑﺎﺷﻼﭖ ﺋﯩﺰﭼﯩﻞ ﺩﺍﯞﺍﻣﻠﯩﺸﯩﭗ ﻛﯧﻠﯩﯟﺍﺗﯩﺪﯗ. ﺋﯘ ﻛﯩﺸﻰ ﻫﺎﺯﯨﺮ ﻓﻠﻮﺭﯨﺪﺍ ﺷﯩﺘﺎﺗﯩﺪﺍ ﺑﻮﻟﯘﭖ، ﺋﯚﺯﻯ ﺑﯩﺮ ﺋﺎﻳﺮﯨﻢ ﺷﯩﺮﻛﻪﺕ ﻗﯘﺭﺩﻯ. ﻫﻪﺭ ﻗﯧﺘﯩﻢ ﻛﺎﻟﯩﻔﻮﺭﻧﯩﻴﻪﮔﻪ ﻛﻪﻟﺴﻪ، ﭼﻮﻗﯘﻡ ﺑﯩﺰﻧﯩﯔ ﺋﯚﻳﮕﻪ ﻛﯧﻠﯩﭗ ﻗﻮﻧﯘﭖ، ﻣﻪﻥ ﺑﯩﻠﻪﻥ ﭘﺎﺭﺍﯕﻠﯩﺸﯩﭗ ﻛﯧﺘﯩﺪﯗ.

2000-ﻳﯩﻠﯩﻨﯩﯔ ﺋﺎﺧﯩﺮﻟﯩﺮﻯ Alex ﻧﻰ ﻣﻪﻥ ﺗﻮﻧﯘﺷﺘﯘﺭﯗﭖ، ﺑﯩﺰﻧﯩﯔ Wawesplitter ﺩﯦﮕﻪﻥ ﺷﯩﺮﻛﻪﺗﻜﻪ ﺋﺎﻟﺪﯗﺭﺩﯗﻡ. ﺋﯘﺯﯗﻥ ﺋﯚﺗﻤﻪﻱ ﺋﯩﻜﻜﯩﻠﯩﻤﯩﺰ ﺷﯩﺮﻛﻪﺗﻨﯩﯔ ﺋﯩﻨﮋﯨﻨﯩﺮﻟﯩﻖ ﺑﯚﻟﯜﻣﯩﺪﯨﻜﻰ ﺑﺎﺷﻘﺎ-ﺑﺎﺷﻘﺎ ﮔﯘﺭﯗﭘﭙﯩﻼﺭﻏﺎ ﺑﺎﺷﻠﯩﻖ ﺑﻮﻟﺪﯗﻕ. ﺋﯘ ﺋﯚﺯ ﺧﯩﺰﻣﯩﺘﯩﺪﯨﻦ ﺑﺎﺷﻘﺎ، ﻣﻪﻥ ﻗﯩﻠﯩﯟﺍﺗﻘﺎﻥ ﭘﺮﻭﺟﻪﻛﺘﻨﯩﯔ ﺑﯩﺮ ﻗﯩﺴﯩﻢ ﻣﯧﺨﺎﻳﻨﯩﻜﻠﯩﺮﯨﻨﻰ ﻻﻳﯩﻬﯩﻠﻪﺷﻜﻪ ﻳﺎﺭﺩﻩﻣﻠﯩﺸﯩﺪﯨﻐﺎﻥ ﺑﻮﻟﺪﻯ. ﺋﯘ ﻣﻪﻥ ﺋﯜﭼﯜﻥ ﺋﺎﺟﺎﻳﯩﭗ ﺟﺎﻥ ﻛﯚﻳﺪﯛﺭﯛﭖ ﺋﯩﺸﻠﻪﭖ ﺑﻪﺭﺩﻯ. ﺑﯩﺮ ﺟﯩﺪﺩﯨﻲ ﯞﻩﺯﯨﭙﯩﻨﯩﯔ ﻫﯚﺩﺩﯨﺴﯩﺪﯨﻦ ﭼﯩﻘﯩﺶ ﺋﯜﭼﯜﻥ، 2-3 ﻫﻪﭘﺘﻪ ﻫﻪﺭ ﻛﯜﻧﻰ 12 ﺳﺎﺋﻪﺗﺘﯩﻦ ﺋﺎﺭﺗﯘﻕ ﺋﯩﺸﻠﯩﺪﻯ. ﻟﯧﻜﯩﻦ، ﺑﯩﺮ ﻣﻪﺯﮔﯩﻞ ﺋﯚﺗﻜﻪﻧﺪﯨﻦ ﻛﯧﻴﯩﻦ ﺋﺎﻣﯧﺮﯨﻜﯩﻨﯩﯔ ﻧﯘﺭﻟﯘﻕ ﺗﺎﻻ ﺧﻪﯞﻩﺭﻟﯩﺸﯩﺶ ﺳﺎﻫﻪﺳﯩﺪﯨﻜﻰ ﺋﯩﻘﺘﯩﺴﺎﺩﯨﺪﺍ ﺯﻭﺭ ﭼﯧﻜﯩﻨﯩﺶ ﻳﯜﺯ ﺑﻪﺭﺩﻯ. Alex ﺑﯩﺰﻧﯩﯔ ﺷﯩﺮﻛﻪﺗﺘﻪ ﭘﻪﻗﻪﺕ 9 ﺋﺎﻱ ﺋﯩﺸﻠﯩﮕﻪﻧﺪﯨﻦ ﻛﯧﻴﯩﻦ، ﺷﯩﺮﻛﻪﺗﺘﻪ ﺑﯩﺮ ﭼﻮﯓ ﺧﯩﺰﻣﻪﺗﺘﯩﻦ ﺑﻮﺷﯩﺘﯩﺶ ﺑﻮﻟﯘﭖ، ﺷﯘ ﻗﯧﺘﯩﻢ ﺋﯘﻧﯩﻤﯘ ﺋﯩﺸﺘﯩﻦ ﺑﻮﺷﯩﺘﯩﯟﻩﺗﺘﻰ. ﺷﯘﻧﯩﯖﺪﯨﻦ ﻛﯧﻴﯩﻦ ﺋﯘ ﮔﯧﺮﻣﺎﻧﯩﻴﻪﻧﯩﯔ  Lambda-Fizik ﺩﯦﮕﻪﻥ ﭼﻮﯓ ﻻﺯﯦﺮ ﺷﯩﺮﻛﯩﺘﯩﻨﯩﯔ ﻓﻠﻮﺭﯨﺪﺍﺩﯨﻜﻰ ﺗﻪﺗﻘﯩﻘﺎﺕ ﻣﻪﺭﻛﯩﺰﯨﺪﯨﻦ ﺋﯩﺶ ﺗﯧﭙﯩﭗ، ﺷﯘ ﻳﻪﺭﮔﻪ ﻛﯚﭼﯜﭖ ﻛﻪﺗﺘﻰ. ﺋﯘﻧﯩﯔ ﺋﯘ ﺷﯩﺮﻛﻪﺗﺘﯩﻜﻰ ﺑﺎﺷﻠﯩﻘﻰ ﺑﯩﺮ ﺋﯚﺯﯨﺪﯨﻦ 15 ﻳﺎﺵ ﻛﯩﭽﯩﻚ ﮔﯧﺮﻣﺎﻧﻠﯩﻖ ﺑﻮﻟﯘﭖ، ﺋﯘ ﮔﯧﺮﻣﺎﻧﻠﯩﻖ Alex ﻧﻰ  ﺗﺎﺯﺍ ﺑﻮﺯﻩﻙ ﻗﯩﻠﯩﭙﺘﯘ. ﺑﯩﺮ ﻛﯜﻧﻰ ﻣﻪﻥ Alex ﺑﯩﻠﻪﻥ ﺗﯧﻠﯧﻔﻮﻧﺪﺍ ﺳﯚﺯﻟﻪﺷﺴﻪﻡ، ﺋﯘ ﻣﺎﯕﺎ: "ﺋﻪﺭﻛﯩﻦ، ﺋﻪﻳﻨﻰ ﯞﺍﻗﯩﺘﺘﺎ ﻣﻪﻥ ﺳﺎﯕﺎ ﻗﺎﻧﺪﺍﻕ ﻣﯘﺋﺎﻣﯩﻠﻪ ﻗﯩﻠﻐﺎﻥ ﺑﻮﻟﺴﺎﻡ، ﻣﯧﻨﯩﯔ ﺑﺎﺷﻠﯩﻘﯩﻢ ﻫﺎﺯﯨﺮ ﻣﺎﯕﺎ ﺷﯘﻧﺪﺍﻕ ﻣﯘﺋﺎﻣﯩﻠﻪ ﻗﯩﻠﯩﯟﺍﺗﯩﺪﯗ. ﺑﯘﻧﯩﯖﻐﺎ ﻫﻪﺭ ﻛﯜﻧﻰ ﺋﺎﺯﺍﺑﻠﯩﻨﯩﯟﺍﺗﯩﻤﻪﻥ. ﻟﯧﻜﯩﻦ، ﻫﻪﺭ ﻗﯧﺘﯩﻢ ﻣﻪﻥ ﺋﯘﻧﯩﯔ ﺋﻪﺳﻜﻰ ﻣﯘﺋﺎﻣﯩﻠﯩﺴﯩﮕﻪ ﺋﯘﭼﺮﺍﭖ، ﻛﯚﯕﻠﯜﻡ ﻳﯧﺮﯨﻢ ﺑﻮﻟﻐﺎﻧﺪﺍ، ﻣﻪﻥ ﺳﯧﻨﻰ ﺋﻮﻳﻼﻳﻤﻪﻥ. ﺷﯘﻧﯩﯔ ﺑﯩﻠﻪﻥ ﻣﺎﯕﺎ ﺑﺎﺷﻘﯩﺪﯨﻦ ﻛﯜﭺ-ﻗﯘﯞﯞﻩﺕ ﻛﯩﺮﯨﺪﯗ. ﺋﻪﺭﻛﯩﻦ ﻗﯩﻼﻟﯩﻐﺎﻧﻨﻰ ﻣﻪﻧﻤﯘ ﻗﯩﻼﻻﻳﻤﻪﻥ"، ﺩﻩﭖ ﺋﯚﺯﯛﻣﮕﻪ ﺋﯩﻠﻬﺎﻡ ﺑﯧﺮﯨﯟﺍﺗﯩﻤﻪﻥ. ﻫﺎﺯﯨﺮ ﺳﻪﻥ ﻣﯧﻨﯩﯔ ﺋﯚﮔﯩﻨﯩﺶ ﺋﯜﻟﮕﻪﻡ ﺑﻮﻟﯘﭖ ﻗﺎﻟﺪﯨﯔ. ﺑﺎﺷﻘﯩﻼﺭ ﺑﯩﻠﻪﻥ ﺑﻮﻟﻐﺎﻥ ﻣﯘﻧﺎﺳﯩﯟﻩﺗﺘﯩﻼ ﺋﻪﻣﻪﺱ، ﻳﻪﻧﻪ ﺑﺎﺷﻘﺎ ﻧﯘﺭﻏﯘﻥ ﺋﯩﺸﻼﺭﺩﺍ ﻣﻪﻥ ﺳﯧﻨﻰ ﺋﯜﻟﮕﻪ ﻗﯩﻠﯩﭗ ﺗﯩﺮﯨﺸﯩﯟﺍﺗﯩﻤﻪﻥ. ﺑﯘ ﻣﯧﻨﯩﯔ ﭼﯩﻦ ﻛﯚﯕﻠﯜﻣﺪﯨﻦ ﭼﯩﻘﻘﺎﻥ ﮔﻪﭖ"، ﺩﯦﺪﻯ.
  ﺋﺎﻣﯧﺮﯨﻜﯩﺪﺍ ﻫﻪﺭ ﻗﯧﺘﯩﻢ ﺑﯩﺮ ﻳﯧﯖﻰ ﺧﯩﺰﻣﻪﺗﻜﻪ ﻛﯩﺮﯨﺸﺘﻪ، ﺳﯩﺰ ﺋﺎﻟﺪﻯ ﺑﯩﻠﻪﻥ ﺋﯘ ﺷﯩﺮﻛﻪﺗﻜﻪ ﺋﯩﻠﺘﯩﻤﺎﺱ ﻗﯩﻠﯩﺴﯩﺰ. ﺋﯘ ﺷﯩﺮﻛﻪﺕ ﺳﯩﺰﻧﻰ ﺑﯩﺮ ﺋﺎﺯ ﻣﯘﯞﺍﭘﯩﻖ ﻛﯚﺭﺳﻪ، ﺋﺎﻟﺪﻯ ﺑﯩﻠﻪﻥ ﺳﯩﺰﻧﻰ ﺷﯩﺮﻛﻪﺗﻜﻪ ﭼﺎﻗﯩﺮﺗﯩﭗ، ﺩﻭﻛﺘﻮﺭﻟﯘﻕ ﺋﯘﻧﯟﺍﻧﻰ ﺑﺎﺭ ﻛﺎﻧﺪﯨﺪﺍﺗﻼﺭ ﺑﯩﻠﻪﻥ ﺷﯩﺮﻛﻪﺗﻨﯩﯔ ﻫﻪﻣﻤﻪ ﺑﺎﺷﻠﯩﻘﻠﯩﺮﻯ ﺑﯩﺮ-ﺑﯩﺮﻟﻪﭖ ﻛﯚﺭﯛﺷﯜﭖ ﭼﯩﻘﯩﺪﯗ. ﺑﻪﺯﯨﺪﻩ ﺳﯩﺰﺩﯨﻦ ﺋﯩﻤﺘﯩﻬﺎﻥ ﺋﺎﻟﯩﺪﯗ. ﺑﻪﺯﯨﺪﻩ ﺳﯩﺰﻧﻰ ﺑﯩﺮ ﮔﯘﺭﯗﭘﭙﺎ ﺋﺎﺩﻩﻣﻨﯩﯔ ﺋﺎﻟﺪﯨﺪﺍ ﺋﯚﺯﯨﯖﯩﺰﻧﯩﯔ ﺑﯘﺭﯗﻥ ﻗﯩﻠﻐﺎﻥ ﺋﯩﺸﻠﯩﺮﯨﯖﯩﺰ ﺗﻮﻏﺮﯨﺴﯩﺪﺍ ﺩﻭﻛﻼﺕ ﺑﯧﺮﯨﺸﻜﻪ ﺋﻮﺭﯗﻧﻼﺷﺘﯘﺭﯨﺪﯗ. ﺑﯘ ﺗﯜﮔﯩﮕﻪﻧﺪﯨﻦ ﻛﯧﻴﯩﻦ، ﺋﻪﮔﻪﺭ ﺳﯩﺰ ﺋﯘﻻﺭﻏﺎ ﻳﺎﺭﯨﺴﯩﯖﯩﺰ، ﺋﯘﻻﺭ ﺳﯩﺰﺩﯨﻦ 4 ﮔﯘﯞﺍﻫﭽﻰ ﺋﺎﺩﻩﻡ (ﺋﯩﻨﮕﻠﯩﺰﭼﻪ "Professional References" ﺩﻩﭖ ﺋﺎﺗﯩﻠﯩﺪﯗ) ﻧﯩﯔ ﺗﯩﺰﯨﻤﯩﻨﻰ ﺋﯧﻠﯩﭗ، ﺋﯘﻻﺭ ﺑﯩﻠﻪﻥ ﺗﯧﻠﯧﻔﻮﻧﺪﺍ ﺑﯩﺮ-ﺑﯩﺮﻟﻪﭖ ﻛﯚﺭﯛﺷﯜﭖ، ﺳﯩﺰ ﺗﻮﻏﺮﯨﻠﯩﻖ ﺗﯧﺨﯩﻤﯘ ﻛﻪﯓ ﺩﺍﺋﯩﺮﯨﺪﻩ ﺋﻪﻫﯟﺍﻝ ﺋﯩﮕﯩﻠﻪﻳﺪﯗ. ﻫﻪﻣﺪﻩ ﺳﯩﺰﻧﯩﯔ ﺋﯘﻻﺭﻏﺎ ﺋﯧﻴﺘﻘﺎﻧﻠﯩﺮﯨﯖﯩﺰﻧﯩﯔ ﺭﺍﺳﺖ-ﻳﺎﻟﻐﺎﻧﻠﯩﻘﯩﻨﻰ ﺋﯧﻨﯩﻘﻼﻳﺪﯗ. ﻫﺎﺯﯨﺮ ﻣﯧﻨﯩﯔ ﺗﯩﺰﯨﻤﯩﻤﺪﺍ ﻣﻪﻥ ﺑﯩﻠﻪﻥ ﺑﯘﺭﯗﻥ ﺑﯩﺮﮔﻪ ﺋﯩﺸﻠﻪﭖ ﺑﺎﻗﻘﺎﻥ ﭘﺮﻭﻓﯧﺴﺴﻮﺭ، ﺋﯩﻨﮋﯨﻨﯩﺮ ﯞﻩ ﺷﯩﺮﻛﻪﺗﻠﻪﺭﻧﯩﯔ ﭼﻮﯓ ﺑﺎﺷﻠﯩﻘﻠﯩﺮﯨﺪﯨﻦ، ﻣﺎﯕﺎ ﮔﯘﯞﺍﻫﭽﻰ ﺑﻮﻟﯘﭖ ﺑﯧﺮﯨﺸﻨﻰ ﺧﺎﻻﻳﺪﯨﻐﺎﻧﻠﯩﻘﯩﻨﻰ ﺑﯩﻠﺪﯛﺭﮔﻪﻧﻠﻪﺭﺩﯨﻦ 20 ﮔﻪ ﻳﯧﻘﯩﻦ ﺋﺎﺩﻩﻡ ﺑﺎﺭ. ﺋﯚﺗﻜﻪﻥ ﻳﯩﻞ ﺟﭙﻞ ﮔﻪ ﺧﯩﺰﻣﻪﺗﻜﻪ ﻛﯩﺮﮔﻪﻧﺪﻩ، ﺗﯚﯞﻩﻧﺪﯨﻜﻰ 4 ﺋﺎﺩﻩﻡ ﮔﯘﯞﺍﻫﭽﻰ ﺑﻮﻟﯘﭖ ﺑﻪﺭﺩﻯ:
  1) ) ﻣﯧﻨﯩﯔ ﺩﻭﻛﺘﻮﺭﻟﯘﻕ ﺋﯘﺳﺘﺎﺯﯨﻢ، ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﻰ ﺋﯧﻠﯧﻜﺘﺮ ﯞﻩ ﻛﻮﻣﭙﻴﯘﺗﯧﺮ ﺋﯩﻨﮋﯨﻨﯩﺮﻟﯩﻘﻰ ﻓﺎﻛﯘﻟﺘﯧﺘﯩﻨﯩﯔ ﻣﯘﺋﺎﯞﯨﻦ ﻣﯘﺩﯨﺮﻯ. ﺋﯚﺯﻯ ﺋﺎﻓﺮﯨﻘﯩﻠﯩﻖ ﺋﺎﻕ ﺗﻪﻧﻠﯩﻚ ﺑﻮﻟﯘﭖ، ﻳﯧﺸﻰ ﻣﻪﻥ ﺑﯩﻠﻪﻥ ﺗﻪﯓ، ﺑﺎﻟﯩﻠﯩﺮﻯ ﻣﯧﻨﯩﯖﻜﯩﺪﯨﻦ ﻛﯩﭽﯩﻚ. ﺋﻪﻣﻤﺎ، ﺋﯘ ﻛﯩﺸﻰ ﺋﯜﺯﯛﻟﺪﯛﺭﻣﻪﻱ ﺋﻮﻗﯘﻏﺎﻥ ﺑﻮﻟﻐﺎﭼﻘﺎ، ﻣﻪﻧﺪﯨﻦ 10 ﻳﯩﻞ ﺑﯘﺭﯗﻥ ﮔﻪﺋﻮﺭﮔﯩﺌﺎ ﺗﯧﺨﻨﯩﻜﯩﻠﯩﻖ ﺋﯩﻨﺴﺘﯩﺘﯘﺗﯩﺪﺍ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻰ ﺋﯧﻠﯩﭗ، ﭘﺮﻭﻓﯧﺴﺴﻮﺭ ﺑﻮﻟﻐﺎﻥ. ﻣﻪﻥ ﺋﯧﻠﯩﭗ ﺑﺎﺭﻏﺎﻥ ﺗﻪﺗﻘﯩﻘﺎﺗﯩﻤﻨﯩﯔ ﭘﻪﻗﻪﺕ ﻳﯧﺮﯨﻤﻰ ﺑﯩﻠﻪﻥ ﺩﻭﻛﺘﻮﺭﻟﯘﻕ ﺩﯨﺴﺴﯧﺮﺗﺎﺗﺴﯩﻴﻪﺳﻰ ﻳﯧﺰﯨﭗ، 1995-ﻳﯩﻠﻰ 15 ﺩﯨﻦ ﺋﺎﺭﺗﯘﻕ ﺩﻭﻛﺘﻮﺭﻟﯘﻗﻨﻰ ﺋﺎﻟﻐﺎﻧﻼﺭ ﺑﯩﻠﻪﻥ ﺭﯨﻘﺎﺑﻪﺗﻠﯩﺸﯩﭗ، ﻓﺎﻛﯘﻟﺘﯧﺘﻨﯩﯔ "ﺋﻪﯓ ﺋﺎﻟﯩﻲ ﺩﻭﻛﺘﻮﺭﻟﯘﻕ ﺩﯨﺴﺴﯧﺮﺗﺎﺗﺴﯩﻴﻪﺳﻰ" ﺩﯦﮕﻪﻥ ﻣﯘﻛﺎﭘﺎﺗﯩﻐﺎ ﺋﯧﺮﯨﺸﯩﭗ، ﺑﯘ ﻛﯩﺸﯩﮕﻪ ﭼﻮﯓ ﺷﺎﻥ-ﺷﻪﺭﻩﭖ ﻛﻪﻟﺘﯜﺭﮔﻪﻥ ﺋﯩﺪﯨﻢ.
