6-ﺑﯚﻟﯜﻡ

13-ﺳﯘﺋﺎﻝ: ﭼﻪﺕ ﺋﻪﻟﻠﯩﻜﻠﻪﺭﻧﯩﯔ ﺗﯘﺭﻣﯘﺷﯩﺪﺍ ﻛﯩﺘﺎﺏ ﺋﻮﻗﯘﺵ ﻫﻪﻗﻘﯩﺪﻩ ﻛﯚﺯﻩﺗﻜﻪﻧﻠﯩﺮﯨﯖﯩﺰ ﻗﺎﻳﺴﯩﻼﺭ؟

ﺟﺎﯞﺍﺏ: ﻣﻪﻥ ﺋﺎﻣﯧﺮﯨﻜﯩﻠﯩﻘﻼﺭﻧﯩﯔ ﻛﯩﺘﺎﺏ ﺋﻮﻗﯘﺷﻘﺎ ﺋﺎﺋﯩﺖ ﺋﺎﺩﻩﺗﻠﯩﺮﯨﻨﻰ ﺋﯚﺯﯛﻣﻨﯩﯔ ﺑﯩﯟﺍﺳﯩﺘﻪ ﻛﯚﺭﮔﻪﻧﻠﯩﺮﻯ ﺋﺎﺭﻗﯩﻠﯩﻖ ﺗﻪﺳﯟﯨﺮﻟﻪﭖ ﺑﯧﺮﻩﻱ. ﻣﻪﻥ ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﺩﺍﯞﯨﺲ ﺷﯚﺑﯩﺴﯩﺪﻩ ﺋﻮﻗﯘﯞﺍﺗﻘﺎﻥ ﯞﺍﻗﺘﯩﻤﺪﺍ، ﺑﯩﺰﻧﯩﯔ ﺋﯚﻳﮕﻪ ﺑﺎﺷﻘﺎ ﺑﯩﺮ ﺷﯩﺘﺎﺗﻨﯩﯔ ﻛﯩﭽﯩﻚ ﺑﯩﺮ ﻳﯧﺮﯨﺪﻩ ﺗﯘﺭﯨﺪﯨﻐﺎﻥ، ﺋﯚﺯﻯ ﻣﯘﺳﯘﻟﻤﺎﻥ، ﺋﻪﻣﻤﺎ ﺋﯧﺮﻯ ﺋﺎﻣﯧﺮﯨﻜﯩﻠﯩﻖ ﺑﯩﺮ ﺩﻭﺳﺘﯩﻤﯩﺰ ﺑﯩﺮ ﻗﺎﻧﭽﻪ ﻛﯜﻥ ﺗﺎﻣﺎﺷﺎ ﻗﯩﻠﯩﺶ ﻣﯘﻧﺎﺳﯩﯟﯨﺘﻰ ﺑﯩﻠﻪﻥ ﻛﯧﻠﯩﭗ، ﺑﯩﺰﻧﯩﯔ ﻳﺎﺗﺎﻗﺘﺎ 2 ﺋﺎﺧﺸﺎﻡ ﻗﯘﻧﯘﭖ ﻗﺎﻟﺪﻯ. ﺑﯘ ﺩﻭﺳﺘﯩﻤﯩﺰﻧﯩﯔ ﺋﯧﺮﻯ ﺋﺎﺷﯘ ﺩﻭﺳﺘﯩﻤﯩﺰ ﺑﯩﻠﻪﻥ ﺗﻮﻱ ﻗﯩﻠﯩﺶ ﺋﯜﭼﯜﻥ ﺋﯩﺴﻼﻡ ﺩﯨﻨﯩﻐﺎ ﻛﯩﺮﮔﻪﻧﯩﺪﻯ. ﺋﯘﻻﺭ ﺑﯩﺰﻧﯩﯔ ﺋﯚﻳﮕﻪ ﻛﯧﻠﯩﭗ ﺋﻪﺗﯩﺴﻰ ﺑﺎﺯﺍﺭﻏﺎ ﭼﯩﻘﯩﭗ ﻗﺎﻳﺘﯩﭗ ﻛﻪﻟﮕﻪﻧﺪﻩ، ﺋﯘ ﺋﺎﻣﯧﺮﯨﻜﯩﻠﯩﻘﻨﯩﯔ ﻗﻮﻟﯩﺪﺍ ﺋﯩﺴﻼﻡ ﺩﯨﻨﯩﻐﺎ ﺋﺎﺋﯩﺖ 3-4 ﺋﯩﻨﮕﻠﯩﺰﭼﻪ ﻛﯩﺘﺎﺑﻨﻰ ﻛﯚﺭﺩﯛﻡ. ﺋﯘﻻﺭ ﺗﺎﻣﺎﺷﺎ ﻗﯩﻠﯩﺶ ﺟﻪﺭﻳﺎﻧﯩﺪﺍ، ﻣﻪﺧﺴﯘﺱ ﺑﯩﺮ ﻗﺎﻧﭽﻪ ﻛﯩﺘﺎﺑﺨﺎﻧﯩﻼﺭﻏﺎ ﺑﯧﺮﯨﭗ، ﺋﯩﺴﻼﻡ ﺩﯨﻨﯩﻐﺎ ﺋﺎﺋﯩﺖ ﺋﯚﺯﻟﯩﺮﯨﺪﻩ ﻳﻮﻕ ﻛﯩﺘﺎﺑﻼﺭﻧﯩﯔ ﻫﻪﻣﻤﯩﺴﯩﻨﻰ ﺳﯧﺘﯩﯟﺍﻟﻐﺎﻥ ﺋﯩﻜﻪﻥ. ﻣﻪﻥ ﺑﯘ ﻛﯩﺘﺎﺑﻼﺭﻧﻰ ﯞﺍﺭﺍﻗﻼﭖ ﻛﯚﺭﯛﭖ ﺑﯧﻘﯩﭗ، ﻧﺎﻫﺎﻳﯩﺘﻰ ﺗﻪﺳﯩﺮﻟﻪﻧﺪﯨﻢ، ﻫﻪﻣﺪﻩ ﺋﯩﻨﺘﺎﻳﯩﻦ ﺧﯩﺠﯩﻞ ﺑﻮﻟﺪﯗﻡ. ﺋﯩﭽﯩﻤﺪﻩ، "ﭼﻪﺕ ﺋﻪﻟﺪﻩ ﺗﯘﺭﯗﭖ، ﺋﯚﺯﻟﯩﺮﯨﻨﻰ «ﻣﻪﻥ ﻣﯘﺳﯘﻟﻤﺎﻥ» ﺩﻩﭖ ﻫﯧﺴﺎﺑﻼﭖ ﻳﯜﺭﯛﻳﺪﯨﻐﺎﻥ ﺋﯘﻳﻐﯘﺭﻻﺭ ﺋﯩﭽﯩﺪﻩ ﺋﯚﺯ ﺩﯨﻨﻰ ﺗﻮﻏﺮﯨﺴﯩﺪﺍ ﻣﯘﺷﯘﻧﺪﺍﻕ ﺋﯩﺰﺩﯨﻨﯩﺪﯨﻐﺎﻥ ﺋﺎﺩﻩﻣﻠﻪﺭﺩﯨﻦ ﻗﺎﻧﭽﯩﺴﻰ ﺑﺎﺭ؟" ﺩﻩﭖ ﺋﻮﻳﻠﯩﺪﯨﻢ.

ﻛﯩﺘﺎﺏ ﺋﻮﻗﯘﺵ ﺋﺎﻣﯧﺮﯨﻜﯩﻠﯩﻘﻼﺭﻧﯩﯔ ﻛﯜﻧﺪﯨﻠﯩﻚ ﺗﯘﺭﻣﯘﺷﯩﺪﯨﻜﻰ ﺋﯩﻨﺘﺎﻳﯩﻦ ﻣﯘﻫﯩﻢ ﺗﻪﺭﻛﯩﺒﻠﻪﺭﻧﯩﯔ ﺑﯩﺮﻯ ﺑﻮﻟﯘﭖ، ﻛﯩﺘﺎﺏ ﺋﻮﻗﯘﺵ ﺋﺎﺩﯨﺘﻰ ﺋﯘﻻﺭﻧﯩﯔ ﺑﺎﻟﯩﻠﯩﻖ ﺩﻩﯞﺭﯨﺪﯨﻼ ﺑﺎﺷﻠﯩﻨﯩﺪﯗ. ﻛﺎﻟﯩﻔﻮﺭﻧﯩﻴﻪﺩﯨﻜﻰ ﻫﻪﺭ ﺑﯩﺮ ﻧﺎﻫﯩﻴﯩﺪﻩ 10 ﺩﯨﻦ 30 ﻏﯩﭽﻪ ﺷﻪﻫﻪﺭ ﺑﺎﺭ ﺑﻮﻟﯘﭖ، ﻫﻪﺭ ﺑﯩﺮ ﺷﻪﻫﻪﺭﻧﯩﯔ ﺑﯩﺮﺩﯨﻦ ﻛﯘﺗﯘﭘﺨﺎﻧﯩﺴﻰ ﺑﺎﺭ. ﺳﯩﺰﻧﯩﯔ ﺋﺎﺋﯩﻠﯩﯖﯩﺰﺩﻩ 4 ﺟﺎﻥ ﺋﺎﺩﻩﻡ ﺑﻮﻟﺴﺎ، ﺳﯩﺰﻧﯩﯔ ﺋﯚﻳﯩﯖﯩﺰ ﺟﺎﻳﻼﺷﻘﺎﻥ ﺷﻪﻫﻪﺭﻧﯩﯔ ﻛﯘﺗﯘﭘﺨﺎﻧﯩﺴﻰ ﺋﺎﺋﯩﻠﯩﯖﯩﺰﺩﯨﻜﻰ 4 ﺟﺎﻥ ﺋﺎﺩﻩﻣﻨﯩﯔ ﻫﻪﻣﻤﯩﺴﯩﮕﻪ ﻫﻪﻗﺴﯩﺰ ﻛﯘﺗﯘﭘﺨﺎﻧﺎ ﻛﯧﻨﯩﺸﻜﯩﺴﻰ ﺑﯧﺮﯨﺪﯗ. ﺑﯘ ﻛﯘﺗﯘﭘﺨﺎﻧﯩﻼﺭﺩﺍ ﻳﯧﺸﻰ 3 ﻛﻪ ﻛﯩﺮﮔﻪﻥ ﺑﺎﻟﯩﺪﯨﻦ ﺗﺎﺭﺗﯩﭗ، ﭼﻮﯕﻼﺭﻏﯩﭽﻪ ﻫﻪﻣﻤﻪ ﺋﺎﺩﻩﻣﮕﻪ ﺑﺎﭖ ﻛﯧﻠﯩﺪﯨﻐﺎﻥ ﻛﯩﺘﺎﺑﻼﺭ ﻗﻮﻳﯘﻟﯩﺪﯗ. ﻛﯩﺘﺎﺑﺘﯩﻦ ﺑﺎﺷﻘﺎ، ﻣﻪﺧﺴﯘﺱ ﺑﺎﻟﯩﻼﺭﻧﻰ ﺗﻪﺭﺑﯩﻴﯩﻠﻪﺷﻜﻪ ﺗﻪﻳﻴﺎﺭﻻﻧﻐﺎﻥ ﺋﯜﻧﺌﺎﻟﻐﯘ ﯞﻩ ﺳﯩﻨﺌﺎﻟﻐﯘ ﻟﯩﻨﺘﯩﻠﯩﺮﯨﻤﯘ ﺑﺎﺭ ﺑﻮﻟﯘﭖ، ﻫﻪﺭ ﺑﯩﺮ ﻛﯘﺗﯘﭘﺨﺎﻧﯩﺪﯨﻜﻰ ﻛﯩﺘﺎﺑﻼﺭﻧﯩﯔ ﺋﻪﯓ ﻛﻪﻡ ﺩﯦﮕﻪﻧﺪﻩ ﻳﯧﺮﯨﻤﻰ ﺑﺎﻟﯩﻼﺭﻏﺎ ﺋﺎﺋﯩﺖ ﻛﯩﺘﺎﺑﻼﺭ ﺑﻮﻟﯩﺪﯗ. ﻫﻪﺭ ﻗﯧﺘﯩﻢ ﺋﺎﺭﯨﻴﻪﺕ ﺋﺎﻟﯩﺪﯨﻐﺎﻥ ﻛﯩﺘﺎﺏ ﯞﻩ ﻟﯩﻨﺘﯩﻼﺭﻧﯩﯔ ﺳﺎﻥ ﭼﻪﻛﻠﯩﻤﯩﺴﻰ ﻳﻮﻕ ﺑﻮﻟﯘﭖ، ﻛﯩﺘﺎﺑﻼﺭﻧﻰ 3 ﻫﻪﭘﺘﯩﻠﯩﻚ، ﻟﯩﻨﺘﯩﻼﺭﻧﻰ ﺑﯩﺮ ﻫﻪﭘﺘﯩﻠﯩﻚ ﺋﺎﺭﯨﻴﻪﺕ ﺑﯧﺮﯨﭗ ﺗﯘﺭﯨﺪﯗ. ﺑﯘ ﻛﯘﺗﯘﭘﺨﺎﻧﯩﻼﺭﻧﯩﯔ ﺭﺍﺳﺨﻮﺩﯨﻨﯩﯔ ﺑﯩﺮ ﻗﯩﺴﻤﯩﻨﻰ ﺷﯩﺘﺎﺗﻠﯩﻖ ﻫﯚﻛﯜﻣﻪﺕ، ﻗﺎﻟﻐﺎﻥ ﻗﯩﺴﻤﯩﻨﻰ ﻫﻪﺭ ﺑﯩﺮ ﺷﻪﻫﻪﺭ ﺑﯩﺰﺩﯨﻦ ﻳﯩﻐﻘﺎﻥ ﻳﻪﺭ ﺑﯧﺠﻰ ﻛﯩﺮﯨﻤﯩﺪﯨﻦ ﭼﯩﻘﯩﺮﯨﺪﯗ. ﻛﯩﭽﯩﻚ ﺑﺎﻟﯩﻠﯩﺮﻯ ﺑﺎﺭ ﺋﺎﻣﯧﺮﯨﻜﯩﻠﯩﻖ ﺋﺎﻕ ﺗﻪﻧﻠﯩﻚ ﺋﺎﻳﺎﻟﻼﺭﻧﯩﯔ ﺋﯩﭽﯩﺪﻩ ﺋﯩﺸﻠﯩﻤﻪﻱ، ﺋﯚﺯ ﺑﺎﻟﯩﺴﯩﻨﻰ ﭘﯜﺗﯜﻥ ﻛﯜﻥ ﺑﺎﻗﯩﺪﯨﻐﺎﻧﻼﺭ ﺧﯧﻠﻰ ﻳﯘﻗﯩﺮﻯ ﻧﯩﺴﺒﻪﺗﻨﻰ ﺋﯩﮕﯩﻠﻪﻳﺪﯗ. ﺋﯘﻧﺪﺍﻗﻼﺭﻧﯩﯔ ﺑﯩﺮ ﺋﺎﺩﯨﺘﻰ ﻫﻪﺭ ﻛﯜﻧﻰ ﺑﺎﻟﯩﻠﯩﺮﯨﻨﻰ ﺋﯚﺯ ﺷﻪﻫﯩﺮﯨﺪﯨﻜﻰ ﻛﯘﺗﯘﭘﺨﺎﻧﯩﻼﺭﻏﺎ ﺋﯧﭙﻜﯧﻠﯩﭗ، ﺑﺎﻟﯩﺴﻰ ﻫﯧﺮﯨﭗ ﻗﺎﻟﻐﯩﭽﻪ ﺋﯘﻻﺭﻏﺎ ﻛﯩﺘﺎﺏ ﺋﻮﻗﯘﭖ ﺑﯧﺮﯨﺶ، ﺑﺎﻟﯩﺴﻰ ﻫﯧﺮﯨﭗ ﻗﺎﻟﻐﺎﻧﺪﺍ ﺋﯘﻻﺭﻧﻰ ﺋﯚﺯﻯ ﺧﺎﻟﯩﻐﺎﻥ ﻛﯩﺘﺎﺑﻼﺭﻧﻰ ﻛﯚﺭﯛﺷﻜﻪ ﺑﯩﺮ ﻣﻪﺯﮔﯩﻞ ﻗﻮﻳﯘﭖ ﺑﯧﺮﯨﺸﺘﯩﻦ ﺋﯩﺒﺎﺭﻩﺕ. ﺋﯘﻧﯩﯖﺪﯨﻦ ﺑﺎﺷﻘﺎ، ﺋﻮﻗﯘﺭﻣﻪﻧﻠﻪﺭ ﺋﺎﻣﯧﺮﯨﻜﯩﻨﯩﯔ ﻛﯩﻨﻮﺳﯩﺪﯨﻨﻤﯘ ﻛﯚﭖ ﻛﯚﺭﯛﭖ ﺗﯘﺭﯨﺪﯨﻐﯩﻨﯩﺪﻩﻙ، ﺋﺎﻕ ﺗﻪﻧﻠﯩﻜﻠﻪﺭﻧﯩﯔ ﺋﯘﺧﻼﺷﺘﯩﻦ ﺑﯘﺭﯗﻥ ﻛﯩﭽﯩﻚ ﺑﺎﻟﯩﻠﯩﺮﯨﻐﺎ ﻛﯩﺘﺎﺏ ﺋﻮﻗﯘﭖ ﺑﯧﺮﯨﺶ ﻳﺎﻛﻰ ﺋﯘﻻﺭﻏﺎ ﻫﯧﻜﺎﻳﻪ ﺋﯧﻴﺘﯩﭗ ﺑﯧﺮﯨﺶ ﺋﺎﺩﯨﺘﻰ ﺑﺎﺭ. ﺑﯘﻧﻰ ﺋﯘﻻﺭ "ﺋﯘﺧﻼﺵ ﯞﺍﻗﺘﯩﺪﯨﻜﻰ ﻫﯧﻜﺎﻳﻪ" (ﺋﯩﻨﮕﻠﯩﺰﭼﻪ"Bed time story" ) ﺩﻩﭖ ﺋﺎﺗﺎﻳﺪﯗ. ﺋﺎﺷﯘﻧﺪﺍﻕ ﻗﯩﻠﻐﺎﭼﻘﺎ، ﺋﯘﻻﺭﻧﯩﯔ ﺑﺎﻟﯩﻠﯩﺮﻯ ﻛﯩﭽﯩﻜﯩﺪﯨﻦ ﺗﺎﺭﺗﯩﭗ ﻛﯩﺘﺎﺏ ﺋﻮﻗﯘﺷﻨﻰ ﻳﺎﺧﺸﻰ ﻛﯚﺭﯨﺪﯨﻐﺎﻥ ﺑﻮﻟﯘﭖ ﭼﻮﯓ ﺑﻮﻟﯩﺪﯗ. ﺑﯩﺮ ﻗﯧﺘﯩﻢ ﺋﺎﻳﺎﻟﯩﻢ ﺑﯩﻠﻪﻥ ﺋﯩﻜﻜﯩﻤﯩﺰ ﺑﯩﺰﻧﯩﯔ ﺑﺎﻟﯩﻐﺎ ﻛﯩﺘﺎﺏ ﺋﯧﻠﯩﭗ ﺑﯧﺮﯨﺶ ﺋﯜﭼﯜﻥ ﺑﯩﺰﻧﯩﯔ ﻛﯘﺗﯘﭘﺨﺎﻧﯩﻤﯩﺰﻏﺎ ﺑﯧﺮﯨﭗ، ﻛﯩﺘﺎﺏ ﺋﯩﺰﺩﻩﯞﺍﺗﺴﺎﻕ، ﺑﯩﺮ 3 ﻳﺎﺵ ﺋﻪﺗﺮﺍﭘﯩﺪﯨﻜﻰ ﻧﺎﻫﺎﻳﯩﺘﻰ ﺋﻮﻣﺎﻕ ﻗﯩﺰﭼﺎﻗﻨﯩﯔ ﺋﺎﯞﺍﺯﯨﻨﻰ ﺗﺎﺯﺍ ﻗﻮﻳﯘﭖ ﺑﯧﺮﯨﭗ ﻛﯩﺘﺎﺏ ﺋﻮﻗﯘﯞﺍﺗﻘﯩﻨﯩﻨﻰ ﻛﯚﺭﺩﯗﻕ. ﺑﯩﺰ ﺋﯘ ﻗﯩﺰﻧﯩﯔ ﺋﺎﺭﻗﯩﺴﯩﻐﺎ ﺋﯚﺗﯜﭖ ﺑﯩﺮ ﺩﻩﻡ ﻗﺎﺭﺍﭖ ﺗﯘﺭﺩﯗﻕ. ﺗﺎﺯﺍ ﺩﯨﻘﻘﻪﺕ ﻗﯩﻠﯩﭗ ﻗﺎﺭﯨﺴﺎﻕ، ﺋﯘ ﻗﯩﺰ ﺑﯩﺮ ﺑﻪﺗﻨﻰ ﺗﯜﮔﻪﺗﻤﻪﻳﻼ ﻳﯧﯖﻰ ﺑﯩﺮ ﺑﻪﺗﻨﻰ ﺋﯧﭽﯩﭗ ﺑﻮﻟﻐﺎﻥ ﺑﻮﻟﺴﯩﻤﯘ، ﺋﺎﻟﺪﯨﻨﻘﻰ ﺑﻪﺗﺘﯩﻜﻰ ﺗﯧﻜﯩﺴﺘﻨﻰ ﻧﺎﻫﺎﻳﯩﺘﻰ ﺗﻮﻏﺮﺍ ﺋﻮﻗﯘﯞﺍﺗﯩﺪﯗ. ﺋﻪﺳﻠﯩﺪﻩ، ﺑﯘ ﻗﯩﺰ ﺗﯧﺨﻰ ﻛﯩﺘﺎﺏ ﺋﻮﻗﯘﺷﻨﻰ ﺑﯩﻠﻤﻪﻳﺪﯨﻐﺎﻥ ﺑﻮﻟﯘﭖ، ﻫﯧﻠﯩﻘﻰ ﻛﯩﺘﺎﺑﻨﯩﯔ ﺗﯧﻜﯩﺴﺘﯩﻨﻰ ﭘﯜﺗﯜﻧﻠﻪﻱ ﻳﺎﺩﻟﯩﯟﺍﻟﻐﺎﻥ ﺋﯩﻜﻪﻥ. ﺷﯘﯕﺎ، ﻛﯩﺘﺎﺑﻨﻰ ﺋﯧﭽﯩﭗ، ﺷﯘ ﺑﯩﺮ ﺑﻪﺗﻜﻪ ﺗﻮﻏﺮﺍ ﻛﻪﻟﮕﻪﻥ ﺗﯧﻜﯩﺴﺘﻨﻰ ﭘﯜﺗﯜﻧﻠﻪﻱ ﻳﺎﺩﻗﺎ ﺋﻮﻗﯘﭖ، ﺋﺎﻧﺪﯨﻦ ﻳﯧﯖﻰ ﺑﯩﺮ ﺑﻪﺗﻨﻰ ﺋﺎﭼﯩﺪﯨﻜﻪﻥ. ﺋﯧﻬﺘﯩﻤﺎﻝ ﺑﯘ ﺋﯚﺯﯨﻨﯩﯔ ﺋﯩﻨﺘﺎﻳﯩﻦ ﻳﺎﺧﺸﻰ ﻛﯚﺭﯨﺪﯨﻐﺎﻥ ﻛﯩﺘﺎﺑﻰ ﺑﻮﻟﯘﭖ، ﺋﺎﭘﯩﺴﯩﻐﺎ ﻗﺎﻳﺘﺎ-ﻗﺎﻳﺘﺎ ﺋﻮﻗﯘﺗﯘﭖ، ﺋﺎﺧﯩﺮﻯ ﺋﯚﺯﯨﮕﻪ ﻳﺎﺩ ﺑﻮﻟﯘﭖ ﻛﻪﺗﻜﻪﻥ ﺋﻮﺧﺸﺎﻳﺪﯗ. ﺑﯩﺰﻣﯘ ﺋﯩﻜﻜﻰ ﺑﺎﻟﯩﻤﯩﺰ ﺋﺎﻣﯧﺮﯨﻜﯩﻐﺎ ﻛﻪﻟﮕﻪﻥ ﻛﯜﻧﺪﯨﻦ ﺗﺎﺭﺗﯩﭗ، ﺋﯘﻻﺭﻧﻰ ﻫﻪﺭ ﻛﯜﻧﻰ ﺑﯩﺮ ﺳﺎﺋﻪﺕ ﺋﻪﺗﺮﺍﭘﯩﺪﺍ ﻛﯩﺘﺎﺏ ﺋﻮﻗﯘﺷﻘﺎ ﺋﺎﺩﻩﺗﻠﻪﻧﺪﯛﺭﺩﯗﻕ. ﻛﯚﭘﯩﻨﭽﻪ ﯞﺍﻗﯩﺘﺘﺎ ﺋﯚﺯﻟﯩﺮﯨﮕﻪ ﺋﻮﻗﯘﺗﯘﭖ، ﺑﯩﺮﯨﻤﯩﺰ ﺋﯘﻻﺭﻧﯩﯔ ﻗﯧﺸﯩﺪﺍ ﺋﺎﯕﻼﭖ ﺋﻮﻟﺘﯘﺭﺩﯗﻕ. ﺧﺎﺗﺎﻟﯩﻘﯩﻨﻰ ﺗﯜﺯﯨﺘﯩﭗ ﺑﻪﺭﺩﯗﻕ. ﺑﻪﺯﯨﺪﻩ ﺋﯘﻻﺭﻏﺎ ﻛﯩﺘﺎﺏ ﺋﻮﻗﯘﺵ ﭘﻪﻗﻪﺕ ﺧﻮﺵ ﻳﺎﻗﻤﺎﻱ ﻗﺎﻟﺴﺎ، ﻛﯩﺘﺎﺑﻨﻰ ﺑﯩﺰ ﺋﯘﻻﺭﻏﺎ ﺋﻮﻗﯘﭖ ﺑﻪﺭﺩﯗﻕ. ﺋﺎﺳﺎﺳﻪﻥ ﻫﻪﺭ ﻫﻪﭘﺘﻪ ﺩﯦﮕﯩﺪﻩﻙ ﺋﯚﺯﯨﻤﯩﺰﻧﯩﯔ ﻛﯘﺗﯘﭘﺨﺎﻧﯩﺴﯩﻐﺎ ﺑﯧﺮﯨﭗ، ﻛﯩﺘﺎﺑﻨﻰ ﺋﺎﻟﻤﺎﺷﺘﯘﺭﯗﭖ ﺗﯘﺭﺩﯗﻕ. ﺑﺎﻟﯩﻠﯩﺮﯨﻤﯩﺰ ﭼﻮﯓ ﺑﻮﻟﯘﭖ، ﻛﯘﺗﯘﭘﺨﺎﻧﯩﺪﯨﻜﻰ ﻛﯩﺘﺎﺑﻼﺭﻏﺎ ﻗﯩﺰﯨﻘﻤﺎﻳﺪﯨﻐﺎﻥ ﺑﻮﻟﯘﭖ ﻗﺎﻟﻐﺎﻧﺪﯨﻦ ﺗﺎﺭﺗﯩﭗ، ﺑﯩﺰ ﺋﯘﻻﺭﻏﺎ ﺋﯚﺯﻟﯩﺮﻯ ﻳﺎﺧﺸﻰ ﻛﯚﺭﯛﺩﯨﻐﺎﻥ ﻛﯩﺘﺎﺑﻼﺭﻧﻰ ﺳﯧﺘﯩﭗ ﺋﯧﻠﯩﭗ ﺑﯧﺮﯨﺪﯨﻐﺎﻥ ﺑﻮﻟﺪﯗﻕ. ﺷﯘﯕﺎ ﺋﯩﻜﻜﻰ ﺑﺎﻟﯩﻤﯩﺰﻧﯩﯔ ﻫﺎﺯﯨﺮﻣﯘ ﺋﯘﺧﻼﺷﺘﯩﻦ ﺑﯘﺭﯗﻥ ﺋﻮﻗﯘﻳﺪﯨﻐﺎﻥ ﻛﯩﺘﺎﺑﻠﯩﺮﻯ ﺑﺎﺭ ﺑﻮﻟﯘﭖ، ﺋﯘﺧﻼﺷﺘﯩﻦ ﺑﯘﺭﯗﻥ ﺋﺎﺯﺭﺍﻕ ﻛﯩﺘﺎﺏ ﺋﻮﻗﯘﺵ ﺋﯘﻻﺭﻏﺎ ﭘﯜﺗﯜﻧﻠﻪﻱ ﺋﺎﺩﻩﺕ ﺑﻮﻟﯘﭖ ﻛﻪﺗﺘﻰ. ﺋﺎﻣﯧﺮﯨﻜﯩﺪﺍ ﺩﺍﯕﻠﯩﻘﺮﺍﻕ ﺋﺎﻟﯩﻲ ﻣﻪﻛﺘﻪﭘﻜﻪ ﻗﻮﺑﯘﻝ ﻗﯩﻠﯩﻨﯩﺸﺘﺎ، ﺋﻮﺗﺘﯘﺭﺍ ﻣﻪﻛﺘﻪﭖ ﻧﻪﺗﯩﺠﯩﺴﯩﺪﯨﻦ ﺑﺎﺷﻘﺎ ﻳﻪﻧﻪ "ﺳﻪﯞﯨﻴﻪ ﺑﺎﻫﺎﻻﺵ ﺋﯩﻤﺘﯩﻬﺎﻧﻰ" ﺩﯦﮕﻪﻥ، ﺋﯩﻨﮕﻠﯩﺰﭼﻪ "Scholastic Assessment Test (SAT)" ﺩﻩﭖ ﺋﺎﺗﯩﻠﯩﺪﯨﻐﺎﻥ ﺑﯩﺮ ﻣﻪﻣﻠﯩﻜﻪﺗﻠﯩﻚ ﺋﯩﻤﺘﯩﻬﺎﻥ ﻧﻪﺗﯩﺠﯩﺴﯩﮕﯩﻤﯘ ﻗﺎﺭﺍﻳﺪﯗ. ﻣﯧﻨﯩﯔ ﺋﻮﻏﻠﯘﻡ ﻫﺎﺯﯨﺮ ﺷﯘ ﺋﯩﻤﺘﯩﻬﺎﻧﺪﺍ ﺳﯩﻨﯩﻠﯩﺪﯨﻐﺎﻥ ﺋﯩﻨﮕﻠﯩﺰﭼﻪ ﺳﯚﺯﻟﯜﻛﻠﻪﺭﻧﻰ ﻳﺎﺩﻻﯞﺍﺗﻘﺎﻥ ﺑﻮﻟﯘﭖ، ﻫﻪﺭ ﻛﯜﻧﻰ ﻛﻪﭼﺘﻪ ﻣﯧﻨﻰ ﭼﺎﻗﯩﺮﯨﭗ، ﻳﯧﯖﻰ ﻳﺎﺩﻟﯩﻐﺎﻥ ﺳﯚﺯﻟﯜﻛﻠﻪﺭﻧﻰ ﯞﻩ ﺋﺎﻟﺪﯨﻨﻘﻰ 4 ﻛﯜﻥ ﺋﯩﭽﯩﺪﻩ ﺋﯚﮔﻪﻧﮕﻪﻥ ﺳﯚﺯﻟﯜﻛﻠﻪﺭﻧﻰ ﻣﺎﯕﺎ ﺳﯩﻨﯩﻐﯘﺯﯨﺪﯗ. ﺋﯘﻧﯩﯖﻐﺎ 20 ﻣﯩﻨﯘﺗﺘﯩﻦ ﻛﯚﭘﺮﻩﻙ ﯞﺍﻗﯩﺖ ﻛﯧﺘﯩﺪﯨﻐﺎﻥ ﺑﻮﻟﯘﭖ، ﺋﻮﻏﻠﯘﻡ ﻗﺎﻧﺪﺍﻕ ﯞﺍﻗﯩﺘﺘﺎ ﺗﻪﻳﻴﺎﺭ ﺑﻮﻟﺴﺎ، ﻣﻪﻥ ﺋﯚﺯﯛﻡ ﻗﯩﻠﯩﯟﺍﺗﻘﺎﻥ ﻫﻪﺭ ﻗﺎﻧﺪﺍﻕ ﺋﯩﺸﻨﻰ ﺗﻮﺧﺘﯩﺘﯩﭗ ﻗﻮﻳﯘﭖ، ﺋﯘﻧﯩﯔ ﺑﯩﻠﻪﻥ ﻫﯧﻠﯩﻘﻰ ﺳﯚﺯﻟﯜﻛﻠﻪﺭﻧﻰ ﺋﯚﺗﻜﯜﺯﯨﻤﻪﻥ. ﺋﻪﮔﻪﺭ ﺗﯧﻠﯧﯟﯨﺰﻭﺭﺩﺍ ﺋﯚﺯﯛﻡ ﻧﺎﻫﺎﻳﯩﺘﻰ ﻳﺎﺧﺸﻰ ﻛﯚﺭﯛﺩﯨﻐﺎﻥ ﺑﯩﺮ ﻧﻪﺭﺳﻪ ﻛﯚﺭﯛﯞﺍﺗﻘﺎﻥ ﺑﻮﻟﺴﺎﻣﻤﯘ، ﻳﺎﻛﻰ ﻣﯘﺷﯘ ﻣﺎﻗﺎﻟﯩﻨﻰ ﻳﯧﺰﯨﯟﺍﺗﻘﺎﻥ ﺑﻮﻟﺴﺎﻣﻤﯘ، ﺋﻮﻏﻠﯘﻣﻨﯩﯔ ﻗﯩﻠﯩﯟﺍﺗﻘﺎﻥ ﺋﯘ ﺋﯩﺸﯩﻨﯩﯔ ﺋﯩﻨﺘﺎﻳﯩﻦ ﻣﯘﻫﯩﻤﻠﯩﻘﯩﻨﻰ ﺑﯩﻠﺪﯛﺭﯛﺵ، ﺋﯘﻧﻰ ﺩﺍﯞﺍﻣﻠﯩﻖ ﺭﯨﻐﺒﻪﺗﻠﻪﻧﺪﯛﺭﯛﭖ ﺗﯘﺭﯗﺵ ﺋﯜﭼﯜﻥ، ﺋﯚﺯ ﺋﯩﺸﯩﻤﻨﻰ ﺗﺎﺷﻼﭖ ﻗﻮﻳﯘﭖ، ﺋﯚﺯﯛﻣﻨﯩﯔ ﻧﺎﻫﺎﻳﯩﺘﻰ ﭼﺎﺭﭼﺎﭖ ﻛﻪﺗﻜﻪﻧﻠﯩﻜﯩﮕﻪ ﻗﺎﺭﯨﻤﺎﻱ، ﺋﻮﻏﻠﯘﻣﻨﯩﯔ ﺋﯚﻳﯩﮕﻪ ﻛﯩﺮﯨﭗ، ﺋﯘﻧﯩﯔ ﺑﯩﻠﻪﻥ ﺑﯩﻠﻠﻪ ﺳﯚﺯﻟﯜﻛﻠﻪﺭﻧﻰ ﺗﻪﻛﺮﺍﺭﻻﻳﻤﻪﻥ.