2) ) ﻣﻪﻥ ﻳﯘﻗﯩﺮﯨﺪﺍ ﭼﯜﺷﻪﻧﺪﯛﺭﯛﭖ ﺋﯚﺗﯜﭖ ﻛﻪﺗﻜﻪﻥ Alex..
3) ) ﻣﯧﻨﯩﯔ ﺳﺎﻧﺪﯨﺌﺎ ﺩﯙﻟﻪﺕ ﺗﻪﺟﺮﯨﺒﯩﺨﺎﻧﯩﺴﯩﺪﯨﻜﻰ ﭘﻮﺳﺘﺪﻭﻛﺘﻮﺭﻟﯘﻕ ﺋﯘﺳﺘﺎﺯﯨﻢ، ﻫﺎﺯﯨﺮ ﮔﻪ ﺟﯩﺌﻮﺭﺟﯩﻴﺎ ﺗﯧﺨﻨﯩﻜﺎ ﺋﯩﻨﺴﺘﯩﺘﯘﺗﻰ (Georgia institute of technology) ﻓﯩﺰﯨﻜﺎ ﻓﺎﻛﯘﻟﺘﯧﺘﯩﻨﯩﯔ ﻣﯘﺩﯨﺮﻯ. ﺋﯘ ﻛﯩﺸﻰ ﺩﻭﻛﺘﻮﺭﻟﯘﻗﻨﻰ ﺳﺘﺎﻧﻔﻮﺭﺩﺗﯩﻦ ﺋﺎﻟﻐﺎﻥ ﺑﻮﻟﯘﭖ، ﺩﻩﺭﯨﺠﯩﺪﯨﻦ ﺗﺎﺷﻘﯩﺮﻯ ﻗﯩﺴﻘﺎ ﺋﻮﭘﺘﯩﻜﯩﻠﯩﻖ ﭘﯘﻟﺴﻨﻰ ﺋﯚﻟﭽﻪﺵ ﺟﻪﻫﻪﺗﺘﻪ ﺑﯩﺮ ﻳﯧﯖﻰ ﺋﯘﺳﯘﻟﻨﻰ ﻛﻪﺷﭗ ﻗﯩﻠﯩﭗ، ﭘﯜﺗﯜﻥ ﺩﯗﻧﻴﺎﻏﺎ ﺗﻮﻧﯘﻟﻐﺎﻥ. ﺋﺎﻣﯧﺮﯨﻜﯩﺪﺍ ﺋﻪﯓ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺗﻪﺗﻘﯩﻘﺎﺗﻼﺭﻧﻰ ﺋﯧﻠﯩﭗ ﺑﺎﺭﯨﺪﯨﻐﺎﻥ ﺑﯩﺮ ﻗﺎﻧﭽﻪ ﻗﺎﺗﻼﻡ ﺋﻮﺭﯗﻧﻼﺭ ﺑﺎﺭ. ﺩﯙﻟﻪﺕ ﺗﻪﺟﺮﯨﺒﯩﺨﺎﻧﯩﺴﻰ ﺷﯘﻻﺭﻧﯩﯔ ﺑﯩﺮﻯ. 1995-ﻳﯩﻠﻰ ﻣﻪﻥ ﺩﻭﻛﺘﻮﺭﻟﯘﻗﻨﻰ ﺗﯜﮔﻪﺗﻜﻪﻧﺪﯨﻦ ﻛﯧﻴﯩﻦ، ﻣﯧﻨﻰ ﺳﺎﻧﺪﯨﺌﺎ ﺩﯙﻟﻪﺕ ﺗﻪﺟﺮﯨﺒﯩﺨﺎﻧﯩﺴﻰ ﭘﻮﺳﺘﺪﻭﻛﺘﻮﺭﻟﯘﻗﻘﺎ ﻗﻮﺑﯘﻝ ﻗﯩﻠﺪﻯ. ﻟﯧﻜﯩﻦ، ﻣﻪﻥ ﺋﯘ ﭼﺎﻏﺪﺍ ﺟﯘﯕﮕﻮ ﮔﯩﺮﺍﺟﺪﺍﻧﻰ ﺑﻮﻟﻐﺎﭼﻘﺎ، ﻣﯧﻨﯩﯔ ﺑﯘ ﺗﻪﺟﺮﯨﺒﯩﺨﺎﻧﯩﻨﯩﯔ ﺋﯩﭽﯩﮕﻪ ﻛﯩﺮﯨﭗ ﺋﯩﺸﻠﯩﺸﯩﻤﮕﻪ ﻳﻮﻝ ﻗﻮﻳﯘﻟﻤﯩﺪﻯ (ﺟﯘﯕﮕﻮ ﮔﯩﺮﺍﺟﺪﺍﻧﻠﯩﺮﻯ ﺑﯘ ﺗﻪﺟﺮﯨﺒﯩﺨﺎﻧﯩﺪﯨﻦ ﭼﻪﻛﻠﻪﻧﮕﻪﻥ ﺋﯩﻜﻪﻥ). ﺷﯘﻧﯩﯔ ﺑﯩﻠﻪﻥ، ﺋﯘﻻﺭ ﻣﯧﻨﯩﯔ ﻣﺎﺋﺎﺷﯩﻤﻨﻰ ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﻰ ﺋﺎﺭﻗﯩﻠﯩﻖ ﺑﻪﺭﺩﻯ. ﻣﻪﻥ ﺷﯘ ﺋﺎﻟﯩﻲ ﻣﻪﻛﺘﻪﭘﺘﻪ ﺗﯘﺭﯗﭖ ﺋﯘﻻﺭﻧﯩﯔ ﺗﻪﺗﻘﯩﻘﺎﺗﯩﻨﻰ ﻗﯩﻠﺪﯨﻢ. ﻣﻪﻥ ﺷﯘ ﭼﺎﻏﺪﺍ ﻻﻳﯩﻬﯩﻠﯩﮕﻪﻥ ﯞﻩ CVI ﻻﺯﯦﺮ ﺷﯩﺮﻛﯩﺘﯩﮕﻪ ﻛﯩﺮﮔﻪﻧﺪﯨﻦ ﻛﯧﻴﯩﻦ ﻳﺎﺳﺎﭖ ﭼﯩﻘﻘﺎﻥ ﺑﯩﺮ ﻻﺯﯦﺮ ﺳﯩﺴﺘﯧﻤﯩﺴﻰ ﻫﺎﺯﯨﺮ ﺋﺎﺳﻤﺎﻧﻨﯩﯔ ﻳﯘﻗﯩﺮﻯ ﻗﺎﺗﻠﯩﻤﯩﺪﯨﻜﻰ ﺋﻮﺯﯗﻥ ﻗﻪﯞﯨﺘﯩﻨﻰ ﻳﻪﺭ ﻳﯜﺯﯨﺪﻩ ﺗﯘﺭﯗﭖ ﻛﯚﺯﯨﺘﯩﺪﯨﻐﺎﻥ ﻟﯩﺪﺍﺭ ﺋﯜﺳﻜﯩﻨﯩﺴﯩﮕﻪ ﺋﯩﺸﻠﯩﺘﯩﯟﺍﺗﯩﺪﯗ.
4) ) ﻣﻪﻥ Wawesplitter ﺩﯦﮕﻪﻥ ﺷﯩﺮﻛﻪﺗﺘﻪ ﺋﯩﺸﻠﯩﮕﻪﻧﺪﯨﻜﻰ ﺷﯩﺮﻛﻪﺗﻨﯩﯔ ﺑﺎﺵ ﺗﯧﺨﻨﯩﻜﺎ ﺋﻮﻓﯩﺴﻮﺭﻯ (Chto)، ﻫﺎﺯﯨﺮ ﺋﯩﻨﺘﯩﻞ ﺷﯩﺮﻛﯩﺘﻰ (ﻳﻪﻧﻰ ﻛﻮﻣﭙﻴﯘﺗﯧﺮﻧﯩﯔ ﭼﭙﯘ ﺳﯩﻨﻰ ﺋﯩﺸﻠﻪﭖ ﭼﯩﻘﯩﺮﯨﺪﯨﻐﺎﻥ ﺷﯩﺮﻛﻪﺕ) ﻧﯩﯔ ﻓﻮﺗﻮﻧﯩﻚ ﮔﯘﺭﯗﭘﭙﯩﺴﯩﻨﯩﯔ ﺑﺎﺵ ﺩﯨﺮﯨﻜﺘﻮﺭﻯ. ﺋﯘ ﻛﯩﺸﻰ ﺩﻭﻛﺘﻮﺭﻟﯘﻗﻨﻰ ﻣﯩﺖ ﺩﯨﻦ ﺋﯧﻠﯩﭗ، ﺑﯘﺭﯗﻥ ﺋﺎﻣﯧﺮﯨﻜﯩﺪﺍ ﺋﻪﯓ ﺩﻩﺳﻠﻪﭖ ﻗﯘﺭﯗﻟﻐﺎﻥ، ﺗﯧﻠﯧﻔﻮﻧﻨﻰ ﺋﯩﺠﺎﺩ ﻗﯩﻠﻐﺎﻥ ﺑﯧﻞ ﺗﻪﺟﺮﯨﺒﯩﺨﺎﻧﯩﺴﯩﻨﯩﯔ ﺑﯩﺮ ﺋﺎﻟﯩﻤﻰ ﺑﻮﻟﯘﭖ ﺋﯩﺸﻠﯩﮕﻪﻥ. ﻫﻪﻣﺪﻩ ﻧﯘﺭﻟﯘﻕ ﺗﺎﻻﻧﯩﯔ ﺩﻩﺳﻠﻪﭘﺘﻪ ﺗﻪﺭﻩﻗﻘﯩﻲ ﻗﯩﻠﺪﯗﺭﯗﻟﯘﺷﯩﻐﺎ ﺧﯧﻠﻰ ﭼﻮﯓ ﺗﯚﻫﭙﻪ ﻗﻮﺷﻘﺎﻥ ﺋﯩﻜﻪﻥ. ﻣﻪﻥ ﺋﯘ ﻛﯩﺸﻰ ﺑﯩﻠﻪﻥ 3 ﻳﯩﻠﺪﯨﻦ ﺋﺎﺭﺗﯘﻕ ﺑﯩﺮﮔﻪ ﺋﯩﺸﻠﯩﺪﯨﻢ.
  ﻣﻪﻥ ﻳﯧﻘﯩﻨﺪﺍJPL ﻧﯩﯔ ﺑﯩﺮ 3 ﻛﯜﻧﻠﯜﻙ ﺋﯩﻨﮋﯨﻨﯧﺮﻻﺭ ﻛﯘﺭﺳﯩﻐﺎ ﻗﺎﺗﻨﺎﺷﺘﯩﻢ. ﺋﻮﻗﯘﺗﻘﯘﭼﻰ 1-ﺳﺎﺋﻪﺗﻠﯩﻚ ﺩﻩﺭﺳﻨﯩﯔ ﺑﯧﺸﯩﺪﯨﻼ، ﺳﯩﻨﯩﭙﺘﯩﻜﻰ 25 ﺋﻪﺗﺮﺍﭘﯩﺪﯨﻜﻰ ﺋﯩﻨﮋﯨﻨﯩﺮ-ﻣﯘﺗﻪﺧﻪﺳﺴﯩﺴﻠﻪﺭﺩﯨﻦ ﺋﯚﺯﻟﯩﺮﯨﻨﯩﯔ ﻗﺎﻳﺴﻰ ﺋﻮﺗﺘﯘﺭﺍ ﻣﻪﻛﺘﻪﭘﻨﻰ ﭘﯜﺗﺘﯜﺭﮔﻪﻧﻠﯩﻜﯩﻨﻰ ﺳﯩﻨﯩﭙﺘﯩﻜﯩﻠﻪﺭﮔﻪ ﺋﯧﻴﺘﯩﭗ ﺑﯧﺮﯨﺸﯩﻨﻰ ﺗﻪﻟﻪﭖ ﻗﯩﻠﺪﻯ. ﻗﺎﺭﯨﺴﺎﻡ ﺑﯘ ﺳﯩﻨﯩﭙﺘﺎ ﭼﻪﺕ ﺋﻪﻟﺪﯨﻦ ﻛﻪﻟﮕﻪﻧﻠﻪﺭﺩﯨﻦ ﭘﻪﻗﻪﺕ ﻣﻪﻧﻼ ﺋﯩﻜﻪﻧﻤﻪﻥ. ﻣﻪﻥ ﺋﻮﻗﯘﻏﺎﻥ ﺋﻮﺗﺘﯘﺭﺍ ﻣﻪﻛﺘﻪﭖ ﺑﯘ ﻳﻪﺭ ﺷﺎﺭﯨﻨﯩﯔ ﻗﻪﻳﻪﺭﯨﺪﻩ ﺋﯩﻜﻪﻧﻠﯩﻜﯩﻨﻰ ﭼﯜﺷﻪﻧﺪﯛﺭﯛﺵ ﺋﯜﭼﯜﻥ ﻣﺎﯕﺎ ﺑﺎﺷﻘﯩﻼﺭﺩﯨﻦ 4-5 ﺟﯜﻣﻠﻪ ﺳﯚﺯﻧﻰ ﺋﺎﺭﺗﯘﻕ ﻗﯩﻠﯩﺸﻘﺎ ﺗﻮﻏﺮﺍ ﻛﻪﻟﺪﻯ. ﻟﯧﻜﯩﻦ، ﻣﻪﻥ ﺋﯩﻨﺘﺎﻳﯩﻦ ﻫﺎﻳﺎﺟﺎﻧﻠﯩﻨﯩﭗ ﺗﯘﺭﯗﭖ ﺳﯚﺯﻟﯩﺪﯨﻢ. ﻣﻪﻥ CVI ﻻﺯﯦﺮ ﺷﯩﺮﻛﯩﺘﯩﺪﻩ ﺋﯩﺸﻠﻪﯞﺍﺗﻘﺎﻧﺪﺍ، ﺑﯩﺮ ﻗﯧﺘﯩﻢ ﮔﯧﺰﯨﺘﻜﻪ ﺋﯧﻼﻥ ﭼﯩﻘﯩﺮﯨﭗ، ﺋﯩﻠﺘﯩﻤﺎﺱ ﻗﯩﻠﻐﯘﭼﻰ 80 ﻛﯩﺸﯩﻨﯩﯔ ﺋﯩﭽﯩﺪﯨﻦ 3 ﻧﻰ ﺗﺎﻟﻼﭖ ﺑﯩﺰﻧﯩﯔ ﺷﯩﺮﻛﻪﺗﻜﻪ ﺧﯩﺰﻣﻪﺗﻜﻪ ﺋﺎﻟﺪﯨﻢ. ﺋﯘﻻﺭﻧﯩﯔ ﻗﯩﻠﯩﺪﯨﻐﺎﻥ ﺋﯩﺸﻰ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺑﻮﺷﻠﯘﻕ ﭼﻪﻣﺒﻪﺭﯨﺪﻩ ﻻﺯﯦﺮ ﺯﺍﭘﭽﺎﺳﻠﯩﺮﯨﻨﻰ ﺋﯩﺸﻠﻪﭖ ﭼﯩﻘﯩﺮﯨﺶ ﺋﯩﺪﻯ. ﺑﯘﻧﻰ ﺋﯩﺸﻠﻪﻳﺪﯨﻐﺎﻥ ﻣﺎﺷﯩﻨﯩﻨﻰ ﺑﺎﺷﻘﯘﺭﯗﺵ ﺋﯩﻨﺘﺎﻳﯩﻦ ﻗﯩﻴﯩﻦ ﺑﻮﻟﯘﭖ، 2 ﻗﻮﻝ ﺑﯩﻠﻪﻥ ﻛﯚﺯﻧﻰ ﺗﻪﯓ ﺋﯩﺸﻘﺎ ﺳﺎﻟﻤﯩﺴﺎ، ﻳﯜﻛﺴﻪﻙ ﺩﻩﺭﯨﺠﯩﺪﻩ ﺯﯦﻬﻨﯩﻨﻰ ﻣﻪﺭﻛﻪﺯﻟﻪﺷﺘﯜﺭﻣﯩﺴﻪ ﺑﻮﻟﻤﺎﻳﺘﺘﻰ. ﺋﻪﮔﻪﺭ ﺑﯩﺮﻩﺭ ﺧﺎﺗﺎﻟﯩﻖ ﺑﻮﻟﯘﭖ ﻗﺎﻟﺴﺎ، 10 ﻣﯩﯔ ﺩﻭﻟﻼﺭﻏﯩﭽﻪ ﺑﻮﻟﻐﺎﻥ ﺯﺍﭘﭽﺎﺱ ﺑﯘﺯﯗﻟﯘﭖ ﻛﯧﺘﻪﺗﺘﻰ. ﺋﯘﻻﺭﻏﺎ ﺳﺎﺋﯩﺘﯩﮕﻪ 17 ﺩﻭﻟﻼﺭ ﺋﻪﺗﺮﺍﭘﯩﺪﺍ ﻣﺎﺋﺎﺵ ﺑﯧﺮﯨﻠﻪﺗﺘﻰ. ﻫﻪﻣﻤﯩﺴﻰ ﺋﺎﻟﯩﻲ ﻣﻪﻛﺘﻪﭘﺘﻪ ﺑﺎﻛﻼﯞﯗﺭ ﺋﯘﻧﯟﺍﻧﻰ ﺋﺎﻟﻐﺎﻧﻼﺭ ﺑﻮﻟﯘﭖ، ﺋﯩﻜﻜﯩﺴﻰ ﻫﯩﻨﺪﯨﺴﺘﺎﻧﻠﯩﻖ، ﻗﺎﻟﻐﺎﻥ ﺑﯩﺮﺳﻰ ﯞﯨﺌﯧﺘﻨﺎﻣﻠﯩﻖ ﺋﯩﺪﻯ. ﻣﻪﻥ ﺋﯚﺯﯛﻣﻨﯩﯔ ﭘﯜﺗﯜﻥ ﯞﯗﺟﯘﺩﻯ ﺑﯩﻠﻪﻥ ﺋﯘﻻﺭﻏﺎ 2 ﻫﻪﭘﺘﻪ ﺑﯘ ﻣﺎﺷﯩﻨﯩﻨﻰ ﺑﺎﺷﻘﯘﺭﯗﺷﻨﻰ ﺋﯚﮔﻪﺗﻜﻪﻥ ﺑﻮﻟﺴﺎﻣﻤﯘ، ﺋﯘﻻﺭﺩﯨﻦ ﺋﯩﻜﻜﯩﺴﻰ ﺯﺍﺩﯨﻼ ﺋﯚﮔﯩﻨﻪﻟﻤﯩﺪﻯ. ﺷﯘﻧﯩﯔ ﺑﯩﻠﻪﻥ 2 ﻫﻪﭘﺘﯩﺪﯨﻦ ﻛﯧﻴﯩﻦ ﺋﯘ ﺋﯩﻜﻜﯩﺴﯩﻨﻰ ﺋﯩﺸﺘﯩﻦ ﺑﻮﺷﯩﺘﯩﺸﻘﺎ ﻣﻪﺟﺒﯘﺭﯨﻲ ﺑﻮﻟﺪﯗﻡ. ﺋﻪﺗﯩﺴﻰ ﺋﯩﺸﺘﯩﻦ ﺑﻮﺷﯩﺘﯩﺪﯨﻐﺎﻥ ﻛﯧﭽﯩﺴﻰ ﺋﺎﺳﺎﺳﻪﻥ ﺋﯘﺧﻠﯩﻤﯩﺪﯨﻢ. ﺑﯘﺭﯗﻧﻘﻰ ﺳﻪﺭﮔﯜﺯﻩﺷﺘﻠﯩﺮﯨﻢ ﻛﯚﺯ ﺋﺎﻟﺪﯨﻤﻐﺎ ﻛﯧﻠﯩﭗ، ﺋﯘﻻﺭﻏﺎ ﺋﯩﭽﯩﻢ ﺋﺎﻏﺮﯨﭗ، ﺋﯩﻨﺘﺎﻳﯩﻦ ﺋﺎﺯﺍﺑﻼﻧﺪﯨﻢ. ﺋﯘﻻﺭﻧﯩﯖﻤﯘ ﺋﺎﺋﯩﻠﯩﺴﻰ، ﺑﺎﻟﯩﻠﯩﺮﻯ ﺑﺎﺭ ﺋﻪﻣﻪﺳﻤﯘ؟ ﺋﯘﻻﺭﻣﯘ ﺟﺎﻥ ﺑﺎﻗﻤﯩﺴﺎ ﺑﻮﻟﻤﺎﻳﺪﯗ ﺋﻪﻣﻪﺳﻤﯘ؟ ﺋﯘﻻﺭﻧﻰ ﺋﯩﺸﺨﺎﻧﺎﻣﻐﺎ ﺑﯩﺮﺩﯨﻦ-ﺑﯩﺮﺩﯨﻦ ﭼﺎﻗﯩﺮﯨﭗ ﻛﯧﻠﯩﭗ، ﺋﯘﻻﺭﻧﯩﯔ ﺋﯩﺸﺘﯩﻦ ﭼﯩﻘﯩﺮﯨﻠﻐﺎﻧﻠﯩﻘﯩﻨﻰ ﺋﯧﻴﺘﯩﺶ، ﻣﯧﻨﯩﯔ ﺋﯚﻣﺮﯛﻣﺪﯨﻜﻰ ﺋﻪﯓ ﻣﯜﺷﻜﯜﻝ ﺋﯩﺸﻼﺭﻧﯩﯔ ﻳﻪﻧﻪ ﺑﯩﺮﻯ ﺑﻮﻟﺪﻯ.