ﺋﺎﻣﯧﺮﯨﻜﯩﺪﺍ ﺋﺎﺗﺎ-ﺋﺎﻧﯩﻼﺭ ﺑﺎﻟﯩﻼﺭﻏﺎ ﻛﯘﺗﯘﭘﺨﺎﻧﯩﺪﯨﻦ ﻛﯩﺘﺎﺏ ﺋﺎﺭﯨﻴﻪﺕ ﺋﯧﻠﯩﭗ ﺑﻪﺭﮔﻪﻧﺪﯨﻦ ﺑﺎﺷﻘﺎ، ﺑﺎﺯﺍﺭﺩﯨﻨﻤﯘ ﻧﯘﺭﻏﯘﻥ ﻛﯩﺘﺎﺑﻼﺭﻧﻰ ﺳﯧﺘﯩﭗ ﺋﺎﻟﯩﺪﯗ. ﺑﻮﻟﯘﭘﻤﯘ ﺋﺎﻕ ﺗﻪﻧﻠﯩﻜﻠﻪﺭﻧﯩﯔ ﺑﺎﻟﯩﻠﯩﺮﯨﻨﯩﯔ ﺋﯚﻳﯩﮕﻪ ﻗﺎﺭﺍﻳﺪﯨﻐﺎﻥ ﺑﻮﻟﺴﺎ، ﭼﻮﻗﯘﻡ ﺑﯩﺮﺩﯨﻦ ﻛﯩﺘﺎﺏ ﺳﺎﻗﻼﺵ ﺋﻮﺭﻧﻰ ﺑﺎﺭﻟﯩﻘﯩﻨﻰ ﻛﯚﺭﮔﯩﻠﻰ ﺑﻮﻟﯩﺪﯗ. ﺑﺎﻟﯩﻼﺭ ﭼﻮﯓ ﺑﻮﻟﻐﺎﻧﺪﺍ، ﻳﺎﻛﻰ ﺑﯘ ﻛﯩﺘﺎﺑﻼﺭﺩﯨﻦ ﺯﯦﺮﯨﻜﻜﻪﻧﺪﻩ، ﺋﺎﺗﺎ-ﺋﺎﻧﯩﻼﺭ ﺋﯘ ﻛﯩﺘﺎﺑﻼﺭﻧﻰ ﺋﯚﺯ ﺷﻪﻫﯩﺮﯨﺪﯨﻜﻰ ﻛﯘﺗﯘﭘﺨﺎﻧﯩﻐﺎ ﺋﯩﺌﺎﻧﻪ ﻗﯩﻠﯩﺪﯗ. ﺷﯘﯕﺎ ﻫﻪﺭ ﺑﯩﺮ ﻛﯘﺗﯘﭘﺨﺎﻧﯩﺪﺍ ﺋﯩﺌﺎﻧﻪ ﻗﯩﻠﻐﺎﻥ ﻛﯩﺘﺎﺑﻼﺭﻧﻰ ﻗﻮﻳﯘﭖ ﻗﻮﻳﯩﺪﯨﻐﺎﻥ ﻣﻪﺧﺴﯘﺱ ﺋﻮﺭﯗﻥ ﯞﻩ ﻗﻪﻏﻪﺯ ﺳﺎﻧﺪﯗﻗﻼﺭ ﺑﻮﻟﯩﺪﯗ. ﺑﻪﺯﻯ ﻛﯘﺗﯘﭘﺨﺎﻧﯩﻼﺭ ﻳﯩﻐﯩﻠﻐﺎﻥ ﻛﯩﺘﺎﺑﻼﺭﻧﻰ ﺋﯚﺯﻟﯩﺮﻯ ﺑﯩﺮ ﺗﻪﺭﻩﭖ ﻗﯩﻼﻟﻤﺎﻳﺪﯨﻐﺎﻥ ﻫﺎﻟﻪﺗﻜﻪ ﻛﯧﻠﯩﭗ ﻗﺎﻟﺴﺎ، "ﺑﯘ ﻳﻪﺭﺩﯨﻜﻰ ﻛﯩﺘﺎﺑﻼﺭﻧﻰ ﺋﯚﺯﯨﯖﯩﺰ ﺧﺎﻟﯩﻐﺎﻧﭽﻪ ﺋﯧﻠﯩﭗ ﻛﻪﺗﺴﯩﯖﯩﺰ ﺑﻮﻟﯩﺪﯗ" ﺩﻩﭘﻤﯘ ﻳﯧﺰﯨﭗ ﻗﻮﻳﯩﺪﯗ.

ﺑﺎﻟﯩﻼﺭﻧﻰ ﻛﯩﺘﺎﺏ ﺋﻮﻗﯘﺷﻘﺎ ﺋﯜﻧﺪﻩﺵ ﭘﯜﺗﯜﻥ ﺋﺎﻣﯧﺮﯨﻜﺎ ﺟﻪﻣﺌﯩﻴﯩﺘﯩﮕﻪ ﺳﯩﯖﯩﭗ ﻛﻪﺗﻜﻪﻥ ﺑﯩﺮ ﺋﯩﺶ ﺑﻮﻟﯘﭖ، ﻣﻪﻛﺘﻪﭖ، ﺋﻮﻗﯘﺗﻘﯘﭼﻰ، ﺋﺎﺗﺎ-ﺋﺎﻧﺎ، ﯞﻩ ﻫﻪﺭ ﺳﺎﻫﻪﺩﯨﻜﻰ ﺩﺍﯕﻠﯩﻖ ﺋﻪﺭﺑﺎﭘﻼﺭﻧﯩﯔ ﻫﻪﻣﻤﯩﺴﻰ ﺑﯘ ﺋﯩﺸﻨﻰ ﺋﯚﺯﻟﯩﺮﯨﻨﯩﯔ ﺋﻪﯓ ﻣﯘﻫﯩﻢ ﺑﯘﺭﭼﻠﯩﺮﯨﻨﯩﯔ ﺑﯩﺮﻯ ﻗﺎﺗﺎﺭﯨﺪﺍ ﺗﯘﺗﯩﺪﯗ. ﺋﺎﻣﯧﺮﯨﻜﯩﺪﯨﻜﻰ ﺑﺎﺷﻼﻧﻐﯘﭺ ﯞﻩ ﺗﻮﻟﯘﻗﺴﯩﺰ ﺋﻮﺗﺘﯘﺭﺍ ﻣﻪﻛﺘﻪﭘﻠﻪﺭ ﻫﻪﺭ ﻳﯩﻠﻰ ﺑﯩﺮ ﺋﺎﻳﻨﻰ "ﻛﯩﺘﺎﺏ ﺋﻮﻗﯘﺵ ﺋﯧﻴﻰ" ﻗﯩﻠﯩﭗ ﺑﻪﻟﮕﯩﻠﻪﭖ، ﺑﯘ ﺑﯩﺮ ﺋﺎﻳﻨﯩﯔ ﺋﯩﭽﯩﺪﻩ ﭘﯜﺗﯜﻥ ﻣﻪﻛﺘﻪﭖ ﺋﻮﻗﯘﻏﯩﻠﯩﺮﯨﻐﺎ ﻣﻪﻟﯘﻡ ﺳﺎﻧﺪﯨﻜﻰ ﻛﯩﺘﺎﺑﻨﻰ ﺋﻮﻗﯘﭖ ﺑﻮﻟﯘﺷﻨﻰ ﺗﺎﭘﺸﯘﺭﯗﻕ ﻗﯩﻠﯩﭗ ﺑﯧﺮﯨﺪﯗ. ﯞﻩﺯﯨﭙﯩﻨﻰ ﺋﺎﺷﯘﺭﯗﭖ ﺋﻮﺭﯗﻧﻠﯩﻐﺎﻧﻼﺭﻏﺎ ﻣﯘﻛﺎﭘﺎﺕ ﺑﯧﺮﯨﺪﯗ. ﻣﻪﻥ ﺋﯩﻜﻜﻰ ﺑﺎﻻﻣﻨﯩﯔ "ﻛﯩﺘﺎﺏ ﺋﻮﻗﯘﺵ ﺋﯧﻴﻰ" ﺗﯜﮔﯩﮕﻪﻧﺪﯨﻦ ﻛﯧﻴﯩﻨﻜﻰ "Ice-cream" ﺯﯨﻴﺎﭘﯩﺘﯩﮕﻪ ﻛﯚﭖ ﻗﯧﺘﯩﻢ ﻗﺎﺗﻨﯩﺸﯩﭗ ﺑﺎﻗﺘﯩﻢ. ﺑﺎﺷﻼﻧﻐﯘﭼﻨﯩﯔ ﺑﺎﻟﯩﻠﯩﺮﯨﻨﻰ ﻛﯩﺘﺎﺏ ﺋﻮﻗﯘﺷﻘﺎ ﻗﯩﺰﯨﻘﺘﯘﺭﯗﺵ ﺋﯜﭼﯜﻥ، ﻫﻪﺭ ﺑﯩﺮ ﻣﻪﻛﺘﻪﭘﺘﻪ ﻫﻪﺭ ﻳﯩﻠﻰ "ﻛﯩﺘﺎﺏ ﻳﻪﺭﻣﻪﻧﻜﯩﺴﻰ" ﭘﺎﺋﺎﻟﯩﻴﯩﺘﻰ ﺋﯧﻠﯩﭗ ﺑﺎﺭﯨﺪﯗ. ﺑﯘ ﭘﺎﺋﺎﻟﯩﻴﻪﺗﺘﻪ ﺑﺎﻟﯩﻼﺭ ﻛﯩﺘﺎﺑﻠﯩﺮﯨﻨﻰ ﻧﻪﺷﺮ ﻗﯩﻠﯩﺪﯨﻐﺎﻥ ﺷﯩﺮﻛﻪﺗﻠﻪﺭ ﻣﻪﻛﺘﻪﭘﻜﻪ ﻛﯧﻠﯩﭗ، ﺋﯚﺯﻟﯩﺮﻯ ﻧﻪﺷﯩﺮ ﻗﯩﻠﻐﺎﻥ ﺋﻪﯓ ﻳﯧﯖﻰ ﻛﯩﺘﺎﺑﻼﺭﻧﻰ ﻛﯚﺭﮔﻪﺯﻣﻪ ﻗﯩﻠﯩﺪﯗ ﻫﻪﻣﺪﻩ ﻧﻪﻕ ﻣﻪﻳﺪﺍﻧﺪﺍ ﺳﺎﺗﯩﺪﯗ. ﺑﯩﺮ ﻗﯧﺘﯩﻢ ﻣﻪﻥ ﺋﻮﻏﻠﯘﻣﻨﯩﯔ ﻣﻪﻛﺘﯩﭙﯩﺪﯨﻦ ﺑﺎﻻﻣﻐﺎ ﻣﻪﺧﺴﯘﺱ ﻛﯩﺘﺎﺏ ﺑﯘﻳﺮﯗﺗﯘﺵ ﺗﻮﻏﺮﯨﺴﯩﺪﺍ ﺑﯩﺮ ﺗﻪﻛﻠﯩﭗ ﺗﺎﭘﺸﯘﺭﯗﭖ ﺋﺎﻟﺪﯨﻢ. ﭘﻪﻗﻪﺕ 5 ﺩﻭﻟﻼﺭ ﺧﻪﺟﻠﻪﭖ ﺑﯩﺮ ﻛﯩﺘﺎﺏ ﺑﯘﻳﺮﯗﺗﻘﺎﻧﯩﺪﯨﻢ، ﻣﻪﺧﺴﯘﺱ ﻣﯧﻨﯩﯔ ﺋﻮﻏﻠﯘﻡ ﺋﯜﭼﯜﻥ ﺑﯧﺴﯩﻠﻐﺎﻥ ﺑﯩﺮ ﻛﯩﺘﺎﺑﻨﻰ ﺗﺎﭘﺸﯘﺭﯗﭖ ﺋﺎﻟﺪﯨﻢ. ﺑﯘ ﻛﯩﺘﺎﺑﻨﯩﯔ ﺋﯩﭽﯩﺪﯨﻜﻰ ﺋﺎﺳﺎﺳﯩﻲ ﺭﻭﻟﭽﻰ ﻣﯧﻨﯩﯔ ﺋﻮﻏﻠﯘﻡ ﺑﻮﻟﯘﭖ، ﻛﯩﺘﺎﺑﻨﯩﯔ ﺗﻪﺷﯩﻐﯩﻤﯘ ﺋﻮﻏﻠﯘﻣﻨﯩﯔ ﺋﯩﺴﻤﻰ ﺑﯧﺴﯩﻠﻐﺎﻧﯩﺪﻯ. ﻣﻪﻥ ﻗﺎﺗﺘﯩﻖ ﺗﻪﺳﯩﺮﻟﻪﻧﺪﯨﻢ. ﺋﺎﻣﯧﺮﯨﻜﯩﻨﯩﯔ -2001ﻳﯩﻠﯩﺪﯨﻜﻰ11-ﺳﯩﻨﺘﻪﺑﯩﺮﯞﻩﻗﻪﺳﻰ ﻳﯜﺯ ﺑﻪﺭﮔﻪﻥ ﯞﺍﻗﯩﺘﺘﺎ، ﺋﺎﻣﯧﺮﯨﻜﺎ ﭘﺮﯨﺰﯨﺪﯨﻨﺘﻰ ﺑﯘﺵ ﺑﯩﺮ ﺑﺎﺷﻼﻧﻐﯘﭺ ﻣﻪﻛﺘﻪﭘﻨﯩﯔ ﻛﯩﺘﺎﺏ ﺋﻮﻗﯘﺵ ﭘﺎﺋﺎﻟﯩﻴﯩﺘﯩﮕﻪ ﻗﺎﺗﻨﯩﺸﯩﯟﺍﺗﻘﺎﻧﯩﺪﻯ. ﺋﺎﻣﯧﺮﯨﻜﯩﻨﯩﯔ ﻫﯚﻛﯜﻣﻪﺕ ﺧﺎﺩﯨﻤﻠﯩﺮﻯ ﺷﯘ ﻣﻪﻛﺘﻪﭘﻜﻪ ﺑﯧﺮﯨﭗ، ﺑﯩﺮ ﺳﯩﻨﯩﭙﺘﺎ ﺑﯘﺷﻨﯩﯔ ﻗﯘﻟﯩﻘﯩﻐﺎ ﭘﯩﭽﯩﺮﻻﭖ،        ﻧﻴﯘ-ﻳﻮﺭﻛﺘﺎ ﺑﻮﻟﻐﺎﻥ ﯞﻩﻗﻪﻧﻰ ﺩﻭﻛﻼﺕ ﻗﯩﻠﯩﺪﯗ. ﺋﺎﻣﯧﺮﯨﻜﯩﺪﯨﻜﻰ ﺑﺎﺷﻘﺎ ﺋﺎﺗﺎﻗﻠﯩﻖ ﺋﻪﺭﺑﺎﭘﻼﺭﻣﯘ ﺑﺎﺷﻼﻧﻐﯘﭺ ﻣﻪﻛﺘﻪﭘﻠﻪﺭﮔﻪ ﺑﯧﺮﯨﭗ، ﺑﺎﻟﯩﻼﺭﻏﺎ ﻛﯩﺘﺎﺏ ﺋﻮﻗﯘﭖ ﺑﯧﺮﯨﯟﺍﺗﻘﺎﻧﻠﯩﻘﯩﻨﻰ ﺑﯩﺰ ﺗﯧﻠﯧﯟﯨﺰﻭﺭﺩﺍ ﺩﺍﯞﺍﻣﻠﯩﻖ ﻛﯚﺭﯛﭖ ﺗﯘﺭﯨﻤﯩﺰ.