    ﺩﯗﻧﻴﺎﺩﯨﻜﻰ ﻣﯩﻠﻠﻪﺗﻠﻪﺭﻧﯩﯔ ﻣﻪﺩﻩﻧﯩﻴﯩﺘﻰ، ﺋﯚﺭﭖ-ﺋﺎﺩﯨﺘﻰ، ﺋﻪﻧﺌﻪﻧﯩﺴﻰ، ﻗﯩﻠﯩﻖ-ﻣﯩﺠﻪﺯﻟﯩﺮﻯ ﻗﺎﺗﺎﺭﻟﯩﻘﻼﺭ ﺑﯩﺮ-ﺑﯩﺮﯨﻨﯩﯖﻜﯩﮕﻪ ﺋﻮﺧﺸﺎﭖ ﻛﻪﺗﻤﻪﻳﺪﯗ. ﻟﯧﻜﯩﻦ، ﺋﻪﮔﻪﺭ ﺑﯩﺮ ﺋﺎﺩﻩﻣﺪﻩ ﻣﻪﻥ ﻳﯘﻗﯩﺮﯨﺪﺍ ﺗﯩﺰﻏﺎﻥ ﻛﯩﺸﯩﻠﯩﻚ ﺧﺎﺭﺍﻛﺘﯧﺮ ﺑﻮﻟﺴﺎ، ﻫﻪﻣﺪﻩ ﻫﻪﻣﻤﻪ ﺟﺎﻳﺪﺍ، ﻫﻪﻣﻤﻪ ﯞﺍﻗﯩﺘﺘﺎ ﺋﯚﺯﯨﮕﻪ ﺗﻪﻟﻪﭘﻨﻰ ﻳﯘﻗﯩﺮﻯ ﻗﻮﻳﺴﺎ، ﺋﯘ ﺋﺎﺩﻩﻡ ﺑﯘ ﺩﯗﻧﻴﺎﺩﯨﻜﻰ ﻫﻪﺭ ﻗﺎﻧﺪﺍﻕ ﻣﯩﻠﻠﻪﺗﻨﯩﯔ ﻫﯚﺭﻣﯩﺘﯩﮕﻪ ﺋﯧﺮﯨﺸﻪﻟﻪﻳﺪﯗ. ﺋﯘﻳﻐﯘﺭ ﻣﯩﻠﻠﯩﺘﯩﻨﯩﯔ ﺑﺎﺷﻘﺎ ﻣﯩﻠﻠﻪﺗﻠﻪﺭ ﺋﺎﻟﺪﯨﺪﯨﻜﻰ ﯞﻩ ﺧﻪﻟﻘﺌﺎﺭﺍﺩﯨﻜﻰ ﺋﻮﺑﺮﺍﺯﻯ ﻫﻪﺭ ﺑﯩﺮ ﺋﯘﻳﻐﯘﺭﻧﯩﯔ ﺟﻪﻣﺌﯩﻴﻪﺗﺘﯩﻜﻰ ﺋﯩﭙﺎﺩﯨﺴﻰ، ﺟﻪﻣﺌﯩﻴﻪﺗﻜﻪ ﻗﻮﺷﻘﺎﻥ ﺗﯚﻫﭙﯩﺴﻰ ﺋﺎﺭﻗﯩﻠﯩﻖ ﺑﻪﻟﮕﯩﻠﯩﻨﯩﺪﯗ. ﺋﻪﮔﻪﺭ ﺳﯩﺰ ﺧﯘﺳﯘﺳﻰ ﺋﻪﺧﻼﻕ-ﭘﻪﺯﯨﻠﻪﺕ ﯞﻩ ﺧﯩﺰﻣﻪﺕ ﺋﯩﻘﺘﯩﺪﺍﺭﻯ ﺟﻪﻫﻪﺗﺘﻪ ﺑﺎﺷﻘﯩﻼﺭ ﺑﯩﻠﻪﻥ ﻫﯧﭻ ﺑﻮﻟﻤﯩﻐﺎﻧﺪﺍ ﺗﻪﯕﻠﯩﺸﻪﻟﻤﯩﺴﯩﯖﯩﺰ، ﺑﯘ ﺩﯗﻧﻴﺎﺩﯨﻜﻰ ﻫﻪﺭ ﻗﺎﻧﺪﺍﻕ ﻣﯩﻠﻠﻪﺗﻨﯩﯔ ﺋﺎﺭﯨﺴﯩﻐﺎ ﺑﯧﺮﯨﯔ، ﺳﯩﺰ ﻳﻪﻧﯩﻼ ﺧﺎﺭﻟﯩﻨﯩﺴﯩﺰ. ﻧﻪﺯﻩﺭﮔﻪ ﺋﯧﻠﯩﻨﻤﺎﻳﺴﯩﺰ. ﺋﯘﻳﻐﯘﺭ ﻣﯩﻠﻠﯩﺘﯩﻨﯩﯔ ﻧﺎﺧﺸﺎ-ﺋﯘﺳﺴﯘﻝ-ﭼﺎﻗﭽﺎﻗﻠﯩﺮﻯ ﺑﯩﺰ ﺋﯘﻳﻐﯘﺭﻻﺭ ﺋﯜﭼﯜﻥ ﺋﻪﯓ ﻗﯩﻤﻤﻪﺗﻠﯩﻚ ﺑﻮﻟﻐﺎﻥ، ﺑﯘ ﺩﯗﻧﻴﺎﺩﯨﻜﻰ ﺋﻪﯓ ﺋﯩﻠﻐﺎﺭ ﻣﻪﺩﯨﻨﯩﻴﻪﺗﻠﻪﺭﻧﯩﯔ ﺑﯩﺮﻯ. ﺑﯩﺰ ﺋﯘﻧﻰ ﭘﯜﺗﯜﻥ ﻛﯜﭼﯩﻤﯩﺰ ﺑﯩﻠﻪﻥ ﻗﻮﻏﺪﯨﺸﯩﻤﯩﺰ، ﺋﯘﻧﻰ ﺗﻪﺭﻩﻗﻘﯩﻲ ﻗﯩﻠﺪﯗﺭﯨﺸﯩﻤﯩﺰ ﻛﯧﺮﻩﻙ. ﻟﯧﻜﯩﻦ، ﺑﯩﺰﻧﯩﯔ ﻳﯧﻘﯩﻨﻘﻰ ﺯﺍﻣﺎﻧﺪﯨﻦ ﺑﯘﻳﺎﻧﻘﻰ ﺋﻪﻫﯟﺍﻟﯩﻤﯩﺰ ﺋﯩﺴﭙﺎﺗﻼﭖ ﺗﯘﺭﻏﯩﻨﯩﺪﻩﻙ، ﺑﯩﺰ ﺋﯚﺯﯨﻤﯩﺰﻧﯩﯔ ﻧﺎﺧﺸﺎ-ﺋﯘﺳﯘﻝ-ﭼﺎﻗﭽﺎﻗﻠﯩﺮﻯ ﺋﺎﺭﻗﯩﻠﯩﻖ ﺋﯘﻳﻐﯘﺭﻻﺭﻧﯩﯔ ﺑﺎﺷﻘﺎ ﻣﯩﻠﻠﻪﺕ ﺋﺎﻟﺪﯨﺪﯨﻜﻰ ﯞﻩ ﺩﯗﻧﻴﺎﺩﯨﻜﻰ ﻳﺎﺧﺸﻰ ﺋﻮﺑﺮﺍﺯﯨﻨﻰ ﺗﯩﻜﻠﯩﻴﻪﻟﻤﻪﻳﻤﯩﺰ. ﺑﯘ ﺩﯗﻧﻴﺎ ﺋﯘﻧﺪﺍﻕ ﻣﺎﯕﻤﺎﻳﺪﯗ. ﻣﻪﻥ ﻫﺎﺯﯨﺮﻏﯩﭽﻪ ﺑﯩﺮ ﻳﻪﻫﯘﺩﯨﻴﻨﯩﯔ ﻧﺎﺧﺸﺎ ﺋﯧﻴﺘﻘﯩﻨﯩﻨﻰ ﻳﺎﻛﻰ ﺋﯘﺳﺴﯘﻝ ﺋﻮﻳﻨﯩﻐﯩﻨﯩﻨﻰ ﻛﯚﺭﯛﭖ ﺑﺎﻗﻤﯩﺪﯨﻢ. ﺭﯦﺌﺎﻟﻠﯩﻘﺘﯩﻤﯘ، ﻛﯩﻨﻮﺩﯨﻤﯘ ﻛﯚﺭﯛﭖ ﺑﺎﻗﻤﯩﺪﯨﻢ. ﻳﻪﻫﯘﺩﯨﻴﻼﺭ، ﮔﯧﺮﻣﺎﻧﻠﯩﻘﻼﺭ، ﯞﻩ ﻳﺎﭘﻮﻧﻠﯘﻗﻼﺭ ﺋﺎﻧﭽﻪ ﻛﯜﻟﻤﻪﻳﺪﯗ. ﭼﺎﻗﭽﺎﻗﻨﯩﻤﯘ ﺋﺎﻧﭽﻪ ﺑﯩﻠﻤﻪﻳﺪﯗ. ﻟﯧﻜﯩﻦ، ﻣﻪﻟﯘﻡ ﻣﻪﻧﺎﺩﯨﻦ ﺋﯧﻠﯩﭗ ﺋﯧﻴﺘﻘﺎﻧﺪﺍ ﺋﯘﻻﺭ ﻫﺎﺯﯨﺮ ﺩﯗﻧﻴﺎﻧﻰ ﺳﻮﺭﺍﯞﺍﺗﯩﺪﯗ. ﺩﯗﻧﻴﺎﺩﯨﻜﻰ ﻣﯩﻠﻠﻪﺗﻠﻪﺭ ﭘﯘﺭﺳﻪﺕ ﺋﺎﻟﺪﯨﺪﺍ ﺑﺎﺭﺍﯞﻩﺭ ﺋﻪﻣﻪﺱ. ﺋﯘﻳﻐﯘﺭﻻﺭ ﺋﯜﭼﯜﻥ ﺑﯘ ﺗﯧﺨﯩﻤﯘ ﺷﯘﻧﺪﺍﻕ. ﺑﯘ ﺟﻪﻫﻪﺗﺘﻪ ﺑﯩﺰ ﻛﯜﻧﻠﻪﭖ، ﻳﯩﻠﻼﭖ ﺷﯩﻜﺎﻳﻪﺕ ﻗﯩﻠﺴﺎﻗﻤﯘ ﺑﯩﺰ ﻳﻮﻟﻠﯘﻕ ﺑﻮﻟﯘﺷﯩﻤﯩﺰ ﻣﯘﻣﻜﯩﻦ. ﻟﯧﻜﯩﻦ، ﺋﯘﻧﯩﯔ ﭘﺎﻳﺪﯨﺴﻰ ﻧﯧﻤﻪ؟ ﺋﯘﻧﯩﯔ ﻫﺎﺯﯨﺮﻗﻰ ﺋﻪﻫﯟﺍﻟﻨﻰ ﺋﯚﺯﮔﻪﺭﺗﯩﺸﻜﻪ ﭘﺎﻳﺪﯨﺴﻰ ﺑﺎﺭﻣﯘ؟ ﺋﻪﮔﻪﺭ ﭘﺎﻳﺪﯨﺴﻰ ﺑﻮﻟﻤﯩﺴﺎ، ﺑﯩﺰ ﺋﯚﺯﯨﻤﯩﺰﺩﯨﻦ ﺳﻮﺭﺍﭖ ﺑﺎﻗﻤﯩﺴﺎﻕ ﺑﻮﻟﻤﺎﻳﺪﯗ: ﻣﻪﻥ ﺋﯚﺯﯛﻣﻨﻰ ﻛﻪﻣﺴﯩﺘﯩﺪﯨﻐﺎﻥ ﺑﺎﺷﻘﺎ ﻣﯩﻠﻠﻪﺗﺘﯩﻦ ﺑﻮﻟﻐﺎﻥ ﺧﯩﺰﻣﻪﺗﺪﯨﺸﯩﻢ ﺑﯩﻠﻪﻥ ﺋﻮﺧﺸﺎﺵ ﺩﻩﺭﯨﺠﯩﺪﻩ ﺗﯩﺮﯨﺸﯩﯟﺍﺗﯩﻤﻪﻧﻤﯘ؟ ﻣﻪﻥ ﻫﻪ ﺩﯦﺴﯩﻼ ﺋﯘ ﻳﻪﺭ ﺑﯘ ﻳﻪﺭﻟﻪﺭﺩﻩ ﺋﻮﻟﺘﯘﺭﯗﺵ ﺋﻮﻳﻨﺎﭖ ﻳﯜﺭﮔﻪﻧﺪﻩ، ﺑﺎﺷﻘﺎ ﻣﯩﻠﻠﻪﺗﺘﯩﻦ ﺑﻮﻟﻐﺎﻥ ﺧﯩﺰﻣﻪﺗﺪﺍﺷﻠﯩﺮﯨﻢ ﻧﯧﻤﻪ ﺋﯩﺶ ﻗﯩﻠﯩﯟﺍﺗﯩﺪﯗ؟ ﺋﯘﻳﻐﯘﺭﻻﺭﻧﯩﯔ ﺋﯚﺯ ﺋﻮﺑﺮﺍﺯﯨﻨﻰ ﺋﯚﺯﯨﮕﻪ ﻻﻳﯩﻖ ﺗﻪﺭﯨﻘﯩﺪﻩ ﺗﯩﻜﻠﯩﺸﯩﻨﯩﯔ ﺑﯩﺮﺩﯨﻦ-ﺑﯩﺮ ﻳﻮﻟﻰ، ﻫﻪﺭ ﺧﯩﻞ ﺳﯜﭘﻪﺕ ﯞﻩ ﺋﯩﻘﺘﯩﺪﺍﺭ ﺟﻪﻫﻪﺗﺘﻪ ﻫﯧﭻ ﺑﻮﻟﻤﯩﻐﺎﻧﺪﺍ ﺑﺎﺷﻘﯩﻼﺭ ﺑﯩﻠﻪﻥ ﺗﻪﯕﻠﯩﺸﯩﺶ، ﺋﻪﯓ ﻳﺎﺧﺸﯩﺴﻰ ﺑﺎﺷﻘﯩﻼﺭﻧﻰ ﺑﯧﺴﯩﭗ ﭼﯜﺷﯜﺵ.

ﺑﯩﺰﮔﻪ ﻫﺎﺯﯨﺮﭼﻪ ﺋﯘﻧﯩﯖﺪﯨﻦ ﺑﺎﺷﻘﺎ ﻳﻮﻝ ﻳﻮﻕ.

ﺑﺎﺵ ﺑﻪﺗﻜﻪ ﻗﺎﻳﺘﯩﺶ