ﺑﯩﺰ ﺷﯩﻤﺎﻟﯩﻲ ﻛﺎﻟﯩﻔﻮﺭﻧﯩﻴﻪﻧﯩﯔ Davis ﺩﯦﮕﻪﻥ ﺷﻪﻫﯩﺮﯨﺪﻩ 1990-ﻳﯩﻠﯩﺪﯨﻦ 1997-ﻳﯩﻠﯩﻐﯩﭽﻪ 7 ﻳﯩﻞ ﺗﯘﺭﺩﯗﻕ. ﺑﯩﺰﻧﯩﯔ ﺗﯘﺭﻏﺎﻥ ﻳﺎﺗﯩﻘﯩﻤﯩﺰ ﻛﺎﻟﯩﻔﻮﺭﻧﯩﻴﻪ ﺋﯘﻧﯩﯟﯦﺮﺳﯩﺘﯧﺘﯩﻨﯩﯔ ﭘﻪﻗﻪﺕ ﺗﻮﻱ ﻗﯩﻠﻐﺎﻥ ﺋﻮﻗﯘﻏﯘﭼﯩﻼﺭﻏﯩﻼ ﺋﯩﺠﺎﺭﯨﮕﻪ ﺑﯧﺮﯨﺪﯨﻐﺎﻥ ﻳﺎﺗﺎﻕ ﺑﯩﻨﺎ ﺭﺍﻳﻮﻧﯩﺪﺍ ﺑﻮﻟﯘﭖ، ﺋﯘ ﻳﻪﺭﺩﻩ ﺗﯘﺭﯨﺪﯨﻐﺎﻧﻼﺭﻧﯩﯔ ﻫﻪﻣﻤﯩﺴﻰ ﺋﺎﺷﯘ ﻣﻪﻛﺘﻪﭘﻨﯩﯔ ﺋﻮﻗﯘﻏﯘﭼﯩﻠﯩﺮﻯ ﺋﯩﺪﻯ. 1997-ﻳﯩﻠﯩﺪﯨﻦ 2004-ﻳﯩﻠﯩﻨﯩﯔ ﺋﻮﺗﺘﯘﺭﯨﺴﯩﻐﯩﭽﻪ ﺷﯩﻤﺎﻟﯩﻲ ﻛﺎﻟﯩﻔﻮﺭﻧﯩﻴﻪﺩﯨﻜﻰ San Francisco ﺷﻪﻫﯩﺮﻯ ﺑﯩﻠﻪﻥ ﺳﯩﻠﯩﻜﻮﻥ ﺟﯩﻠﻐﯩﺴﯩﻐﺎ ﻳﯧﻘﯩﻦ ﺟﺎﻳﺪﯨﻜﻰ San Ramon ﺩﯦﮕﻪﻥ ﺷﻪﻫﻪﺭﺩﻩ ﺋﯚﺯﯨﻤﯩﺰ ﺳﯧﺘﯩﯟﺍﻟﻐﺎﻥ ﺋﺎﻳﺮﯨﻢ ﺑﯩﻨﺎﻟﯩﻖ ﺋﯚﻳﺪﻩ ﺗﯘﺭﺩﯗﻕ. ﺑﯘ ﺷﻪﻫﻪﺭ ﺋﺎﻣﯧﺮﯨﻜﯩﺪﯨﻜﻰ ﺗﯘﺭﻣﯘﺵ ﺳﻪﯞﯨﻴﯩﺴﻰ ﺋﻮﺗﺘﯘﺭﺍ ﯞﻩ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﻛﯩﺸﯩﻠﻪﺭ ﺗﯘﺭﯨﺪﯨﻐﺎﻥ ﺷﻪﻫﻪﺭ ﺑﻮﻟﯘﭖ، ﺑﯘ ﺷﻪﻫﻪﺭﺩﯨﻜﯩﻠﻪﺭﻧﯩﯔ ﺋﻮﺗﺘﯘﺭﯨﭽﻪ ﻳﯩﻠﻠﯩﻖ ﺋﺎﺋﯩﻠﻪ ﻛﯩﺮﯨﻤﻰ 87 ﻣﯩﯔ ﺩﻭﻟﻼﺭ ﺋﯩﻜﻪﻥ. (ﻛﺎﻟﯩﻔﻮﺭﻧﯩﻴﻪﺩﻩ ﻳﯩﻠﻠﯩﻖ ﺋﺎﺋﯩﻠﻪ ﻛﯩﺮﯨﻤﻰ 30 ﻣﯩﯔ ﺩﻭﻟﻼﺭﺩﯨﻦ ﺗﯚﯞﻩﻧﻠﻪﺭ ﻛﻪﻣﺒﻪﻏﻪﻟﻠﻪﺭ ﻫﯧﺴﺎﺑﻠﯩﻨﯩﺪﯗ) Davis ﺗﺎ ﻣﻪﻛﺘﻪﭘﻨﯩﯔ ﺑﯩﺮ ﭼﻮﯓ ﺳﯘ ﺋﯜﺯﯛﺵ ﻛﯚﻟﻰ ﺑﺎﺭ ﺑﻮﻟﯘﭖ، ﻳﺎﺯ ﻛﯜﻧﻠﯩﺮﻯ ﺑﯩﺰ ﺑﺎﻟﯩﻠﯩﻤﯩﺰﻧﻰ ﺩﺍﯞﺍﻣﻠﯩﻖ ﺷﯘ ﻳﻪﺭﮔﻪ ﺋﺎﭘﯩﺮﺍﺗﺘﯘﻕ. San Ramon ﺷﻪﻫﯩﺮﯨﺪﻩ ﺑﻮﻟﺴﺎ، ﺑﯩﺰﻧﯩﯔ ﺑﯩﺮ ﻛﯩﭽﯩﻚ ﺭﺍﻳﻮﻧﻐﺎ ﺗﻪﯞﻩ ﺑﯩﺮ ﺳﯘ ﺋﯜﺯﯛﺵ ﻛﯚﻟﻰ ﺑﯩﻠﻪﻥ ﺑﯩﺮ "tennis" ﺗﻮﭖ ﻣﻪﻳﺪﺍﻧﻰ ﺑﺎﺭ ﺋﯩﺪﻯ. ﺑﯩﺰﺩﻩ ﺋﯘﻻﺭﻧﯩﯔ ﺋﺎﭼﻘﯘﭼﻰ ﺑﺎﺭ ﺑﻮﻟﯘﭖ، ﺑﯩﺰ ﺋﯘﻻﺭﻧﻰ ﺧﺎﻟﯩﻐﺎﻥ ﯞﺍﻗﯩﺘﺘﺎ ﺋﯩﺸﻠﯩﺘﻪﻟﻪﻳﺘﯘﻕ. ﺑﯘ ﻛﯚﻟﻠﻪﺭﻧﯩﯔ ﺑﯩﺮ ﺗﯜﺯﯛﻣﻰ، 15 ﻳﺎﺷﺘﯩﻦ ﻛﯩﭽﯩﻚ ﺑﺎﻟﯩﻼﺭ ﺳﯘ ﺋﯜﺯﮔﻪﻧﺪﻩ، ﺋﯘﻻﺭﻧﯩﯔ ﻗﯧﺸﯩﺪﺍ ﭼﻮﻗﯘﻡ ﺑﯩﺮﻩﺭ 18 ﺗﯩﻦ ﻳﯘﻗﯩﺮﻯ ﻳﺎﺷﺘﯩﻜﻰ ﺋﺎﺩﻩﻡ ﺑﻮﻟﯘﺷﻰ ﻛﯧﺮﻩﻙ. ﺑﯩﺰ ﺑﺎﻟﯩﻠﯩﺮﯨﻤﯩﺰﻧﻰ ﺳﯘ ﺋﯜﺯﯛﺷﻜﻪ ﺋﺎﭘﺎﺭﻏﺎﻧﺪﺍ، ﻛﯚﺯﯨﻤﯩﺰﮔﻪ ﺩﺍﯞﺍﻣﻠﯩﻖ ﭼﯧﻠﯩﻘﯩﺪﯨﻐﺎﻥ ﺑﯩﺮ ﺋﯩﺶ، ﻧﯘﺭﻏﯘﻥ ﺋﺎﺗﺎ-ﺋﺎﻧﯩﻼﺭ ﺑﺎﻟﯩﻠﯩﺮﯨﻨﻰ ﺳﯘﺩﺍ ﺋﻮﻳﻨﯩﻐﯩﻠﻰ ﻗﻮﻳﯘﭖ ﺑﯧﺮﯨﭗ، ﺋﯚﺯﻟﯩﺮﻯ ﺑﯩﺮ ﺗﻪﺭﻩﭘﺘﯩﻦ ﺑﺎﻟﯩﻠﯩﺮﯨﻨﻰ ﻛﯚﺯﻩﺗﻜﻪﭺ، ﺑﯩﺮ ﺗﻪﺭﻩﭘﺘﯩﻦ ﻛﯩﺘﺎﺏ ﺋﻮﻗﯘﺷﺘﯩﻦ ﺋﯩﺒﺎﺭﻩﺕ ﺋﯩﺪﻯ. ﺑﯩﺰﻧﯩﯔ ﻳﺎﺗﺎﻕ ﺭﺍﻳﻮﻧﯩﻤﯩﺰﺩﺍ ﻣﻪﺧﺴﯘﺱ ﺑﺎﻟﯩﻼﺭ ﺋﻮﻳﻨﺎﺵ ﺋﯜﭼﯜﻥ ﻳﺎﺳﺎﻟﻐﺎﻥ ﺳﯧﺮﯨﻠﻐﯘﭺ، ﮔﯜﻟﻪﯕﮕﯜﭺ، ﻳﺎﻣﯩﺸﯩﭗ ﭼﯩﻘﯩﭗ ﺋﻮﻳﻨﺎﻳﺪﯨﻐﺎﻥ 2-3 ﻣﯧﺘﯩﺮ ﺋﯩﮕﯩﺰﻟﯩﻜﺘﯩﻜﻰ ﻗﯘﺭﯗﻟﻤﯩﻼﺭ ﯞﻩ ﻗﯘﻣﻠﯘﻗﻼﺭ ﺑﺎﺭ ﺑﻮﻟﯘﭖ، ﺋﯩﺸﻠﯩﻤﻪﻳﺪﯨﻐﺎﻥ ﺋﺎﻧﯩﻼﺭ ﺑﺎﻟﯩﻠﯩﺮﯨﻨﻰ ﺷﯘ ﻳﻪﺭﺩﻩ ﺋﻮﻳﻨﯩﻐﯩﻠﻰ ﻗﻮﻳﯘﭖ ﺑﯧﺮﯨﭗ، ﺋﯚﺯﻟﯩﺮﻯ ﻛﯩﺘﺎﺏ ﺋﻮﻗﯘﭖ ﺋﻮﻟﺘﯘﺭﺍﺗﺘﻰ. ﺑﯩﺰﻧﯩﯔ San Ramonﺩﯨﻜﻰ ﻗﻮﺷﻨﯩﻠﯩﺮﯨﻤﯩﺰﻧﯩﯔ ﻫﻪﻣﻤﯩﺴﻰ ﺩﯦﮕﯩﺪﻩﻙ ﮔﯧﺰﯨﺘﻜﻪ ﻣﯘﺷﺘﯩﺮﻯ ﺑﻮﻟﻐﺎﻧﯩﺪﻯ (ﻫﻪﺭ ﻛﯜﻧﻰ ﺗﺎﯓ ﺳﻪﻫﻪﺭﺩﻩ ﮔﯧﺰﯨﺖ ﺗﻮﺷﯘﻏﯘﭼﻰ ﮔﯧﺰﯨﺘﻠﻪﺭﻧﻰ ﻫﻪﺭ ﺑﯩﺮ ﻣﯘﺷﺘﯩﺮﯨﻨﯩﯔ ﺋﯚﻳﯩﻨﯩﯔ ﺋﺎﻟﺪﯨﻐﺎ ﺗﺎﺷﻼﭖ ﻗﻮﻳﯩﺪﯨﻐﺎﻥ ﺑﻮﻟﻐﺎﭼﻘﺎ، ﺑﯩﺰ ﺋﯩﺸﻘﺎ ﻣﺎﯕﻐﺎﻧﺪﺍ ﻗﻮﺷﻨﯩﻼﺭﻧﯩﯔ ﺋﯚﻳﯩﻨﯩﯔ ﺋﺎﻟﺪﯨﺪﯨﻜﻰ ﮔﯧﺰﯨﺘﻨﻰ ﻫﻪﺭ ﻛﯜﻧﻰ ﻛﯚﺭﯛﭖ ﺗﯘﺭﯨﻤﯩﺰ). ﻛﺎﻟﯩﻔﻮﺭﻧﯩﻴﻪﺩﯨﻜﻰ ﺷﻪﺧﺴﯩﻲ ﺋﯚﻳﻠﻪﺭﻧﯩﯔ ﺋﺎﺭﻗﺎ ﻫﻮﻳﻠﯩﺴﯩﻐﺎ ﻗﺎﺭﯨﺴﯩﯖﯩﺰ، ﻣﻪﺧﺴﯘﺱ ﻛﯩﺘﺎﺏ ﺋﻮﻗﯘﺵ ﺋﯜﭼﯜﻥ ﺗﻪﻳﻴﺎﺭﻻﻧﻐﺎﻥ ﻫﻪﺭ ﺧﯩﻞ ﺋﻮﺭﯗﻧﺪﺍﻗﻼﺭﻧﻰ ﭼﻮﻗﯘﻡ ﻛﯚﺭﯛﺳﯩﺰ. ﻣﻪﻥ ﺑﯩﻠﻪﻥ ﺑﯩﺮ ﻣﯩﻨﯩﺒﯘﺳﺘﺎ ﺋﯩﺸﻘﺎ ﺑﺎﺭﯨﺪﯨﻐﺎﻥ ﺧﺎﺩﯨﻤﻼﺭﻧﯩﯔ ﺋﯩﭽﯩﺪﻩ، ﻳﻮﻝ ﺑﻮﻳﻰ ﻛﯩﺘﺎﺏ ﺋﻮﻗﯘﻳﺪﯨﻐﺎﻧﻼﺭﺩﯨﻦ ﺑﯩﺮ ﻗﺎﻧﭽﯩﺴﻰ ﺑﺎﺭ.

ﺑﯩﺰ ﺋﺎﭘﺘﻮﺑﯘﺱ ﺑﯧﻜﯩﺘﯩﺪﻩ ﺋﺎﭘﺘﻮﺑﯘﺱ ﺳﺎﻗﻼﭖ ﺗﯘﺭﻏﺎﻥ، ﭘﻮﻳﯩﺰ ﺑﯧﻜﯩﺘﯩﺪﻩ ﭘﻮﻳﯩﺰ ﺳﺎﻗﻼﭖ ﺗﯘﺭﻏﺎﻥ، ﺋﺎﻳﺮﻭﭘﯩﻼﻥ ﺋﯩﺴﺘﺎﻧﺴﯩﺴﯩﺪﺍ ﺋﺎﻳﺮﻭﭘﯩﻼﻥ ﺳﺎﻗﻼﭖ ﺗﯘﺭﻏﺎﻧﻼﺭﻧﯩﯔ ﻛﯚﭘﯩﻨﭽﯩﺴﻰ ﮔﯧﺰﯨﺖ ﻳﺎﻛﻰ ﻛﯩﺘﺎﺏ ﺋﻮﻗﯘﭖ ﺗﯘﺭﻏﺎﻧﻠﯩﻘﯩﻨﻰ ﻛﯚﺭﯛﭖ ﺗﯘﺭﯨﻤﯩﺰ. ﺋﺎﻳﺮﻭﭘﯩﻼﻥ ﯞﻩ ﭘﻮﻳﯩﺰﺩﯨﻜﻰ ﻳﻮﻟﯘﭼﯩﻼﺭﻧﯩﯔ ﻛﯚﭘﯩﻨﭽﯩﺴﯩﻤﯘ ﻛﯩﺘﺎﺏ ﺋﻮﻗﯘﯞﺍﺗﻘﺎﻧﻠﯩﻘﯩﻨﻰ ﻛﯚﺭﯨﻤﯩﺰ. ﺑﺎﻏﭽﯩﻼﺭﺩﯨﻜﻰ ﭼﯩﻤﻠﯩﻘﻨﯩﯔ ﯞﻩ ﺩﯦﯖﯩﺰ ﺑﻮﻳﯩﺪﯨﻜﻰ ﻗﯘﻣﻠﯘﻗﻨﯩﯔ ﺋﯜﺳﺘﯩﺪﻩ ﺋﺎﭘﺘﺎﭖ ﺳﯩﻨﯩﯟﯦﺘﯩﭗ، ﻛﯩﺘﺎﺏ ﺋﻮﻗﯘﭖ ﻳﺎﺗﻘﺎﻥ ﻛﯩﺸﯩﻠﻪﺭﻧﻰ ﺩﺍﯞﺍﻣﻠﯩﻖ ﺋﯘﭼﺮﯨﺘﯩﻤﯩﺰ. ﺩﻭﻛﺎﻧﻼﺭﺩﺍ ﭘﯘﻝ ﺗﯚﻟﻪﺷﻜﻪ ﺋﯚﭼﺮﻩﺕ ﺗﯘﺭﻏﺎﻧﺪﺍ، ﻧﯚﯞﯨﺘﻰ ﻛﻪﻟﮕﻪﻥ ﺋﺎﻳﺎﻟﻼﺭﻧﯩﯔ ﺳﻮﻣﻜﯩﺴﯩﺪﯨﻦ ﭘﯘﻝ ﻳﺎﻛﻰ ﺑﺎﻧﻜﺎ ﻛﺎﺭﺗﯩﻠﯩﺮﯨﻨﻰ ﺋﯧﻠﯩﺶ ﺋﯜﭼﯜﻥ، ﺋﺎﻟﺪﻯ ﺑﯩﻠﻪﻥ ﺳﻮﻣﻜﯩﺴﯩﺪﯨﻜﻰ ﻛﯩﺘﺎﺑﻨﻰ ﺋﯧﻠﯩﭗ ﺑﯩﺮ ﺗﻪﺭﻩﭘﻜﻪ ﻗﻮﻳﯘﭖ ﻗﻮﻳﻐﯩﻨﯩﻨﻰ ﺩﺍﯞﺍﻣﻠﯩﻖ ﻛﯚﺭﯛﭖ ﺗﯘﺭﯨﻤﯩﺰ. ﻣﯧﻨﯩﯔ ﭘﻪﺭﯨﺰﯨﻤﭽﻪ، ﺳﻮﻣﻜﺎ ﻛﯚﺗﯜﺭﯨﯟﺍﻟﻐﺎﻥ ﺋﺎﻣﯧﺮﯨﻜﯩﻠﯩﻘﻼﺭﻧﯩﯔ ﺳﻮﻣﻜﯩﺴﯩﻨﻰ ﺋﺎﺧﺘﯘﺭﺳﺎ، ﻳﯧﺮﯨﻤﯩﺪﯨﻦ ﻛﯚﭘﯩﻨﯩﯔ ﺳﻮﻣﻜﯩﺴﯩﺪﯨﻦ ﻛﻪﻡ ﺩﯦﮕﻪﻧﺪﻩ ﺑﯩﺮﻩﺭ ﻛﯩﺘﺎﺏ، ﮊﻭﺭﻧﺎﻝ ﻳﺎﻛﻰ ﮔﯧﺰﯨﺖ ﭼﯩﻘﯩﺸﻰ ﻣﯘﻣﻜﯩﻦ. ﺋﺎﻣﯧﺮﯨﻜﯩﺪﯨﻜﻰ ﺧﯧﻠﻰ ﻧﯘﺭﻏﯘﻥ ﻛﯩﺘﺎﺑﻼﺭ، ﺑﻮﻟﯘﭘﻤﯘ ﺭﻭﻣﺎﻧﻼﺭﻧﯩﯔ ﺋﯘﺯﯗﻧﻠﯘﻗﻰ ﺑﯩﻠﻪﻥ ﻛﻪﯕﻠﯩﮕﻰ ﺋﺎﺩﻩﺗﺘﯩﻜﻰ ﻛﯩﺘﺎﭘﻼﺭﻧﯩﯖﻜﯩﺪﯨﻦ ﻛﯩﭽﯩﻚ ﺑﻮﻟﯩﺪﯗ. ﺷﯘﯕﺎ ﺋﯘﻻﺭﻧﻰ ﻛﯚﺗﯜﺭﯛﭖ ﻳﯜﺭﯛﺵ ﺋﯩﻨﺘﺎﻳﯩﻦ ﻗﻮﻻﻳﻠﯩﻘﺪﯗﺭ.

ﺗﻪﺭﻩﻗﻘﯩﻲ ﺗﺎﭘﻘﺎﻥ ﺟﻪﻣﺌﯩﻴﻪﺗﻨﯩﯔ ﺑﯩﺮ ﺋﺎﻻﻫﯩﺪﯨﻠﯩﻜﻰ، ﺑﯘ ﺟﻪﻣﺌﯩﻴﻪﺗﺘﯩﻜﻰ ﻛﯩﺸﯩﻠﻪﺭ ﺑﯩﺮ-ﺑﯩﺮﻯ ﺑﯩﻠﻪﻥ ﺋﯧﻐﯩﺰ ﺋﺎﺭﻗﯩﻠﯩﻖ ﺋﺎﻻﻗﻪ ﻗﯩﻠﯩﺸﻘﺎ ﺋﯩﻨﺘﺎﻳﯩﻦ ﻗﺎﺩﯨﺮﺩﯗﺭ. ﺋﺎﻣﯧﺮﯨﻜﺎ ﺟﻪﻣﺌﯩﻴﯩﺘﯩﺪﻩ، ﻧﯘﺭﻏﯘﻥ ﺋﯩﺸﻼﺭ ﺗﯧﻠﯧﻔﻮﻥ ﺋﺎﺭﻗﯩﻠﯩﻘﻼ ﺑﯧﺠﯩﺮﯨﻠﯩﺪﯗ. ﺗﯧﻠﯧﻔﻮﻥ ﺋﺎﺭﻗﯩﻠﯩﻖ ﺑﯧﺠﯩﺮﮔﯩﻠﻰ ﺑﻮﻟﯩﺪﯨﻐﺎﻥ ﺋﯩﺸﻼﺭ ﺋﯜﭼﯜﻥ ﻫﯧﭻ ﻛﯩﻢ ﻣﻪﺧﺴﯘﺱ ﻳﻮﻝ ﻳﯜﺭﯛﭖ، ﻗﺎﺭﺷﻰ ﺗﻪﺭﻩﭘﻨﯩﯔ ﻗﯧﺸﯩﻐﺎ ﺑﺎﺭﻣﺎﻳﺪﯗ. ﺑﻪﻟﮕﯩﻠﯩﻚ ﻣﻪﺩﻩﻧﯩﻴﻪﺕ ﺳﻪﯞﯨﻴﯩﺴﯩﮕﻪ ﺋﯩﮕﻪ ﻛﯩﺸﯩﻠﻪﺭ ﺑﯩﻠﻪﻥ ﻫﻪﺭ ﻗﺎﻧﺪﺍﻕ ﺑﯩﺮ ﻣﻪﺳﯩﻠﻪ ﺋﯜﺳﺘﯩﺪﻩ ﺳﯚﺯﻟﻪﺷﺴﻪ، ﺋﯘﻻﺭ ﻧﺎﻫﺎﻳﯩﺘﻰ ﺋﻮﺭﯗﻧﻠﯘﻕ ﭘﯩﻜﯩﺮ ﻳﯜﺭﮔﯜﺯﻩﻟﻪﻳﺪﯗ. ﻣﺎﻧﺎ ﺑﯘﻻﺭ ﻳﯘﻗﯩﺮﯨﻘﯩﺪﻩﻙ ﻛﯩﺘﺎﺏ ﺋﻮﻗﯘﺷﻨﻰ ﺋﯚﻣﯜﺭ ﺑﻮﻳﻰ ﺗﺎﺷﻠﯩﻤﺎﺳﻠﯩﻖ ﺋﺎﺩﯨﺘﯩﻨﯩﯔ ﻧﻪﺗﯩﺠﯩﺴﯩﺪﯗﺭ. ﺑﺎﻛﻼﯞﯨﺮ  ﺋﯘﻧﯟﺍﻧﯩﺪﯨﻦ ﻳﯘﻗﯩﺮﯨﻨﻰ ﺗﻪﻟﻪﭖ ﻗﯩﻠﯩﺪﯨﻐﺎﻥ ﺧﯩﺰﻣﻪﺗﻠﻪﺭﻧﯩﯔ ﺋﯧﻼﻧﻠﯩﺮﯨﻐﺎ ﻗﺎﺭﯨﺴﯩﯖﯩﺰﻣﯘ، ﺋﯘﻻﺭﻧﯩﯔ ﻫﻪﻣﻤﯩﺴﯩﺪﻩ "ﻣﯘﻛﻪﻣﻤﻪﻝ ﺋﯧﻐﯩﺰ ﺑﯩﻠﻪﻥ ﻗﻪﻟﻪﻡ ﺋﺎﺭﻗﯩﻠﯩﻖ ﺋﺎﻻﻗﯩﻠﯩﺸﯩﺶ ﺋﯩﻘﺘﯩﺪﺍﺭﻯ ﭼﻮﻗﯘﻡ ﺑﻮﻟﯘﺷﻰ ﻛﯧﺮﻩﻙ" ﺩﯦﮕﻪﻥ ﺟﯜﻣﻠﯩﻨﻰ ﭼﻮﻗﯘﻡ ﻛﯚﺭﯨﺴﯩﺰ. ﺑﯘ ﺋﺎﻣﯧﺮﯨﻜﺎ ﺟﻪﻣﺌﯩﻴﯩﺘﯩﺪﻩ ﺋﯧﻐﯩﺰ ﺑﯩﻠﻪﻥ ﻗﻪﻟﻪﻡ ﺋﺎﺭﻗﯩﻠﯩﻖ ﺋﯚﺯ-ﺋﺎﺭﺍ ﺋﯜﻧﯜﻣﻠﯜﻙ ﺋﺎﻻﻗﯩﻠﯩﺸﯩﺸﻨﯩﯔ ﻗﺎﻧﭽﯩﻠﯩﻚ ﻣﯘﻫﯩﻢ ﺭﻭﻝ ﺋﻮﻳﻨﺎﻳﺪﯨﻐﺎﻧﻠﯩﻘﯩﻨﻰ ﭼﯜﺷﻪﻧﺪﯛﺭﯛﭖ ﺑﯧﺮﯨﺪﯗ. ﻣﻪﻥ "CVI Laser" ﺩﯦﮕﻪﻥ ﺷﯩﺮﻛﻪﺗﺘﻪ ﺋﯩﺸﻠﯩﮕﻪﻥ ﯞﺍﻗﺘﯩﻤﺪﺍ، ﺑﯩﺰﻧﯩﯔ ﺑﯘ ﺷﯚﺑﻪ ﺷﯩﺮﻛﯩﺘﯩﻤﯩﺰﺩﻩ ﻣﻪﺧﺴﯘﺱ ﺗﯧﻠﯧﻔﻮﻥ ﺋﺎﺭﻗﯩﻠﯩﻖ ﺳﻮﺩﺍ-ﺳﯧﺘﯩﻖ ﻗﯩﻠﯩﺪﯨﻐﺎﻥ ﺧﺎﺩﯨﻤﺪﯨﻦ 3 ﻛﯩﺸﻰ ﺑﺎﺭ ﺋﯩﺪﻯ. ﺑﻪﺯﯨﺪﻩ ﺋﺎﻏﺮﯨﻖ ﯞﻩ ﺗﻪﺗﯩﻞ ﻗﯩﻠﯩﭗ ﺩﻩﻡ ﺋﯧﻠﯩﺶ ﺳﻪﯞﻩﺑﻠﯩﺮﻯ ﺑﯩﻠﻪﻥ ﺑﯘ 3 ﻛﯩﺸﯩﻨﯩﯔ ﻫﯧﭽﻘﺎﻳﺴﯩﺴﻰ ﺋﯩﺸﻘﺎ ﻛﻪﻟﻤﻪﻱ ﻗﺎﻟﻐﺎﻧﺪﺍ، ﻣﯧﻨﯩﯔ ﺑﺎﺷﻠﯩﻘﯩﻢ ﻣﯧﻨﻰ ﺷﯘ ﺋﯩﺸﻘﺎ ﺳﯧﻠﯩﭗ ﻗﻮﻳﺎﺗﺘﻰ. ﺋﯘﻧﯩﯖﺪﯨﻦ ﺑﺎﺷﻘﺎ، ﺑﻪﺯﻯ ﺧﯧﺮﯨﺪﺍﺭﻻﺭ ﺋﯚﺯﯨﮕﻪ ﻻﺯﯨﻢ ﺑﻮﻟﻐﺎﻥ ﺋﺎﭘﭙﺎﺭﺍﺗﻨﯩﯔ ﻓﯘﻧﻜﯩﺴﯩﻴﯩﺴﯩﻨﻰ ﺑﯩﺰﻧﯩﯔ ﺗﯩﺠﺎﺭﻩﺕ ﺧﺎﺩﯨﻤﻠﯩﺮﯨﻤﯩﺰﻧﯩﯔ ﺑﯩﺮﻩﺭﺳﯩﮕﻪ ﺋﯧﻴﺘﯩﭗ، ﺋﯘﻧﯩﯔ ﻻﻳﯩﻬﯩﺴﻰ ﻗﺎﻧﺪﺍﻕ ﺑﻮﻟﺴﺎ ﻳﺎﺧﺸﯩﻠﯩﻘﯩﻨﻰ، ﻫﻪﻣﺪﻩ ﺋﯘﻧﯩﯖﻐﺎ ﻗﺎﻳﺴﻰ ﺯﺍﭘﭽﺎﺳﻼﺭﻧﻰ ﺋﺎﻟﺴﺎ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺳﻮﺭﯨﻐﺎﻧﺪﺍ، ﺋﯘ ﺧﺎﺩﯨﻤﻨﯩﯔ ﺗﯧﺨﻨﯩﻜﯩﺪﯨﻦ ﻳﯧﺘﻪﺭﻟﯩﻚ ﺧﻪﯞﯨﺮﻯ ﺑﻮﻟﻤﯩﻐﺎﭼﻘﺎ، ﻣﯧﻨﻰ ﻳﺎﺭﺩﻩﻣﮕﻪ ﭼﺎﻗﯩﺮﺍﺗﺘﻰ. ﻣﻪﻥ ﺋﯘﻧﺪﺍﻕ ﺧﯧﺮﯨﺪﺍﺭﻏﺎ ﺗﯧﻠﯧﻔﻮﻧﺪﯨﻼ ﺑﯩﺮﻩﺭ ﻧﻪﺭﺳﯩﻨﻰ ﻻﻳﯩﻬﯩﻠﻪﭖ ﭼﯜﺷﻪﻧﺪﯛﺭﯛﭖ، ﺋﯘﻧﯩﯖﻐﺎ ﻗﺎﻳﺴﻰ ﺯﺍﭘﭽﺎﺳﻼﺭﻧﻰ ﺋﯩﺸﻠﻪﺗﺴﻪ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺋﯧﻴﺘﯩﭗ ﺑﯧﺮﻩﺗﺘﯩﻢ. ﺑﯩﺮ ﻗﯧﺘﯩﻢ ﺑﯩﺮ ﺋﺎﻟﯩﻲ ﻣﻪﻛﺘﻪﭘﻨﯩﯔ ﭘﺮﻭﻓﯧﺴﺴﻮﺭﻯ ﺋﯚﺯﯨﮕﻪ ﺑﯩﺮ ﺋﺎﻻﻫﯩﺪﻩ ﻻﺯﯦﺮ ﺋﻪﻳﻨﯩﻜﯩﻨﯩﯔ ﻻﺯﯨﻤﻠﯩﻘﯩﻨﻰ، ﺋﻪﻣﻤﺎ ﺋﯘ ﺋﻪﻳﻨﻪﻛﻨﯩﯔ ﺑﯩﺰﻧﯩﯔ ﺷﯩﺮﻛﻪﺗﻨﯩﯔ ﻣﻪﻫﺴﯘﻻﺕ ﺗﯩﺰﯨﻤﻠﯩﻜﯩﺪﻩ ﻳﻮﻗﻠﯘﻗﯩﻨﻰ ﺋﯧﻴﺘﯩﭗ، ﻣﯧﻨﯩﯔ ﺋﺎﺷﯘﻧﺪﺍﻕ ﺋﻪﻳﻨﻪﻛﻨﻰ ﻗﺎﻳﺴﻰ ﺷﯩﺮﻛﻪﺗﻨﯩﯔ ﭼﯩﻘﯩﺮﯨﺪﯨﻐﺎﻧﻠﯩﻘﯩﻨﻰ ﺋﯧﻴﺘﯩﭗ ﺑﯧﺮﯨﺸﯩﻤﻨﻰ ﺋﯩﻠﺘﯩﺠﺎ ﻗﯩﻠﺪﻯ. ﻣﻪﻥ ﺑﯩﺰﻧﯩﯔ ﺷﯩﺮﻛﻪﺗﻨﯩﯔ ﺋﯩﺴﻜﯩﻼﺗﯩﺪﯨﻦ ﺯﺍﭘﭽﺎﺱ ﺗﯧﭙﯩﭗ ﺑﯧﺮﯨﺪﯨﻐﺎﻥ ﺑﯩﺮ ﺧﺎﺩﯨﻤﻨﻰ ﺧﯘﺳﯘﺳﯩﻴﯩﺘﻰ ﻫﯧﻠﯩﻘﻰ ﺋﻪﻳﻨﻪﻛﻜﻪ ﻳﯧﻘﯩﻦ ﻛﯧﻠﯩﺪﯨﻐﺎﻥ ﺑﯩﺮ ﺧﯩﻞ ﺋﻪﻳﻨﻪﻛﺘﯩﻦ 10 ﺩﺍﻧﯩﺴﯩﻨﻰ ﻗﺎﻳﺘﺎ ﺋﯚﻟﭽﻪﭖ، ﺋﯘﻧﯩﯔ ﻧﻪﺗﯩﺠﯩﺴﯩﻨﻰ ﻣﺎﯕﺎ ﻣﺎﯕﺪﯗﺭﯗﭖ ﺑﯧﺮﯨﺸﻜﻪ ﺑﯘﻳﺮﯗﺩﯗﻡ. ﻧﻪﺗﯩﺠﯩﺴﻰ ﭼﯩﻘﻘﺎﻧﺪﺍ، ﺋﯘﻻﺭﻧﯩﯔ ﺋﯩﭽﯩﺪﯨﻜﻰ ﻫﯧﻠﯩﻘﻰ ﭘﺮﻭﻓﯧﺴﺴﻮﺭﻏﺎ ﻻﺯﯨﻢ ﺋﻪﻳﻨﻪﻛﻜﻪ ﺋﻪﯓ ﻳﯧﻘﯩﻦ ﻛﯧﻠﯩﺪﯨﻐﺎﻥ ﺑﯩﺮﯨﻨﻰ ﺗﺎﻟﻼﭖ، ﺋﯘ ﭘﺮﻭﻓﯧﺴﺴﻮﺭﻏﺎ ﺳﯧﺘﯩﭗ ﺑﻪﺭﺩﯨﻢ. ﺋﯘ ﭘﺮﻭﻓﯧﺴﺴﻮﺭ ﻣﺎﯕﺎ ﺟﯩﻖ ﺭﻩﻫﻤﻪﺕ ﺋﯧﻴﺘﺘﻰ. ﻫﻪﻣﺪﻩ ﺋﯚﺯ ﺗﻪﺟﺮﯨﺒﯩﺴﯩﻨﻰ ﺑﯘ ﺋﻪﻳﻨﻪﻙ ﺑﯩﻠﻪﻥ ﻏﻪﻟﯩﺒﯩﻠﯩﻚ ﺋﯩﺸﻠﻪﭖ، ﺗﻪﺗﻘﯩﻘﺎﺕ ﻧﻪﺗﯩﺠﯩﺴﯩﻨﻰ ﺑﯩﺮ ﻳﯘﻗﯩﺮﻯ ﺩﻩﺭﯨﺠﯩﻠﯩﻚ ﺋﯩﻠﻤﯩﻲ ﺗﻪﺗﻘﯩﻘﺎﺕ ﮊﻭﺭﻧﯩﻠﯩﺪﺍ ﺋﯧﻼﻥ ﻗﯩﻠﻐﺎﻧﺪﺍ، ﻣﺎﻗﺎﻟﯩﺴﻨﯩﯔ ﺋﻪﯓ ﺋﺎﺧﯩﺮﺳﯩﺪﺍ ﻣﯧﻨﯩﯔ ﺋﯩﺴﻤﯩﻤﻨﻰ ﺋﺎﺗﺎﭖ ﺗﯘﺭﯗﭖ ﻣﺎﯕﺎ ﻗﺎﻳﺘﯩﺪﯨﻦ ﺭﻩﻫﻤﻪﺕ ﺋﯧﻴﺘﯩﭙﺘﯘ. ﺋﯘ ﭘﺮﻭﻓﯧﺴﺴﻮﺭ ﺑﯘ ﯞﻩﻗﻪﻧﻰ ﺋﯚﺯﯨﻨﯩﯔ ﺑﺎﺷﻘﺎ ﺗﻮﻧﯘﺷﻠﯩﺮﯨﻐﯩﻤﯘ ﺋﯧﻴﺘﯩﭗ ﺑﯧﺮﯨﭙﺘﯘ. ﺷﯘﻧﯩﯔ ﺑﯩﻠﻪﻥ ﺑﯩﺮ ﻣﻪﺯﮔﯩﻞ ﺑﯩﺮ ﻗﺎﻧﭽﻪ ﺋﺎﻟﯩﻲ ﻣﻪﻛﺘﻪﭘﻨﯩﯔ ﭘﺮﻭﻓﯧﺴﺴﻮﺭﻟﯩﺮﻯ ﺑﯩﺰﻧﯩﯔ ﺷﯩﺮﻛﻪﺗﺘﯩﻦ ﺑﯩﺮ ﻧﻪﺭﺳﻪ ﺋﯧﻠﯩﺶ ﺋﯜﭼﯜﻥ ﺗﯧﻠﯧﻔﻮﻥ ﻗﯩﻠﺴﺎ، ﺗﯧﻠﯧﻔﻮﻧﻨﻰ ﺋﯧﻠﯩﭙﻼ، "ﺑﯩﺰ ﺩﻭﻛﺘﯘﺭ ﺋﻪﺭﻛﯩﻦ ﺳﯩﺪﯨﻖ ﺑﯩﻠﻪﻥ ﻛﯚﺭﯛﺷﻪﺗﺘﯘﻕ" ﺩﻩﻳﺪﯨﻐﺎﻥ ﺑﻮﻟﯘﭖ ﻗﺎﻟﺪﻯ. ﺑﯘ ﺋﯩﺸﺘﯩﻦ ﻛﯧﻴﯩﻦ ﻣﯧﻨﯩﯔ ﺋﻪﻳﻨﻰ ﯞﺍﻗﯩﺘﺘﯩﻜﻰ ﺑﺎﺷﻠﯩﻘﯩﻢ Alex ﻧﺎﻫﺎﻳﯩﺘﻰ ﺗﻪﺳﯩﺮﻟﯩﻨﯩﭗ، ﺷﯘﻧﯩﯖﺪﯨﻦ ﻛﯧﻴﯩﻦ ﺑﯩﺰ ﭘﺎﺭﺍﯕﻼﺷﻘﺎﻥ ﯞﺍﻗﯩﺘﺘﺎ ﻣﺎﯕﺎ "ﺳﻪﻥ ﻛﺎﺭﺍﻣﻪﺕ ﺋﯩﻨﮋﯨﻨﯧﺮ ﺑﻮﻟﯘﭘﻼ ﻗﺎﻟﻤﺎﻱ، ﻧﺎﻫﺎﻳﯩﺘﻰ ﺋﯘﺳﺘﺎ ﺳﯧﺘﯩﻘﭽﻰ (ﺋﯩﻨﮕﻠﯩﺰﭼﻪ 'salesperson') ﺋﯩﻜﻪﻧﺴﻪﻥ" ﺩﻩﻳﺪﯨﻐﺎﻥ ﺑﻮﻟﺪﻯ. ﻣﻪﻥ "Wave Splitter" ﺩﯦﮕﻪﻥ ﺷﯩﺮﻛﻪﺗﺘﻪ ﺋﯩﺸﻠﻪﯞﺍﺗﻘﺎﻧﺪﺍ، ﺷﯩﺮﻛﻪﺗﻨﯩﯔ ﺳﻮﺩﺍ-ﺳﯧﺘﯩﻖ ﺑﯚﻟﯜﻣﯩﺪﯨﻜﯩﻠﻪﺭﮔﻪ ﻳﺎﺭﺩﻩﻣﻠﯩﺸﯩﭗ، ﻳﺎﭘﻮﻧﯩﻴﻪﮔﻪ ﺑﯧﺮﯨﭗ، ﺑﯩﺰﻧﯩﯔ ﺷﯩﺮﻛﻪﺗﻨﯩﯔ NEC, Hitachi, Fujitsu ﯞﻩ Sumitomo ﻗﺎﺗﺎﺭﻟﯩﻖ ﭼﻮﯓ ﺷﯩﺮﻛﻪﺗﻠﻪﺭ ﺑﯩﻠﻪﻥ ﺋﯧﻠﯩﭗ ﺑﺎﺭﻏﺎﻥ «ﺗﯧﺨﻨﯩﻜﯩﻠﯩﻖ ﺳﯚﻫﺒﻪﺕ»ﻟﯩﺮﯨﮕﻪ ﻗﺎﺗﻨﺎﺷﺘﯩﻢ. ﻫﻪﻣﺪﻩ ﺋﯚﺯﯛﻣﻨﯩﯔ ﺗﯧﺨﻨﯩﻜﯩﻠﯩﻖ ﺋﯩﻘﺘﯩﺪﺍﺭﻯ ﺑﯩﻠﻪﻥ ﻳﺎﭘﻮﻧﭽﻪ ﺗﯩﻠﯩﻤﺪﯨﻦ ﭘﺎﻳﺪﯨﻠﯩﻨﯩﭗ، ﺑﯩﺰﻧﯩﯔ ﺋﯘ ﻳﺎﭘﻮﻧﻠﯘﻕ ﺧﯧﺮﯨﺪﺍﺭﻟﯩﺮﯨﻤﯩﺰﻧﻰ ﺧﯧﻠﻰ ﺗﻪﺳﯩﺮﻟﻪﻧﺪﯛﺭﯛﭖ، ﺷﯩﺮﻛﯩﺘﯩﻤﯩﺰﻧﯩﯔ ﺳﻮﺩﺍ-ﺳﯧﺘﯩﻖ ﺋﯩﺸﻠﯩﺮﯨﻐﺎ ﻛﯚﺯﮔﻪ ﻛﯚﺭﯛﻧﻪﺭﻟﯩﻚ ﺗﯚﻫﭙﻪ ﻗﻮﺷﺘﯘﻡ. 2002-ﻳﯩﻠﻰ ﻓﯧﯟﺭﺍﻟﺪﺍ ﻣﻪﻥ ﺷﯩﺮﻛﻪﺗﺘﯩﻦ ﺑﯩﺮ ﻫﻪﭘﺘﻪ ﺭﯗﺧﺴﻪﺕ ﺳﻮﺭﺍﭖ، ﺋﺎﻣﯧﺮﯨﻜﯩﻨﯩﯔ ﺑﺎﺷﻘﺎ ﺑﯩﺮ ﺷﯩﺘﺎﺗﯩﻐﺎ ﺩﻩﻡ ﺋﯧﻠﯩﺸﻘﺎ ﻛﻪﺗﻜﻪﻧﺪﻩ، ﺑﯩﺰﻧﯩﯔ ﺷﯩﺮﻛﻪﺗﺘﻪ ﺑﯩﺮ ﭼﻮﯓ ﻛﯚﻟﻪﻣﻠﯩﻚ ﺧﺎﺩﯨﻢ ﻗﯩﺴﻘﺎﺭﺗﯩﺶ ﺑﻮﻟﯘﭖ، ﻣﯧﻨﯩﯔ ﺋﯜﺳﺘﯜﻣﺪﯨﻜﻰ ﺋﯩﻨﮋﯨﻨﯧﺮﻟﯩﻚ ﺑﯚﻟﯜﻣﯩﮕﻪ ﻣﻪﺳﺌﯘﻝ 2 ﻣﯘﺋﺎﯞﯨﻦ ﺭﻩﺋﯩﺴﻨﯩﯔ ﻫﻪﺭ ﺋﯩﻜﻜﯩﻠﯩﺴﯩﻨﻰ ﺷﯩﺮﻛﻪﺗﺘﯩﻦ ﭼﯩﻘﯩﺮﯞﯦﺘﯩﭙﺘﯘ. ﺷﯘﻧﯩﯔ ﺑﯩﻠﻪﻥ ﺷﯩﺮﻛﻪﺗﻨﯩﯔ ﺳﻮﺩﺍ ﺳﯧﺘﯩﻘﯩﻐﺎ ﻣﻪﺳﺌﯘﻝ ﻣﯘﺋﺎﯞﯨﻦ ﺭﻩﺋﯩﺴﻰ ﻣﯧﻨﯩﯔ ﺋﯩﮕﯩﺴﯩﺰ ﻗﺎﻟﻐﺎﻧﻠﯩﻘﯩﻤﺪﯨﻦ ﭘﺎﻳﺪﯨﻠﯩﻨﯩﭗ، ﻣﯧﻨﻰ ﺋﯩﻨﮋﯨﻨﯧﺮﻟﯩﻖ ﺑﯚﻟﯜﻣﯩﺪﯨﻦ، ﺳﻮﺩﺍ-ﺳﯧﺘﯩﻖ ﺑﯚﻟﯜﻣﯩﮕﻪ ﻳﯚﺗﻜﯩﯟﺍﭘﺘﯘ. ﺩﻩﻡ ﺋﯧﻠﯩﺸﺘﯩﻦ ﻗﺎﻳﺘﯩﭗ ﻛﯧﻠﯩﭗ، ﺑﯘ ﺋﯩﺸﺘﯩﻦ ﺧﻪﯞﻩﺭ ﺗﺎﭘﻘﺎﻧﺪﯨﻦ ﻛﯧﻴﯩﻦ، ﻣﻪﻥ ﻗﺎﺗﺘﯩﻖ ﻧﺎﺭﺍﺯﻯ ﺑﻮﻟﺪﯗﻡ. ﺋﯘﻻﺭﻏﺎ "ﻣﻪﻥ ﺋﯩﻨﮋﯨﻨﯧﺮ ﺑﯚﻟﯜﻣﯩﺪﻩ ﺗﯘﺭﯗﯞﯦﺮﯨﭗ، ﺳﯩﻠﻪﺭﮔﻪ ﻗﺎﻧﭽﯩﻠﯩﻚ ﻳﺎﺭﺩﻩﻡ ﻛﯧﺮﻩﻙ ﺑﻮﻟﺴﺎ، ﺷﯘﻧﭽﯩﻠﯩﻚ ﺋﯩﺸﻠﻪﭖ ﺑﻪﺭﻩﻱ. ﺷﯘﯕﺎ ﻣﯧﻨﻰ ﻳﯚﺗﻜﯩﻤﻪﯕﻼﺭ. ﺋﻪﮔﻪﺭ ﻣﯘﺷﯘﻧﺪﺍﻕ ﻣﻪﺟﺒﯘﺭﻯ ﻳﯚﺗﻜﯩﺴﻪﯕﻼﺭ، ﻣﻪﻥ ﺑﯘ ﺷﯩﺮﻛﻪﺗﺘﯩﻦ ﻛﯧﺘﯩﺸﻜﻪ ﻣﻪﺟﺒﯘﺭ ﺑﻮﻟﯩﻤﻪﻥ" ﺩﯦﺪﯨﻢ. ﻣﻪﻥ ﺋﯘ ﭼﺎﻏﺪﺍ ﺷﯩﺮﻛﻪﺗﻨﯩﯔ ﺋﯩﻨﮕﻠﯩﺰﭼﻪ "Planar Light wave Circuits" ﺩﻩﭖ ﺋﺎﺗﯩﻠﯩﺪﯨﻐﺎﻥ "ﻳﯩﻐﯩﻨﭽﺎﻕ ﻧﯘﺭ ﻳﻮﻟﻰ ﺗﯧﺨﻨﯩﻜﯩﺴﻰ" ﺩﯦﮕﻪﻥ ﺑﯩﺮ ﺋﻪﯓ ﻳﯧﯖﻰ ﺗﯧﺨﻨﯩﻜﯩﺴﯩﻐﺎ ﻣﻪﺳﺌﯘﻝ ﺋﯩﺪﯨﻢ. ﺑﯩﺰ ﻣﯘﺷﯘ ﺗﯧﺨﻨﯩﻜﺎ ﺋﺎﺭﻗﯩﻠﯩﻖ ﭼﯩﻘﯩﺮﯨﻠﯩﺪﯨﻐﺎﻥ ﺑﯩﺮ ﺯﺍﭘﭽﺎﺳﻨﯩﯔ ﺋﻪﯓ ﺋﺎﺧﯩﺮﻗﻰ ﺑﺎﺳﻘﯘﭼﯩﻐﺎ ﻛﻪﻟﮕﻪﻥ ﺑﻮﻟﯘﭖ، ﻣﻪﻥ ﺋﯘﻧﻰ ﺋﯚﺯﯛﻡ ﺑﯩﺮ ﺑﺎﺷﻘﺎ ﺋﯧﻠﯩﭗ ﭼﯩﻘﯩﺸﻨﻰ ﺑﻪﻛﻤﯘ ﺋﺎﺭﺯﯗ ﻗﯩﻼﺗﺘﯩﻢ. ﺋﯘﻧﯩﯔ ﺋﯜﺳﺘﯩﮕﻪ، ﺋﺎﻣﯧﺮﯨﻜﯩﺪﺍ ﺳﻮﺩﺍ-ﺳﯧﺘﯩﻖ ﺋﯩﺸﻠﯩﺮﻯ ﺑﯩﻠﻪﻥ ﺷﯘﻏﯘﻟﻠﯩﻨﯩﺪﯨﻐﺎﻧﻼﺭ ﺋﯩﻨﺘﺎﻳﯩﻦ ﻛﯚﭖ ﺑﻮﻟﯘﭖ، ﺷﯩﺮﻛﻪﺗﺘﻪ ﺋﺎﺩﻩﻡ ﻗﯩﺴﻘﺎﺭﺗﺴﺎ، ﺋﺎﻟﺪﻯ ﺑﯩﻠﻪﻥ ﺷﯘﻧﺪﺍﻗﻼﺭﻧﻰ ﻗﯩﺴﻘﺎﺭﺗﯩﺪﯗ. ﺋﯘﻧﯩﯔ ﺋﻪﻛﺴﯩﭽﻪ، ﺋﯩﻨﮋﯨﻨﯧﺮﻟﯩﻚ ﺋﻪﯓ ﺋﻪﺗﯩﺒﺎﺭﻟﯩﻖ ﺧﯩﺰﻣﻪﺕ ﺑﻮﻟﯘﭖ، ﺋﯘ ﻛﯩﻢ ﺑﻮﻟﺴﺎ ﺷﯘ ﻗﯩﻠﯩﯟﯦﺮﯨﺪﯨﻐﺎﻥ ﻛﻪﺳﯩﭗ ﺋﻪﻣﻪﺱ. ﺷﯘﯕﺎ ﻣﯧﻨﯩﯔ ﺋﯩﻨﮋﯨﻨﯧﺮﻟﯩﻘﺘﯩﻦ ﺋﺎﻳﺮﯨﻠﻐﯩﻢ ﻳﻮﻕ ﺋﯩﺪﻯ . ﺋﺎﺧﯩﺮﯨﺪﺍ ﺑﯩﺰﻧﯩﯔ ﺷﯩﺮﻛﻪﺕ ﻣﯧﻨﯩﯔ ﺗﻪﻟﯩﭙﯩﻤﮕﻪ ﻗﻮﺷﯘﻟﺪﻯ.

ﻫﯧﻜﺎﻳﻪ، ﺭﻭﻣﺎﻥ ﯞﻩ ﻫﻪﺭ ﺧﯩﻞ ﺩﻩﺭﺳﻠﯩﻚ ﻛﯩﺘﺎﺑﻼﺭﺩﯨﻦ ﺑﺎﺷﻘﺎ، ﺋﺎﻣﯧﺮﯨﻜﯩﺪﺍ ﺋﺎﺩﻩﻡ ﺗﻪﺳﻪﯞﯞﯗﺭ ﻗﯩﻼﻻﻳﺪﯨﻐﺎﻥ ﻫﻪﺭ ﺑﯩﺮ ﻛﻪﺳﯩﭙﺘﻪ، ﺑﯘﺭﯗﻧﻘﯩﻼﺭ ﺋﯚﺯﻟﯩﺮﯨﻨﯩﯔ ﺋﻪﻣﯩﻠﯩﻲ ﺗﻪﺟﺮﯨﺒﯩﻠﯩﺮﯨﮕﻪ، ﺑﯧﺸﯩﺪﯨﻦ ﺋﯚﺗﻜﯜﺯﮔﻪﻥ ﻣﻪﻏﻠﯘﺑﯩﻴﯩﺘﻰ ﺑﯩﻠﻪﻥ ﻗﺎﺯﺍﻧﻐﺎﻥ ﻣﯘﯞﻩﭘﭙﯩﻘﯩﻴﻪﺗﻠﯩﺮﯨﮕﻪ، ﺋﯚﺯﻯ ﺋﯧﻠﯩﭗ ﺑﺎﺭﻏﺎﻥ ﺋﯩﻠﻤﯩﻲ ﺗﻪﺗﻘﯩﻘﺎﺗﻠﯩﺮﯨﻐﺎ، ﯞﻩ ﭘﯜﺗﯜﻥ ﺩﯗﻧﻴﺎﻧﯩﯔ ﻛﯚﭖ ﻳﯩﻠﻠﯩﻖ ﺋﯩﻠﻤﯩﻲ ﺗﻪﺗﻘﯩﻘﺎﺕ ﻧﻪﺗﯩﺠﯩﻠﯩﺮﯨﮕﻪ ﺋﺎﺳﺎﺳﻪﻥ ﻳﯧﺰﯨﭗ ﭼﯩﻘﯩﭗ ﺋﯧﻼﻥ ﻗﯩﻠﻐﺎﻥ ﻛﯩﺘﺎﺑﻼﺭﺩﯨﻦ ﺑﯩﺮ ﻗﺎﻧﭽﯩﻨﻰ ﺗﯧﭙﯩﺶ ﻣﯘﻣﻜﯩﻦ. ﺑﯘ ﻛﯩﺘﺎﺑﻼﺭ ﺑﯘﺭﯗﻧﻘﯩﻼﺭ ﻳﺎﺭﺍﺗﻘﺎﻥ ﺑﯩﻠﯩﻢ ﺟﯘﻏﻼﻧﻤﯩﺴﻰ ﺑﻮﻟﯘﭖ، ﺋﻪﮔﻪﺭ ﻣﯘﯞﺍﭘﯩﻖ ﭘﺎﻳﺪﯨﻠﯩﻨﯩﻠﺴﺎ، ﺋﯘﻻﺭ ﻛﯧﻴﯩﻨﻜﯩﻠﻪﺭ ﺋﯜﭼﯜﻥ ﻣﯚﻟﭽﻪﺭﻟﯩﮕﯜﺳﯩﺰ ﺩﻩﺭﯨﺠﯩﺪﻩ ﺋﯩﻘﺘﯩﺴﺎﺩﯨﻲ، ﺋﯩﺠﺘﯩﻤﺎﺋﻰ ﯞﻩ ﺳﯩﻴﺎﺳﯩﻲ ﻗﯩﻤﻤﻪﺕ ﻳﺎﺭﯨﺘﺎﻻﻳﺪﯗ. ﺑﯩﺰ ﺩﺍﯞﺍﻣﻠﯩﻖ ﺋﺎﯕﻼﻳﺪﯨﻐﺎﻥ "ﺋﯩﻠﻤﯩﻲ ﺋﯘﺳﯘﻟﺪﺍ ﺋﯩﺶ ﻗﯩﻠﯩﺶ" ﺩﯦﮕﻪﻧﻠﯩﻚ، ﺋﯚﺯﯨﻤﯩﺰ ﻗﯩﻠﻐﺎﻥ ﻫﻪﺭ ﺑﯩﺮ ﺋﯩﺸﺘﺎ، ﺑﯘﺭﯗﻧﻘﯩﻼﺭ ﻳﺎﺭﺍﺗﻘﺎﻥ ﺑﯩﻠﯩﻤﺪﯨﻦ ﺗﻮﻟﯘﻕ ﭘﺎﻳﺪﯨﻠﯩﻨﯩﺶ ﺩﯦﮕﻪﻧﻠﯩﻜﺘﯩﻦ ﺋﯩﺒﺎﺭﻩﺗﺘﯘﺭ. ﺑﯘ ﻳﻪﺭﺩﻩ ﻣﻪﻥ ﺷﯘﻧﻰ ﺗﯩﻠﻐﺎ ﺋﯧﻠﯩﺸﻘﺎ ﻣﻪﺟﺒﯘﺭﯨﻤﻪﻧﻜﻰ، ﺑﯩﺰ ﺋﯘﻳﻐﯘﺭﻻﺭ "ﺋﯩﻠﻤﯩﻲ ﺋﯘﺳﯘﻟﺪﺍ ﺋﯩﺶ ﻗﯩﻠﯩﺶ" ﻧﯩﯔ ﻣﻪﻧﺎﺳﯩﻨﻰ ﻫﻪﻗﯩﻘﯩﻲ ﺗﯜﺭﺩﻩ ﺗﻮﻏﺮﺍ ﭼﯜﺷﯩﻨﯩﭗ، ﺋﯘﻧﻰ ﺋﯚﺯﯨﻤﯩﺰﻧﯩﯔ ﺋﻪﻣﻪﻟﯩﻲ ﻫﻪﺭﯨﻜﯩﺘﯩﻤﯩﺰﮔﻪ ﺗﻪﺗﺒﯩﻘﻼﺷﺘﺎ ﺋﯩﻨﺘﺎﻳﯩﻦ ﺋﺎﺟﯩﺰﻣﯩﺰ. ﺑﯩﺰﻧﯩﯔ ﻧﯘﺭﻏﯘﻥ ﻛﯩﺸﯩﻠﯩﺮﯨﻤﯩﺰ ﺋﯚﺯﯨﻨﯩﯔ ﺋﯩﻠﻤﯩﻲ ﺋﺎﺳﺎﺳﯩﻲ ﺑﻮﻟﻤﯩﻐﺎﻥ ﭘﻪﺭﯨﺰﯨﮕﻪ ﯞﻩ ﺷﻪﺧﺴﯩﻲ ﻫﯧﺴﺴﯩﻴﺎﺗﯩﻐﺎ ﺗﺎﻳﯩﻨﯩﭗ ﺋﯩﺶ ﻗﯩﻠﯩﺸﻨﻰ ﺋﺎﺩﻩﺕ ﻗﯩﻠﯩﯟﺍﻟﻐﺎﻥ. ﺑﯘﻧﯩﯔ ﺯﯨﻴﯩﻨﯩﻨﻰ ﺑﯩﺰ ﻫﺎﺯﯨﺮ ﻳﻪﺗﻜﯩﭽﻪ ﺗﺎﺭﺗﯩﯟﺍﺗﯩﻤﯩﺰ. ﺑﺎﺭﻏﺎﻧﺴﯧﺮﻯ ﻛﯚﭖ ﺋﯘﻳﻐﯘﺭ ﻫﯜﻧﻪﺭﯞﻩﻧﻠﯩﺮﯨﻨﯩﯔ ﺋﯚﺯ ﺋﯩﮕﯩﻠﯩﻜﯩﻨﻰ ﻳﻮﻗﯩﺘﯩﭗ ﻗﻮﻳﯘﯞﺍﺗﻘﺎﻧﻠﯩﻘﻰ ﻣﺎﻧﺎ ﻣﯘﺷﯘ ﺋﺎﻗﯩﯟﻩﺗﻨﯩﯔ ﺑﯩﺮ ﺋﯩﺴﭙﺎﺗﯩﺪﯗﺭ. ﺑﯘﺭﯗﻧﻘﯩﻼﺭ ﻳﺎﺭﺍﺗﻘﺎﻥ ﺑﯩﻠﯩﻤﻨﯩﯔ ﻫﻪﻣﻤﯩﺴﻰ، ﺳﯩﺰ ﺋﯘﻻﺭﺩﯨﻦ ﭘﺎﻳﺪﯨﻠﯩﻨﯩﺪﯨﻐﺎﻥ ﯞﺍﻗﯩﺘﺘﺎ، ﺳﯩﺰﺩﯨﻦ ﺷﯘ ﻛﻪﺳﯩﭙﺘﻪ ﺋﺎﻟﯩﻲ ﻣﻪﻛﺘﻪﭖ ﺋﯘﻧﯟﺍﻧﻰ ﺑﻮﻟﯘﺷﻨﻰ ﺗﻪﻟﻪﭖ ﻗﯩﻠﻤﺎﻳﺪﯗ. ﺗﻮﻟﯘﻗﺴﯩﺰ ﯞﻩ ﺗﻮﻟﯘﻕ ﺋﻮﺗﺘﯘﺭﺍ ﻣﻪﻛﺘﻪﭘﻨﻰ ﭘﯜﺗﺘﯜﺭﮔﻪﻧﻠﻪﺭﻣﯘ ﺋﻮﻗﯘﭖ ﭘﺎﻳﺪﯨﻠﯩﻨﺎﻻﻳﺪﯨﻐﺎﻥ ﻛﯩﺘﺎﺑﻼﺭﻣﯘ ﺳﺎﻧﺎﻗﺴﯩﺰ ﺑﺎﺭ. ﺑﯩﺰ ﺋﯚﺯ ﺋﯩﺸﻠﯩﺮﯨﻤﯩﺰﺩﯨﻦ ﭼﻮﻗﯘﻡ ﺑﯩﺮ ﺋﯜﻧﯜﻡ ﻫﺎﺳﯩﻞ ﻗﯩﻠﻤﺎﻗﭽﻰ ﺑﻮﻟﯩﺪﯨﻜﻪﻧﻤﯩﺰ، ﺑﯘﺭﯗﻥ ﻳﺎﺭﯨﺘﯩﻠﻐﺎﻥ ﺑﯩﻠﯩﻤﺪﯨﻦ ﺗﻮﻟﯘﻕ ﭘﺎﻳﺪﯨﻠﯩﻨﯩﭗ، ﻫﻪﻗﯩﻘﯩﻲ ﺗﯜﺭﺩﻩ ﺋﯩﻠﻤﯩﻲ ﺋﺎﺳﺎﺳﺘﺎ ﺋﯩﺶ ﻗﯩﻠﯩﺸﯩﻤﯩﺰ ﻛﯧﺮﻩﻙ.

ﻣﻪﻥ ﻛﯩﭽﯩﻜﯩﻤﺪﯨﻨﻼ ﺑﯩﺮ ﺋﯩﺸﻨﻰ ﻗﯩﻠﯩﺸﺘﯩﻦ ﺑﯘﺭﯗﻥ، ﺋﯘﻧﻰ ﻗﯩﻠﯩﺸﺘﯩﻜﻰ ﻣﻪﻗﺴﯩﺪﯨﻤﻨﻰ، ﻫﻪﻣﺪﻩ ﺋﯘﻧﻰ ﻗﺎﻧﺪﺍﻕ ﻗﯩﻠﺴﺎ ﺗﻮﻏﺮﺍ ﻗﯩﻠﻐﯩﻠﻰ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﻧﺎﻫﺎﻳﯩﺘﻰ ﺗﻮﻟﯘﻕ ﺋﺎﻳﺪﯨﯖﻼﺷﺘﯘﺭﯨﯟﯦﻠﯩﺸﻘﺎ ﺋﺎﺩﻩﺗﻠﻪﻧﮕﻪﻥ ﺑﻮﻟﯘﭖ، ﺋﻪﮔﻪﺭ ﺑﯘ ﻧﻪﺭﺳﯩﻠﻪﺭ ﺋﯧﻨﯩﻖ ﺑﻮﻟﻤﯩﺴﺎ، ﺋﯘ ﺋﯩﺸﻨﻰ ﻫﻪﺭﮔﯩﺰﻣﯘ ﺑﺎﺷﻠﯩﻴﺎﻟﻤﺎﻳﻤﻪﻥ. ﺑﯘ ﺋﺎﺩﻩﺗﻨﯩﯔ ﭘﺎﻳﺪﯨﺴﯩﻨﻰ ﻣﻪﻥ ﻳﺎﻟﻐﯘﺯ ﺋﯚﺯﯛﻣﻨﯩﯔ ﻛﻪﺳﭙﯩﻲ ﺧﯩﺰﻣﯩﺘﯩﻤﺪﯨﻼ ﺋﻪﻣﻪﺱ، ﺋﯚﺯﯛﻣﻨﯩﯔ ﺷﻪﺧﺴﯩﻲ ﺗﯘﺭﻣﯘﺷﯩﻤﺪﯨﻤﯘ ﺩﺍﯞﺍﻣﻠﯩﻖ ﻛﯚﺭﯛﭖ ﻛﯧﻠﯩﯟﺍﺗﯩﻤﻪﻥ. 1995-ﻳﯩﻠﻰ ﻣﻪﻥ ﺩﻭﻛﺘﯘﺭﻟﯘﻕ ﺋﯘﻧﯟﺍﻧﯩﻐﺎ ﺋﯧﺮﯨﺸﯩﭗ، ﭘﻮﺳﺘﺪﻭﻛﺘﯘﺭﻟﯘﻕ ﺧﯩﺰﻣﯩﺘﯩﻨﻰ ﺑﺎﺷﻠﯩﻐﺎﻧﺪﺍ، ﺋﯚﺯﯨﻤﯩﺰﻧﯩﯔ ﺋﯩﻘﺘﯩﺴﺎﺩ ﻗﯩﻠﯩﭗ ﻳﯩﻐﯩﺪﯨﻐﺎﻥ ﻛﯩﺮﯨﻤﯩﻤﯩﺰﺩﯨﻦ ﻗﺎﻧﺪﺍﻕ ﭘﺎﻳﺪﯨﻼﻧﺴﺎ ﺋﻪﯓ ﻳﺎﺧﺸﻰ ﺑﻮﻟﯩﺪﯨﻐﺎﻧﻠﯩﻘﯩﻨﻰ ﺑﯩﻠﯩﯟﯦﻠﯩﺶ ﺋﯜﭼﯜﻥ، ﺋﺎﻣﯧﺮﯨﻜﯩﻨﯩﯔ ﺑﺎﻧﻜﺎ ﺳﯩﺴﺘﯧﻤﯩﺴﻰ ﺗﻮﻏﺮﯨﺴﯩﺪﯨﻜﻰ ﺑﯩﺮ ﻛﯩﺘﺎﺑﻨﻰ ﺳﯧﺘﯩﯟﯦﻠﯩﭗ ﺋﻮﻗﯘﺩﯗﻡ. ﺑﯩﺮﯨﻨﭽﻰ ﺷﯩﺮﻛﻪﺗﺘﻪ ﺧﯩﺰﻣﻪﺕ ﺑﺎﺷﻠﯩﻐﺎﻧﺪﯨﻦ ﻛﯧﻴﯩﻦ، "ﺑﺎﻳﻠﯩﻖ ﻳﯩﻐﯩﺸﻨﯩﯔ 5 ﭘﺮﯨﻨﺴﯩﭙﻠﯩﺮﻯ" ﺩﯦﮕﻪﻥ ﺑﯩﺮ ﻛﯩﺘﺎﺑﻨﻰ ﺳﯧﺘﯩﯟﯦﻠﯩﭗ ﺋﻮﻗﯘﺩﯗﻡ. ﻣﯧﻨﯩﯔ ﺋﯩﻘﺘﯩﺴﺎﺩﺗﯩﻦ ﺧﯧﻠﻰ ﺧﻪﯞﯨﺮﯨﻢ ﺑﺎﺭ ﺑﻮﻟﯘﭖ، ﺋﺎﻣﯧﺮﯨﻜﺎ ﯞﻩ ﺩﯗﻧﻴﺎ ﺋﯩﻘﺘﯩﺴﺎﺩﯨﻲ ﺑﺎﺯﯨﺮﯨﻨﻰ ﺧﯧﻠﻰ ﺗﻮﻟﯘﻕ ﭼﯜﺷﯩﻨﯩﭗ ﻣﺎﯕﯩﺪﯨﻐﺎﻥ ﺑﻮﻟﺴﺎﻣﻤﯘ، ﺑﺎﺷﻘﯩﻼﺭﻧﯩﯔ ﻳﯜﻗﯩﺮﯨﻘﻰ ﻣﻪﺳﯩﻠﯩﺪﻩ ﻗﺎﻧﺪﺍﻕ ﺗﻪﻛﻠﯩﭙﻠﯩﺮﻯ ﺑﺎﺭﻟﯩﻘﯩﻨﻰ ﺑﯩﻠﮕﯩﻢ ﻛﻪﻟﮕﻪﻧﯩﺪﻯ. 1997-ﻳﯩﻠﻰ ﺋﯚﻱ ﺳﯧﺘﯩﯟﯦﻠﯩﺸﺘﯩﻦ ﺑﯘﺭﯗﻥ، "ﺗﯘﻧﺠﻰ ﻗﯧﺘﯩﻢ ﺋﯚﻱ ﺳﯧﺘﯩﯟﺍﻟﯩﺪﯨﻐﺎﻧﻼﺭ ﺑﯩﻠﯩﯟﯦﻠﯩﺸﻘﺎ ﺗﯧﮕﯩﺸﻠﯩﻚ ﻣﯘﻫﯩﻢ ﺋﯩﺸﻼﺭ" ﺩﯦﮕﻪﻥ ﺑﯩﺮ ﻛﯩﺘﺎﺑﻨﻰ ﺳﯧﺘﯩﯟﯦﻠﯩﭗ ﺋﻮﻗﯘﺩﯗﻡ. 1998-ﻳﯩﻠﻰ ﺋﯚﻳﻨﯩﯔ ﺋﺎﺭﻗﺎ ﻫﻮﻳﻠﯩﺴﯩﻐﺎ ﺑﯩﺮ ﻛﻪﯕﻠﯩﻜﻰ 5 ﻣﯧﺘﯩﺮ، ﺋﯘﺯﯗﻧﻠﯘﻗﻰ 10 ﻣﯧﺘﯩﺮ ﻛﯧﻠﯩﺪﯨﻐﺎﻥ ﻳﺎﻏﺎﭺ ﺳﯘﭘﺎ ﻳﺎﺳﺎﺵ ﺋﺎﻟﺪﯨﺪﺍ، "ﺋﯚﺯﻯ ﺳﯘﭘﺎ ﻳﺎﺳﺎﺷﻨﯩﯔ ﺋﯘﺳﯘﻟﻠﯩﺮﻯ ﺗﻮﻏﺮﯨﺴﯩﺪﺍ" ﺩﯦﮕﻪﻥ ﺑﯩﺮ ﻛﯩﺘﺎﺑﻨﻰ ﺳﯧﺘﯩﯟﯦﻠﯩﭗ ﺋﻮﻗﯘﺩﯗﻡ. 1999-ﻳﯩﻠﻰ ﺋﺎﻣﯧﺮﯨﻜﯩﺪﺍ ﭘﺎﻱ-ﭼﻪﻙ ﺑﺎﺯﯨﺮﻯ ﺋﯩﻨﺘﺎﻳﯩﻦ ﻗﯩﺰﯨﭗ ﻛﻪﺗﻜﻪﻧﯩﺪﻯ، "ﺋﺎﻣﯧﺮﯨﻜﯩﻨﯩﯔ ﭘﺎﻱ-ﭼﻪﻙ ﺑﺎﺯﯨﺮﻯ" ﺩﯦﮕﻪﻥ ﺑﯩﺮ ﻛﯩﺘﺎﺑﻨﻰ ﺳﯧﺘﯩﯟﯦﻠﯩﭗ ﺋﻮﻗﯘﺩﯗﻡ. ﻛﻪﺳﯩﭗ ﺟﻪﻫﻪﺗﺘﻪ ﻛﯩﺘﺎﺏ ﺋﻮﻗﯘﭖ، ﻳﯧﯖﻰ ﻧﻪﺭﺳﻪ ﺋﯚﮔﯩﻨﯩﺶ ﺑﯩﺰ ﺋﯜﭼﯜﻥ ﺩﺍﯞﺍﻣﻠﯩﻖ ﺑﻮﻟﯩﺪﯨﻐﺎﻥ ﺑﯩﺮ ﺋﯩﺶ. ﺩﻭﻛﺘﯘﺭﻟﯘﻕ ﺋﯘﻧﯟﺍﻧﻰ ﺋﯧﻠﯩﺶ، ﻫﻪﺭﮔﯩﺰ ﺋﯚﺯ ﻛﻪﺳﭙﯩﻤﯩﺰ ﺳﺎﻫﻪﺳﯩﺪﻩ ﺩﯗﻧﻴﺎﺩﯨﻜﻰ ﺑﯩﻠﯩﻤﻠﻪﺭﻧﯩﯔ ﻫﻪﻣﻤﯩﺴﯩﻨﻰ ﺋﯚﮔﯩﻨﯩﭗ ﺑﻮﻟﻐﺎﻧﻠﯩﻘﯩﻤﯩﺰﺩﯨﻦ ﺩﯦﺮﻩﻙ ﺑﻪﺭﻣﻪﻳﺪﯗ. ﺋﯘ ﭘﻪﻗﻪﺕ ﺑﯩﺰﺩﻩ ﺋﯚﺯﯨﻤﯩﺰ ﻛﯩﺘﺎﺏ ﺋﻮﻗﯘﭖ، ﻳﯧﯖﻰ ﻧﻪﺭﺳﯩﻠﻪﺭﻧﻰ ﺋﯚﺯﯨﻤﯩﺰ ﺋﯚﮔﯩﻨﯩﭗ، ﺋﯘﻧﻰ ﺋﯚﺯ ﺋﻪﻣﻪﻟﯩﻴﯩﺘﯩﻤﯩﺰﺩﻩ ﺋﯩﺸﻠﯩﺘﻪﻟﻪﻳﺪﯨﻐﺎﻥ ﺑﯩﺮ ﻗﯩﺴﯩﻢ ﺋﺎﺳﺎﺳﻠﯩﻖ ﺋﯩﻘﺘﯩﺪﺍﺭﻧﯩﯔ ﻳﯧﺘﯩﻠﮕﻪﻧﻠﯩﻜﯩﺪﯨﻦ ﺩﯦﺮﻩﻙ ﺑﯧﺮﯨﺪﯗ. ﻣﻪﻥ ﻣﯘﺷﯘ ﺳﯚﻫﺒﻪﺕ ﺧﺎﺗﯩﺮﯨﺴﯩﻨﻰ ﻳﯧﺰﯨﺸﻨﻰ ﺑﺎﺷﻠﯩﻐﺎﻧﺪﯨﻦ ﺑﯘﻳﺎﻥ، ﺋﯚﺯ ﻛﻪﺳﭙﯩﻤﺪﻩ ﺑﯩﺮ ﻗﺎﻧﭽﻪ ﻳﯧﯖﻰ ﻧﻪﺭﺳﯩﻨﻰ ﺋﯚﮔﯩﻨﯩﭗ، ﺋﯘﻻﺭﻧﻰ ﺋﯚﺯ ﺗﻪﺗﻘﯩﻘﺎﺗﯩﻤﺪﺍ ﭘﺎﻳﺪﯨﻠﯩﻨﯩﭗ ﺑﻮﻟﺪﯗﻡ. ﺋﺎﺩﻩﻡ ﻗﺎﻧﭽﻪ ﻛﯚﭖ ﺋﯚﮔﻪﻧﮕﻪﻧﺴﯧﺮﻯ، ﺋﯚﺯ ﺑﯩﻠﯩﻤﯩﻨﯩﯔ ﻛﻪﻣﻠﯩﻜﯩﻨﻰ ﺷﯘﻧﭽﻪ ﻫﯧﺲ ﻗﯩﻠﯩﺪﯗ. ﺷﯘﯕﺎ، ﻳﺎﺧﺸﯩﺮﺍﻕ ﺗﯘﺭﻣﯘﺵ ﻛﻪﭼﯜﺭﯛﺷﻨﻰ ﺋﯩﺴﺘﻪﻳﺪﯨﻐﺎﻥ ﻫﻪﺭ ﻗﺎﻧﺪﺍﻕ ﺑﯩﺮ ﺋﺎﺩﻩﻡ، ﻛﯩﺘﺎﺏ ﺋﻮﻗﯘﭖ، ﻳﯧﯖﻰ ﺑﯩﻠﯩﻢ ﺋﯩﮕﯩﻠﻪﺷﻨﻰ ﺋﯚﺯﯨﻨﯩﯔ ﺋﯚﻣﯜﺭﻟﯜﻙ ﺋﯩﺸﻰ ﻗﯩﻠﯩﺸﻰ ﻛﯧﺮﻩﻙ. ﺗﻪﺭﻩﻗﻘﯩﻲ ﺗﺎﭘﻘﺎﻥ ﺩﯙﻟﻪﺗﻠﻪﺭﺩﯨﻜﻰ ﻛﯚﭖ ﺳﺎﻧﻠﯩﻖ ﺋﺎﺩﻩﻣﻠﻪﺭ ﺩﻩﻝ ﺋﺎﺷﯘﻧﺪﺍﻕ ﺋﺎﺩﻩﻣﻠﻪﺭﺩﯗﺭ.

ﺑﯘﻧﯩﯖﺪﯨﻦ 30 ﻧﻪﭼﭽﻪ ﻳﯩﻠﻨﯩﯔ ﺋﺎﻟﺪﯨﺪﯨﻜﻰ ﻣﻪﺩﻩﻧﯩﻴﻪﺕ ﺋﯩﻨﻘﯩﻼﺑﻰ ﺟﻪﺭﻳﺎﻧﯩﺪﺍ، ﻣﻪﻥ ﻳﯧﺰﯨﺪﯨﻜﻰ ﺩﯦﻬﻘﺎﻧﻼﺭﻧﯩﯔ ﺑﯩﺮ ﻳﯩﻞ ﺋﯩﺸﻠﻪﭘﻤﯘ ﻳﻪﻧﻪ ﺋﯚﺯﯨﻨﯩﯔ ﺋﺎﺷﻠﯩﻖ ﭘﯘﻟﯩﻨﻰ ﺗﯚﻟﯩﻴﻪﻟﻤﻪﺳﻠﯩﻚ ﺗﯜﭘﻪﻳﻠﯩﺪﯨﻦ، ﻳﯧﺸﻰ ﻣﻪﻥ ﺑﯩﻠﻪﻥ ﺑﺎﺭﺍﯞﻩﺭ ﻛﯧﻠﯩﺪﯨﻐﺎﻥ ﺑﺎﻟﯩﻠﯩﺮﯨﻨﻰ ﺋﻮﻗﯘﺗﻤﺎﻱ، ﺋﯧﺘﯩﺰﻟﯩﻘﻨﯩﯔ ﺋﻪﻣﮕﯩﻜﯩﮕﻪ ﺳﯧﻠﯩﯟﺍﺗﻘﺎﻥ ﺋﻪﻫﯟﺍﻟﻨﻰ ﻛﯚﺭﯛﭖ، ﺋﯩﻨﺘﺎﻳﯩﻦ ﺋﯧﭽﯩﻨﻐﺎﻥ ﺋﯩﺪﯨﻢ. ( 30 ﻳﯩﻞ ﺑﯘﺭﯗﻧﻘﻰ  ﺋﺎﺷﯘﻧﺪﺍﻕ ﺋﻪﻫﯟﺍﻝ ﺗﻪﻛﻠﯩﻤﺎﻛﺎﻧﻐﺎ ﮔﯩﺮﻩﻟﯩﺸﯩﭗ ﻛﻪﺗﻜﻪﻥ ﺧﻪﻧﯘﺑﯩﻲ ﺷﯩﻨﺠﺎﯕﻨﯩﯔ ﭼﻪﺕ-ﻳﺎﻗﺎ ﺭﺍﻳﯘﻧﻠﯩﺮﯨﺪﺍ ﺗﺎ ﻫﺎﺯﯨﺮﻏﯩﭽﻪ ﻣﻪﯞﺟﯜﺕ. ﺗﻪﻫﺮﯨﺮﻟﯩﮕﯜﭼﯩﺪﯨﻦ) " . ﺋﻪﮔﻪﺭ ﻫﯚﻛﯜﻣﻪﺕ ﻣﯘﺷﯘ ﺑﺎﻟﯩﻼﺭﻧﯩﯔ ﺋﺎﺷﻠﯩﻖ ﭘﯘﻟﯩﻨﻰ ﻛﯚﺗﯜﺭﯨﯟﻩﺗﻜﻪﻥ ﺑﻮﻟﺴﺎ، ﺋﯘﻻﺭﻧﯩﯔ ﻛﯚﭘﯩﻨﭽﯩﺴﻰ ﺧﯘﺩﺩﻯ ﻣﻪﻧﺪﻩﻙ ﺋﻮﻗﯘﻳﺎﻟﯩﻐﺎﻥ ﺑﻮﻻﺗﺘﻰ"، ﺩﻩﭖ ﺋﻮﻳﻠﯩﻐﺎﻥ ﺋﯩﺪﯨﻢ. ﻫﺎﺯﯨﺮ ﺋﯘﻧﯩﯖﺪﯨﻦ 30 ﻧﻪﭼﭽﻪ ﻳﯩﻞ ﺋﯚﺗﯜﭖ ﻛﻪﺗﺘﻰ. ﻫﺎﺯﯨﺮ ﻳﯧﺰﯨﻼﺭﺩﺍ ﺋﻮﻗﯘﻳﺎﻟﻤﺎﻱ ﻗﯧﻠﯩﯟﺍﺗﻘﺎﻥ ﺑﺎﻟﯩﻼﺭ ﺑﺎﺭﻣﯘ-ﻳﻮﻕ، ﺑﻮﻟﺴﺎ ﺋﯘﻻﺭ ﻗﺎﻧﭽﯩﻠﯩﻚ ﻧﯩﺴﺒﻪﺗﻨﻰ ﺋﯩﮕﯩﻠﻪﻳﺪﯗ، ﺑﯘﻻﺭ ﻣﺎﯕﺎ ﻣﻪﻟﯘﻡ ﺋﻪﻣﻪﺱ. ﺋﻪﻣﻤﺎ، ﻣﺎﯕﺎ ﻧﺎﻫﺎﻳﯩﺘﻰ ﺋﯧﻨﯩﻖ ﺑﯩﺮ ﺋﯩﺶ ﺷﯘﻛﻰ، ﺋﻮﻗﯘﻳﺎﻟﻤﯩﻐﺎﻥ ﻛﯩﺸﯩﻠﻪﺭ ﻣﯩﻠﻠﻪﺕ ﺳﯜﭘﯩﺘﯩﻨﻰ ﻳﯘﻗﯩﺮﯨﻠﯩﺘﯩﺸﻘﺎ ﻫﯧﭻ ﻗﺎﻧﺪﺍﻕ ﺗﯚﻫﭙﻪ ﻗﻮﺷﺎﻟﻤﺎﻳﺪﯗ. ﺋﯘﻧﯩﯔ ﺋﻪﻛﺴﯩﭽﻪ، ﺋﯘﻻﺭ ﻛﻪﻟﮕﯜﺳﯩﺪﻩ ﺟﻪﻣﺌﯩﻴﻪﺕ ﺋﯜﭼﯜﻧﻤﯘ، ﻣﯩﻠﻠﻪﺕ ﺋﯜﭼﯜﻧﻤﯘ ﺑﯩﺮ ﻳﯜﻙ ﺑﻮﻟﯘﭖ ﻗﺎﻟﯩﺪﯗ. ﺑﯩﺮ ﻣﯩﻠﻠﻪﺗﻨﯩﯔ ﺳﯜﭘﯩﺘﯩﻨﻰ ﺋﯚﺳﺘﯜﺭﯛﺵ، ﭘﯜﺗﯜﻥ ﻣﯩﻠﻠﻪﺗﺘﯩﻦ ﻧﺎﻫﺎﻳﯩﺘﻰ ﺋﯘﺯﯗﻥ ﯞﺍﻗﯩﺖ ﺗﻮﺧﺘﯩﻤﺎﻱ ﺗﯩﺮﯨﺸﭽﺎﻧﻠﯩﻖ ﻛﯚﺭﺳﯩﺘﯩﺸﻨﻰ ﺗﻪﻟﻪﭖ ﻗﯩﻠﯩﺪﯨﻐﺎﻥ ﺟﺎﭘﺎﻟﯩﻖ ﺋﯩﺶ. ﻳﺎﭘﻮﻧﯩﻴﻪ 2-ﺩﯗﻧﻴﺎ ﺋﯘﺭﯗﺷﯩﺪﯨﻦ 100 ﻳﯩﻞ ﺑﯘﺭﯗﻧﻼ ﭘﯜﺗﯜﻥ ﺧﻪﻟﻖ ﻣﺎﺋﺎﺭﯨﭙﯩﻨﻰ ﺋﻮﻣﯘﻣﻼﺷﺘﯘﺭﯗﭖ ﺑﻮﻟﻐﺎﻧﯩﺪﻯ. ﺷﯘﯕﺎ ﺋﯘﻻﺭ 2-ﺩﯗﻧﻴﺎ ﺋﯘﺭﯗﺷﯩﺪﯨﻦ ﻛﯧﻴﯩﻦ ﺋﯘﭼﻘﺎﻧﺪﻩﻙ ﺗﻪﺭﻩﻗﻘﯩﻲ ﻗﯩﻼﻟﯩﺪﻯ.

ﻫﺎﺯﯨﺮﻗﻰ ﺷﺎﺭﺍﺋﯩﺘﺘﺎ، ﺋﯘﻳﻐﯘﺭﻻﺭ ﺋﯚﺯ ﻣﯩﻠﻠﯩﺘﯩﻨﯩﯔ ﺳﯜﭘﯩﺘﯩﻨﻰ ﺋﯚﺳﺘﯜﺭﯛﺷﻰ ﺋﯜﭼﯜﻥ ﻗﺎﻧﺪﺍﻕ ﻗﯩﻠﯩﺸﻰ ﻛﯧﺮﻩﻙ؟ ﺑﯘ ﺋﯩﺸﺘﺎ ﻫﻪﺭ ﺑﯩﺮ ﺋﺎﺩﻩﻡ ﻗﺎﻧﺪﺍﻕ ﺭﻭﻝ ﺋﻮﻳﻨﯩﺸﻰ ﻛﯧﺮﻩﻙ؟

ﺋﯘﻳﻐﯘﺭ ﻣﯩﻠﻠﯩﺘﯩﻨﯩﯔ ﻛﻪﻟﮕﯜﺳﯩﮕﻪ ﻛﯚﯕﯜﻝ ﺑﯚﻟﯩﺪﯨﻐﺎﻥ، ﻣﯩﻠﻠﻪﺗﻜﻪ ﻛﯚﻳﯜﻧﯩﺪﯨﻐﺎﻥ ﻫﻪﺭ ﺑﯩﺮ ﺋﺎﺩﻩﻡ ﺑﯘ ﻣﻪﺳﯩﻠﻪ ﺗﻮﻏﺮﯨﺴﯩﺪﺍ ﺩﺍﯞﺍﻣﻠﯩﻖ، ﺋﻪﺳﺘﺎﻳﯩﺪﯨﻞ ﺋﻮﻳﻠﯩﺸﻰ ﻛﯧﺮﻩﻙ. ﻫﻪﻣﺪﻩ، ﺋﯚﺯﯨﻨﯩﯔ ﺋﯩﻘﺘﯩﺪﺍﺭﻯ ﻳﻪﺗﻜﻪﻥ ﺩﺍﺋﯩﺮﻩ ﺋﯩﭽﯩﺪﻩ ﻣﯘﯞﺍﭘﯩﻖ ﺋﯩﺶ ﻛﯚﺭﯛﺷﻰ ﻛﯧﺮﻩﻙ. ﺋﯘﻧﺪﺍﻕ ﻗﯩﻠﻤﺎﻳﺪﯨﻜﻪﻧﻤﯩﺰ، ﯞﺍﻗﯩﺖ ﺋﯚﺗﯜﭖ ﻛﯧﺘﯩﯟﯦﺮﯨﺪﯗ. ﺩﻩﯞﯨﺮ ﺋﯩﻠﮕﯩﺮﻟﻪﯞﯦﺮﯨﺪﯗ. ﺑﯩﺰ ﺑﯩﺮ ﺋﯩﺰﯨﻤﯩﺰﺩﺍ ﺗﻮﺧﺘﺎﭖ ﻗﯧﻠﯩﯟﯦﺮﯨﻤﯩﺰ.

ﺑﺎﺵ ﺑﻪﺗﻜﻪ ﻗﺎﻳﺘﯩﺶ